BAHAT do hasunsahan i dunia on. Halani ai boi do gabe lang damei pangahapta. Porini damei pe pangahapta, boi do sompong magou hadameion ai. Jadi sonaha podah ni Bibel mangurupi hita ase tongtong mangahapkon hadameion? Anjaha sonaha hita mangurupi halak na legan ase mandapot hadameion?

Anggo sonang pangahapta janah ibotoh hita dong na manlinggomi hita, dapot hita ma hadameion. Porlu do homa hita marhasoman pakon na legan. Anjaha na sipontingan maningon dohor ma hita bani Jahowa. Sonaha carani?

Tongtong do dear parentah ampa podah ni Jahowa. Anggo idalankon hita ai, on patuduhkon porsaya do hita hu Bani janah sihol marhasoman pakon-Si. (Jer. 17:7, 8; Jak. 2:22, 23) Dob ai lambin dohor ma Jahowa banta janah ibere ma hadameion pingkiran hubanta. Jesaya 32:17 mangkatahon, ‘Buah ni hapintoron ai ma damei, anjaha pangkorhon ni habonaron ai ma hasonangan ronsi sadokah ni dokahni.’ Jadi dapot hita do hadameion anggo ra hita mandalankon parentah ni Jahowa.​—Jes. 48:18, 19.

Marhitei tonduy na pansing, iurupi Jahowa do hita ase mandapot hadameion ai.​—Lah. 9:31.

Ihatahon si Paulus, “buah ni tonduy” do hadameion ai. (Gal. 5:22, 23) Jadi ase mandapot hadameion, maningon ra ma hita itogu-togu tonduy na pansing. Sonaha carani?

Parlobei, tongtong ma mambasa Bibel. (Ps. 1:2, 3) Anggo irimangi hita isi ni Bibel, iurupi tonduy na pansing ma hita ase mangarusi aha na iharosuhkon ampa na ihagigihon Jahowa.  Umpamani, gabe ibotoh hita ma aha na ibahen Jahowa ase totap damei pangahap-Ni, janah mase ponting ai Bani. Jadi anggo idalankon hita podah ni Bibel, lambin damei ma pangahapta.​—Pod. 3:1, 2.

Paduahon, martonggo ma hita mangindo tonduy na pansing. (Luk. 11:13) Jahowa marjanji anggo hita mangindo pangurupion hu Bani, ibere ma ‘damei na mangatasi haganup paruhuron, in ma manramotkon uhur ampa pingkiranta ibagas Kristus Jesus!’ (Pil. 4:6, 7) Jadi anggo hita totap dohor bani Jahowa janah marpangunsandeian hu Bani, iahapkon hita ma hadameion pingkiran.​—Rom 15:13.

Bahat do halak na mambahen hamubahon dob marlajar Bibel. Sonari, sidea domma marhasoman pakon Naibata, mandapot hadameion pingkiran, ampa mardamei pakon na legan. Sonaha sidea mambahen hamubahon?

Sanggah lape gabe Saksi Jahowa, dong piga-piga sanina botou na urah manggila janah martinggili. Tapi marusaha do sidea mambahen hamubahon. Sonari sidea domma gabe halak na basar, sabar, janah ra mardamei pakon na legan. * (Pod. 29:22) Pardiateihon ma sonaha si David pakon si Rachel mambahen hamubahon.

Sanggah lape marlajar Bibel si David, somal do ia mangindahi hahurangan ni halak janah kasar marsahap i rumah. Tapi ibotoh ia ma maningon mubah do ia. Sonaha carani? Si David mangkatahon, “Hudalankon ma podah ni Bibel. Ujungni gabe mardear ma ahu pakon namatoras ampa anggingku.”

Si Rachel ipagodang ibagas kaluarga na urah manggila. Nini do, “Halani halak i rumah  urah-urah manggila, ronsi sonari pe maningon marusaha do ahu ase ulang songon sidea.” Aha na ibahen ia ase rosuh mardamei? Nini do, “Tongtong ma ahu martonggo mangindo pangurupion ni Jahowa.”

In ma dua contoh na patuduhkon anggo ra hita mandalankon podah hun Bibel janah marpangunsandeian bani Jahowa, dapot hita ma hadameion. Hassi pe sonari bahat halak na urah manggila, boi do hita totap mardamei pakon kaluarga ampa sanina botou i kuria. Tapi Jahowa sihol ase hita ‘mardamei pakon haganup halak’. (Rom 12:18) Sonaha carani? Janah mase maningon marusaha hita mardamei pakon na legan?

Sanggah marbarita, ipatugah hita do barita hadameion pasal Harajaon ni Naibata. (Jes. 9:5, 6; Mat. 24:14) Anjaha bahat do halak na ra manjalo barita ai. Halani ai, hassi pe bahat hajahaton i dunia on, lang be mandolei sidea janah lang urah manggila. Dapot sidea homa pangarapan bani ari simagira. On ma na mangojur sidea ase ‘mangindahi hadameion’.​—Ps. 34:15.

Tapi lang ganupan halak ra manjalo baritanta. (Joh. 3:19) Hassi pe sonai ihutkon hita ma podah ni Jesus on, ‘Hatahon hanima ma tabinima, laho masuk hu rumah ai. Jadi sogop ma dameinima bani rumah ai, anggo na talup do sidea manjalosi. Tapi anggo lang, mulak ma bennima dameinima ai.’ (Mat. 10:11-13) Jadi hassi pe adong halak na lang manjalo, totap ma hita basar bani sidea. Janah iurupi tonduy na pansing do homa hita ase totap mardamei pakon na legan. Andohar bani panorang na legan, sidea ra manangar baritanta. Anggo sonai ibahen hita, tongtong ma damei pangahapta.

Marusaha do homa hita mardamei pakon petugas i pamarentahan hassi pe lang marosuh sidea mangidah hita. Umpamani i sada nagori i Afrika, lang ibere pamarentah hita pajongjongkon Balei Harajaon ijai. Jadi ase boi pasaloseihon parsoalan ai ibagas damei, ipindo ma sada sanina na ongga gabe misionaris ijai, ase laho hu kantor kedutaan ni sidea na dong i London, Inggris. Sanina ai ma holi na patorangkon anggo Saksi-Saksi Jahowa marhorja ibagas damei.

Ihatahon sanina ai ma, “Das ma ahu i kantor ai. Janah huidah ma dong sada petugas naboru na mamakei pakeian adat. Hubotoh ma suku aha ia, janah ongga do huparlajari bahasani. Jadi huparsahapkon ma ia mamakei bahasa ai. Gabe tarsonggot ma naboru ai. Mintor isungkun ia ma, ‘Ham laho manjumpahi ise Pak?’ Basar ma hubalosi anggo ahu sihol manjumpahi duta besar. Italepon ma duta ai, lanjar roh ma ia manjumpahi ahu. Iparsahapkon ma ahu mamakei bahasa ni sidea. Dob ai hupatorang ma anggo Saksi-Saksi Jahowa marhorja ibagas damei i nagorini, janah ia pe dear manangihon.”

Dobkonsi manangar sarita ni sanina ai, gabe iarusi duta besar ai ma aha do sasintongni na ihorjahon Saksi-Saksi Jahowa. Lang piga dokah hunjai, lang be ilarang pamarentah hita pajongjongkon Balei Harajaon i nagori nongkan ai. Malas tumang ma uhur ni sanina botou manangar barita ai! Hunjon ibotoh hita ma anggo basar hita bani ganup halak, boi ma hita manjaga hadameion.

Sonari, juakjuak ni Jahowa i sab dunia on riap marhorja ibagas damei laho manombah Jahowa. Halani ai marusaha ma hita manjaga hadameion ai, ase malas uhur ni Jahowa mangidah hita. Janah bani ari magira, dapot hita ma hadameion na manongtong i dunia na baru.​—2 Ptr. 3:13, 14.