1. Aha do na mambahen malas uhurta?

MALAS tumang uhur mangidah sanina-botou na marsinalsal panondangni! Tahun na salpu, dong lobih 10.000.000 halak na marlajar Bibel rap pakon hita. Tambah do homa marjuta halak na roh hu ari Pardingatan janah manangar sonaha banggal ni holong ni Naibata marhitei tobusan.​—1 Joh. 4:9.

2, 3. (a) Aha do na lang boi manlanglangi hita ase totap marsada? (b) Aha ma na laho iulas hita bani artikel on?

² Marmasam bahasa do na igunahon Saksi Jahowa i sab dunia on. Hassi pe sonai, totap do sidea marsada laho pasangapkon Jahowa. (Pangk. 7:9) Lang soal bahasa aha na igunahon atap ija hita tading, boi do hita marsinalsal “songon bintang i dunia on”.​—Pil. 2:15.

³ Jadi hita marsinalsal laho pasangapkon Jahowa. Bani artikel on ulas hita ma sonaha hita marsinalsal  ibagas pangidangion, hasadaon Kristen, ampa haringgasonta.​—Basa Mateus 5:14-16.

4, 5. (a) Leganni marbarita, aha ope na boi bahenonta ase marsinalsal panondangta? (b) Aha do gunani anggo basar hita? (Tonggor ma gambar bani alm. 21.)

⁴ Sada cara na ponting laho patuduhkon sinondang na marsinalsal ai ma marhitei marbarita janah mangurupi halak gabe susian ni Jesus. (Mat. 28:19, 20) Tahun 1925, bani artikel “Terang yang Menembus Kegelapan” ipatugah do lang boi sasada halak ihatahon porsaya bani Tuan anggo ia lang marsinalsal. Dob ai ihatahon, “Ia patuduhkon ai marhitei marbarita janah marparlahou songon na iharosuhkon Naibata.” (The Watch Tower, 1 Juni 1925) Leganni ai, parlahounta pe boi pasangapkon Jahowa. Bahat do halak na mangidah hita sanggah marbarita. Jadi anggo tarsirom hita janah basar, ra do sidea gabe marosuh manangar baritanta.

⁵ Jesus mangkatahon bani susianni, “Hatahon hanima ma tabinima, laho masuk hu rumah ai.” (Mat. 10:12) Ijia sanggah Jesus marbarita, somal do halak na lang itanda iontang masuk hu rumah. Tapi sonari lang be sonai. Bani piga-piga ianan, anggo roh halak na lang itanda hu rumah, ra do gabe mabiar simada rumah atap pe sogam uhurni. Tapi anggo basar hita, lang be mabiar sidea. Ipardiateihon nasiam do anggo basar janah tarsirom nasiam sanggah manjaga gerai, gabe ra halak mambuat basaan ai? Sipata ra do gabe sidea na parlobei marsahap hubanta!

6. Aha ma na ibahen pasangan na matua ase boi totap marbarita?

⁶ Dong sada paramangon pakon parinangon i Inggris na lang boi dokah marbarita halani domma matua janah hurang sehat. Sidea tading dohorhon sikolah. Jadi ibahen sidea ma meja i alaman ni rumahni janah ibahen ma ijai basaan na hira-hira iharosuhkon namatoras. Sanggah namatoras ai mangalop anakni, dong do na ra mambuat buku ai, tarmasuk buku Pertanyaan Kaum Muda—Jawaban yang Praktis, Jilid 1 pakon 2. Dong homa sahalak parintis na gati mangkasomani sidea. Ipardiateihon halak ma anggo parintis ai basar, janah na matua ai pe rosuh mangurupi na legan. Halani ai dong ma sada namatoras na ra marlajar Bibel pakon sidea.

7. Sonaha hita mangurupi pangungsi na tading i iananta?

⁷ Nabaru on, bahat do halak na mangungsi hu nagori na legan. Sonaha hita boi mangurupi pangungsi na tading i iananta ase marlajar pasal Jahowa? Parlobei, parlajari ma bahasa ni  sidea ase boi hita marsitandaan pakon sidea. Leganni ai, ase boi marsahapi pakon sidea, gunahon ma aplikasi JW Language. Dob ai, patuduh ma video pakon publikasi bani sahap ni sidea na dong i jw.org.​—5 Mus. 10:19.

8, 9. (a) Sonaha partumpuan tengah pekan boi mangurupi hita? (b) Sonaha namatoras mangurupi dakdanak ase dear mambere komentar?

⁸ Iurupi Jahowa do hita ase lambin pandei ibagas pangidangion. Umpamani, bani Partumpuan Hagoluhan pakon Pangidangion Kristen, iajari do hita ase lambin pangkar manrohi use ampa mangajari halak marlajar Bibel.

⁹ Sanggah dong na baru ope roh hu partumpuan, longang do sidea mangidah dakdanak na boi mambere komentar. Nasiam namatoras, urupi ma niombah ase boi mambere komentar sandiri. Dong do halak na ra marlajar Bibel dobkonsi manangar komentar ni dakdanak na roh humbagas uhurni.​—1 Kor. 14:25.

10. Sonaha parlajaran Bibel kaluarga mangurupi kaluarga lambin marsada?

¹⁰ Ipasangap do Jahowa anggo ganup kaluarga marsada ibagas damei. Halani ai, nasiam namatoras, bahen ma parlajaran Bibel kaluarga na taratur. Bahat do kaluarga na rup manonton JW Broadcasting. Dob manonton, iulas sidea ma aha parlajaranni bani  sidea. Dingat ma lang sarupa pangajaran bani dakdanak na etek pakon remaja. Jadi, marusaha ma mambahen ase parlajaran Bibel kaluarga marguna bani ganup anggota kaluarga.​—Ps. 148:12, 13.

11-13. Sonaha hita boi mambahen kuria lambin marsada?

¹¹ Gari na maposo pe boi do mangojur sanina-botou i kuria. Marusaha ma hanima marhasoman pakon sidea na dob matua. Sungkun ma mase sidea boi martahan mangidangi Jahowa sadokah martahun-tahun. Dapot hanima do holi parlajaran na maharga humbani sidea. Anjaha sidea pe gabe tarojur do homa! Sasintongni, ganup hita maningon basar mangalo-alo halak na baru roh hu Balei Harajaon. Urupi ma sidea mangindahi hundulan, janah arahkon ma sidea marsitandaan pakon na legan ase malas uhurni.

¹² Sanggah nasiam memandu pertemuan dinas, bere ma ianan na sosok bani sidea. Janah bahen ma ase sidea ihasomani na maposo. Gati do na matua atap sidea na hurang sehat gabe maretek ni uhur halani lang boi mangidangi songon na hinan. Tapi gabe malas ma uhur ni sidea anggo parduli nasiam janah mamingkirhon haporluanni. Lang soal sadiha umur ni sidea atap sadiha dokah sidea gabe Saksi Jahowa, anggo basar nasiam mangojur sidea, gabe ringgas ma sidea mangidangi.​—3 Mus. 19:32.

¹³ Marmalas ni uhur do halak Israel na hinan sanggah rup manombah Jahowa. Bani Psalmen ihatahon, “Naha dearni ampa naha jengesni, anggo rap hundul na marsanina.” (Basa Psalmen 133:1, 2.) Songon minak na morum janah maharga do hasadaon ai. Sonai ma homa hita boi mambahen sanina botou marmalas ni uhur anggo basar janah bujur bani sidea. On ma na parohkon hasadaon ibagas kuria. Ai ra do nasiam lambin mananda sanina botou i kuria?​—2 Kor. 6:11-13.

14. Sonaha ase panondangta marsinalsal i iananta tading?

¹⁴ Lang soal ija nasiam tading, boi do panondangnima marsinalsal. Anggo bujur janah basar nasiam, ra do adong simbalog rumah na ra marlajar Bibel. Pingkirhon ma: ‘Sonaha do pangahap ni simbalog mangidah ahu? Ai borsih janah rapi do rumahku hun bagas pakon hun darat? Ra do ahu mangurupi sidea?’ Pindo ma sanina botou mansaritahon pangalamanni na dear sanggah pataridahkon habujuron bani sindohor, simbalog, hasoman sahorja, atap hasoman sasikolah.​—Ep. 5:9.

15. Mase hita maningon marjaga-jaga?

¹⁵ Anggo hita sihol ase panondangta totap marsinalsal, maningon jaga ma  hita bai ganup panorang. Gati do Jesus pasingatkon susianni, “Jaga ma hanima.” (Mat. 24:42; 25:13; 26:41) Anggo iahap hita dokah ope ‘haparngiton banggal’ atap hamarsikon banggal ai, ra do gabe lang ringgas hita marbarita. (Mat. 24:21) Ujungni, lang be marjaga-jaga hita janah gabe mirlop ma panondangta ai.

16, 17. Aha ma na boi ibahen hita ase totap marjaga-jaga?

¹⁶ Halani roh samborni dunia on, porlu ma hita lambin marjaga-jaga. Anjaha domma ibotoh hita anggo ajal ni dunia on roh do holi bani panorang na dob itontuhon Jahowa. (Mat. 24:42-44) Jadi sanggah paimahon ai, sabar ma hita janah totap ma dingat pangarapanta. Basa ma Bibel bai ganup ari janah tongtong ma martonggo. (1 Ptr. 4:7) Marlajar ma humbani pangalaman ni sanina botou na dob dokah mangidangi Jahowa. Umpamani, basa ma pangalaman na dong bani artikel “Tujuh Puluh Tahun Memegang Punca Baju Seorang Yahudi”, bani Menara Pengawal 15 April 2012, alaman 18-21.

 ¹⁷ Totap ma hita ringgas mangidangi Jahowa. Urupi ma halak na legan, janah marsaor ma pakon sanina botou. Haganupan ai boi mambahen malas uhurta, anjaha lang ihojabhon be domma roh ari ai. (Ep. 5:16) Domma bahat na ihorjahon juakjuak ni Naibata sadokah saratus tahun na parpudi on. Anjaha sonari on lambin bahat do na laho ihorjahon hita. Halani ai lambin marsinalsal ma panondangta!

18, 19. Sonaha sintua boi mangurupi hita ase ringgas mangidangi Jahowa? Patugah ma contohni.

¹⁸ Hassi pe gati hita lepak, boi do hita totap mangidangi Jahowa. Ibere Ia do “sibere-bere bani jolma”, in ma sintua i kuria. (Basa Epesus 4:8, 11, 12.) Jadi sanggah roh sintua hu rumahta, dear ma tangihon podah ni sidea ase maruhur hita.

¹⁹ Dong sada kaluarga i Inggris, na mangindo pangurupion dua sintua halani parsoalan ibagas parhajabuan ni sidea. Parinangon mangkatahon anggo paramangonni lang mambere siusihan ibagas na mangidangi Jahowa. Paramangon pe mangakui anggo ia lang pentar mangajari janah lang mambahen parlajaran Bibel kaluarga. Iurupi sintua ai ma kaluarga ai. Iojur do paramangon ai ase mangusihi pambahenan ni Jesus bani susianni. Iojur do parinangon ase sabar bani paramangonni. Ibere do homa podah bani sidea sonaha boi mambahen parlajaran Bibel rap pakon dua niombahni. (Ep. 5:21-29) Hassi pe lang urah, marusaha do paramangon ai gabe kopala kaluarga na bujur. Janah sintua pe totap mangojur ia ase marpangunsandeian bani Jahowa. Holong ampa habasaron na ipatuduh sintua, boi mangurupi kaluarga nongkan ai.

20. Aha ma gunani anggo marsinalsal panondangta?

²⁰ “Martuah ma ganup na mangkabiari Jahowa, na mardalan bani dalan-Ni.” (Ps. 128:1) Jadi anggo marsinalsal panondangta, gabe martuah ma hita. Halani ai, ajari ma halak ase mananda Naibata, pongkut ma mangurupi kaluarga pakon kuria ase totap marsada, janah totap ma marjaga-jaga. Halak na mangidah parlahounta na madear boi gabe dihut pasangapkon Naibata Jahowa.​—Mat. 5:16.