1, 2. (a) Mase dear anggo hita hampit Jahowa? (b) Aha na laho iulas hita bani artikel on?

ANGGO hita dohor bani Jahowa, ai do na sidearan. Halani lang dong na sigogohan, sipentaran, ampa na parholong sobali Ia! Tontu sihol do hita ase totap setia janah patuduhkon anggo hita hampit Jahowa. (Ps. 96:4-6) Tapi dong do juakjuak ni Naibata na lang totap setia.

² Bani artikel on, iulas hita ma pasal halak na mangaku anggo ia hampit Jahowa hape ihorjahon do na ihagigihon-Si. Na siporlunan, parlajari hita homa sonaha hita boi totap setia bani Jahowa.

3. Mase Jahowa sihol mangurupi si Kain, janah aha do na ihatahon Ia hu bani?

³ Umpamani si Kain. Ia lang manombah gana-gana, tapi seng iharosuhkon Jahowa ia. Mase? Halani ibotoh Jahowa dong na jahat ibagas uhurni. (1 Joh. 3:12) Halani ai ipasingat Jahowa ma ia, “Ai lang dirgak do bohimu, anggo ihorjahon ho na madear? Tapi anggo lang ihorjahon  ho na madear, monggop ma dousa in i lobei ni labah in, anjaha hubam do ihasiholhon, tapi ho do patut manrajaisi.” (1 Mus. 4:6, 7) Jadi tangkas ma ipatugah Jahowa anggo mubah ia janah mamilih hampit Jahowa, gabe marosuh ma Jahowa bani.

4. Sanggah ipasingat Jahowa si Kain, aha ma na ibahen ia?

⁴ Anggo ra ia manangihon sipasingat ai, marpangulaki ma uhur ni Jahowa. Tapi iihutkon do harosuhni na lepak ai, janah dobni mardousa ma ia. (Jak. 1:14, 15) Ra do mungkahni lang ongga tarpingkir ia laho manlawan Jahowa. Tapi ujungni lang itangihon ia sipasingat ai, manlawan do ia dompak Jahowa, janah ibunuh ma anggini!

5. Pingkiran na sonaha do na boi mambahen hita mardousa?

⁵ Songon si Kain, ra do adong halak Kristen na mangaku manombah Jahowa, tapi ihorjahon do na ihagigihon-Si. (Jud. 11) Tongtong do ia martumpu ampa marbarita. Tapi ipingkirhon do tong pasal seks, maruhur haut, atap pe mardomdom. (1 Joh. 2:15-17; 3:15) Pingkiran sisonai boi do mambahen ia gabe mardousa. Tongon lang ibotoh halak aha na ipingkirhon hita. Tapi anggo Jahowa ibotoh do na dong ibagas uhurta. Ibotoh Ia do anggo hita lang humbani gok ni uhur mambalosi-Si.​—Basa Jeremia 17:9, 10.

6. Sonaha Jahowa mangurupi hita manadingkon hajahatonta?

⁶ Hassi pe dong hasalahanta, sihol do Jahowa mangurupi hita. Ibere do sipasingat ase mubah hita. Ia mangkatahon, “Mulak ma hanima hu Bangku, ase mulak Ahu bannima.” (Mal. 3:7) Jadi marpangulaki do uhur-Ni mangidah hita. Iarusi Jahowa do hagalekonta anjaha sihol ase hita setia hu Bani janah mangkagigihon na sambor. (Jes. 55:7) Anggo sonai ibahen hita, sai urupan ni Naibata ma hita ase margogoh laho manadingkon pambahenanta na jahat ai.​—1 Mus. 4:7.

7. Mase gabe seda parhasomanan ni Salomo pakon Jahowa?

⁷ Sanggah poso ope si Salomo, orot do parhasomananni pakon Jahowa. Ibere Jahowa do hapentaran ampa tugas na ponting hu bani, ai ma pajongjongkon rumah panumbahan i Jerusalem. Tapi ujungni maseda do parhasomananni pakon Jahowa, halani lang itangihon ia titah ni Naibata. (1 Raj. 3:12; 11:1, 2) Isuratkon do bani Titah anggo raja lang boi “pabueionni parinangonni, ase ulang manlembang uhurni”. (5 Mus. 17:17) Tapi dong 700 halak parinangon ni si Salomo janah 300 gundikni! (1 Raj. 11:3) Anjaha bahat do parinangonni ai na manombah gana-gana, hape domma ihatahon bani Titah lang boi ia marhajabuan pakon bangsa na legan.​— 5 Mus. 7:3, 4.

8. Sonaha si Salomo mambahen borit uhur ni Jahowa?

⁸ Lambin dokah, lang be iharosuhkon si Salomo titah ni Jahowa. Ujungni ihorjahon ma na sambor. Ipadear ia do ianan panggalangan bani gana-gana, ai ma Astarot pakon  Kamos i lobei ni kota Jerusalem. Hape i kota ai do ia pajongjongkon rumah panumbahan! Dob ai, iirikkon do parinangonni marsombah gana-gana ai. (1 Raj. 11:5-8; 2 Raj. 23:13) Tapi ioto-otoi ia do dirini. Ra do iagan ia lang borit uhur ni Jahowa asal ma ia totap mambere galangan bani Jahowa.

9. Aha do na masa sanggah si Salomo lang be manangihon Jahowa?

⁹ Hape borit do uhur ni Jahowa mangidah pambahenanni ai. Bibel mangkatahon, “Manringis ma Jahowa hu bani Raja Salomo, halani marbalik uhurni hun bani Jahowa.” Ongga do namin iurupi Naibata si Salomo. ‘Ipatalar Ia do diri-Ni hu bani, pala dua hali. Domma pala ilumbahon bani pasal ai, na so bulih irikkononni naibata na legan; tapi seng iramotkon tonah ni Jahowa.’ Ujungni lang be iharosuhkon Jahowa ia. Gabe posah dua ma harajaonni, anjaha bahat tumang ma sitaronon ni ginomparni sadokah marratus tahun.​—1 Raj. 11:9-13.

10. Sonaha parhasomananta dompak Jahowa boi maseda?

¹⁰ Anggo hita marhasoman pakon halak na lang ra mandalankon parentah ni Jahowa, gabe songon sidea ma hita marparlahou. Gabe mandaoh ma hita bani Jahowa. Halak sisonai ra do adong ibagas kuria, kaluarganta, simbalog, hasoman sahorja, atap pe  hasoman sasikolah. Jadi anggo hita marsaor pakon halak sisonai, ujungni gabe maseda ma parhasomananta pakon Jahowa.

11. Aha do na porlu ipingkirhon hita sanggah mamilih hasoman?

¹¹ Basa 1 Korint 15:33. Bahat do halak na lang sisombah Jahowa dear paruhuranni, anjaha lang tongtong sidea mangkorjahon na sambor. Ra do adong itanda nasiam halak sisonai. Tapi, ai sosok do marhasoman pakon sidea? Pingkirhon ma, anggo marhasoman pakon sidea sonaha holi parhasomananmu dompak Jahowa? Ai boi do ham lambin dohor bani Jahowa? Aha do na siporlunan bani sidea? Aha do na gati isahapkon sidea? Ai gati do sidea marbuali pasal mode baju naimbaru, tablet, duit, hiburan, ampa na leganni? Ai marosuh do sidea manonggor hahurangan ni halak? Ai gati do sidea marguro-guro pasal na butak? Jesus pasingatkon, “Ai in na manggoki uhur, ai do iluarhon pamangan.” (Mat. 12:34) Anggo maseda do parhasomananmu pakon Jahowa, ulang be marhasoman pakon sidea!​—Pod. 13:20.

12. (a) Aha ma na ipatugah Jahowa bani halak Israel dobkonsi sidea luar hun Masir? (b) Aha ma balos ni halak Israel sanggah ipindo Jahowa ase sidea totap setia hu Bani?

¹² Dong do parlajaran na idapot hita sanggah Jahowa paluahkon halak Israel hun Masir. Sanggah sidea tumpu i lobei ni Dolog Sinai, ipatalar Jahowa diri-Ni marhitei halongangan. Ididah sidea ma hombun na hapal, hilap, timus, janah itangar sidea ma longgur ampa sora ni tarompit na gogoh. (2 Mus. 19:16-19) Itangar sidea ma homa Jahowa patugahkon maningon Ia tumang do Naibata na ibalosi sidea. Marjanji do Jahowa anggo sidea totap setia mandalankon titah-Ni, Jahowa pe setia ma bani sidea. (Basa 2 Musa 20:1-6.) Jadi anggo totap sidea hampit Jahowa, iharosuhkon Jahowa ma sidea tongtong. Porini ham ijai, sonaha pangahapmu manangar ai? Ra do sarupa balosmu pakon halak Israel na mangkatahon, “Ganup hata na pinatugah ni Jahowa sai na bahenonnami do.” (2 Mus. 24:3) Tapi lang piga dokah hunjai, dong na manguji hatengeran ni uhur ni sidea bani Jahowa. Aha ma ai?

13. Aha do na manguji hatengeran ni uhur ni halak Israel?

¹³ Halani ipatuduh Jahowa hagogohon-Ni marhitei halongangan, gabe mabiar ma halak Israel. Jadi laho ma si Musa hu Dolog Sinai laho marsahap pakon Jahowa. (2 Mus. 20:18-21) Tapi halani dokah si Musa lang turun hun dolog ai, gabe bulinsah ma sidea halani lang dong na mambobahon sidea i padang belantara. Aha ma na ibahen sidea? Ihatahon sidea ma bani si Aron, “Bahen ma bennami naibata sibobahon hanami, halani seng ibotoh hanami atap na mahua do si Musa, halak ai, na mambobahon hanami luar hun tanoh Masir.” Hunjon taridah ma anggo sidea marpangunsandeian bani  si Musa, pambobai ni sidea.​—2 Mus. 32:1, 2. 

14. Sonaha halak Israel mangoto-otoi dirini, janah aha ma na ibahen Jahowa?

¹⁴ Domma ibotoh halak Israel namin salah do manombah gana-gana. (2 Mus. 20:3-5) Tapi mintor podas do sidea manombah anak lombu omas! Hassi pe sonai, ipaoto-oto sidea do dirini. Iagan sidea totap ope sidea hampit Jahowa. Ihatahon si Aron use panombahan bani anak lombu omas ai “ari raya bani Jahowa”! Aha ma na ibahen Jahowa? Ihatahon Jahowa ma bani si Musa anggo halak Israel domma manlembang, janah manimbil humbani ‘dalan na dob ipatuduh Ia bani sidea’. Halani ai marah tumang ma Jahowa janah sihol manripaskon sidea.​—2 Mus. 32:5-10.

15, 16. Sonaha si Musa pakon si Aron patuduhkon anggo sidea tongon-tongon hampit Jahowa? (Tonggor ma gambar bani alm. 15.)

¹⁵ Tapi marpangulaki do uhur ni Jahowa. Seng saud iripaskon bangsa ai. Tapi ibere do panorang bani sidea laho mamilih ase sidea hampit Jahowa. (2 Mus. 32:14) Dob ididah si Musa bangsa ai marsurak, mandoding, janah manortor i lobei ni anak lombu omas ai, ibuat ma lombu omas ai janah iduda ma ai lumat tumang. Anjaha nini ma, “Ise hampit Jahowa? Roh ma hu bangku!” Lanjar “martumpu ma humbani ganup halak Levi” hubani si Musa.​—2 Mus. 32:17-20, 26.

¹⁶ Hassi pe si Aron na paulihon lombu omas ai, tapi mubah do ia janah dihut pakon halak Levi ai. On patuduhkon anggo sidea hampit Jahowa janah lang mangirikkon pardousa ai. Maruhur do pilihan na ibahen sidea ai. Halani patarni matei do marribu halak na manombah lombu omas ai. Tapi halak na hampit Jahowa maluah, janah marjanji do Jahowa laho mamasu-masu sidea.​—2 Mus. 32:27-29.

17. Aha na iparlajari hita humbani sarita ni halak Israel nongkan ai?

¹⁷ Jadi aha ma parlajaranni hubanta? Apostel Paulus mangkatahon, “Gabe panjoraan ma ai banta”, ase ulang hita ‘mambalosi naibata na legan’. Dob ai ipatorang si Paulus do homa anggo ‘ai isuratkon bahen lumba-lumba banta, na manggoluh ibagas panorang ni ujung ni dunia on. Halani ai, halak na mangagan jongjong ia, pangkei ma, ase ulang tompas ia’. (1 Kor. 10:6, 7, 11, 12) Jadi songon na ihatahon si Paulus, dong do halak na mangaku manombah Jahowa hape ihorjahon do tong na sambor. Ra do iagan sidea marosuh ope Jahowa mangidah sidea. Hape lang iharosuhkon Jahowa anggo pitah sahap dassa mangkatahon dirini setia bani Jahowa janah sihol gabe hasoman-Ni.​—1 Kor. 10:1-5.

18. Aha ma na mambahen hita gabe mandaoh humbani Jahowa, janah sonaha ma ujungni?

 ¹⁸ Halani lang podas roh si Musa hun dolog Sinai songon na niarapkon halak Israel, gabe bulinsah ma sidea. Sonai homa hita, halani lang podas roh ajal ni dunia on, ra do gabe bulinsah hita. Ra do iagan hita dokah ope saud janji ni Jahowa ai. Ujungni gabe ipindahi hita ma harosuhta sandiri sedo harosuh ni Jahowa. Anggo lang jaga hita, boi ma gabe mandaoh hita humbani Jahowa janah ihorjahon hita ma na lepak, na lang ongga tarpingkir hinan.

19. Aha na maningon idingat hita, janah mase?

¹⁹ Jahowa mangindo ase hita manangihon-Si humbai gok ni uhur janah Ia tumang ma na maningon isombah. (2 Mus. 20:5) Mase? Halani Ia mangkaholongi hita. Anggo lang harosuh-Ni na ihorjahon hita, gabe harosuh ni Sibolis ma na ihorjahon hita. Janah seda ma parhasomananta pakon Jahowa. Si Paulus pasingatkon, ‘Seng boi nasiam minum humbani panginuman ni Jahowa, janah minum homa humbani panginuman ni malekat na jahat. Seng boi nasiam rap mangan i meja ni Jahowa, janah mangan homa humbani meja ni malekat na jahat.’​—1 Kor. 10:21.

20. Sanggah ihorjahon hita na lepak, sonaha Jahowa mangurupi hita?

²⁰ Ibere Jahowa do panorang bani si Kain, si Salomo, pakon halak Israel laho paubahkon parlahouni. (Lah. 3:19) Hunjon taridah ma marpangulaki do uhur ni Jahowa bani juakjuak-Ni na mambahen hasalahan. Dingat ma sonaha ia manasap hasalahan ni si Aron. Sonari pe, ibere Jahowa do sipasingat banta marhitei Bibel, publikasi, ampa sanina botou. Ibahen Jahowa sonai ase ulang be ihorjahon hita na sambor. Anggo itangihon hita sipasingat ai, maidop ma uhur-Ni mangidah hita.

21. Sanggah dong na manguji hatengeran ni uhurta bani Jahowa, aha do na maningon ibahen hita?

²¹ Marguna do idop ni uhur ni Jahowa hubanta. (2 Kor. 6:1) Ai ma panorang ase hita “marnalangkon uhur na so daulat ampa hisap-hisap dunia on”. (Basa Titus 2:11-14.) Bani dunia na jahat on, sai adong do na manguji hatengeran ni uhurta bani Jahowa. Jadi totap ma hita patuduhkon anggo hita hampit Jahowa. Dingat ma “maningon marhabiaran do ham bani Jahowa Naibatamu, maningon Ia do balosanmu, anjaha marsijoloman uhurmu Bani”!​—5 Mus. 10:20.