Sadokah 40 tahun ma si Salomo, bapa ni si Rehabeam gabe raja i Israel. (1 Raj. 11:42) Dob matei bapani ai, laho ma si Rehabeam hun Jerusalem hu Sikem laho gabe raja. (2 Kron. 10:1) Ai mabiar do ia manggantihon bapani halani lang songon bapani ai pentarni? Lang piga dokah dob ia gabe raja, dong ma parsoalan. Janah maningon ma ia mambahen haputusan na patuduhkon maruhur do ia atap lang.

Sadokah on borat do porsanon ni halak Israel. Jadi isuruh sidea ma utusan manjumpahi si Rehabeam laho mangkatahon, “Borat do pasangannami ibahen bapanta. Ai pe pahampung ham ma rodi na borat, na binahen ni bapanta ai pakon pasangan na borat, na tinampeihonni ai bennami, ase ra hanami unduk bamu.”​—2 Kron. 10:3, 4.

Sunsah do ia mamutuskon on. Anggo itangihon ia sidea, lang be boi ia pakon kaluargani marsonang-sonang songon na hinan. Tapi anggo lang ra ia manangihon sidea, ra do sidea gabe manlawan hu bani. Jadi aha ma ibahen ia? Isungkun ma lobei partua-partua. Iojur sidea ma ase ia manangihon halak ai. Tapi isungkun ia do homa hasomanni na maposo anjaha kasar do ia mambalosi sidea. Nini ma, “Borat pe pasangan na tinampeihon ni bapa bani nasiam, tapi lambin boratni ope ai bahenonku; ia bapa lonsing-lonsing do ibahen maminsang nasiam, tapi anggo ahu gansip golang do bahenonku maminsang nasiam.”​—2 Kron. 10:6-14.

Aha ma parlajaranni? Sonari, bahat do i kuria sanina-botou na matua na dob martahun-tahun mangidangi Jahowa. Sidea boi mangurupi hita mambahen haputusan na dear. Jadi tangihon hita ma podah ni sidea.​—Job 12:12.

Ipatumpu si Rehabeam ma tentara laho manlawan na sapuluh suku ai. Tapi isuruh Jahowa ma  sada nabi ai ma si Semaya mangkatahon, “Seng bulih nasiam marporang dompak sanina nasiam, ai ma halak Israel. Mulak ma nasiam ganup hu rumahni bei, ai na marharorohan hun Bangku do na masa on.”​—1 Raj. 12:21-24. *

Ai urah do si Rehabeam mandalankon hata ni Jahowa ai? Domma ihatahon ia uhumanni do sidea marhitei “gansip golang”. Hape, naha ma nini halak anggo lang saud uhumanni sidea na manlawan ai? (Bandingkon 2 Kronika 13:7.) Lang soal sonaha parsahap ni halak, itangihon raja pakon tentarani ai do ‘hata ni Jahowa, laho ma sidea mulak romban hu bani hata ni Jahowa’.

Aha ma parlajaranni? Hassi pe iejek halak hita, tongtong ma tangihon Naibata. Ipasu-pasu Naibata do hita anggo tongtong manangihon-Si.​—5 Mus. 28:2.

Ai ipasu-pasu do ia halani manangihon Jahowa? Eak. Bahat do pasu-pasu sadokah ia mandalankon titah ni Naibata. Umpamani, totap do ia gabe raja ni halak Juda pakon Benjamin. Ipajongjong do homa huta-huta na baru. Janah gabe “toguh tumang” ma harajaonni. (2 Kron. 11:5-12) Dob ai, halani harajaon sapuluh suku mulai manombah gana-gana, bahat ma halak hunjai na roh hu Jerusalem mangihutkon si Rehabeam janah manombah Jahowa.​—2 Kron. 11:16, 17.

Tapi, dobkonsi toguh harajaonni, ihorjahon ia ma na sambor. Lang be itangihon titah ni Jahowa janah isombah do homa gana-gana. Mase sonai? Halak Amon do inang pakon kaluargani. (1 Raj. 14:21) Ai sidea do na mangojur ia mangkorjahon ai? Lang ibotoh hita. Tapi iihutkon halak Israel do parlahouni na sambor ai. Jadi, ipaturut Jahowa ma Raja Sisak hun Masir manaluhon piga-piga huta i Juda hassi pe domma ipatoguh si Rehabeam huta ai.​—1 Raj. 14:22-24; 2 Kron. 12:1-4.

Lambin parah ma situasi sanggah si Sisak pakon tentarani roh hu Jerusalem, mamorangi si Rehabeam. Ijia, roh ma nabi Semaya padaskon hata ni Jahowa bani si Rehabeam ampa kopala ni tentara, “Domma itadingkon hanima Ahu, Ahu pe tadingkonon-Ku ma hanima laho padaskon hubagas tangan ni si Sisak.” Aha ma na ibahen si Rehabeam? Mintor mubah ma ia! Bibel mangkatahon, ‘Ipaunduk kopala-kopala ni halak Israel pakon raja ai ma uhurni, nini sidea ma, “Bonar do Jahowa.”’ Jadi, ipaluah Jahowa ma si Rehabeam, janah Jerusalem lang saud iripaskon.​—2 Kron. 12:5-7, 12.

Dob ai, totap do si Rehabeam mamarentah i harajaon Juda. Paima matei ia, ibere ma bahat hadiah bani ganup anakni. Ra do ibahen ia sonai ase ulang manlawan sidea dompak si Abia, anak na ipilih manggantihon ia gabe raja. (2 Kron. 11:21-23) Pentaran do pambahenanni on marimbangkon na hinan.

Hassi pe marusaha si Rehabeam mangkorjahon na dear, tapi Bibel mangkatahon ‘na jahat do na ihorjahon ia’. Mase? Halani “seng idompakkon uhurni mangindahi Jahowa”. Jadi lang marosuh Jahowa mangidahsi.​—2 Kron. 12:14.

Humbani sarita on, aha ma parlajaranni hubanta? Sipata itangihon si Rehabeam do Naibata janah ihorjahon do na dear bani juakjuak-Ni. Tapi lang orot parhasomananni dompak Jahowa janah lang tongon-tongon ia mangkorjahon harosuh-Ni. Halani ai ma ase lepak pambahenanni janah isombah do gana-gana. Ra do sungkun-sungkun hita: ‘Sanggah idalankon ia sipasingat ni Jahowa, tongon do halani manolsoli hasalahanni ia? Atap halani isuruh halak dassa?’ (2 Kron. 11:3, 4; 12:6) Buktini iulakkon ia do mangkorjahon na sambor. Legan tumang do ia humbani si Daud, ompungni! Hassi pe ongga si Daud mambahen hasalahan, tapi isolsoli ia do ai. Janah tongon-tongon do ia mubah. Sadokah goluhni ihaholongi do Jahowa janah manombah-Si humbani gok ni uhurni.​—1 Raj. 14:8; Ps. 51:3, 19; 63:2.

 Bahat do na iparlajari hita hun sarita on. Porlu do isarihon hita kaluarganta janah bujur bani halak na legan. Tapi ase iharosuhkon Jahowa hita, maningon isombah hita do Ia domu bani harosuh-Ni, janah patoguh ma parhasomananta dompak-Si.

Jadi, maningon toguh ma holongta bani Jahowa. Songon apuy, ase boi totap gara porlu do torus itambah sobanni. Sonai homa hita ase totap mangkaholongi Jahowa, tongtong ma parlajari hita Bibel, rimangi, anjaha totap ma martonggo. (Ps. 1:2; Rom 12:12) On ma na mangojur hita tongtong pamalaskon uhur ni Jahowa. Dob ai, anggo mambahen hasalahan, bahen ma hamubahon. Ulang ma hita songon si Rehabeam. Tapi totap ma hita setia mangidangi Jahowa.​—Jud. 20, 21.