SANGGAH iparentahkon Jesus susianni marbarita, ipasingat ia do lang ganup halak ra manangar barita ai. (Luk. 10:3, 5, 6) Sonai homa sonari on. Sipata ra do adong halak na kasar janah mambogbogi hita sanggah marbarita. Halani ai ra do gabe sunsah hita pataridahkon idop ni uhur janah marayoh ma hita marbarita hubani sidea.

Ibotoh paridop ni uhur do aha na ihaporluhon halak pakon parsoalan ni sidea. Halani ai, gabe sapangahapan ma ia janah sihol mangurupi sidea. Tapi sonaha anggo hita lang be maridop ni uhur sanggah mangidangi? Gabe lang ringgas be hita marbarita, janah marayoh ma hita mangurupi sidea. Usih songon apuy do haringgason ai. Ase totap gara apuy ai, maningon itambah ma soban. Sonai homa ma hita, ase lambin ringgas hita porlu do hita patuduhkon idop ni uhur!​—1 Tes. 5:19.

Sonaha ase hita lambin maridop ni uhur? Ulas hita ma tolu contoh na boi iusihi hita, ai ma Jahowa, Jesus, pakon apostel Paulus.

Hassi pe sadokah on bahat ladung na ipararat pasal Jahowa, tapi “[bujur] do Ia, age bani halak na so mambotoh martarima kasih ampa bani halak parjahat”. (Luk. 6:35) Sonaha Ia patuduhkon habujuron? Sabar do Ia bani “haganup jolma” janah sihol ase sidea maluah. (1 Tim. 2:3, 4) Hassi pe lang marosuh Ia bani hajahaton, tapi halani holong-Ni lang marosuh Ia age sahalak matei.​—2 Ptr. 3:9.

Ibotoh Jahowa do jago tumang Sibolis pararatkon ladung. (2 Kor. 4:3, 4) Bahat do halak humbani dakdanak domma manangar ladung ai. Halani ai gabe lang ra sidea manjalo hasintongan. Hassi pe sonai, totap do Jahowa sihol mangurupi sidea. Hunja ibotoh hita?

Dingat ma kota Ninive. Hassi pe jahat tumang halak i kota ai, sonaha pangahap ni Jahowa mangidah sidea? Jahowa mangkatahon bani si Jona, “Mintor lang ma idop uhur-Hu mangidah Ninive, huta na banggal in, na marisi lobih 120.000 jolma, na so mambotoh parleganan ni siamun barang sambilou?” (Jon. 4:11) Halani sidea lape mananda Jahowa, gabe maidop ma uhur-Ni mangidah sidea. Jadi isuruh ma si Jona laho pasingatkon sidea.

Sonai ma homa pangahapta mangidah halak. Halani holong, usihi hita ma Jahowa. Ringgas ma hita mangurupi sidea mananda Jahowa hassi pe lang ganup halak ra manjalo.

Anggo dong halak na lang ra manangar baritanta, marusaha ma mambotoh mase  sonai sidea. Dong piga-piga alasanni. Ra do halani lang sai iarusi sidea isi ni Bibel. Janah dong do homa na ididah sidea na mangaku halak Kristen tapi sambor parlahouni. Na leganni dong na manangar Saksi Jahowa ipasambor-sambor. Anjaha ra do adong na mabiar irisai ibagas kaluarga atap pe i huta anggo ra marlajar Bibel.

Bahat do halak gabe saja pangahapni halani gok ni sitaronon. Sahalak misionaris na margoran si Kim patugahkon pangalamanni. Bahat do ididahni halak sisonai bani iananni marbarita. Halani parporangan bahat do harugian. On mambahen halak gabe mandolei janah lang porsaya bani ise pe. Anjaha gati do halak ijai manlanglangi Saksi Jahowa sanggah marbarita. Ongga do homa si Kim iparburu sanggah marbarita.

Hassi pe sonai sonaha si Kim totap maridop ni uhur? Idingat ia do tongtong Podah 19:11 na mangkatahon, “Hapentaran ni jolma mambahensi nanget manringis.” Sanggah ipingkirhon ia pangahap ni halak bani ianan ai, on ma na mangurupisi ase totap maridop ni uhur. Dong do homa halak na basar manjalo ia ijai. Janah dong do piga-piga na ra irohi use laho marlajar Bibel pakonsi.

Jadi hita pe maningon marusaha ma mangarusi pangahap ni halak janah sabar bani sidea hassi pe ai lang urah. Janah boi homa sungkun hita dirinta, ‘Porini ahu lang marlajar Bibel janah dong Saksi Jahowa na roh hu rumahku, sonaha do pangahapku?’ Ra, halani domma itangar hita Saksi ipasambor-sambor, ra do lang ra hita manjalo sidea. Songon na ihatahon Jesus sonaha hita sihol ibahen halak, sonai ma bahen hita bani sidea.​—Mat. 7:12.

Hinan marusaha do si Paulus manlanglangi halak marbarita. Hassi pe sonai totap do Jahowa pakon Jesus maridop ni uhur hu bani. Mardingat ai ihatahon si Paulus ma, “Ahu, sipanrisai, siparburu ampa siunsagahkon gogohku hinan. Tapi jumpahan idop ni uhur do ahu, ai ibagas na so hubotoh do huhorjahon ai, ibagas na so porsaya.” (1 Tim. 1:13) Jadi anggo adong halak na jahat hu bani sanggah ia marbarita, marusaha do ia totap patuduhkon idop ni uhur halani mardingat sonai do ia hinan.

Tapi sonaha pangahap ni si Paulus sanggah mangidah halak rosuh tumang manombah gana-gana? Bani Lahoan ni Apostel  17:16, ihatahon do sanggah si Paulus i Aten gabe “gok ringis tumang ma uhurni ibagas, mangidah buei ni gana-gana i huta ai”. Hassi pe sogam uhurni mangidah ugama ni sidea, igunahon ia do ai laho padaskon barita bani sidea. (Lah. 17:22, 23) Ipingkirhon ia do barita aha na sosok na laho ipadas domu bani situasi ni sidea ase ‘andohar siotikanni maluah deba ibahen’ ia.​—1 Kor. 9:20-23.

Anggo dong halak na kasar atap fanatik sanggah hita marbarita, tiru hita ma na ibahen si Paulus. Anggo marusaha hita mangarusi sidea, gabe ibotoh hita ma sonaha mangurupi sidea mambotoh “ambilan na madear”. (Jes. 52:7) Adong pangalaman na jenges humbani si Dorothy. Nini do, “I ianannami bahat do halak na porsaya anggo Naibata ai kejam janah rosuh manguhum. Tapi hupuji do sidea halani porsaya bani Naibata. Dob ai hupatugah ma hun Bibel anggo Jahowa ai Naibata na parholong, janah dong do homa janji-Ni bani ari magira.”

Marusaha ma hita mangojur sanina botou sanggah rup marbarita. Songon na ihatahon si Jessica anggo dong halak na kasar dompaksi atap bani hasomanni sanggah marbarita sidea, lang lalab ai na idingatni. Tapi pangalaman na dear sanggah marbarita do na isahapkon sidea. Sonai ma namin hita.

Ibotoh Jahowa do lang sai urah hita marbarita. Tapi malas tumang uhur-Ni anggo hita mangusihi idop ni uhur-Ni! (Luk. 6:36) Dingat ma lang sadokah ni dokahni Ia sabar janah maridop ni uhur bani dunia na jahat on. Dong do panorangni Ia manripaskon parjahat. Tapi paima roh ari ai, ponting tumang do hita marbarita. (2 Tim. 4:2) Jadi ringgas ma hita marbarita janah patuduh ma idop ni uhur bani “haganup jolma”.