HUDINGAT do bani sogod ni ari martahun-tahun na salpu i Brookings, Dakota Selatan, Amerika Serikat. Borgoh tumang huahap, ra halani laho roh ma musim borgoh. Sanggah ai, borgohan do ahu pakon piga-piga hasoman i sada gudang. Jongjong do hanami i lambung ni sada bak na banggal na igoki bah, janah mangilu tumang bah ai! Husaritahon ma lobei hagoluhanku ase iarusi nasiam mase hanami ijai.

Ahu tubuh bani 7 Maret 1936. Ahu do sietekkan humbani ompat marsanina. Hanami tading i perladangan bagian timur ni Dakota Selatan. Ponting do perladangan ai bani goluhnami tapi sedo ai na siporlunan. Namatorasku ididi gabe Saksi Jahowa tahun 1934. Halani ai mangkorjahon harosuh ni Jahowa do na siporlunan bani sidea. Hamba sidang do si Clarence, bapangku, pakon si Alfred, tulangku bani sada kuria na etek i Conde, Dakota Selatan. (Hamba sidang isobut do ai sonari koordinator badan penatua.)

Taratur do kaluarganami martumpu ampa marbarita hun rumah hu rumah, laho patugahkon pangarapan pasal ari simagira. Siusihan ampa pangajarion humbani namatorasku do na mangurupi ahu ase lambin mangkaholongi Jahowa. Sanggah marumur onom tahun, ahu pakon si Dorothy, botouhu, domma gabe parbarita. Tahun 1943 dihut ma ahu bani Sikolah Pangidangion Kristen na baru ipungkah.

Ponting tumang do kebaktian bennami.  Hudingat ma bani sada kebaktian tahun 1949 i Sioux Falls, Dakota Selatan, marambilan do Sanina Grant Suiter na marjudul “Waktunya Lebih Lama daripada yang Anda Sangka!” Ipatorang ia do ganup halak Kristen na dob ididi ase tongtong marbarita. Dobkonsi ai, huondoskon ma diringku bani Jahowa, janah ididi ma ahu bani kebaktian na mangihut bani 12 November 1949 i Brookings. Sonai ma, songon na hupatugah nongkan ai mase boi hanami borgohan i gudang ai. Na paimahon laho ididi do hanami ibagas bak na banggal ai.

Bani 1 Januari 1952 sanggah marumur 15 tahun, gabe parintis ma ahu. Bibel mangkatahon, “Marsaor pakon halak na pentar, parohkon hapentaran,” janah bahat do halak na maruhur ibagas kaluargangku na mangojur ahu ase marintis. (Pod. 13:20) Gati do ahu marbarita rup pakon si Julius, tulangku na marumur 60 tahun. Hassi pe daoh tuanan ia, tapi malas do uhurnami boi rup mangidangi. Bahat do na huparlajari humbani pangalamanni. Dihut do homa si Dorothy gabe parintis.

Sanggah poso ope ahu, iontang namatorasku do sintua kaliling hu rumahnami. Sintua kaliling na bahat mangurupi ahu, ai ma si Jesse pakon si Lynn Cantwell. Parduli do sidea bangku. Sanggah sidea mangidangi i kuria na dohor hun kurianami, sipata iontang do ahu ase dihut mangidangi rap pakonsi. Malas tumang uhurhu halani ai! Rosuh do ahu gabe parintis janah ringgas marhorja padaskon ambilan na madear songon sidea.

Sintua kaliling na mangihut ai ma si Bud Miller. Sanggah ahu marumur 18 tahun, ia pakon si Joan, parinangonni roh hu kurianami. Tapi sanggah ai, maningon do ahu manjumpahi panitia wajib militer. Rosuh do panitia ai ase hulanggar titah ni Jesus ase totap netral ibagas politik. Tapi sihol do ahu ase boi pararatkon ambilan na madear pasal Harajaon. (Joh. 15:19) Halani ai, laho hupindo ma ase ipaturut ahu totap gabe parbarita na madear.

Malas tumang uhurhu sanggah Sanina Miller, ra dihut manjumpahi panitia ai.  Sedo halak parmela atap parbiar ia. Anjaha dear do ia mangarusi isi ni Bibel. Lambin pangkar ma ahu halani ia mangkasomani ahu. Bani musim milas tahun 1954, itangihon sidea ma pangindoanku ai ase totap gabe parbarita. Halani ai, lambin buei ma panorangku laho mangidangi Jahowa.

Lang piga dokah dobkonsi ai, iontang ma ahu mangidangi hu Betel, i Perladangan Menara Pengawal i Staten Island, New York. Tolu tahun ma ahu mangidangi ijai. Bahat do pangalaman na hudapot halani rup marhorja pakon sanina ampa botou na maruhur.

Dong do homa stasiun radio WBBR i perladangan i Pulou Staten. Igunahon Saksi Jahowa do stasiun ai humbani tahun 1924 ronsi tahun 1957. Pitah 15 ronsi 20 anggota kaluarga Betel hansa na marhorja ijai. Ai pe bahatan do na maposo janah lang marpangalaman. Tapi adong sada sanina na mininakan ai ma si Eldon Woodworth na rup marhorja pakon hanami. Usih songon bapa do ia janah bahat do na iajarhon bennami. Sipata, sanggah marsalisih hanami, Sanina Woodworth mangkatahon anggo Jahowa manggunahon juakjuak ni na lang gokan dear laho mangkorjahon harosuh-Ni.

Sanina Frederick W. Franz pe dihut do mangurupi hanami. Maruhur janah tangkas do ia mangarusi isi ni Bibel. Parduli do ia bennami. Si Harry Peterson do na marmasak bennami. Urahan do sonai mandilosi, marimbangkon mamakei goran ni na sasintongni, ai ma Papargyropoulos. Na mininakan do homa ia, janah ringgas marbarita. Hassi pe pongkut marhorja i Betel, tapi totap do ringgas ia marbarita. Dong maratus majallah na ibagihon ia tiap bulan. Dear do homa ia mangarusi isi ni Bibel, janah mambalosi bahat sungkun-sungkunnami.

I perladangan, ipasirsir hanami do buah ampa sayur janah pamasukkon ai hubagas kaleng. Tiap tahun, hira-hira 42.600 liter ma buah pakon sayur na iboan bani  kaluarga Betel. Rup marhorja do ahu pakon si Etta Huth, botou na maruhur. Ia do na mangajari hanami sonaha pamasukkon buah ampa sayur ai hubagas kaleng. Roh do homa botou na dohor hunjai laho mangurupi hanami, janah si Etta ma na mambagi tugas bani sidea. Hassi pe pandei botou on, tapi hormat do ia bani ganup sanina na mangawasi perladangan ai. Gabe siusihan na madear ma ia bennami.

Sada humbani bahat botou na roh mangurupi hanami ai ma si Angela Romano. Si Etta do na mangurupisi marlajar Bibel. Marhajabuan ma ahu pakon si Angela bani April 1958. Malas do uhurnami rup mangidangi Jahowa sadokah 58 tahun. Tenger ni uhur ni si Angela mambahen toguh partongah jabuannami. Maruhur do ia, janah sanggah dong hasunsahan pos do uhurhu hu bani.

Tahun 1957, sanggah ijual gedung WBBR i Pulou Staten, mangidangi ma ahu tongkin i Betel Brooklyn. Dob marhajabuan ahu pakon si Angela, kaluar ma ahu hun Betel. Sadokah tolu tahun, gabe parintis ma hanami i Pulou Staten. Sanggah ai, marhorja do ahu bani sada stasiun radio na margoran WPOW.

Sederhana do pargoluhannami ase boi mangidangi bai ianan na mamorluhon. Tahun 1961 ijalo hanami ontangan ase mangidangi gabe parintis istimewa hu Falls City, Nebraska. Tapi lang piga dokah dobkonsi ai, iontang do hanami hu Lansing Selatan, New York, laho dihut bani Sekolah Pelayanan Kerajaan sadokah sabulan. Malas do uhurnami halani bahat pangajarion na ijalo hanami ijai. Iagan hanami dobkonsi ai, mulak do use hanami hu Nebraska, hape itugaskon do hanami gabe misionaris i Kamboja! Malas do uhurnami halani i nagori na jenges i Asia Tenggara ai, bahat do na baru na ididah ampa iparlajari hanami. Rosuh tumang do hanami patugahkon pasal Harajaon ni Naibata bani halak na ijai.

Tapi, mubah ma situasi politik i Kamboja, halani ai maningon do hanami hu Vietnam Selatan. Dob dua tahun ijai, boritan ma ahu janah maningon mulak hu Amerika Serikat. Dokah do ahu boritan. Dobkonsi malum ahu, marintis ma use hanami.

Bulan Maret 1965, gabe sintua kaliling ma hanami. Ahu pakon si Angela, malas do uhurnami mangidangi gabe sintua kaliling ampa pengawas distrik sadokah 33 tahun. Janah dihut do hanami mangurupi i kebaktian. Rosuh tumang do ahu mangkorjahon ai halani tongtong do hupaima-ima ganup kebaktian. Bani piga-piga tahun irohi hanami do kuria-kuria i New York City, ampa kebaktian na ibahen i Stadion Yankee.

Bahat do tugas na ijalo hanami, na baru ampa na borat. Bani tahun 1995, ipindo ma ahu ase mangajari i Sekolah Pelatihan Pelayanan. Dob tolu tahun, iontang ma hanami  hu Betel. Malas tumang uhurhu boi mulak use hu Betel dobkonsi 40 tahun. Ijai do mulani ahu mangidangi sepenuh waktu khusus. Ongga do ahu mangidangi i Bagian Parambilanon ampa gabe instruktur bani buei sikolah na ipasirsir organisasi. Tahun 2007, ibahen Pangurus Pusat ma Departemen Sekolah-Sekolah Teokratis na mangatur ganup sikolah na ibahen Betel, janah ongga do ahu gabe pengawas ni departemen ai sadokah piga-piga tahun.

Na baru on, bahat do parubahan ibahen bani sikolah na iatur Betel. Tahun 2008 ipungkah ma Sikolah bani Sintua ni Kuria. Dob dua tahun, lobih humbani 12.000 sintua na marlajar i Patterson ampa i Betel Brooklyn. Sonari sikolah sisonai domma ibahen bani buei ianan. Tahun 2010, Sekolah Pelatihan Pelayanan iubah gabe Sekolah Alkitab bagi Saudara Lajang, janah dong homa ibahen sikolah na baru ai ma Sekolah Alkitab bagi Pasangan Kristen.

Bulan September 2014, ipasada ma dua sikolah ai gabe Sikolah bani Parbarita Harajaon. Na boi dihut bani sikolah ai, sidea na marhajabuan ampa sanina pakon botou na lape marhajabuan. Malas do uhur ni ganup hasomanta i sab dunia manangar ai, janah paimahon ase ibahen homa sikolah ai bai ianan ni sidea. Martarima kasih do ahu halani boi pajumpah pakon buei halak na ra mambere dirini ase boi dihut bani sikolah ai.

Anggo hurimangi use sonaha hagoluhanku sanggah paima ididi i gudang na borgoh ai ronsi sonari, martarima kasih do ahu bani Jahowa halani boi jumpah pakon bahat hasoman na maruhur. Halani sidea do ahu lambin mananda Jahowa janah mangidangi-Si. Adong na tuanan atap na posonan, anjaha legan do sukunami. Tapi boi huidah anggo sidea tongon-tongon mangkaholongi Jahowa humbani parlahou ni sidea. Martarimah kasih do ahu halani boi marlajar humbani bahat hasoman na maruhur i organisasi ni Jahowa.