Sonaha Mambahen Parlajaran Bibel Lambin Dear janah Iharosuhkon

PADALAN

SI JOSUA maningon mambobai halak Israel hu Tanoh Parpadanan. Tontu lang urah mandalankon ai. Halani ai, iojur janah ipatoguh Jahowa ma si Josua. Ia mangkatahon, ‘Pir ma tonduymu anjaha totap tumang uhurmu.’ Ase boi marhasil janah mambahen haputusan na maruhur, Jahowa mangakatahon maningon ibasa si Josua ma Titah-Ni janah idalankon.—Jos. 1:7, 8.

Songon na ihatahon Bibel, sunsah do homa hagoluhanta sonari on. (2 Tim. 3:1) Jadi anggo sihol hita marhasil songon si Josua, dalankon hita ma podah na ibere Naibata bani si Josua ai. Maningon ma tongtong ibasa hita Bibel. Anjaha dalankon ma podah ni Naibata ase boi mambahen haputusan na madear.

Tapi lang ganupan hita mambotoh sonaha carani ase rosuh marlajar Bibel. Hape bahat tumang do gunani ai. Halani ai, pardiateihon ma kotak “ Suba ma Piga-Piga Cara On”. Ijai dong piga-piga cara na mangurupi nasiam ase lambin marosuh marlajar Bibel.

Bani Psalmen ihatahon do, “Sai togu Ham ma ahu bani dalan ni parentah-Mu, ai ai do na huharosuhkon.” (Ps. 119:35) Jadi, nasiam pe boi do homa rosuh marlajar Bibel. Anggo tongtong iparlajari nasiam ai, bahat ma hatorangan na dear na boi dapot nasiam.

Hassi pe tugasta lang songon si Josua na mambobai sada bangsa, dong bei do hasunsahanta. Halani ai, usihi ma si Josua. Parlajari janah dalankon ma Hata ni Naibata. Ujungni, boi ma nasiam mambahen haputusan na madear janah marhasil.

SUBA MA PIGA-PIGA CARA ON

Martonggo ma lobei paima marlajar. Bibel marisi pingkiran ni Jahowa janah isuratkon ai laho mangurupi hita ase martuah. Jadi sanggah ibasa ham Bibel, pindo ma ase iurupi Jahowa ham mangarusi aha na ibasa, mardingat janah mandalankon ai sanggah mambahen haputusan.—Esr. 7:10.
Bahen ma sungkun-sungkun sanggah ibasa ham Bibel atap publikasi na ibuat hun Bibel. Umpamani, ‘Hunjon, aha ma na huparlajari pasal Jahowa? Aha ma kaitanni pakon tema ni Bibel? Janah sonaha ahu manggunahon on laho mangurupi na legan?’
Pingkirhon ma na ibasa ham. Sanggah ham mambasa, soh ma tongkin janah pingkirhon ma sungkun-sungkun on: ‘Sonaha pangahapku dob mambasa on? Mase sonai pangahapku? Aha ma kaitanni na hubasa on pakon na dob masa bangku na hinan ampa sonari, anjaha aha ma kaitanni i lobei ni ari? Sonaha ahu boi mandalankon podah atap pe prinsip ni Bibel?’ (Job 23:5; Ps. 49:4) Pingkirhon ma homa sonaha ham boi patorangkon mase iparentahkon Naibata juakjuak-Ni ase ulang mangkorjahon na salah. Atap pingkirhon ma sonaha do ujungni anggo halak na ibasa ham ai lang sonai pambahenanni.—5 Mus. 32:28, 29.
Bayangkon ma sanggah ham mambasa. Umpamani, boi do ibayangkon ham, adong ham ijai sanggah si Josep ijual abangni hubani ginompar ni si Ismael? (1 Mus. 37:18-28) Aha ma na ididah janah itangar ham janah sonaha pangahapmu? Aha ma na ipingkirhon sidea? Lambin bahat ma gunani na idapot ham anggo sonai ibahen ham sanggah marlajar Bibel.
Gunahon ma na ipasirsir organisasi laho mangindahi hatorangan na iporluhon. Parlajari ma sonaha manggunahon bahan na tarsetak ampa na online laho mambahen riset ase lambin iharosuhkon ham marlajar Bibel. Ulang malang manungkun bani na legan sonaha ase pandei hita manggunahon ai. Umpamani, Indeks Publikasi Menara Pengawal atap pe Panduan Riset untuk Saksi-Saksi Yehuwa boi mangurupi ham mangarusi topik ampa hatorangan ayat-ayat na laho ibotoh ham. Gunahon ma lampiran na dong bani Kitab Suci Terjemahan Dunia Baru. Ijai dong hatorangan pasal geografis, kronologi, ukuran ampa borat, pakon na leganni.
Pingkirhon ma rimpunanni. On boi mangurupi ham mardingat aha na baru iparlajari ham. Na sidearan, patugah ma ai bani na legan. Ai dong do hatorangan na boi igunahon ham sanggah mangidangi? Anggo sonai ibahen ham, idingat ham ma holi rimpunanni, janah boi homa na legan mandapot guna.