1, 2. Aha do artini mangkawah dompak Jahowa?

SONARI hita manggoluh bani “ari hasunsahan bani panorang parpudi”. (2 Tim. 3:1) Janah lambin bahat do hasunsahan paima Jahowa manripaskon dunia na jahat on laho parohkon hadameion hu tanoh on. Halani ai, porlu isungkun hita dirinta, ‘Hubani ise do ahu mangkawah laho mangindo pangurupion ampa tugah-tugah?’ Ra do mintor podas hita mangkatahon, “Bani Jahowa,” janah ai do balos na sidearan.

² Tapi aha do artini mangkawah dompak Jahowa? Anjaha hunja do ibotoh hita anggo hita mangkawah dompak Jahowa sanggah dong parsoalan? Sada panurat ni Bibel patorangkon ponting tumang do ase hita mangkawah dompak Jahowa sanggah mamorluhon pangurupion. (Basa Psalmen 123:1-4.) Ihatahon do anggo hita mangkawah dompak Jahowa usih ma ai songon jabolon na mangkawah dompak tuanni. Jabolon ai porsaya  anggo tuanni ai boi mambere sipanganon janah boi manlinggomi ia. Tapi ia pe maningon do mambotoh aha do harosuh ni tuanni janah mandalankon domu bani harosuhni. Sonai ma homa hita, maningon iparlajari hita ma Bibel ase iarusi hita harosuh ni Jahowa janah mangkorjahon ai. Dob ai, pos ma uhurta sai urupan ni Jahowa do hita.​—Ep. 5:17.

3. Sipata, aha do na mambahen hita lang mangkawah dompak Jahowa?

³ Hassi pe ibotoh hita ponting tumang do mangkawah dompak Jahowa, tapi sipata lang sonai ibahen hita. Ongga do masa on bani si Marta, hasoman ni Jesus. ‘Hosei tumang do ia marugas.’ (Luk. 10:40-42) Gari si Marta gabe lang ihorjahon na sipontingan halani sibuk tumang hassi pe dong Jesus ijai. Hita pe ra do homa sonai. Jadi aha do na boi mambahen hita lang be mangkawah dompak Jahowa? Bani artikel on, iulas hita ma sonaha pambahenan ni halak na legan boi mambahen hita gabe lepak. Janah iparlajari hita sonaha ase hita totap mangkawah dompak Jahowa.

4. Mase si Musa gabe lang dihut masuk hu Tanoh Parpadanan?

⁴ Tongtong do si Musa mangkawah dompak Jahowa. Bibel mangkatahon, “Totap do ia marsijoloman bani na so taridah ai.” (Basa Heber 11:24-27.) Dob ai ihatahon use “seng dong be jongjong i tongah-tongah ni halak Israel sada nabi songon si Musa, na tinanda ni Jahowa dumpar bohi”. (5 Mus. 34:10) Hassi pe ia hasoman ni Jahowa, tapi halani lepak pambahenanni, gabe lang dihut ia masuk hu Tanoh Parpadanan. (4 Mus. 20:12) Aha do lepakni?

5-7. Aha ma na masa dobkonsi halak Israel luar hun Masir, janah aha ma na ibahen si Musa?

⁵ Lobih hurang dua bulan dobkonsi halak Israel luar hun Masir sanggah lape das sidea i Dolog Sinai, dong ma parsoalan. Halani lang dong bah, mulai ma manggila janah marungut-ungut halak Israel dompak si Musa. Halani ai gabe “doruh-doruh ma si Musa hubani Jahowa, nini ma, ‘Aha ma bahenonku hubani bangsa on? Narus ma pargijigon ni sidea ahu bani batu.’” (2 Mus. 17:4) Jadi ibere Jahowa ma tugah-tugah bani si Musa. Isuruh Jahowa do ase ia mambuat tungkotni janah ibogbogkon ai bani batu gingging i Horeb. Bibel mangkatahon, “Ibahen si Musa ma sonai i lobei ni partua ni Israel.” Dob ai luar ma bahat bah hunjai janah boi ma sidea minum. Salosei ma parsoalan ai.​—2 Mus. 17:5, 6.

⁶ Bibel mangkatahon igoran si Musa ma ianan ai Massa, artini “Parlajouan”, pakon Meriba, artini “Partinggilan”. Mase igoran sonai? “Halani partinggilan ni halak Israel ampa halani na ilajou sidea ai Jahowa marhitei na mangkatahon, ‘I tongah-tongahta do nani Jahowa atap lang?’”—2 Mus. 17:7.

⁷ Sonaha pangahap ni Jahowa mangidah na masa i Meriba? Manlawan  dompak-Si do halak Israel ai, sedo pitah bani si Musa. (Basa Psalmen 95:8, 9.) Lepak tumang do pambahenan ni halak Israel ai. Tapi anggo si Musa, tongtong do ia mangkawah dompak Jahowa janah mandalankon parentah-Ni.

8. Aha na masa sanggah halak Israel laho das hu Tanoh Parpadanan?

⁸ Tapi hira-hira 40 tahun dobkonsi ai, masa ma homa na sisonai. Laho das ma halak Israel hu Tanoh Parpadanan. Sonari sidea domma dohorhon Kades. Igoran do homa ianan ai Meriba. * Mase? Halani ijai pe marungut-ungut do halak Israel halani seng dong bah. (4 Mus. 20:1-5) Tapi sahali on, ibahen si Musa do hasalahan.

9. Aha ma na iparentahkon Jahowa bani si Musa, tapi aha na ibahen si Musa? (Tonggor ma gambar bani alm. 9.)

⁹ Jadi, aha ma na ibahen si Musa? Ipindahi ia do Jahowa. Tapi sahali on lang isuruh ia mambogbog dolog batu ai. Iparentahkon do ase ibuat ia tungkotni, mangarahkon sidea dohor hu dolog batu ai, janah Isuruh ma dolog batu ai ase mangaluarhon bah. (4 Mus. 20:6-8) Sonai do ibahen si Musa? Lang. Halani gulut pingkiranni gabe manggila ma ia bani sidea janah ihatahon ma, “Bogei ma, nasiam sipanlawan! Ai maningon ipakaluar hanami do bah bani nasiam hun dolog batu on?” Dob ai ibogbog ma dolog batu ai ronsi dua hali.​—4 Mus. 20:10, 11, NW.

10. Mase Jahowa manggila bani si Musa?

¹⁰ Gabe manggila ma Jahowa hubani si Musa. (5 Mus. 1:37; 3:26) Mase manggila Ia? Sada alasan halani lang itangihon si Musa parentah na baru na dob ipatugah Jahowa bani.

11. Mase halak Israel gabe marpingkir anggo bah ai roh sedo halani halongangan?

¹¹ Dong pe alasan na legan mase manggila Jahowa. Koras tumang do anggo dolog batu i Meriba na parlobei. Jadi hassi pe domma gogoh dolog ai ibogbog, seng ra kaluar bah hun dolog batu ai. Tapi legan do anggo dolog batu i Meriba na paduahon. Bahatan do dolog batu na ijai humbani kapur. Halani gabur boi ma ia manimpan bah. Ai ma na mangkatektek janah tumpu hubagas tanoh. Pitah mambahen lubang tumang, boi ma dapotan bah halak. Jadi sanggah ibogbog si Musa dolog batu ai, ra do on mambahen halak Israel marpingkir anggo bah ai kaluar sedo halani halongangan. *

12. Ra do halani aha use Jahowa manggila hubani si Musa pakon si Aron?

¹² Ra do adong alasan na legan mase Jahowa manggila bani si Musa pakon si Aron. Nini si Musa bani sidea, “Ai maningon ipakaluar hanami do bah bani nasiam hun dolog batu on?” Sanggah ihatahon si Musa “hanami”, ra do na imaksud ia dirini pakon si Aron. Jadi, otik pe lang ipasangap si Musa Jahowa na mambahen halongangan ai. Bani Psalmen 106:32, 33 ihatahon, “Ipuhoi sidea do ringis-Ni bani Bah Meriba, gabe mangonai hasedaon bani si Musa halani sidea; ai sai igitiki sidea do uhurni, gabe tarlopus bibirni marsahap.” * (4 Mus. 27:14) Hunjon taridah ma anggo si Musa lang mambere ganup hasangapon bani Jahowa. Halani ai ihatahon Jahowa ma bani si Musa pakon Aron, ‘Ilanggar hanima do hatang-Ku.’ (4 Mus. 20:24) Lepak tumang do pambahenan ni si Musa ai!

13. Mase pintor panguhuman ni Jahowa bani si Musa?

¹³ Bahat do tanggung jawab na ibere Jahowa bani si Musa pakon si Aron halani sidea na mambobahon juakjuak-Ni. (Luk. 12:48) Hinan, ongga do ihatahon Jahowa anggo sasundut halak Israel lang boi dihut hu Tanoh Parpadanan halani manlawan dompak-Si. (4 Mus. 14:26-30, 34) Jadi pintor do Jahowa sanggah mambere uhuman na sarupa bani si Musa halani domma manlawan ia. Songon na sasundut ai, si Musa pe lang boi masuk hu Tanoh Parpadanan.

14, 15. Aha ma na mambahen si Musa manlawan dompak Jahowa?

¹⁴ Aha ma na mambahen si Musa manlawan dompak Jahowa? Pardiateihon ma use na ihatahon Psalmen 106:32, 33, “Ipuhoi sidea do ringis-Ni bani Bah Meriba, gabe mangonai hasedaon bani si Musa halani sidea; ai sai igitiki sidea do uhurni, gabe tarlopus bibirni marsahap.” Hata “igitiki” ijon mangartihon sai ibahen halak Israel do marah si Musa. Hassi pe sasintongni Jahowa do na ilawan halak Israel ai, tapi gabe si Musa do na manggila. Halani seng boi mangorom dirini gabe lepak ma parsahapni.

¹⁵ Si Musa lang be mangkawah dompak Jahowa halani ipaturut ia pambahenan ni halak mambahen ia gabe lepak. Sanggah na parlobei halak Israel marungut-ungut pasal bah, sintong do na ibahen si Musa. (2 Mus. 7:6) Tapi ra do halani domma martahun-tahun halak Israel manlawan, gabe mandolei ma ia. Ra do on na mambahen ia pitah  mamingkirhon pangahapni sandiri marimbangkon pasangapkon Jahowa.

16. Mase ma porlu ipingkirhon hita pangalaman ni si Musa?

¹⁶ Gari songon si Musa sada nabi na martenger ni uhur bani Naibata boi gabe lepak, tarlobih homa hita on. Otik nari mando si Musa masuk hu tanoh parpadanan. Hita pe sonai homa. Otik nari mando masuk ma hita hu dunia baru. (2 Ptr. 3:13) Tontu lang pot hita anggo lang masuk hujai. Tapi ase boi dihut, maningon ma hita mangkawah dompak Jahowa anjaha manangihon hata-Ni. (1 Joh. 2:17) Aha ma parlajaran na dapot hita humbani hasalahan ni si Musa?

17. Hassi pe gulut pingkiranta, sonaha hita totap manrajai diri?

¹⁷ Marusaha ma manrajai diri sanggah gulut pingkiran. Sipata, ra do marulak-ulak parsoalan na sarupa roh hubanta. Tapi Bibel mangkatahon, “Ulang ma marnaloja hita mambahen na madear, ai na manabi do use hita bani panorangni, anggo seng gabe galek hita sonari.” (Gal. 6:9; 2 Tes. 3:13) Ai marpingkir do hita lobei paima  marsahap, sanggah dong halak na lalab mambahen sunsah pangahapta? Ai boi do irajai hita dirinta? (Pod. 10:19; 17:27; Mat. 5:22) Sanggah dong na mambahen sogam uhurta, marlajar ma ‘padaskon ringis in bani Naibata’. (Basa Rom 12:17-21.) Aha do artini ai? Ulang marah, tapi sabar ma paimahon Jahowa pasaloseihon ai domu bani harosuh-Ni. Anggo marusaha hita mambalas janah lang mangkawah dompak Jahowa, on patuduhkon hita lang pasangapkon-Si.

18. Aha ma na porlu idingat hita pasal mangihutkon tugah-tugah?

¹⁸ Pangkei ma mangihutkon tugah-tugah naimbaru. Ai tongtong do hita mangihutkon aturan ni Jahowa? Ulang ma hita mangkorjahon aha pe halani domma somal ibahen hita sonai. Tapi podas ma hita mangihutkon tugah-tugah naimbaru na ibere Jahowa marhitei organisasi. (Heb. 13:17) Janah maningon pangkei ma homa hita ase ulang “nalobihi na tarsurat in”. (1 Kor. 4:6) Anggo pangkei hita mangihutkon ai, taridah ma anggo hita tongtong mangkawah dompak-Si.

19. Sonaha ase ulang seda parhasomananta dompak Jahowa anggo dong na mambahen hasalahan?

¹⁹ Ulang paturut hasalahan ni halak pasedahon parhasomananta dompak Jahowa. Anggo tongtong hita mangkawah bani Jahowa, dear ma parhasomananta pakon-Si. Janah hita pe lang urah marah anggo dong halak na mambahen na lepak. Tarlobih ma on hubani sidea na ibere bahat tanggung jawab i organisasi, songon si Musa. Tontu maningon marusaha ma hita manangihon Hata-Ni ase dapot haluahon. (Pil. 2:12) Lambin bahat tanggung jawab na ibere banta, lambin bahat ma homa na ipindo Jahowa hubanta. (Luk. 12:48) Tapi, anggo tongon-tongon hita mangkaholongi Jahowa, seng ra hita tartolsu atap sirang humbani holong ni uhur-Ni.​—Ps. 119:165; Rom 8:37-39.

20. Aha do na maningon bahenonta?

²⁰ Sunsah tumang do hagoluhan sonari on. Jadi ponting tumang do hita mangkawah dompak Jahowa, “siparhotak i nagori atas” ase iarusi hita aha do harosuh-Ni. Ulang ma paturut hita pambahenan ni halak na lepak mambahen seda parhasomananta dompak Jahowa. Bahat do na iparlajari hita humbani pangalaman ni si Musa. Marimbangkon dihut hita lepak halani lepak pambahenan ni halak, dearan ma hita ‘mangkawah bani Jahowa Naibatanta, paima maidop uhur-Ni hubanta’.​—Ps. 123:1, 2.