1, 2. Sonaha Jahowa mangapoh hita, janah aha do sura-sura-Ni na ipatugah bani Bibel?

ADONG sada garama na mambasa 1 Korint 7:28 na mangulas pasal parhajabuan. Ijai ihatahon “marhasunsahan do halak sisonai bani daging”. Dob ai isungkun ma pasal on bani sada sintua na matoras na dob marhajabuan, “Aha do artini ‘marhasunsahan’ ijon, janah aha do na maningon hubahen anggo ahu marhajabuan?” Paima ibalosi, isuruh sintua ai ma ase garama ai mamingkirhon hata na isuratkon si Paulus homa, ai ma Jahowa “Naibata sipangapoh in, na mangapoh hanami ibagas sagala sitarononnami,” atap hasunsahan.—2 Kor. 1:3, 4.

² Domma ibotoh hita anggo Naibata Jahowa ra do mangapoh hita ibagas hasunsahanta. Iahapkon hita sandiri do sonaha Jahowa mangurupi hita janah manogu-nogu hita marhitei Bibel. Pos ma uhurta, sarupa do sura-sura ni Jahowa humbani hinan ronsi sonari, ai ma mambere  na sidearan hubanta.—Basa Jeremia 29:11, 12.

3. Sungkun-sungkun aha do na laho iulas hita?

³ Somalni, urah do hita martahan anggo ibotoh hita aha na mambahen hita marhasunsahan. Jadi, aha do ra na mambahen adong hasunsahan ibagas parhajabuan ampa kaluarga? Contoh na ija do humbani Bibel ampa sonari na mangapoh hita ase martahan? Balosi hita ma sungkun-sungkun ai bani artikel on.

4, 5. Hasunsahan aha do na iahapkon paramangon pakon parinangon?

⁴ Dobkonsi si Hawa itompa Jahowa, iboan ma naboru ai hubani si Adam bahen parinangonni. Dob ai nini Jahowa ma, “Tadingkonon ni dalahi do bapa pakon inangni laho mangkasomani parinangonni, gabe sada daging ma sidea.” (1 Mus. 2:24) Ganup hita lang gokan dear. (Rom 3:23) Halani ai, tontu adong ma parsoalan ibagas partongah jabuan. Umpamani, sanggah lape marhajabuan, unduk do naboru hubani namatorasni. Tapi Bibel mangkatahon, dob marhajabuan paramangon do na gabe kopalani. (1 Kor. 11:3) Sonai homa paramangon, sunsah do mulani ia mandalankon tugasni gabe kopala kaluarga. Ra do homa sunsah bani parinangon unduk bani paramangonni marimbangkon hubani namatorasni. Ambah ni ai, sanggah baru marhajabuan ra do adong parsalisihan humbani sindohor ni naboru atap dalahi.

⁵ Legan ni ai, tontu malas do uhurni paramangon pakon parinangon na mambotoh lang piga dokah nari adong ma niombah ni sidea. Tapi dong homa na mambahen sidea holsohan. Umpamani, sehat do atap lang etek-etek ai pakon inangni. Ipingkirhon homa tambah bahat ma bolanja. Dobkonsi tubuh etek-etek ai, maningon ibahen sidea ma parubahan. Bahat ma bois panorang ni inang laho mangurus etek-etek ai. Bapa pe, sibuk ma marhorja laho mansarihon haporluan ni parinangon pakon niombahni. Halani ai lang be bahat panorang sidea laho mardua-dua.

6-8. Sonaha do pangahap ni sidea na marhajabuan anggo lang marniombah?

⁶ Dong ope hasunsahan na legan na iahapkon sidea na marhajabuan. Adong do na sihol marniombah tapi lalab lang boi. On mambahen pusok tumang uhur ni parinangon. (Pod. 13:12) Sapari, ponting tumang do bani naboru marhajabuan janah marniombah. Halani ai ma pusok tumang uhur ni si Rahel, parinangon ni si Jakob halani lalab lang marniombah, hape kakani domma marniombah. (1 Mus. 30:1, 2) Sonari on pe, bani piga-piga nagori bahat do halak porsaya ponting tumang do bahat niombah. Gati do sidea manungkun mase misionaris ai lang marniombah age sada. Hassi pe domma tangkas ipatorang misionaris ai, tapi tong do adong na mangkatahon, “Itonggohon hanami pe nasiam!”

⁷ Pardiateihon ma contoh na legan.  Sada botou hun Inggris, sihol tumang do ia marniombah. Tapi dob ibotoh hape lang boi ia marniombah, gabe pusok ma uhurni pakon paramangonni. Dob ai, iputuskon sidea ma mambuat anak angkat. Tapi piga-piga dokah sai pusok do uhurni. Ia mangkatahon, “Sodapan do huahap marniombah na hutubuhkon sandiri marimbangkon mambuat anak angkat.”

⁸ Bibel mangkatahon “maluah do [naboru] marhitei na mantubuhkon anak”. (1 Tim. 2:15) On sedo artini anggo naboru mandapot hagoluhan sadokah ni dokahni halani marniombah. Jadi, aha do arti ni ayat ai? Anggo adong anak, lang be adong panorangni laho manggosipi atap mangastui na so urusanni halani sibuk mangurus dakdanakni. (1 Tim. 5:13) Hassi pe sonai, totap do adong parsoalan ibagas rumah tanggani.

9. Hasunsahan aha ope na iahapkon halak na marhajabuan?

⁹ Hasunsahan na legan na iahapkon na marhajabuan ai ma hamatean hasoman goluhni. Hassi pe lang iarapkon on, tapi buei do humbani sidea na martahan sanggah masa sisonai. Porsaya do halak Kristen bani pangarapan parpuhoon janah on do na mangapoh sidea. (Joh. 5:28, 29) Buei do janji na ibere Jahowa marhitei Bibel na boi mangapoh hita sadokah panorang hasunsahan. Idah hita ma piga-piga juakjuak ni Jahowa na mangahapkon pangapohon janah sonaha ai mangurupi sidea.

10. Sonaha si Hanna mandapot pangapohon? (Idah gambar bani alaman 3.)

¹⁰ Pardiateihon ma contoh hun si Hanna, parinangon ni si Elkana. Ia sihol ase adong niombahni, tapi lalab lang boi. Hape si Peninna, imbangni ai, bahat niombahni. (Basa 1 Samuel 1:4-7.) Na mambahen lambin parah, “ganup tahun” ihata-hatai imbangni ai do ia. On mambahen borit tumang uhurni. Aha do bahenonni ase boi tarapoh? Laho ma ia hu rumah ni Jahowa laho martonggo janah dokah do ia martonggo ijai. Ipindo ma bani Jahowa ase adong anakni, janah pos do uhurni iurupi Jahowa do ia. Dob martonggo, dear ma pangahapni anjaha “seng be marposi bohini.” (1 Sam. 1:12, 17, 18) Tenger do uhur ni si Hanna bani Jahowa laho bereon-Ni do anak hu bani, atap mangapohsi marhitei cara na legan.

11. Sonaha do tonggo boi mangapoh hita?

¹¹ Halani hita lang gokan dear janah manggoluh bani dunia na jahat on, sai tong do adong parsoalan. (1 Joh. 5:19) Tapi adong do pangurupion hubanta. Hita boi martonggo bani Jahowa “Naibata sipangapoh in” songon  na ibahen si Hanna. Ipatugah ia do bani Jahowa sonaha paruhuranni janah mangelek-elek ase iurupi. Sonai homa sanggah hita marhasunsahan, ulang pitah patugahkon parsoalanta bani Jahowa. Tapi, sobali patugahkon pangahapta, mangelek-elek hu Bani ma hita mangindo pangurupion.—Pil. 4:6, 7.

12. Sonaha si Hanna boi tarapoh hassi pe marsitaronon?

¹² Ra do pusok uhurta anggo lang marniombah atap matei hasoman goluhta. Tapi adong do pangapohon. Pardiateihon ma contoh na legan. Si Hanna na manggoluh bani panorang ni Jesus, matei ma paramangonni dobkonsi pitu tahun sidea marhajabuan. Janah ra do lang marniombah ia. Sonaha ia boi tarapoh? “Seng meret ia hun rumah panumbahan ai.” Hassi pe domma marumur 84 tahun, tongtong do ia laho hu rumah panumbahan, martonggo ijai janah mangidangi Jahowa. (Luk. 2:37) On ma na mangapoh ia ase boi totap marmalas ni uhur hassi pe marhasunsahan.

13. Sonaha hasoman i kuria mangapoh hita anggo adong sindohorta manadingkon Jahowa?

¹³ Hita pe boi do mandapot pangapohon humbani hasoman na i kuria. (Pod. 18:24) Umpamani, sanggah si Paula marumur lima tahun, lang be mangidangi Jahowa inangni. Halani ai pusok janah borat ma pangahap ni si Paula. Tapi adong ma sada parintis na margoran si Ann na mangojur janah mangkaholongisi. “Hassi pe si Ann sedo sindohorku, tapi holong tumang do ia hubangku janah ai do na mangurupi ahu ase totap mangidangi Jahowa,” nini si Paula. Dobkonsi piga-piga dokah, ulakkon ma inang ni si Paula mangidangi Jahowa. On mambahen malas uhurni. Malas do homa uhur ni si Ann mangurupi si Paula ase totap mangidangi Jahowa.

14. Aha do gunani hubanta anggo hita ra mangurupi na legan?

 ¹⁴ Anggo ringgas hita mangurupi na legan, gabe lang be hasunsahan na lalab idingat hita. Umpamani, buei do sanina-botou na marhajabuan atap pe na lang marhajabuan, mangahapkon hatuahon halani mangkorjahon harosuh ni Jahowa ai ma mangurupi halak na legan mambotoh barita na madear. Iahap sidea do on songon na marhorja bani Jahowa. Sasintongni, ganup hita boi do mangurupi na legan marhitei mambaritahon ambilan na madear. Janah, anggo parduli hita bani sanina-botou, lambin dohor ma hita hubani sidea. (Pil. 2:4) Sonai ma na ibahen si Paulus. Parduli do ia hubani halak  na legan songon “parinangon patorsa-torsa niombahni”. Si Paulus pe mangapoh saninani “songon bapa hubani niombahni”.—Basa 1 Tessalonika 2:7, 11, 12.

15. Ise do na martanggung jawab mangajari niombah pasal Jahowa?

¹⁵ Sonaha hita boi mangapoh kaluarga-kaluarga na i kuria? Sipata, ra do adong hasoman i kuria mangindo ase hita mangajari pasal Jahowa hubani niombahni na poso ope. Hassi pe sipata boi do sonai, tapi Bibel patugahkon bani namatoras do ibere Jahowa tanggung jawab laho mangajari niombah. (Pod. 23:22; Ep. 6:1-4) Porlu tumang do on, halani maningon gati do namatoras marsahap hubani niombahni.

16. Aha do na maningon idingat hita sanggah mangurupi dakdanak?

¹⁶ Jadi, sanggah hita mangurupi hasomanta laho mangajari niombahni, dingat ma lang dos hak-ta pakonsi. Dob ai, ra do sipata adong dakdanak na iajari hita tapi namatorasni lape mananda hasintongan. Anggo sonai, sanggah mangajari sidea, dear do anggo namatorasni adong i rumah, atap adong halak na legan na mangidah hita sanggah mangajari niombahni ai. Mase sonai? Ase ulang lepak pamingkirion ni halak hubanta. Janah i pudian ni ari, ra do gabe boi namatorasni mangajari niombahni.

17. Sonaha na maposo boi mangapoh kaluargani?

¹⁷ Na maposo na mananda Jahowa boi do homa mambere ojuran hubani kaluargani. Sonaha carani? Marhitei hormat bani namatoras janah ringgas mangurupi sidea. Sobali ai, anggo na maposo totap martenger ni uhur bani Jahowa, boi do use on mangapoh kaluargani. Umpamani, paima roh Bah Na Sumbang, ihatahon si Lamek do pasal si Noak, anak ni ai, “On ma na mangapoh hita bani horjanta ampa halojaon ni tanganta bani tanoh, na pinapaan ni Jahowa.” Tongon, saud do na ihatahon si Lamek ai, halani dobkonsi Bah na Sumbang lang be papaan ni Jahowa tanoh on. (1 Mus. 5:29; 8:21) Sonari, niombah na totap mangidangi Jahowa boi do mambere pangapohon hubani kaluargani janah mangurupi sidea ase tongtong martahan sanggah marhasunsahan.

18. Aha na boi mangurupi hita ase martahan ibagas hasunsahan?

¹⁸ Sonari on, ganup juakjuak ni Jahowa boi mandapot pangapohon marhitei martonggo, marimbagaskon contoh hun Bibel, ampa lambin dohor hubani sanina-botou. (Basa Psalmen 145:18, 19.) Jadi, aha pe hasunsahanta pos ma uhurta sai apohon ni Jahowa janah urupan-Ni do hita ase boi martahan!