1. Aha do na mambahen manisia legan pakon binatang?

IBERE Jahowa do panggora ni uhur bani manisia. Tapi anggo bani binatang lang dong ai. Hunja ibotoh hita adong do ai bani manisia? Dob mardousa si Adam pakon si Hawa, marponop ma sidea halani mabiar. On ma na patuduhkon dong panggora ni uhur ni sidea.

2. Mase panggora ni uhur boi ihatahon songon kompas? (Tonggor ma gambar bani alm. 15.)

² Panggora ni uhur ai ma pangahap ibagas uhur na patugahkon ija do na sintong atap na lepak. Panggora ni uhur usih songon kompas na dong bani kapal. Anggo seda kompasni, boi do kahou kapal ai i tongah laut ibahen dorasni logou. Tapi anggo dear kompasni, boi ma kapten kapal ai mamboan kapal das hu tujuanni. Sonai ma panggora ni uhur na madear boi mangurupi hita mambahen haputusan na madear.

3. Sonaha ma ujungni anggo panggora ni uhur lang ilatih?

 ³ Anggo lang dear ilatih hita panggora ni uhur, lang be ipasingat hita sanggah mangkorjahon na lepak. (1 Tim. 4:1, 2) Ra do iahap hita ‘na lepak ai do na dear’. (Jes. 5:20) Jesus mangkatahon, “Na roh ma panorangni gabe songon na manggalang bani Naibata do na mamunuh hanima, ninuhur ni sidea.” (Joh. 16:2) Ai ma na iahapkon halak na mamunuh si Stepanus. (Lah. 6:8, 12; 7:54-60) Sadokah on, bahat do halak siparugama na mangkorjahon hajahaton, songon mamunuh, janah ihatahon do anggo ai harosuh ni Naibata. Sasintongni, domma ilanggar sidea titah ni Naibata. (2 Mus. 20:13) Torang ma, lang be madear panggora ni uhur ni sidea!

4. Sonaha hita manlatih panggora ni uhur ase totap dear?

⁴ Sonaha hita manlatih panggora ni uhur ase totap dear? Bibel marisi titah ampa onjolan atap prinsip na “marguna mamodahi, maminsang, pauli-ulihon ampa manogu-nogu hu hapintoron”. (2 Tim. 3:16) Halani ai, maningon tongtong ma iparlajari hita Bibel, rimangi, janah idalankon. Ujungni, lambin iarusi hita ma paruhuran ni Jahowa. Gabe pos ma uhurta anggo panggora ni uhur ai boi manogu-nogu hu na dear. Ulas hita ma sonaha hita manlatih panggora ni uhur manggunahon titah ni Jahowa ampa prinsip ni Bibel.

5, 6. Sonaha ase titah ni Naibata boi marguna hubanta?

⁵ Ase marguna titah ni Naibata ai hubanta, lang sungkup pitah mambasa Bibel, tapi maningon iharosuhkon hita ma titah-Ni ai. Bibel mangkatahon, ‘Hagigihon ma na jahat janah haholongi ma na madear.’ (Ams. 5:15) Sonaha ase iharosuhkon hita Titah-Ni ai? Maningon iusihi hita ma paruhuran ni Jahowa. Pingkirhon ma contoh on: Porini ham lang boi modom. Jadi ipatugah dokter ma ase nasiam mangankon sipanganon na sehat janah gati marolahraga. Idalankon nasiam ma podah ai, janah dear do hasilni! Tontu gabe malas ma uhurmu halani manangihon podah ai.

⁶ Sonai ma titah ni Naibata, boi mambahen hita gabe martuah janah lang mangkorjahon na sambor. Umpamani, ihatahon Bibel do ase hita ulang marladung, manangko, mangkorjahon parriah-riahon, martinggili, atap mangkorjahon aha pe na dong kaitanni bani hadatuon. (Basa Podah 6:16-19; Pangk. 21:8) Sanggah iahapkon hita dear tumang do hasilni anggo manangihon Jahowa, lambin iharosuhkon hita ma titah-Ni ai.

7. Sonaha pangalaman na dong bani Bibel boi mangurupi hita?

⁷ Podah 1:5 mangkatahon, “Halak na pentar pe itangihon ma [pangajarion].” Humbani Naibata do rohni pangajarion na sidearan! Bahat do pangalaman na isuratkon ibagas Bibel. Hunjai ibotoh hita sonaha do ujungni bani sasada halak anggo mangkorjahon na lepak. Jadi lang pala hita manaron na borit laho mambotoh ija do na sintong pakon na lepak. Umpamani,  pingkirhon ma pangahap ni si Daud dob marbangkis pakon si Batseba. (2 Sam. 12:7-14) Sanggah ibasa nasiam sarita ai, rimangi ma sungkun-sungkun on: ‘Mase ma sonai lepak ni si Daud? Porini ahu si Daud, aha ma na hubahen? Ai gabe marbangkis do ahu songon si Daud, atap si Josep do na hutiru?’ (1 Mus. 39:11-15) Anggo dear irimangi hita sonaha ujungni mangkorjahon na lepak, lambin ‘ihagigihon hita ma na jahat’.

8, 9. (a) Aha ma guna ni panggora ni uhur na ilatih? (b) Sonaha hita manlatih panggora ni uhur mangihutkon prinsip ni Bibel?

⁸ Tontu marusaha do hita ase ulang mangkorjahon na ihagigihon Naibata. Tapi porini hita sihol mambahen haputusan, hape lang dong titah na patugahkon boi do ai ihorjahon atap lang, aha ma na ibahen hita? Sonaha hita mambotoh harosuh ni Naibata? Anggo tongtong hita mangindahi podah ni Bibel laho manlatih panggora ni uhurta, boi ma hita mambahen haputusan na dear.

⁹ Jahowa mangkaholongi hita. Jadi ibere Ia ma prinsip laho mangurupi hita. Ia mangkatahon, “Ahu do Jahowa Naibatamu, na mangajari ho ase martuah ho, na manogu ho bani dalan na patut sidalananmu.” (Jes. 48: 17, 18) Anggo bagas irimangi hita prinsip ni Bibel, gabe madear ma panggora ni uhurta. On ma na mangurupi hita mambahen haputusan na madear.

10. Sonaha do Bibel boi mangurupi hita mambahen haputusan na dear, anjaha sonaha do Jesus mangurupi susianni mambahen haputusan na dear?

¹⁰ Prinsip, ai ma hasintongan na mangurupi hita mambahen pilihan na sintong. Anggo ibotoh hita prinsip ni Bibel, gabe iarusi hita ma sonaha paruhuran ni Jahowa, anjaha ibotoh hita ma mase ibere Jahowa titah-Ni hubanta. Igunahon Jesus do homa prinsip laho mangajari susianni ase ibotoh sidea aha na itidahkon, ai do na laho sabion. Umpamani, anggo sasada halak marah, boi do ujungni gabe martinggili. Anjaha anggo sasada halak lalab mamingkirhon pasal seks, ujungni gabe marbangkis ma ia. (Mat. 5:21, 22, 27, 28) Jadi anggo igunahon hita prinsip ni Jahowa, lambin dear ma panggora ni uhurta, janah haputusanta pe boi pasangapkon Naibata.​—1 Kor. 10:31.

11. Aha na patuduhkon lang sarupa panggora ni uhur ganup halak?

¹¹ Hassi pe halak Kristen mangihutkon Bibel laho manlatih panggora ni uhurni, tapi sipata lang sarupa haputusan na ibahen sidea. Umpamani pasal na manginum alkohol. Seng adong ilarang Bibel sasada halak manginum alkohol, asal ma ulang mabahattu atap pe ronsi tenggen. (Pod. 20:1; 1 Tim. 3:8) Hassi pe sonai, ai boi do halak Kristen manginum alkohol attigan pe ia marosuh? Lang. Halani maningon ipingkirhon ia do homa panggora ni uhur ni halak na legan.

12. Domu bani Rom 14:21 sonaha do hita mamingkirhon panggora ni uhur ni halak na legan?

¹² Ipatugah Si Paulus do ase hita mamingkirhon panggora ni uhur ni halak na legan. Nini do, “Dearan ma ulang mangan [daging], ulang minum anggur, atap mangkorjahon aha pe, anggo mambahen parsangsian do ai bani hasomanmu.” (Rom 14:21) Jadi hassi pe lang salah manginum alkohol, tapi anggo ai boi mambahen sasada halak tartolsu, rahanan ma hita ulang minum. Mase sonai? Ra do adong sada sanina sanggah lape marlajar, rosuh ia manginum bahat alkohol ronsi tenggen. Tapi dobkonsi marlajar Bibel, iputuskon ia ma lang ra be manginum ai. Jadi ulang ma ibahen hita aha pe na boi mambahen ia gabe mulak use mangkorjahon hasomalanni hinan. (1 Kor. 6:9, 10) Halani ai porini roh sanina ai hu rumahta, ulang ma ibere hita alkohol hu bani.

13. Sonaha si Timoteus mamingkirhon panggora ni uhur ni halak na legan ase ra sidea manjalo barita na madear?

¹³ Sanggah poso ope si Timoteus, ra do ia isunat hassi pe maborit ai. Mase? Halani ia sihol marbarita bani halak Jahudi, janah ibotoh ia ponting tumang do sunat ai bani sidea. Songon si Paulus, ipingkirhon ia do panggora ni uhur ni halak na legan. (Lah. 16:3; 1 Kor. 9:19-23) Jadi, ra do nasiam lang pitah mamingkirhon diri sandiri ase boi mangurupi halak na legan?

14, 15. (a) Sonaha ase hita gabe matoras? (b) Sonaha do halak Kristen na matoras marparlahou?

¹⁴ Dobkonsi iparlajari hita “podah pamungkah pasal Kristus”, sihol ma hita gabe “halak na dob matoras”. (Heb. 6:1) Sasada halak gabe matoras sedo halani ia domma dokah ididi. Ase boi gabe matoras, maningon tongtong ma iparlajari hita Bibel. (Ps. 1:1-3) Anggo ibasa hita Bibel bani ganup ari, lambin iarusi hita ma titah ampa prinsip ni Jahowa.

¹⁵ Titah aha do na siporlunan bani halak Kristen? Ai ma titah pasal holong. Ihatahon Jesus do bani susianni, “Hunjon ma botohon ni ganup halak susian-Ku hanima, anggo marsihaholongan hanima.” (Joh. 13:35) Holong ai ihatahon do homa “titah ni Harajaon”. (Jak. 2:8) Holong ai do use na ‘manggoki titah’. (Rom 13:10) Jadi ponting tumang do holong ai, halani Bibel mangkatahon “Naibata ai ma haholongon”. (1 Joh. 4:8) Bani Naibata holong ai lang pitah ibagas uhur, tapi ipatuduh Ia do marhitei pambahenan. Si Johannes mangkatahon, “Hunjon do gabe talar holong ni uhur ni Naibata banta, ai ma humbani na dob sinuruh-Ni Anak-Ni na sasada in hu dunia on, ase manggoluh hita marhiteihon-Si.” (1 Joh. 4:9) Anggo ipatuduh hita holong bani Jahowa, Jesus, sanina-botou, pakon halak na legan, ai ma tandani anggo hita halak Kristen na dob matoras.​—Mat. 22:37-39.

16. Mase lambin arga prinsip ni Bibel ai bani halak na matoras?

¹⁶ Anggo hita domma gabe halak na  toras, lambin ihargai hita ma prinsip ni Bibel. Somalni titah igunahon bani sada situasi. Tapi anggo prinsip boi igunahon bani bahat situasi. Umpamani, lang iarusi dakdanak sonaha ujungni anggo ia marhasoman pakon halak na sambor. Jadi ibahen namatorasni ma aturan laho manjaga dakdanak ai. (1 Kor. 15:33) Tapi dobkonsi magodang, iarusi ia ma prinsip ni Bibel. Prinsip ai do na boi mangurupisi mamilih hasoman na dear. (Basa 1 Korint 13:11; 14:20.) Anggo lambin iarusi hita prinsip ni Bibel, lambin dear ma panggora ni uhurta. Gabe ibotoh hita ma aha do na iharosuhkon Naibata sanggah mambahen haputusan.

17. Aha do buktini domma bahat na ipasirsir hubanta laho mambahen haputusan na dear?

¹⁷ Bahat do na ipasirsir ase hita boi mambahen haputusan na pamalaskon uhur ni Jahowa. Ibagas Bibel, dong do titah ampa prinsip na boi mangurupi hita ase ‘gokan dear janah mangasup bani sagala horja na madear’. (2 Tim. 3:16, 17) Anggo iparlajari hita prinsip ni Bibel, gabe ibotoh hita ma aha do harosuh ni Jahowa. (Ep. 5:17) Aha do na boi mangurupi hita laho mambotoh prinsip ai? Dong do ipasirsir hubanta Indeks Publikasi Menara Pengawal, Panduan Riset untuk Saksi-Saksi Yehuwa, Perpustakaan Menara Pengawal, PERPUSTAKAAN ONLINE Ambilan na Madear, ampa aplikasi JW Library. Bahat do gunani banta anggo ipakei hita alat ai sanggah marlajar Bibel sandiri atap pakon kaluarga.

18. Aha do gunani anggo idalankon hita titah ampa prinsip ni Jahowa?

¹⁸ Lambin martuah ma hita anggo idalankon hita titah ampa prinsip ni Jahowa! Psalmen 119:97-100 mangkatahon, “Holong tumang do uhur hubani titah-Mu; manipat ari do hupingkiri ai. Pentaran do ahu maruhur humbani munsuhku ibahen parentah-Mu, ai tongtong do ai mangkasomani ahu: Pandeian do ahu humbani sagala gurungku, ai hasaksian-Mu do hupingkir-pingkiri. Maruhuran do ahu humbani partua-partua, ai aturan-Mu do huparuhurhon.” Anggo irimangi hita titah ampa prinsip ni Naibata, gabe halak na maruhur ma hita. Anjaha anggo igunahon hita titah ampa prinsip ai laho manlatih panggora ni uhurta, gabe “matoras anjaha gok songon Kristus” ma hita.​—Ep. 4:13.