1, 2. (a) Mase dunia on igoki parsalisihan? (b) Sungkun-sungkun aha do na laho iulas hita bani artikel on?

ADONG sada botou hun Eropa bagian selatan mangkatahon, “Humbani na poso ope ahu, pitah na geduk dassa huidah. Halani ai lang marosuh ahu bani politik i nagoringku, janah hulawan do ai. Sadokah martahun-tahun marhalet do ahu pakon teroris.” Sada sanina hun Afrika bagian selatan mangkatahon, “Huahap pitah sukunami do na jagonan, janah dihut ma ahu hu partai politik. Ibunuh hanami do halak na manlawan partai politiknami hassi pe sasuku hanami.” Leganni ai, sada botou hun Eropa bagian tengah mangkatahon, “Huhasogamkon do halak na lang sabangsa ampa saugama pakon ahu.”

² Sonari on bahat do halak na marparlahou songon na tolu halak ai. Bahat do kalompok politik na martinggili ase mandapot habebason. Somal do halak maringori halani politik. I piga-piga nagori, jahat do parlahou ni sidea bani pandatang. Songon na ihatahon Bibel bahat do halak ‘lang ra mardamei’ bani panorang parpudi on. (2 Tim. 3:1, 3) Sonaha ase halak Kristen boi totap marsada ibagas dunia na gok parsalisihan on? Parlajari hita ma siusihan  humbani Jesus. Ijia, dong parposahan halani politik. Bani artikel on iulas hita ma tolu sungkun-sungkun: Mase lang ra Jesus dihut bani politik? Sonaha Jesus mangajarhon ase hita ulang dihut bani politik? Sonaha Jesus mangajarhon ase hita ulang martinggili sanggah dong na geduk?

3, 4. (a) Aha do na iharosuhkon halak Jahudi na iambilani Jesus? (b) Aha ma pangaruhni ai bani susian ni Jesus?

³ Bahat do halak Jahudi na iambilani Jesus sihol ase maluah humbani halak Rom. Ijia, dong homa sada kalompok politik na fanatik, ai ma kalompok Zealot Jahudi. Dong do humbani sidea na manlawan ise pe na manlanglangi harosuh ni sidea. Bahat do homa sidea na mangihutkon si Judas halak Galilea na mangaku-ngaku anggo ia do Mesias janah pakahouhon buei halak. Sahalak sejarawan Jahudi na margoran si Josephus mangkatahon iarahkon si Judas do halak Jahudi manlawan pamarentah Rom. Anjaha ise pe na ra manggalar pajak ihatahon do “siparbiar”. Ujungni, ibunuh halak Rom ma si Judas ai.​—Lah. 5:37.

⁴ Leganni ai, bahat do homa halak Jahudi na paima-imahon Mesias. Iagan sidea do Mesias ai na laho paluahkon sidea humbani halak Rom janah mambahen sidea gabe bangsa na banggal. (Luk. 2:38; 3:15) Bahat do sidea na porsaya laho ipajongjong Mesias ai ma harajaon i Israel. Dob ai boi ma mulak use hu Israel halak Jahudi na merap. Gari si Johannes pe manungkun bani Jesus, ‘Ham do na sihol roh ai, atap na legan ope sipaimaonnami?’ (Mat. 11:2, 3) Ra do iagan si Johannes dong halak na legan na laho paluahkon halak Jahudi. Dob ai dong homa dua susian ni Jesus na laho hu Emmaus jumpah pakon Jesus na dob ipapuho. Sidea mangkatahon mangarap hinan do sidea anggo Jesus paluahkon halak Israel. (Basa Lukas 24:21.) Dobkonsi ai, dong homa apostel na manungkun bani Jesus, “Ham Tuhan, pajongjongon-Mu ma sonari use harajaon in bani Israel?”​—Lah. 1:6.

5. (a) Mase halak Galilea sihol ase Jesus gabe raja ni sidea? (b) Tapi sipasingat aha ma na ibere Jesus bani sidea?

⁵ Mangarap do halak Jahudi ase Mesias pasaloseihon parsoalan ni sidea. Ididah sidea pandei do Jesus marsahap, boi pamalumkon na boritan janah pasirsirhon sipanganon bani halak na loheian. Bahat do halak longang dobkonsi ibere Jesus 5.000 halak mangan. Halani ai ma sihol do halak Galilea ase Jesus ma na gabe raja ni sidea. Iahap sidea do Jesus ai boi gabe pambobai na sidearan. Tapi Bibel mangkatahon, “Dob ibotoh Jesus, na sihol roh sidea manangkap-Si, laho pabangkitkon-Si gabe raja, jadi surut ma sahalak-Si hu dolog.” (Joh. 6:10-15) Patarni dob lang be geor sidea, ipatorang Jesus ma anggo ia roh sedo na laho manggoki haporluan ni sidea, tapi laho mangajarhon pasal Harajaon ni Naibata. Nini do, “Ulang ma sipanganon na laho salpu horjahon nasiam, tapi sipanganon  na totap ronsi hagoluhan sisadokah ni dokahni ma.”​—Joh. 6:25-27.

6. Sonaha Jesus patuduhkon anggo ia lang ra dihut bani politik ni dunia on? (Tonggor ma gambar bani alm. 3.)

⁶ Ibotoh Jesus do dong piga-piga susianni na porsaya anggo ia laho mamarentah i Jerusalem. Tapi ipatugah Jesus ma limbaga laho patuduhkon na lepak do pangarusion ni sidea ai. Limbaga ai mansaritahon pasal “sada halak na sangap” na sihol laho hu nagori na daoh. Sasintongni Jesus do halak na sangap ai. (Luk. 19:11-13, 15) Tangkas do homa ipatugah Jesus bani sahalak pejabat Rom, ai ma si Pontius Latus, anggo ia lang dihut bani politik i dunia on. Isungkun si Latus do bani Jesus, “Atene, Ham do Raja ni Jahudi?” (Joh. 18:33) Ra do mabiar si Latus anggo Jesus sihol mangarahkon halak ase manlawan pamarentah Rom. Tapi ibalosi Jesus ma ia, ‘Ia Harajaonku seng na hun dunia on ai.’ (Joh. 18:36) Jadi lang ra Jesus dihut bani politik halani i nagori atas do Harajaonni. Laho “manaksihon hasintongan” do ia ase roh hu tanoh on.​—Basa Johannes 18:37.

7. Aha do na mambahen sasada halak gabe dihut mansampuri politik?

⁷ Ibotoh Jesus do aha tugasni. Sonai homa ma hita, anggo ibotoh hita aha tugasta, lang ra hita mansampuri politik age ibagas uhur. Tapi sipata lang urah ai. Sada sintua kaliling patugahkon bahat do halak bani iananni fanatik bani politik. Iahap sidea bangsani do na jagonan, halani ai lang ra sidea anggo iparentah bangsa na legan. Sintua ai mangkatahon, “Untung ma sanina botou totap marsada halani ringgas sidea mambaritahon pasal Harajaon. Marpangunsandei bani Naibata  do sidea sanggah dong hagedukon atap parsoalan.”

8. Hagedukon aha do na masa bani panorang ni Jesus?

⁸ Halani bahat hagedukon, bahat do halak na dihut politik. Bani panorang ni Jesus pe bahat halak dihut politik halani parsoalan pasal manggalar pajak. Ijia ibahen halak Rom do sensus laho mambotoh ise na lape manggalar pajak. Halani ai ma si Judas hun Galilea manlawan bani pamarentahan Rom. Leganni ai, bahat do homa pajak na maningon igalar, songon pajak ni arta, tanoh ampa rumah. Lambin parahni, dong do sijalo pajak na mata duiton. Sipata ibere sidea do duit bani pamarentah ase mandapot jabatan, janah igunahon ma jabatan ai laho pabayakkon dirini. Songon si Sakeus, kopala ni sijalo pajak i Jeriko, gabe bayak do ia halani manipu bahat halak.​—Luk. 19:2, 8.

9, 10. (a) Sonaha munsuh ni Jesus marusaha ase Jesus dihut mansampuri politik? (b) Aha na boi iparlajari hita humbani balos ni Jesus? (Tonggor ma gambar bani alm. 3.)

⁹ Dong homa pajak kepala na maningon igalar halak Jahudi, ai ma tiap halak Jahudi maningon mambere sadinar. (Basa Mateus 22:16-18.) Lang marosuh sidea bani pajak ai halani lang ra sidea iparentah halak Rom. Jadi marusaha ma munsuh ni Jesus ase ia dihut bani parsoalan pajak ai. Isungkun sidea ma Jesus boi do atap lang igalar pajak ai. Mangarap do halak humbani partai ni si Herodes ase ihatahon Jesus lang pala sidea manggalar ai. Ai ma dalanni ase sidea boi mangaduhon Jesus bani Pamarentah Rom. Tapi porini ihatahon Jesus maningon igalar sidea pajak ai, gabe lang ra be halak mangirikkonsi. Jadi aha ma na ibahen Jesus?

¹⁰ Totap do ia netral. Ia mangkatahon, “Bere ma bani kesar, na humbani kesar, anjaha bere ma bani Naibata, na humbani Naibata!” (Mat. 22:21) Jesus mambotoh bahat do sijalo pajak ai na mata duiton. Tapi lang ai na lalab idingat ia. Porsaya do ia pitah Harajaon ni Naibata do na boi pasaloseihon parsoalan ni manisia. Jadi, tiru hita ma Jesus. Ulang ma isampuri hita parsoalan ni politik aha pe. Hassi pe adong sada partai politik na iahap hita dear atap jujur, ulang ma iapiti hita sidea. Atap hassi pe adong sada partai politik na geduk pambahenanni, ulang homa ipasambor-sambor hita sidea. Tongtong ma dingat hita Harajaon ni Naibata ampa hasintongan na iajarhon Ia.​—Mat. 6:33.

11. Sonaha hita mangurupi halak na marsitaronon halani hagedukon?

¹¹ Bahat do Saksi Jahowa na mungkahni dihut bani politik, tapi sonari domma mubah. Umpamani, dong sada botou i Inggris Raya, sanggah lape marlajar Bibel, kuliah do ia jurusan ilmu sosial pakon politik. Nini do, “Gati do ahu mangapiti hak ni halak na markulit hitam, halani sadokah on bahat na mambahen na geduk bannami. Hassi pe monang ahu bani parsoalan ai, tapi totap do sunsah pangahapku.  Hubotoh ma hape sasintongni maningon humbani uhur do imulai ase ulang be mangapasi suku na legan. Dob marlajar Bibel ahu, gabe mubah ma paruhuranku.” Sasintongni sada botou na markulit putih do na mangurupisi mambahen hamubahon. Nini use, “Sonari ahu domma gabe parintis biasa i kuria bahasa isyarat. Anjaha marusaha do ahu marbarita bani ganup halak.”

12. Humbani “ragi” aha do susian ni Jesus maningon jaga?

¹² Bani panorang ni Jesus, pambobai ugama dihut do homa bani politik. Sada buku na mansaritahon pasal hagoluhan ni halak Palestina bani panorang ni Jesus patugahkon pasal ai. Buku ai patorangkon anggo piga-piga kalompok ugama bani halak Jahudi usih songon partai politik na tarbagi-bagi. Ai ma ase ipasingat Jesus susianni, “Pangkei anjaha jaga ma hanima pasal ragi ni Parisei ampa ragi ni si Herodes.” (Mrk. 8:15) Herodes na ihatahon Jesus ai artini halak na mangirikkon partai politik ni si Herodes. Anjaha dong homa kalompok Parisei na sihol ase maluah humbani halak Rom. Dob ai bani buku Mateus, dong homa ipatugah Jesus anggo susianni maningon do jaga bani halak Sadukei. Kalompok on sihol ase halak Rom ma na totap mamarentah ase boi sidea mandapot jabatan. Jadi ipasingat Jesus ma susianni ase jaga bani “ragi” atap ajaran humbani na tolu kalompok ai. (Mat. 16:6, 12) Anjaha ibere Jesus sipasingat ai dobkonsi halak ai sihol mambahen ia gabe raja.

13, 14. (a) Sonaha pambobai ugama boi mambahen dong partinggilan? (b) Mase lang ra hita martinggili sanggah dong pambahenan na geduk? (Tonggor ma gambar bani alm. 3.)

¹³ Anggo pambobai ugama dihut bani politik, ujung-ujungni gabe dong ma partinggilan. Jesus pasingatkon susianni ase totap netral. Halani ai ma sintua ni malim ampa halak Parisei sihol mamunuh Jesus. Mabiar do sidea anggo sompat bahat halak mangirikkon Jesus, lang dong be na mangirikkon sidea. Anjaha magou ma kuasa ni sidea ibagas politik. Nini sidea do, “Anggo ipaturut hita Ia sonin, porsaya ma halak haganupan Bani, gabe roh ma holi halak Rom manrampas tanohta ampa bangsanta.” (Joh. 11:48) Jadi ibahen Sintua ni Malim Kayapas ma rencana laho mamunuh Jesus.​—Joh. 11:49-53; 18:14.

¹⁴ Ipaima ia ma ronsi borngin, janah isuruh ma bahat tentara laho manangkap Jesus. Tapi ibotoh Jesus do ai. Jadi sanggah Jesus mangan pakon susianni, isuruh ia ma ase sidea mamboan dua podang. Marhitei podang ai, Jesus sihol mambere pangajaran. (Luk. 22:36-38) Bani borngin ai, roh ma buei halak laho manangkap  Jesus. Mangidah ai, manggila ma si Petrus janah ibuat ma podangni lanjar itampulhon ma ai bani sasada halak. (Joh. 18:10) Tapi nini Jesus ma bani si Petrus, “Sarungkon ma podangmin! Ai sagala na manampul podang, magou do bahenon ni podang.” (Mat. 26:52, 53) Aha do na sihol iajarhon Jesus? Ase susianni ulang ma sarupa pakon dunia on. Ai do homa na itonggohon ia bani borngin ai. (Basa Johannes 17:16.) Pitah Jahowa do na boi mambalaskon aha na jahat.

15, 16. (a) Sonaha Hata ni Naibata boi mangurupi halak Kristen ase totap marsada? (b) Aha do parlegan ni juakjuak ni Naibata pakon dunia on?

¹⁵ Botou hun Eropa bagian selatan na ipatugah nongkan ai pe mandapot parlajaran na sarupa. Nini do, “Ujungni parohkon hamatean do partinggilan ai, sedo hapintoron. Anjaha bahat do halak na gabe marpusok ni uhur. Tapi malas do uhurhu sonari halani hubotoh pitah Naibata do na boi parohkon hapintoron. Janah ai do na hubaritahon sadokah 25 tahun on.” Sanina hun Afrika bagian selatan nongkan pe domma manggantih tombakni pakon “podang ni tonduy, ai ma Hata ni Naibata”. (Ep. 6:17) Sonari ia domma marbarita bani ganup halak lang soal humbani suku aha pe sidea. Anjaha botou na hun Eropa bagian tengah, dobkonsi gabe saksi Jahowa ia, marhajabuan ma ia pakon sada sanina humbani suku na ihasogamkon ia hinan. Jadi na tolu halak ai mambahen hamubahon halani mangusihi Jesus.

¹⁶ Ponting tumang do mambahen hamubahon! Bibel mangkatahon anggo dunia on usih do songon laut na gunsang, lang adong hadameion. (Jes. 17:12; 57:20, 21; Pangk. 13:1) Politik ni dunia on pitah mambahen parposahan ampa partinggilan dassa. Tapi anggo juakjuak ni Naibata marsada janah mardamei do sidea. Tontu malas do uhur ni Jahowa mangidah ai.​—Basa Sepanya 3:17.

17. (a) Tolu cara aha do na mambahen hita totap marsada? (b) Aha do na laho iulas hita bani artikel na mangihut?

¹⁷ Bani artikel on domma iulas hita sonaha hita boi totap marsada marhitei tolu cara: (1) Porsaya do hita pitah Harajaon ni Naibata do na boi manasap hagedukon, (2) hita lang dihut bani politik, anjaha (3) ulang ma hita martinggil anggo dong hagedukon. Sipata hita lang be marsada halani marsogam ni uhur bani suku na legan. Bani artikel na mangihut iulas hita ma sonaha halak Kristen bani abad na parlobei boi totap manjaga hasadaon.