1. Somalni, aha do na iharosuhkon haganup hita?

SONAHA do pangahapmu anggo dong halak na manlupahon ham, hape itanda ham do ia? Tontu borit ma uhurmu. Mase? Somalni, ganupan hita rosuh do ase itanda atap idingat halak. Tapi lang pitah ai, anggo boi namin ibotoh halak ma sonaha paruhuranmu ampa aha na dob ibahen ham.​—4 Mus. 11:16; Job 31:6.

2, 3. Aha do na masa anggo hita rosuh ipasangap? (Tonggor ma gambar bani alm. 3.)

² Tapi anggo lang jaga hita, boi do ai mambahen hita gabe lepak. Sibolis pakon dunia on rosuh ase hita sihol gabe halak na tarsar atap gabe halak na ponting. Anggo dong rosuhta gabe halak sisonai, on boi mambahen hita lang be pasangapkon Jahowa atap lang be manombah-Si.​—Pangk. 4:11.

³ Bani masa ni Jesus, dong do piga-piga pambobai ni ugama na rosuh ase ipasangap halak. Halani ai ipasingat Jesus ma susianni, “Jaga ma hanima mangidah sibotoh surat, na marosuh medang-edang marbaju ganjang, na  sihol hona tabi i tiga, na mangkaporluhon hundul i lobei-lobei i parguruan ampa bani ianan sisangapan i parpestaan.” Nini homa, “Uhum siboratan do jaloon ni sidea use.” (Luk. 20:46, 47) Tapi anggo Jesus, ipuji ia do naboru na mabalu na mambere dua rimis hassi pe mungkin lang adong na mampardiateihon ai. (Luk. 21:1-4) Jadi bani artikel on ulas hita ma aha do na porlu ibahen ase itanda Jahowa hita.

4. Marimbangkon itanda dunia on, itanda ise do na sidearan, janah mase?

⁴ Bahat do halak i dunia on na sihol marsikolah na gijang, bayak, janah sihol gabe artis ase ipardiateihon halak ia. Tapi ai do na sidearan? Humbani hata ni si Paulus ibotoh hita ma balosni. Ia patugahkon, “Sonari, domma itanda nasiam Naibata, atap sasintongni, Naibata do na mananda nasiam. Mase ma nasiam marbalik use, mulak hubani kuasa ni unsur-unsur na so margogoh anjaha na lumei, ase balosan nasiam ai use?” (Gal. 4:9) Jadi na sidearan ai ma anggo hita ‘itanda Naibata’, Na Tang Sitimbulan in! Ibotoh Jahowa do sonaha hita, anjaha holong do Ia banta. Ia manompa hita ase boi hita dohor hu Bani.​—Par. 12:13, 14.

5. Aha ma na maningon ibahen ase itanda Jahowa hita?

⁵ Hasoman ni Jahowa do si Musa. Ase boi ia mananda Jahowa, ipindo ma ase ipabotohkon Jahowa dalan-Ni. Ibalosi Jahowa ma, “Age hata na hinatahonmondi bahenon-Ku do in, halani na dob jumpahan idop ni uhur ho i lobei-Hu anjaha Hutanda ho pakon goranmu.” (2 Mus. 33:12-17) Jadi, boi do itanda Jahowa hita marsada-sada. Aha ma na boi bahenonta ase boi marhasoman pakon Jahowa? Maningon ihaholongi hita ma Ia janah mangondoskon diri hu Bani.​—Basa 1 Korint 8:3.

6, 7. Aha do na boi mambahen hita lang be marhasoman pakon Jahowa?

⁶ Halani ai porlu ma ihargai hita parhasomananta pakon Jahowa. Songon halak Kristen bani abad na parlobei i Galatia, ulang ma ra hita iparjabolon “kuasa ni unsur-unsur na so margogoh anjaha na lumei”, tarmasuk ma ai sihol gabe bayak janah tarsar. (Gal. 4:9) Sasintongni sidea domma mananda Naibata, janah sidea pe domma itanda Naibata. Tapi songon na ihatahon si Paulus, “marbalik use” sidea mangindahi aha na lang marguna.

⁷ Ai boi do masa sisonai hubanta? Boi. Songon si Paulus, dobkonsi marlajar Bibel hita, lang be ipindahi hita na iharosuhkon dunia on. (Basa Pilippi 3:7, 8.) Umpamani ra do adong piga-piga humbani hita na ongga gabe artis, marsikolah na gijang, tarsar atap bayak halani jenges horjanta. Tapi dobkonsi marlajar Bibel itadingkon hita do ganupan ai. (Heb. 11:24-27) Tapi i pudian ni ari, ra do hita manosal halani mambahen haputusan sisonai. Iagan hita dearan do hagoluhanta anggo lang itadingkon hita ganupan ai! Anggo sonai na ipingkirhon hita, on ma na boi mambahen  hita mulak use mangindahi “na so margogoh anjaha na lumei” na dong i dunia on. *

8. Sonaha ase rosuhan hita idingat Jahowa sedo dunia on?

⁸ Aha ma na mangurupi hita ase rosuhan hita idingat Jahowa sedo dunia on? Dong dua na maningon idingat hita. Parlobei, itanda Jahowa do tongtong juakjuak-Ni na martenger ni uhur hu Bani. (Basa Heber 6:10; 11:6) Maharga do sidea Bani. Pangahap-Ni “geduk” do ai anggo ihalupahon Ia juakjuak-Ni. Jadi, tongtong do itanda Jahowa “na Ia simadasi”. (2 Tim. 2:19) “Itanda Jahowa do dalan ni halak parpintor” janah ibotoh do sonaha paluahkon sidea.​—Ps. 1:6; 2 Ptr. 2:9.

9. Patugah ma contoh sonaha Jahowa paluahkon juakjuak-Ni.

⁹ Sipata, ra do Jahowa paluahkon juakjuak-Ni marhitei halongangan. (2 Kron. 20:20, 29) Umpamani, dingat ma sonaha Ia paluahkon halak Israel i Laut Sigerger sanggah Parao pakon tentarani mangayaki sidea. (2 Mus. 14:21-30; Ps. 106:9-11) Dobkonsi 40 tahun, idingat halak ope pambahenan ni Jahowa ai. (Jos. 2:9-11) Gabe toguh ma uhurta halani mambotoh holong do Jahowa bani juakjuak-Ni janah ipaluah do hinan sidea. I pudian ni ari, sanggah roh Gog hun Magog laho mamorangi hita, lang mabiar hita. (Hes. 38:8-12) Bani panorang ai, malas do uhurta halani marusaha ase hita itanda Jahowa sedo dunia on.

10. Aha use na porlu idingat hita?

¹⁰ Na paduahon na porlu idingat, Jahowa mardingat janah mamasu-masu hita marhitei cara na lang isangka. Anggo adong halak na mangkorjahon na madear ase ipuji halak, seng ibere Jahowa be upahni. Mase sonai? Songon na ihatahon Jesus, domma ijalo sidea upahni sanggah sidea ipuji halak. (Basa Mateus 6:1-5.) Tapi anggo adong na mangkorjahon na madear sedo ase ipuji halak, ipardiateihon Jahowa do ai, halani “sididah na ponop” do Jahowa. Janah ipasu-pasu do horjani ai. Anjaha, sipata Jahowa mambere upah marhitei cara na lang isangka. Ulas hita ma piga-piga contoh.

11. Sonaha Jahowa mardingat si Maria?

¹¹ Ipilih Jahowa do si Maria gabe inang ni Jesus halani martoruh ni uhur ia. Si Maria tading i huta Nasaret, daoh hun Jerusalem ampa  rumah panumbahan na jenges ai. (Basa Lukas 1:26-33.) Mase Jahowa mamilih si Maria? Si Gabriel, malekat ni Naibata ai patugahkon ‘dapotan idop ni uhur do si Maria humbani Naibata’. Humbani parsahapni bani si Elisabet, sindohorni ai, ibotoh hita ma na orot do parhasomanan ni si Maria bani Jahowa. (Luk. 1:46-55) Ipardiateihon Jahowa do si Maria. Anjaha halani hatengeran ni uhurni, ipasu-pasu Jahowa ma ia marhitei cara na lang isangka.

12, 13. Sonaha Jesus ipasangap sanggah ia tubuh ampa sanggah ia iboan si Maria hu rumah panumbahan?

¹² Sanggah tubuh Jesus, hubani ise ma ipatugah Jahowa pasal partubuhni? Sedo hubani pejabat na dong i Jerusalem atap i Betlehem. Tapi isuruh do malekat patugahkon ai bani parmahan na marmahan i sampalan i duru ni Betlehem. (Luk. 2:8-14) Dob ai, roh ma sidea manjumpahi etek-etek na baru tubuh ai. (Luk. 2:15-17) Tontu tarsonggot do si Maria pakon si Josep mangidah sonaha sidea pasangapkon Jesus. Tapi anggo Sibolis, igunahon ma halak na pentar laho manjumpahi Jesus ampa namatorasni. Gabe ipindahi halak na i Jerusalem ma pasal partubuh ni Jesus ai. (Mat. 2:3) Ujungni, bahat ma dakdanak na matei ibunuh.​—Mat. 2:16.

¹³ Dong do Titah bani halak Israel na patugahkon dob 40 ari sada naboru manubuhkon anak, maningon ma ia mambere galangan hubani Jahowa. Halani ai, laho ma si Maria rapkon si Josep mamboan Jesus hun Betlehem hu rumah panumbahan i Jerusalem. Daohni pardalanan ai hira-hira siah kilometer. (Luk. 2:22-24) I pardalanan, ra do sungkun-sungkun si Maria, sonaha do holi ibahen malim ijai laho pasangapkon Jesus. Tongon, ipasangap do Jesus. Tapi lang songon na ipingkirhon si Maria carani. Ipilih Jahowa do si Simeon halak “na bonar anjaha na daulat” ai, ampa si Hanna, nabi  naboru na dob mabalu na marumur 84 tahun. Sidea ma na patugahkon anggo Jesus do holi na gabe Kristus, atap Mesias na ijanjihon ai.​—Luk. 2:25-38.

14. Pasu-pasu aha ma na ijalo si Maria humbani Jahowa?

¹⁴ Ai idingat Jahowa do tongtong si Maria halani bujur ia pagodangkon Jesus? Ai do. Isuratkon do bani Bibel piga-piga pambahenanni ampa na ihatahon ia. Tapi dob mabalu, ra do si Maria tading i Nasaret. Halani ai ma, ra do lang dihut ia mangidah pangidangion ni Jesus sadokah tolu satongah tahun. Tapi sanggah matei Jesus, ijai do ia. (Joh. 19:26) Dob ai, i Jerusalem do ia pakon susianni Jesus paima sidea manjalo tonduy na pansing bani ari Pentakosta. (Lah. 1:13, 14) Ra do homa dihut ia iminaki rapkon susian ni Jesus na legan. Anggo sonai, rapkon Jesus ma ia i surga sadokah ni dokahni. On ma upah na sibanggalan na ijalo ia halani setia mangidangi Jahowa!

15. Sanggah Jesus i tanoh on, sonaha Jahowa patuduhkon anggo Ia marosuh bani Jesus?

¹⁵ Seng ra Jesus ipasangap pambobai ni ugama atap pe pejabat. Tapi, tarojur tumang do ia sanggah Jahowa marsahap tolu hali hun surga, na patuduhkon anggo Jahowa holong hu bani. Na parlobei dobkonsi ididi Jesus i Bah Jordan, ihatahon Jahowa do, “On do Anak, haholongan ni uhur-Hu, marosuh do uhur-Hu mangidah-Si!” (Mat. 3:17) Ra, pitah si Johannes Pandidi dassa na dihut manangar ai. Hira-hira dua tahun dobkonsi ai, itangar tolu susianni do sangah Jahowa mangkatahon, “On do Anak haholongan-Ku, marosuh do uhur-Hu Bani, tangihon hanima ma Ia!” (Mat. 17:5) Na parpudi, piga-piga ari paima hamateanni iulakkon Jahowa do mangkatahon ai.​—Joh. 12:28.

16, 17. Sonaha Jahowa mamasu-masu Jesus marhitei cara na lang isangka?

 ¹⁶ Jesus mambotoh ihatahon halak do holi ia siapasi Naibata janah ipabador ronsi matei. Hassi pe sonai, martonggo do ia ase saud harosuh ni Jahowa, sedo harosuhni. (Mat. 26:39, 42) Sabar do ia manaronkon ai “anjaha seng ihira hailaon ai” halani ia sihol ase idingat Jahowa, sedo idingat dunia on. (Heb. 12:2) Sonaha ma Jahowa mardingat Jesus?

¹⁷ Sanggah Jesus i tanoh on, martonggo do ia mangindo ase ia ipasangap songon na hinan, sanggah ia tading i surga rapkon Bapani. (Joh. 17:5) Lang dong ipatugah bani Bibel anggo ia mangarap lobih na hunjai. Roh pe ia hu tanoh on sedo halani upah, tapi na laho mangkorjahon harosuh ni Jahowa do. Tapi aha ma na ibahen Jahowa? Ipasu-pasu do Jesus marhitei cara na lang isangka. Dob ipapuho Jesus, “ipagijang” ma ia hu ianan na timbulan humbani iananni hinan. Ibere do homa hagoluhan na so ra matei hu bani. Lape dong na ongga manjalo sisonai! * (Pil. 2:9; 1 Tim. 6:16) Banggal tumang do upah na ijalo Jesus halani setia mangidangi Jahowa!

18. Aha ma na mangurupi hita ase rosuhan hita idingat Jahowa, sedo dunia on?

¹⁸ Aha ma na mangurupi hita ase rosuhan hita idingat Jahowa, sedo dunia on? Dingat ma anggo Jahowa tongtong mardingat juakjuak-Ni na setia. Anjaha gati do Ia mambere upah bani sidea marhitei cara na lang isangka. Bani ari simagira, bahat do pasu-pasu na laho bereon-Ni, lobih humbani na iarapkon hita! Halani ai, hassi pe bahat sitaronon i dunia na jahat on, dingat ma na laho salpu ma dunia on, sonai homa ganup hasangaponni. (1 Joh. 2:17) Tapi anggo Jahowa seng ongga ihalupahon hita. Tongtong do idingat Ia holong ampa pambahenanta bani goran-Ni halani “sedo na geduk” Ia. (Heb. 6:10) Ipatuduh Ia do holi ai marhitei mambere upah lobih humbani na iarapkon hita!