1. Mase ihatahon anggo Jahowa simada ganupan? (Tonggor ma gambar bani alm. 21.)

JAHOWA do simada haganupan. Ia do simada “langit ni langitan, tanoh pakon ganup isini”. (5 Mus. 10:14; Pangk. 4:11) Ia do na manompa jolma. Halani ai, Ia ma homa simada ganupan jolma. (Ps. 100:3) Tapi humbani ganup jolma dong na ipilih Naibata gabe juakjuak-Ni.

2. Bani Bibel, ise do na igoran juakjuak ni Jahowa?

² Umpamani bani Psalmen 135 ipatugah “parbagianan-Ni” do bangsa Israel na hinan na setia bani Jahowa. (Ps. 135:4) Dob ai, bani panjahaion ni si Hosea ihatahon adong humbani bangsa na legan na ipilih gabe juakjuak-Ni. (Hos. 2:22) Saud do panjahaion on sanggah Jahowa mulai mamilih na lang halak Israel laho mamarentah pakon Jesus i surga. (Lah. 10:45; Rom 9:23-26) Sidea ai iminaki marhitei tonduy na pansing janah isobut “bangsa  na mapansing”. Ihatahon do homa sidea “bangsa ni Naibata”. (1 Ptr. 2:9, 10) Tapi sonaha halak Kristen na marpangarapan manggoluh sadokah ni dokahni i tanoh on? Isobut Jahowa do homa sidea “bangsang-Ku” ampa halak “na Hupilih ai”.​—Jes. 65:22.

3. (a) Sonari, ise ma na ipilih Jahowa gabe hasoman-Ni? (b) Aha na laho iulas hita bani artikel on?

³ Sonari, “hulanan na etek” pakon ‘biribiri na legan’ rup manombah Jahowa gabe “sada hulanan”. (Luk. 12:32; Joh. 10:16) Hulanan na etek ai ma halak na marpangarapan manggoluh sadokah ni dokahni i surga. Biribiri na legan ai ma halak na marpangarapan manggoluh sadokah ni dokahni i tanoh on. Tontu hasangapon do banta halani boi marhasoman pakon Naibata. Bani artikel on iulas hita ma sonaha hita patuduhkon tarima kasih halani ai.

4. Sonaha hita patuduhkon tarima kasih bani Jahowa, anjaha siusihan aha na ibahen Jesus?

⁴ Hita boi patuduhkon tarima kasih bani Jahowa anggo hita ra mangondoskon diri hu Bani janah ididi. Sanggah ididi, ai patuduhkon anggo hita ra manangihon-Si. Ididah halak ma homa Jahowa do simada hita. (Heb. 12:9) Sonai ma na ibahen Jesus. Sanggah ididi, dos songon na mangkatahon on do ia, “Mangkorjahon rosuh-Mu ai do na huharosuhkon, Ham Naibatangku.” (Ps. 40:8, 9) Sasintongni ia domma gabe bagian humbani bangsa na iondoskon bani Jahowa. Hassi pe sonai, iondoskon ia do dirini bani Jahowa.

5, 6. (a) Aha ma na ihatahon Jahowa dob tardidi Jesus? (b) Hunja ibotoh hita malas do uhur ni Jahowa anggo hita ididi?

⁵ Tongon Jahowa do simada Jesus. Hassi pe sonai, malas do uhur-Ni halani ra Jesus mangidangi-Si sadokah goluhni. Bibel mangkatahon, “Dob tardidi Jesus, mintor naik ma ia humbagas bah ai. Anjaha tonggor ma, mungkab ma langit, anjaha taridah ma susur hun langit tonduy ni Naibata songon asas, lanjar sogop hu bani. Lanjar nini sada sora ma hun nagori atas, ‘On do Anak, haholongan ni uhur-Hu, marosuh do uhur-Hu mangidahsi!’” (Mat. 3:16, 17) Sonai ma homa malas ni uhur ni Jahowa anggo hita mangondoskon diri janah mangidangi-Si. Janah ipasu-pasu ma hita.​—Ps. 149:4.

⁶ Anggo Jahowa do simada haganupan, aha ma na boi ibere hita hu Bani? Bayangkon ma dong sada bapa, bolag jerukni. Bani sada ari, iputik boruni ma piga-piga jeruk ai janah ibere hu bani. Hassi pe ia do simada ganup jeruk na i juma ai, malas tumang do uhurni manjalo ai. Sodapan do pangahapni mangankon jeruk humbani boruni ai marimbangkon jeruk na legan, halani on patuduhkon holong tumang do boruni ai bani. Sonai ma homa malas ni uhur ni Jahowa anggo ra hita mangondoskon diri hu Bani.​—2 Mus. 34:14.

7. Aha na ipatugah buku Maleaki pasal pangahap ni Jahowa bani halak na ra mangidangi-Si?

⁷ Basa Maleaki 3:16. Mase ponting  mangondoskon diri bani Jahowa janah ididi? Hassi pe humbagas kandungan domma Jahowa simada hita, tapi malas tumang do uhur-Ni anggo ra hita mangondoskon diri janah unduk hu Bani. (Pod. 23:15) Itanda Jahowa do halak na ra mangidangi-Si, anjaha isuratkon do goranni bani “buku pardingatan”.

8, 9. Aha na porlu bahenonta ase goranta totap adong ibagas “buku pardingatan”?

⁸ Tapi, sonaha ase goranta totap dong ibagas “buku pardingatan”? Nabi Maleaki mangkatahon maningon ipatuduh hita ma biar dompak Jahowa, janah mamingkirhon goran-Ni. Anggo balosan hita bani na legan, sasapon ni Jahowa ma goranta humbagas buku ai!​—2 Mus. 32:33; Ps. 69:29.

⁹ Jadi lang sungkup pitah marjanji laho mangidangi Jahowa janah ididi. Pitah sahali dassa ai ibahen hita. Tapi anggo mangidangi Jahowa maningon do sadokah goluhta. Bai ganup ari, maningon taridah ma humbani parlahounta anggo hita unduk bani Jahowa.​—1 Ptr. 4:1, 2.

10. Aha ma tandani anggo hita setia bani Jahowa?

¹⁰ Bani artikel na salpu, domma iulas hita pasal si Kain, si Salomo, pakon halak Israel na mangaku manombah Jahowa hape lang totap setia. Humbani contoh ai ibotoh hita ma lang sungkup pitah mangaku manombah Jahowa. Maningon ihagigihon hita do na jahat janah rosuh mangkorjahon na madear. (Rom 12:9) Jahowa mangkatahon dong do “parleganan ni parpintor humbani parjahat, na mambalosi Naibata humbani na so mambalosi Naibata”.​—Mal. 3:18.

11. Mase maningon boi ididah halak anggo hita hampit Jahowa?

¹¹ Halani ai maningon boi ma ididah halak anggo hita hampit Jahowa. On ma carani hita patuduhkon tarima kasih halani domma ipilih gabe juakjuak-Ni. (Mat. 5:16; 1 Tim. 4:15) Pingkirhon ma, ‘Ai boi do ididah halak anggo ahu totap setia bani Jahowa? Ai megah do uhurhu patugahkon anggo ahu Saksi Jahowa?’ Anggo maila hita patuduhkon Jahowa do simada hita, gabe pusok ma uhur ni Jahowa.​—Ps. 119:46; basa Markus 8:38.

12, 13. Sonaha piga-piga halak mambahen dirini lang tangkas anggo sidea Saksi Jahowa?

¹² Parahni, dong Saksi Jahowa na mangihutkon pingkiran ni dunia on. Ujungni gabe lang tangkas taridah anggo sidea legan pakon dunia on. (1 Kor. 2:12) Dunia on mangojur halak ase mangindahi rosuh ni sandiri. (Ep. 2:3) Hassi pe domma ipatugah sonaha parpakeian na sosok bani halak  Kristen, tong do adong na mamakei pakeian na lang suman. Umpamani, pakeian na ketat atap mapondoktu. Ipakei do homa pakeian sisonai hu partumpuan. Dong do homa gaya jambulanni songon dunia on. (1 Tim. 2:9, 10) Ujungni, gabe sunsah ma halak mambotoh Saksi Jahowa do ia atap lang.​—Jak. 4:4.

¹³ Contoh na legan, sanggah i pesta dong do Saksi Jahowa na dihut bani tortor na lang sosok bani halak Kristen, janah marparlahou songon dunia on. Na leganni dong do na pamasukkon foto hu media sosial, janah mambahen komentar na mangihutkon pingkiran ni dunia on. Ra do totap ope sidea roh hu partumpuan. Tapi sidea ai lang gabe siusihan na madear bani sanina botou, na marusaha ase ulang sarupa pakon dunia on.​—Basa 1 Petrus 2:11, 12.

14. Aha do na maningon ibahen hita ase totap marhasoman pakon Jahowa?

¹⁴ Dingat ma, ganupan na dong i dunia on mambahen hita pitah mamingkirhon “rosuh-rosuh ni daging, rosuh-rosuh ni mata ampa na mangenjengkon haadongan”. (1 Joh. 2:16) Halani hita marhasoman pakon Jahowa, maningon legan ma hita humbani dunia on. Tulak hita ma “uhur na so daulat ampa hisap-hisap dunia on”. Anjaha ‘parlahouhon hita ma hapormanon, hapintoron, ampa hadaulaton i dunia on’. (Tit. 2:12) Jadi maningon taridah ma Jahowa do simada hita sanggah hita marsahap, mangan, minum, marpakeian, ampa marhorja.​—Basa 1 Korint 10:31, 32.

15. Mase maningon bujur hita janah holong bani sanina botou?

¹⁵ Cara na legan hita martarima kasih bani Jahowa marhitei mangkaholongi sanina botou. Jahowa do homa simada sidea. Anggo idingat hita ai, gabe tongtong ma ibahen hita na madear bani sidea. (1 Tes. 5:15) Ponting tumang do on halani Jesus mangkatahon, “Hunjon ma botohon ni ganup halak susianku hanima, anggo marsihaholongan hanima.”​—Joh. 13:35.

16. Aha do na boi iparlajari hita humbani Titah ni si Musa pasal pambahenanta bani sanina botou?

¹⁶ Sada contoh pardiateihon ma na ihatahon Titah ni si Musa pasal ugas-ugas na ipakei i Tabernakel laho manombah Jahowa. Hunjai iarusi hita ma sonaha ma namin pambahenanta bani sanina botou. Bani Titah ai dong ipatugah aturan sonaha carani mangurus ugas-ugas. Barang ise na lang mangihutkon aturan ai, ibunuh ma sidea. (4 Mus. 1:50, 51) Jadi gari ugas-ugas pe ipardiateihon Jahowa, tarlobih ma pambahenanta bani sanina botou i kuria! Arga do bani Jahowa juakjuak-Ni, halani ihatahon Ia do, “Barang ise na manjamah hanima, anak ni matang-Ku do na ijamahni ai.”​—Sak. 2:8, Terjemahan Dunia Baru.

17. Aha ma na ‘ipardiateihon anjaha itangar’ Jahowa?

¹⁷ Nabi Maleaki patugahkon ‘ipardiateihon anjaha itangar’ Jahowa do sonaha pambahenanta bani sanina botou. (Mal. 3:16) “Itanda [Jahowa] in do halak, na Ia simadasi.” (2 Tim.  2:19) Jadi ipardiateihon Jahowa do pambahenan ampa parsahapta. (Heb. 4:13) Anggo lang dear hita marparlahou bani sidea, ididah Jahowa do ai. Tapi anggo ra hita manjalo sidea, bujur, marsibere-bere, janah manasap hasalahanni, ididah Jahowa do homa ai.​—Heb. 13:16; 1 Ptr. 4:8, 9.

18. Sonaha hita patuduhkon tarima kasih bani Jahowa halani domma ipilih gabe juakjuak-Ni?

¹⁸ Jadi martarima kasih tumang do hita halani domma ipilih gabe juakjuak-Ni. Patuduh hita ma ai marhitei mangondoskon diri bani Naibata, halani ai do pilihan na sidearan. Hassi pe hita manggoluh ‘i tongah-tongah ni halak na geduk anjaha jahat’, boi do hita totap marparlahou na borsih janah marsinalsal “songon bintang i dunia on”. (Pil. 2:15) Hagigihon hita ma na sambor. (Jak. 4:7) Dob ai, patuduh ma holong ampa hormat bani sanina botou, halani Jahowa do homa simada sidea.​—Rom 12:10.

19. Pasu-pasu aha ma na ibere Jahowa bani juakjuak-Ni?

¹⁹ Ihatahon do bani Bibel, “Seng anjai tulakon ni Jahowa bangsa-Ni.” (Ps. 94:14) Jaminan do on banta. Lang soal aha na masa, totap do Jahowa mangkasomani hita. Porini matei pe hita, seng ihalupahon Jahowa hita. (Rom 8:38, 39) Halani ai, ‘manggoluh pe hita, manggoluh bani Jahowa ma, anjaha matei pe hita, matei bani Jahowa ma. Ase manggoluh barang matei pe hita, tong do bani Jahowa hita.’ (Rom 14:8) Ipaima hita do sanggah Jahowa papuhohon ganup hasomanni na dob matei. (Mat. 22:32) Anjaha sonari pe bahat do pasu-pasu na iahapkon hita. Jadi topat ma na ihatahon Bibel, “Martuah ma bangsa na mambahen Jahowa Naibatani, ai ma bangsa pinilih-Ni gabe parbagianan Bani.”​—Ps. 33:12.