1, 2. Mase porlu iulas hita sonaha mangapoh na marpusok ni uhur? (Idah gambar i alaman 9.)

SI SUSI mangkatahon, “Pusok tumang uhurni ibagas na satahun on halani matei anakni.” Dong homa sada sanina na parinangonni sompong matei mangkatahon, “Seng tarhatahon sonaha pusok ni uhurhu.” Bahat do halak na mangahapkon pusok uhur sisonai. Dong do sanina-botou i kuria na marpusok ni uhur halani matei halak na hinaholonganni paima Harmagedon. Atap ham sandiri ongga do marpusok ni uhur halani matei na hinaholonganmu. Anggo sonai, sungkun-sungkun do ra ham, ‘Hunja do boi dapot hita pangapohon?’

² Dong na mangkatahon dob piga-piga dokah boi do malum luha. Tapi tongon do ai? Sada naboru na mabalu mangkatahon, “Huahap na lobih topat porlu do adong na ibahen ase boi malum luha ai.” Sasintongni anggo dong luha, porlu do ai itambari ase malum. Usih sonai  ma na marpusok ni uhur, porlu do isarihon ase tarapoh uhurni. Jadi, sonaha ma bahenon laho mangapoh sidea na marpusok ni uhur?

3, 4. Mase boi hita porsaya iarusi Jahowa do pusok ni uhurta?

³ Bapanta na paridop ni uhur do Jahowa in, na mangapoh hita sanggah ihaporluhon. (Basa 2 Korint 1:3, 4.) Ia do homa siusihan sibanggalan na patuduhkon uhur sapangahapan. Janah marjanji do homa Ia bani juakjuak-Ni, “Ahu, Ahu do ai na mangapohi hanima!”​—Jes. 51:12; Ps. 119:50, 52, 76.

⁴ Ongga do marpusok ni uhur Bapanta na parholong in, sanggah matei juakjuak-Ni songon si Abraham, si Isak, si Jakob, si Musa, pakon Raja Daud. (4 Mus. 12:6-8; Mat. 22:31, 32; Lah. 13:22) Hassi pe sonai Bibel mangkatahon ipaima Jahowa do panorang laho papuhohon sidea na martenger ni uhur. (Job 14:14, 15) Bani ari ai, gokan dear ma sidea na ipapuho ai janah marmalas ni uhur. Pusok do homa uhur ni Jahowa halani matei anak-Ni na sasada in. Bani Bibel ihatahon “hinaholongan-Ni” do Jesus in. (Pod. 8:22, 30) Tontu, seng boi ibayangkon hita sonaha pusok ni uhur-Ni mangidah marsik tumang hamatean ni Anak-Ni.​—Joh. 5:20; 10:17.

5, 6. Sonaha do Jahowa mangapoh hita?

⁵ Pos ma uhurta urupan ni Jahowa do hita. Halani ai patugah ma hu Bani ibagas tonggo sonaha pusok ni uhurmu. Tarapoh do hita mambotoh iarusi Jahowa do pangahapta, janah ibere do pangapohon. Tapi sonaha do Ia mangapoh hita?

⁶ Sada cara ai ma marhitei pangojur tonduy na pansing. (Lah. 9:31) Marjanji do Jesus, bereon ni Bapa in do hubani na mangindo tonduy na pansing laho mampargogohi sidea. (Luk. 11:13) Si Susi na ipatugah nongkan ai mangkatahon, “Gati do hita manrogop martonggo mangindo pangapohon ni Jahowa. Dobni, damei ni Naibata ma na manramotkon uhur ampa pingkiranta.”​—Basa Pilipi 4:6, 7. 

7, 8. Mase pos uhurta anggo Jesus ra mangapoh hita?

⁷ Isuruh Jahowa do Jesus hu tanoh on laho mangapoh “halak paruhur na maropuk” ampa “sagala na marpusok ni uhur”. (Jes. 61:1, 2; Luk. 4:17-21) Jadi sanggah i tanoh on, iusihi Jesus do tongon Bapani humbani pambahenan ampa parsahapni. (Joh. 5:19) Halani ai ibotoh halak ma iarusi Jesus do sidea sanggah marsitaronon janah rosuh do ia mangurupi sidea.​—Heb. 2:17.

 ⁸ Sanggah poso ope Jesus, ra do adong kaluarga atap hasomanni na matei. Umpamani, si Josep bapa angkatni, ra do domma matei sanggah poso ope Jesus.  * (Idah surat partoruh.) Bayangkon ma sanggah poso ope Jesus, domma matei bapani. Pusok ma uhurni, janah lambin pusok ma ia mangidah inang pakon saninani na marpusok ni uhur. Tontu borat tumang pangahapni.

9. Sanggah matei si Lasarus, sonaha Jesus pataridahkon uhur na sapangahapan?

⁹ Sadokah pangidangionni, ipataridah Jesus do anggo ia mangarusi pangahap ni halak. Umpamani, sanggah si Lasarus, huan-huanni ai matei, boi do iarusi Jesus sonaha pusok ni uhur ni si Maria pakon si Marta. Janah sanggah ididah Jesus tangis sidea, dihut do homa ia tangis, hassi pe laho papuhoonni do si Lasarus.​—Joh. 11:33-36.

10. Mase porsaya hita iarusi Jesus do pangahapta sonari on?

¹⁰ Sonaha pambahenan ni Jesus ai boi mangapoh hita sonari? Bibel patugahkon lang mubah Jesus. Ihatahon do, “Ia Jesus Kristus totap do, sonai nantuari, sonai do sadari on, lanjar sonai do ronsi sadokah ni dokahni.” (Heb. 13:8) Igoran do ia “pambobai hu hagoluhan” halani boi bereonni hagoluhan na manongtong hubanta. Boi do homa iarusi Jesus pusok ni uhurta marsada-sada janah “margogoh do Ia mangurupi sagala na tarlajou”. (Lah. 3:15; Heb. 2:10, 18) Halani ai, porsaya do hita pusok homa uhurni sanggah dong na marpusok ni uhur. Anjaha sihol do ia mangapoh hita domu “bani panorang haporluanni”.​—Basa Heber 4:15, 16.

11. Ayat na ija do na somal mangapoh nasiam?

¹¹ Sarita pasal pusok ni uhur ni Jesus sanggah matei si Lasarus, pitah sada contoh do on humbani buei pangapohon na dong bani Bibel. Jadi topat ma sanggah ihatahon “sagala na tarsurat hinan, bahen podah banta do ai, ase tarsurat ai, ase marpangarapan hita halani hasabaron ampa apoh-apoh na ibagas Surat in”. (Rom 15:4) Jadi anggo pusok uhurmu pareksa ma hata apoh-apoh i toruh on na boi pasonang uhur:

• “Dohor do Jahowa bani halak paruhur na marosak, anjaha ipaluah partonduy na maropuk.”​—Ps. 34:19, 20.

• “Sanggah lutu pingkiranku ibagas, jadi apoh-apoh [ni Jahowa] do pasonang uhurhu.”​—Ps. 94:19.

• “Ase Tuhanta Jesus Kristus pakon Naibata Bapanta na mangkaholongi hita anjaha na mambere banta apoh-apoh na  manongtong ampa pangarapan na madear marhitei idop ni uhur, Ia ma mangapohi anjaha patotaphon uhur nasiam.”​—2 Tes. 2:16, 17. *—Idah surat partoruh.

12. Sonaha do hita boi mangapoh na legan?

¹² Halak na marpusok ni uhur boi do homa mandapot pangapohon hun kuria Kristen. (Basa 1 Tessalonika 5:11.) Sonaha nasiam boi patoguhkon janah mangapoh “tonduy na marosak”? (Pod. 17:22) Dingat ma “adong panorang sipsip, anjaha dong panorang marsahapi”. (Par. 3:7) Si Dalene na dob mabalu mangkatahon anggo na marpusok uhur ai porlu do patugahkon na ibagas pingkiran ampa pangahapni. Halani ai, ponting tumang do ase itangihon hita sidea janah ulang isampangi. Si Junia na botouni matei mandolos mangkatahon, “Hassi pe lang tongon-tongon iarusi ham, marusaha ma mangarusi sonaha pangahap ni sidea na marpusok ni uhur ai.”

13. Pasal na marpusok ni uhur, aha do na porlu idingat hita?

¹³ Na porlu idingat hita lang dos pangahap ni ganup halak janah legan-legan do cara patuduhkon pusok ni uhur. Sipata lang tarpatugah hita sonaha pangahapta na sasintongni. Bibel mangkatahon, “Uhur ai do na mambotoh na maborit ibagas dirini, malas ni uhurni pe seng boi ahapkonon ni na legan.” (Pod. 14:10) Gari ipabotoh pe pangahapni, ra do lang urah hita mangarusi aha na ihatahonni.

14. Aha na boi ihatahon sanggah hita mambere apoh-apoh?

¹⁴ Ra do sihol hita mangapoh na marpusok ni uhur tapi lang ibotoh aha na laho sihatahononkon. Tapi Bibel mangkatahon ‘songon tambar do dilah ni halak na maruhur’. (Pod. 12:18) Buei do halak na mambagihon apoh-apoh humbani brosur Bila Seseorang yang Anda Kasihi Meninggal. * (Idah surat partoruh.) Gati do homa pitah ‘tangis pakon na tangis’ boi mangapoh sidea. (Rom 12:15) Si Gaby na paramangonni matei mangkatahon sipata tangis hansa na boi bahenonni laho patuduhkon pusok ni uhurni. Ia mangkatahon, “Tarapoh do ahu sanggah dihut hasomanku tangis pakon ahu. Gabe lang be lungunan huahap.”

15. Aha na boi bahenonta porini lang ibotoh aha na laho ihatahon sanggah mangapoh? (Idah homa kotak “Hata Apoh-Apoh na Boi Pasonang Uhur.”)

¹⁵ Porini lang ibotoh ham na laho  ihatahon sanggah mangapoh na marpusok ni uhur, tongos ham ma kartu, e-mail, SMS, atap surat. Suratkon ma ayat ni Bibel na boi mangapohsi. Atap anggo adong idingat ham na madear na ongga ibahen na matei ai, patugah ma bani surat in. Si Junia mangkatahon, “Malas tumang uhurhu manjalo pangapohon sisonai hun hasoman sahaporsayaon atap pe sanggah iontang diri hu rumahni. Hubotoh ma isarihon do hape ahu.”

16. Aha do cara na sidearan laho mangapoh halak?

¹⁶ Tonggonta pe boi do mangapoh na marpusok ni uhur. Jadi tonggohon ma sidea atap martonggo ma rap pakon sidea. Ra do lang urah on halani tariluh nasiam sanggah martonggo. Tapi, tonggo humbai gok ni uhur boi mangapoh janah mampargogohi sidea. Idingat si Dalene do on janah mangkatahon, “Ongga do hupindo sidea rap martonggo pakon ahu. Mulani mongkot-ongkot do sidea tapi dobni boi ma martonggo sidea humbani gok ni uhur. Hasilni, holong ampa haporsayaon na ipataridah sidea patoguhkon haporsayaonku.”

17-19. Mase hita porlu tongtong mambere pangapohon?

¹⁷ Lang boi ibotoh hita piga dokah do sasada halak ibagas pusok ni uhur. Sanggah dong na matei, mintor roh do hasoman ampa kaluarga laho mambere pangapohon. Tapi dob piga-piga dokah totap ope na marpusok uhur ai  porlu iapoh janah iurupi. Bibel mangkatahon, “Bani sagala panorang do marholong atei huan-kuan, gabe sanina ibagas hasosakan do ia, ase tubuh.” (Pod. 17:17) Halani ai, sirsir ma hita mangapoh sidea sadokah ihaporluhon.​—Basa 1 Tessalonika 3:7.

¹⁸ Sipata musik, poto, doding, atap pesta-pesta boi do mambahen sasada halak na itadingkon mardingat use na matei ai. On mambahen pusok uhurni. Dob ai, bani namabalu, tontu sunsah do pangahapni parlobei sahali laho hu kebaktian atap Pardingatan Hamatean ni Jesus sahalaksi. Sada sanina na mabalu marsarita, “Hupingkiri, anggo das ulang tahun parhajabuannami dobkonsi marujung goluh parinangonku, tontu borat tumang ma holi pangahapku. Hape bani panorang ai, roh ma piga-piga sanina-botou hu rumahku mambahen acara. Gabe lang be lungunan huahap.”

¹⁹ Dingat ma lang pitah bani acara sisonai hita boi mangapoh na marpusok ni uhur. Si Junia mangkatahon, “Gatih do hasomanku mambere pangurupion na lang husangka-sangka, janah marguna tumang do ai huahap.” Tongon, lang tarbahen hita ase sidea lang be marpusok ni uhur. Tapi tong do adong na boi ibahen hita laho mangurupi sidea. (1 Joh. 3:18) Si Gaby mangkatahon, “Martarima kasih do ahu bani Jahowa halani dong sintua na ra mangurupi ahu sanggah marpusok ni uhur. Marhitei sidea huahapkon ma kuasa ni Jahowa do na mangondingi ahu.”

20. Mase janji ni Naibata boi gabe pangapohon na sidearan?

²⁰ Tontu tarapoh do hita mambotoh laho sasapon ni Jahowa, Naibata Sipangapoh in ma ganup pusok ni uhur marhitei parpuhoon. (Joh. 5:28, 29) Marjanji do Naibata “boiskonon-Ni do hamatean ronsi sadokah ni dokahni, anjaha apusan ni Tuhan Jahowa do iluh humbani sagala bohi”. (Jes. 25:8) Holi ijai, lang dong be ‘na tangis pakon na tangis’, halani ganup halak i tanoh on ‘marmalas ni uhur pakon na marmalas ni uhur’.​—Rom 12:15.