Humbani prinsip ai, taridah ma lepak do manggunahon sinjata songon pistol, sinapan, atap na leganni laho manjaga diri humbani ne legan. Pardiateihon ma podah na mangurupi hita mambahen haputusan na dear:

Pansing do hagoluhan bani Jahowa. Si Daud manuratkon pasal Jahowa, “Ai i lambung-Mu do bah tubuh hagoluhan.” (Ps. 36:10) Jadi, anggo halak Kristen mamilih laho manjaga diri atap artani, maningon do ia marusaha sonaha ase ulang marutang hosah halani lang sangaja mambahen matei sasada halak.​—5 Mus. 22:8; Ps. 51:16.

Atap aha pe na igunahon sasada halak laho manjaga diri, boi do ai mambahen ia marutang hosah. Tarlobih ma sinjata, mambahen gabe urah mamunuh halak age isangaja atap lang. * (Idah surat partoruh.) Anggo parjahat mangidah sinjata, boi do ai mambahen ia mabiar janah halani ai boi do gabe adong na tarbunuh.

Sanggah isuruh Jesus ase susianni mamboan podang bani borngin paima matei ia, ai sedo laho manjaga diri. (Luk. 22:36, 38) Tapi sihol do ia mangajarhon bani sidea: Seng boi susianni martinggili laho manjaga diri hassi pe iparburu halak na marsinjata. (Luk. 22:52) Dob itampulhon si Petrus podangni bani juakjuak ni sintua ni malim, iparentahkon Jesus do si Petrus, “Sarungkon ma podangmin!” Dob ai Jesus mambere podah na manogu-nogu halak Kristen ronsi sonari, “Sagala na manampulhon podang, magou do bahenon ni podang.”​—Mat. 26:51, 52.

Domu bani Mika 4:3, “patopahonon ni [juakjuak ni Naibata] ma podang ni sidea gabe tinggala, anjaha tanja ni sidea gabe sasabi”. Itanda do halak Kristen rosuh mardamei. Sidea mangirikkon podah ni Naibata ai ma ‘ulang balaskon na jahat bani na jahat’ na ipatugah apostel Paulus, janah rosuh do sidea ‘mardamei pakon haganup halak’. (Rom 12:17, 18) Ai ma na ibahen si Paulus hassi pe ia ibagas parlajouan, sonai age ‘parmaraan ibahen panrampok’, lang ongga ia manlanggar podah hun Bibel laho manjaga diri. (2 Kor. 11:26) Tapi porsaya do ia bani Naibata janah mambotoh “rahanan do hapentaran ase parugas porang”.​—Par. 9:18.

Bani halak Kristen, arganan do hagoluhan marimbangkon habayakon. Ibotoh hita do sasada halak “seng humbani artani ai goluhni”. (Luk. 12:15) Jadi, hassi pe domma lamlam marsahap pakon panrampok na marsinjata, tapi totap do ia garang, irikkon ma podah ni Jesus on, “Ulang imbang hanima na jahat!” On boi do mararti bere ma aha pe na pinindoni. (Mat. 5:39, 40; Luk. 6:29) * (Idah surat partoruh.)  Tontu anggo iirikkon hita podah ni Bibel janah lang “mangenjengkon haadongan”, ra do lang tarpingkir sidea laho manjahati hita. (1 Joh. 2:16) Parlinggoman do use hubanta anggo simbalog rumahta mananda hita Saksi Jahowa na rosuh mardamei.​—Pod. 18:10.

Ipingkirhon halak Kristen do panggora ni uhur ni hasoman. (Rom 14:21) Piga-piga sanina-botou ra do tarsonggot atap pe gabe tartolsu sanggah mambotoh dong sanina na manimpan sinjata laho manjaga diri humbani na legan. Hassi pe dong ijin ni sinjata ai, tapi anggo hita mangkaholongi sanina-botou, seng ra hita mambahen sidea tartolsu halani ai.​—1 Kor. 10:32, 33; 13:4, 5.

Halak Kristen sihol gabe siusihan na madear. (2 Kor. 4:2; 1 Ptr. 5:2, 3) Anggo adong halak Kristen na manimpan sinjata laho manjaga diri humbani na legan, ipodahi sintua ma sidea. Tapi, anggo totap do ia manimpan sinjata ai, ia sedo gabe siusihan na madear. Halani ai tugas aha pe i kuria lang boi ibere hu bani. Sonai homa hubani sidea na marhorja na maningon mamboan sinjata, rahanan ma anggo sidea mangindahi horja na legan. *—Idah surat partoruh.

Maningon do halak Kristen mambahen haputusan sonaha manjaga diri, kaluarga, ampa artani, atap pe sanggah i parhorjaan. Tapi sanggah mambahen haputusan sisonai, porlu do idalankon sidea podah hun Bibel. Ibere Naibata do podah ai hubanta halani Ia mangkaholongi hita. Halani ai ma halak Kristen na orot parhasomananni dompak Jahowa, mamutushon lang manimpan sinjata laho manjaga diri humbani na legan. Ibotoh sidea do anggo porsaya bani Naibata janah mandalankon podah hun Bibel, jagaon-Ni do sidea sadokah ni dokahni.​—Ps. 97:10; Pod. 1:33; 2:6, 7.