1, 2. (a) Aha do na itonggohon Jesus sanggah rup pakon apostelni? (b) Aha do ra na mambahen Jesus haru?

SANGGAH rap mangan Jesus pakon ganup apostelni, haru do ia, ai boi do holi apostelni totap marsada? Jadi itonggohon ia ma ase sada, atap marsada ganup susianni, songon ia gabe sada pakon Bapani. (Basa Johannes 17:20, 21.) Anggo marsada sidea, porsaya ma halak Jahowa do na marsuruh Jesus hu tanoh on. Janah anggo marsihaholongan sidea ibotoh halak ma tongon-tongon do sidea susian ni Jesus.​—Joh. 13:34, 35.

² Bani borngin ai, bahat do na iajarhon Jesus pasal hasadaon halani ipardiateihon ia hurang do hasadaon ni susianni ai. Umpamani, gati do sidea maringori pasal “ise do sidea sibanggalan”. (Luk. 22:24-27; Mrk. 9:33, 34) Ongga do homa si Jakobus ampa si Johannes mangindo bani Jesus ase hundul sidea i siamun ni Jesus ibagas Harajaon ni Naibata.​—Mrk. 10:35-40.

3. Aha ope na boi mamosah hasadaon ni susian ni Jesus, janah sungkun-sungkun aha ma na laho iulas hita?

 ³ Leganni ai, dong homa na mambahen susian ni Jesus lang marsada. Ijia, bahat do parposahan halani masogam mangidah halak na legan. Dong homa na manonggor jumbak atap mapas mangidah suku na legan. Jadi maningon iambukkon susian ni Jesus do biak sisonai. Bani artikel on, iulas hita ma sungkun-sungkun: Sonaha Jesus patuduhkon anggo ia lang sitonggor jumbak? Sonaha ia mangurupi susianni ase totap marsada janah lang manonggor jumbak? Anjaha sonaha hita mangusihi Jesus ase totap ibagas hasadaon?

4. Jesus pe ongga do iapasi halak. Patugah ma contohni.

⁴ Gari Jesus pe ongga do iapasi halak. Sanggah si Pilippus mangkatahon domma jumpah ia pakon Mesias, nini si Natanael do, “Mintor tarbahen ma roh na madear hun Nasaret?” (Joh. 1:46) Ra sonai parsahapni halani ninuhurni ai ra boi Mesias roh hun Nasaret, huta na iapasi halak. Hape ra domma ibotoh si Natanael anggo Mesias ai tubuh i Betlehem, domu bai panjahaion bani Mika 5:1. Halak na sangap hun Judea pe mapas do mangidah Jesus halani hun Galilea asalni. (Joh. 7:52) Iahap sidea jagonan do halak Judea marimbangkon halak Galilea. Ipados halak Jahudi do Jesus pakon halak Samaria. (Joh. 8:48) Halak Jahudi mapas mangidah halak Samaria halani lang sarupa hasomalan ampa ugamani pakon sidea. Halani ai ma halak Judea pakon halak Galilea lang ra marsaor pakon sidea.​—Joh. 4:9.

5. Sonaha halak mangapasi susian ni Jesus?

⁵ Mapas do homa pambobai ni ugama Jahudi bani susian ni Jesus. Ihatahon halak Parisei do sidea halak na “bursik”. (Joh. 7:47-49) Ihatahon do homa lang tarpakei susian ni Jesus halani lang sikolah rabi janah na lang mangihutkon hasomalan ni sidea. (Lah. 4:13) Bahat do halak na mangapasi Jesus pakon susianni, halani ijia bahat halak marpingkir jagonan do ugama, sikolah, ampa suku ni sidea. Gabe dihut ma homa sonai pingkiran ni susian ni Jesus. Tapi ase boi totap marsada, maningon iambukkon sidea ma pingkiran sisonai.

6. Patugah ma contoh na mambahen sasahalak gabe mapas mangidah na legan.

⁶ Sonari pe bahat do halak na sitonggor jumbak. Ra adong halak na mangapasi hita, atap ra homa hita mapas mangidah na legan. Sada parintis hun Australia mangkatahon, “Hinan, sogam tumang ahu mangidah halak kulit putih halani sambor tumang do pambahenan ni sidea bani halak Aborigin. Lambin tambah do sogam ni uhurhu halani ongga do homa ahu iapasi.” Sada sanina hun Kanada mangkatahon, “Hinan,  jagonan do huahap halak na marsahap Prancis, halani ai ma lang marosuh ahu bani halak na marsahap Inggris.”

7. Sonaha Jesus patuduhkon anggo ia lang sitonggor jumbak?

⁷ Humbani sapari ronsi sonari, sai adong do halak na sitonggor jumbak. Tapi parahan do sonari. Hassi pe sonai, aha ma na ibahen Jesus hinan? Lang ongga ia manonggor jumbak. Bani ganup halak do ia marbarita. Umpamani hubani halak na bayak ampa na masombuh, hubani halak Parisei ampa halak Samaria, sonai homa bani sijalo pajak. Dob ai, ipatuduh do homa siusihan bani susianni ase ulang podas-podas sidea manguhumi halak atap pe mapas mangidah na legan.

8. Prinsip aha ma na iajarhon Jesus ase susianni totap marsada?

⁸ Ibere Jesus do sada prinsip na mangajarhon ase marsada ganup susianni. Ia mangkatahon, “Marsanina do nasiam ganup.” (Basa Mateus 23:8, 9.) Sasintongni, marsanina do hita halani ganupan hita ginompar ni si Adam. (Lah. 17:26) Ihatahon Jesus do homa ganup susianni gabe sanina botou halani sidea mangkorjahon harosuh ni Bapa na i surga, ai ma Jahowa. (Mat. 12:50) Halani ai gabe kaluarga ni Naibata ma sidea na marsada ibagas holong ampa haporsayaon. Halani ai ma homa sanggah apostel mambahen surat hu kuria-kuria, ihatahon ia do sidea ai hasoman atap sanina.​—Rom 1:13; 1 Ptr. 2:17; 1 Joh. 3:13.

9, 10. (a) Mase lang boi iahap halak Jahudi jagonan suku ni sidea? (b) Sonaha Jesus mangajarhon ase ulang mangapasi suku na legan? (Tonggor ma gambar bani alm. 9.)

⁹ Dobkonsi ai, ipatugah Jesus do homa ase susianni martoruh ni uhur. (Basa Mateus 23:11, 12.) Songon na dob iulas hita, halani gijang ni uhur gabe lang marsada apostelni ai. Anjaha bahat do homa halak ijia na mangahap jagonan do suku ni sidea. Umpamani, iahap halak Jahudi do jagonan sidea halani sidea ai ginompar ni si Abraham. Tapi si Johannes Pandidi mangkatahon, “Tarjadihon Naibata do anak ni si Abraham humbani batu on.”​—Luk. 3:8.

¹⁰ Jesus mangajarhon ase ulang iahap hita jagonan do sukunta. Dong sahalak sibotoh titah na manungkun bani, “Ai ise do goranon hasomanku?” Ibahen Jesus ma sada sarita. Dong sahalak Jahudi na ibogbogi, irampok, janah itadingkon. Montas ma halak Jahudi na legan, tapi seng ra mangurupi. Dob ai, dong halak Samaria na marholong ni atei janah mangurupi halak Jahudi ai. Ujungni, isuruh Jesus ma ase sibotoh titah ai mangusihi halak Samaria nongkan ai. (Luk. 10:25-37) Ijon Jesus patuduhkon anggo halak Samaria boi do mangajari halak Jahudi aha do artini mangkaholongi hasoman.

11. Mase susian ni Jesus lang boi manonggor jumbak, janah sonaha Jesus mangurupi sidea mandalankon ai?

¹¹ Paima tarangkat Jesus hu surga, iparentahkon ma ase susianni marbarita “i sab Judea ampa i Samaria ampa das hu ujung ni tanoh on”. (Lah. 1:8) Halani ai, maningon iambukkon  susianni ai ma biak gijang ni uhur ampa sitonggor jumbak. Gati do Jesus mamuji bangsa na legan. On ma na mangurupi susianni ase ra marbarita hubani ganup bangsa. Umpamani, ipuji ia do sada kopala tentara na toguh marhaporsayaon. (Mat. 8:5-10) Sanggah i Nasaret, ipatugah ia do homa sonaha Jahowa mangurupi halak hun bangsa na legan, songon naboru na mabalu hun Sarpat pakon si Naeman halak Siria na gadamon. (Luk. 4:25-27) Ra do homa Jesus marbarita hubani naboru Samaria. Janah dua ari ma ia tading ijai halani bahat na rosuh manangar baritani.​—Joh. 4:21-24, 40.

12, 13. (a) Sonaha pangahap ni apostel sanggah Jesus marbarita hubani naboru Samaria? (Tonggor ma gambar bani alm. 9.) (b) Aha ma na patuduhkon anggo si Jakobus pakon si Johannes lape mangarusi na iajarhon Jesus?

¹² Lang urah bani apostel ni Jesus mangambukkon biak sitonggor jumbak. Sanggah marbarita Jesus hubani naboru Samaria, longang do sidea. (Joh. 4:9, 27) Mase? Ra do halani pambobai ugama Jahudi lang ongga marsahap pakon naboru i lobei ni halak na mabuei, tarlobih ma bani sada naboru Samaria na sambor parlahouni. Sanggah Jesus iarahkon apostelni mangan, ihatahonni songon sipanganon do mangkorjahon harosuh ni Bapani. Naibata marosuh ase ia marbarita hubani ganup halak tarmasuk bani naboru Samaria ai.​—Joh. 4:31-34.

¹³ Tapi lang iarusi si Jakobus pakon si Johannes ope ai. Sanggah Jesus pakon susianni mamontas hun Samaria, ipindahi sidea ma ijai ianan parbornginan. Tapi lang dong na ra manjalo sidea. Gabe marah tumang ma si Jakobus pakon si Johannes. Janah ipindo sidea ma bani Jesus ase turun apuy hun datas laho mamboiskon huta ai. Tapi mintor ipinsang Jesus do sidea. (Luk. 9:51-56) Porini halak Galilea na mambahen sonai, ra do lang sonai marah ni sidea. Jadi ra do halani sitonggor jumbak ope sidea ase manggila. I pudian ni ari sanggah si Johannes marbarita bani halak Samaria, bahat do sidea na ra manangihon baritani. Anggo idingatni parlahouni ondi ai, ra do maila ia.​—Lah. 8:14, 25.

14. Sonaha apostel pasaloseihon parsoalan na masa halani dong ope na martonggor jumbak?

¹⁴ Lang piga dokah dobkonsi ari Pentakosta tahun 33 M, dong ope na martonggor jumbak i kuria. Ondi ai dong ibagihon sipanganon bani naboru na mabalu. Tapi, hurang do isarihon sidea na mabalu na marsahap Junani. (Lah. 6:1) Ra do on tarjadi halani legan bahasa ni sidea. Mintor podas ma isaloseihon apostel parsoalan ai. Ase boi dos pambagianni, ipilih ma pitu sanina na maruhur laho mangkorjahon ai. Halani ganup sanina ai goranni hun sahap Junani, ra do gabe tarapoh na mabalu nongkan ai.

15. Sonaha si Petrus mangarusi ase ia ulang manonggor jumbak? (Tonggor ma gambar bani alm. 9.)

¹⁵ Somalni pitah pakon halak Jahudi do si Petrus ra marsaor. Tapi dob ipatugah  Jahowa anggo halak Kristen lang boi sonai, marbarita ma ia hubani si Kornelius, tentara ni Rom. (Basa Lahoan ni Apostel 10:28, 34, 35.) Jadi humbani tahun 36 M, marbarita ma susian ni Jesus hubani ganup bangsa. Si Petrus pe ra marsaor ampa mangan rapkon halak Kristen na lang Jahudi. Tapi dob piga-piga tahun sanggah ia i Antiokia, sompong lang ra be ia marsaor pakon sidea. (Gal. 2:11-14) Ipasingat si Paulus ma ia halani ai. Janah ijalo si Petrus do sipasingat ai. Hunja ibotoh hita? Sanggah manurat hubani halak Kristen Jahudi pakon na lang Jahudi i Asia Kecil, ihatahon do ase sidea marholong ni uhur bani ganup hasoman.​—1 Ptr. 1:1; 2:17.

16. Sonaha halak Kristen bani abad na parlobei itanda halak?

¹⁶ Siusihan humbani Jesus mangurupi ganup apostelni laho patuduhkon holong bani “haganup jolma”. (Joh. 12:32; 1 Tim. 4:10) Hassi pe lang urah, ujungni boi ma sidea mambahen hamubahon. Sasintongni, halak Kristen bani abad na parlobei itanda halak halani sidea marsihaholongan. Hira-hira tahun 200 M, sahalak panurat na margoran si Tertullian patugahkon naha nini halak pasal halak Kristen, ‘Marsihaholongan do sidea janah ra do sidea mambere hosahni laho mangkopkop hasomanni.’ Halani mangusihi Naibata, gabe boi ma halak Kristen lang be manonggor jumbak.​—Kol. 3:10, 11.

17. Aha do na mangurupi hita ase ulang sitonggor jumbak? Patugah ma contohni.

¹⁷ Sonari pe, ra do homa lang urah hita mangambukkon biak sitonggor jumbak. Sonai ma na iahapkon sada botou i Prancis. Nini do, “Domma namin iajari Jahowa ahu aha do artini holong ai, sonaha na marsihaholongan,  ampa mangkaholongi ganupan. Tapi maningon marusaha do ahu ase ulang sitonggor jumbak bani na legan. Halani ai ma ase hutonggohon ai tongtong.” Sada botou hun Spanyol mangkatahon lang urah bani ase ulang mapas mangidah suku na legan. Ihatahonni do, “Gati do ahu marhasil, tapi maningon marusaha do ahu tongtong mandalankon ai. Tarima kasih ma bani Jahowa, malas uhurhu boi gabe sada pakon juakjuak ni Naibata.” Ganupan hita porlu do mamareksa diri, ‘Ai halak na sitonggor jumbak ope ahu?’

18, 19. (a) Mase maningon ra hita marsijaloan? (b) Sonaha hita patuduhkon ai?

¹⁸ Dear do homa idingat hita anggo hinan ganup hita lang mananda Naibata. (Ep. 2:12) Tapi halani holong itarik Naibata do hita hu hasintongan. (Hos. 11:4; Joh. 6:44) Anjaha halani ra Jesus manjalo hita, boi ma hita gabe kaluarga ni Naibata. (Basa Rom 15:7.) Hassi pe lang gokan dear hita, ra do Jesus manjalo hita. Jadi hita pe maningon ra manjalo ganup halak!

¹⁹ Halani lambin dohor ajal ni dunia on, lambin bahat ma parposahan halani halak marsogam ni uhur ampa manonggor jumbak. (Gal. 5:19-21; 2 Tim. 3:13) Tapi, maningon dong ma “hauhuron na hun babou” bani juakjuak ni Jahowa. Ai do na mangurupi sidea ase totap mardamei janah lang manonggor jumbak. (Jak. 3:17, 18) Maningon ra ma hita marhasoman pakon ganup halak hun marbagei bangsa. Ulang mapas hita mangidah hasomalan ni sidea. Boi do homa iparlajari hita bahasa ni sidea. Anggo sonai ibahen hita, “songon bah mardalan” ma hadameionta, janah “songon gilumbang ni laut” ma hapintoronta.​—Jes. 48:17, 18.

20. Anggo dong holong banta, aha ma hasilni?

²⁰ Dob marlajar Bibel botou hun Australia nongkan ai, lang be gabe halak na sitonggor jumbak ia. Halani holong gabe mubah ma pamingkirionni. Sanina na marsahap Prancis hun Kanada ai pe mangkatahon, sasintongni marsogam ni uhur halak halani lape mananda paruhuranni bei. Janah ibotoh ia ma “paruhuran ni sasada halak lang itontuhon tanoh hatubuhanni”. Ujungni, marhajabuan pakon botou na marsahap Inggris ma ia! Humbani contoh ai ibotoh hita ma holong boi mambahen halak lang be manonggor jumbak. Holong do na patoguhkon hasadaonta.​—Kol. 3:14.