1. Mase ipilih si Kain haputusan na salah, janah sonaha do ujungni?

SI KAIN maningon do mambahen haputusan bani diri ni sandiri. Irajai do pingkiranni ase dear ujungni, atap ipaturut do pingkiranni na manrajai, janah sambor ma ujungni. Bibel patugahkon anggo si Kain mambahen haputusan na salah. Ujungni matei ma si Abel, anggini ai anjaha ma seda ma parhasomananni pakon Naibata Jahowa.—1 Mus. 4:3-16.

2. Mase porlu mambahen haputusan na dear?

² Haganup hita maningon do mambahen haputusan. Ganup haputusan lang sarupa pontingni. Marpangkorhon do haputusan na ibahen bani hagoluhanta. Anggo dear haputusan na ibahen hita, lang sai bahat be parsoalanta janah lambin damei ma hagoluhanta bei. Tapi anggo salah haputusan na ibahen hita, gabe bahat ma parsoalanta janah mambahen hita maretek ni uhur.—Pod. 14:8.

3. (a) Aha na maningon ihaporsayai hita ase boi mambahen haputusan na maruhur? (b) Sungkun-sungkun aha na laho iulas hita?

 ³ Aha do na mangurupi hita mambahen haputusan na maruhur? Porlu do hita porsaya bani Naibata, anggo Ia mambere hapentaran hubanta ase boi mambahen haputusan na dear. Hita maningon do porsaya bani podah-Ni na dong bani Bibel. (Basa Jakobus 1:5-8.) Anggo lambin dohor hita hu Bani ampa mandalankon podah-Ni, on mangurupi hita gabe porsaya anggo Jahowa sihol mambere sidearan hubanta. Anjaha paima mambahen haputusan, maningon ipindahi hita podah humbani Bibel. Tapi, sonaha do bahenonta ase boi tongtong mambahen haputusan na maruhur? Ai boi do iubah hita haputusanta?

4. Pilihan aha do na maningon ibahen si Adam, anjaha sonaha ujungni?

⁴ Humbani na basaia, manisia maningon do mambahen haputusan. Umpamani, si Adam maningon mamilih laho manangihon Jahowa atap si Hawa, parinangonni. Si Adam mamilih manangihon si Hawa, halani ai salah ma haputusan na binahenni. Jadi, iusir Jahowa ma sidea hun pohon Eden janah matei ma ujungni sidea. Sonari, hita pe mangahapkon buei hasunsahan halani haputusan na ibahen si Adam.

5. Sonaha ma namin pangahapta sanggah mambahen haputusan?

⁵ Buei halak marpingkir, dearan do anggo sidea lang pala mambahen haputusan. Ra do pangahap ni nasiam pe sonai. Tapi, dingat ma anggo Jahowa lang manompa hita songon robot na seng boi marpingkir atap mambahen pilihan. Jahowa sihol ase hita mambahen pilihan. Halani ai, ibere do hubanta podah-Ni laho mangurupi ase maruhur mambahen haputusan. Marguna do hubanta anggo hita na mambahen pilihan. Idah hita ma piga-piga contoh.

6, 7. Haputusan aha do na maningon ibahen halak Israel, anjaha mase sunsah sidea mambahen haputusan ai? (Idah gambar bani alaman 9.)

⁶ Sanggah tading i Tanoh Parpadanan, halak Israel maningon mamilih manombah Jahowa atap naibata na legan. (Basa Josua 24:15.) Songon na urah do pilihan ai. Tapi, pilihan ni sidea boi parohkon hagoluhan atap hamatean. Bani panorang ni Panguhum pe, lalab do halak Israel mambahen pilihan na salah. Lang be Jahowa na isombah sidea tapi gana-gana do. (Panguh. 2:3, 11-23) Dob ai, bani panorang ni nabi Elias, juakjuak ni Naibata pe maningon do mamilih manombah Jahowa atap Baal. (1 Raj. 18:21) Sasintongni, torang do na ija na laho ipilih.  Halani domma ibotoh anggo isombah sidea Jahowa, ai do pilihan na sidearan. Anjaha halak na maruhur tontu lang ra manombah gana-gana. Tapi, sidea lang boi mambahen haputusan. Bibel mangkatahon “mengkat-engkat” do halak Israel bani dua pandapot. Halani ai, iojur si Elias ma sidea ase manombah Naibata Jahowa.

⁷ Mase sunsah halak Israel mambahen haputusan na maruhur? Parlobei, halani lang porsaya sidea bani Jahowa janah lang manangihon-Si. Sidea lang ra marlajar pasal Jahowa ampa sonaha do paruhuran-Ni. Anggo idalankon sidea ai, boi ma sidea mambahen haputusan na dear. (Ps. 25:12) Na paduahon, ipakahou bangsa-bangsa na legan do bangsa Israel, janah sidea do na mambahen haputusan bani halak Israel. Ujungni, gabe iirikkon bangsa Israel ma bangsa ai janah isombah sidea ma gana-gana. Hape domma dokah ipasingat Jahowa bangsa Israel pasal on.—2 Mus. 23:2.

8. Sipasingat aha do na dapot hita humbani halak Israel?

⁸ Aha na masa bani halak Israel mangurupi hita ase mambotoh, maningon do mangihutkon Hata ni Naibata sanggah mambahen haputusan. Galatia 6:5 pasingatkon anggo ganup halak martanggung jawab do bani haputusanni bei. Halani ai, ulang ma halak na legan na mambahen haputusan hubanta. Ganup hita maningon do mangarusi sintong do na ihatahon Jahowa, janah dalankon ma ai.

9. Mase lang dear anggo halak na legan na manontuhon pilihanta?

⁹ Sonaha halak na legan boi mambahen haputusan hubanta? Anggo ipaturut hita halak na legan mambahen haputusan na lepak hubanta. (Pod. 1:10, 15) Tapi, lang dear sisonai. Bahen ma haputusan mangihutkon panggora ni uhur na ilatih domu bani Bibel. Anggo halak na legan do manontuhon pilihanta, doskon na mangirikkon sidea do hita. Parohkon mara do ai.

10. Sipasingat aha do na ibere si Paulus bani halak na i Galatia?

¹⁰ Ipasingat si Paulus do bani halak na i Galatia, ase ulang ipaturut halak na legan manontuhan pilihan ni sidea. (Basa Galatia 4:17.) Dong piga-piga halak i Galatia na marusaha mambahen haputusan bani hasoman sahaporsayaonni. Mase? Halani gijang do uhur ni sidea janah sihol ase sidea na iirikkon sedo apostel. Sidea lang mangkargai hak ni hasonmanni na i kuria laho mambahen pilihan sandiri.

11. Sonaha hita mangurupi na legan sanggah sidea mambahen haputusan?

¹¹ Si Paulus mambere siusihan na dear hubanta. Ibotoh ia, dong do  hak ni hasomanni na i kuria laho mambahen pilihan janah ihargai do ai. (Basa 2 Korint 1:24.) Sonari, ganup sintua mangusihi si Paulus sanggah mambere podah bani sasahalak na laho mambahen haputusan. Malas do uhur ni sidea patugahkon podah hun Bibel hubani hasoman sahaporsayaon. Dear do sidea mangurupi hasoman i kuria sanggah mambahen haputusan, halani mangkorhon do haputusan ai bani goluhni bei. Aha do parlajaranni? Sanggah hasomanta mambahen pilihan, hita boi patugahkon podah hun Bibel na sosok bani situasi ni sidea. Anjaha ganup halak, adong do hakni mambahen haputusan, janah martanggung jawab bani haputusan ai. Anggo sidea mambahen haputusan na maruhur, sidea do na mandapot guna. Halani ai lang dong hakta laho manontuhon pilihan bani hasomanta.

12, 13. Mase lang dear anggo hita mambahen haputusan sanggah manggila atap pe maretek ni uhur?

¹² Sonari on bahat do halak mangihutkon uhurni mambahen haputusan. Tapi parohkon mara do on. Bibel pasingatkon, ase ulang marpangunsandeian bani uhur atap pingkiranta. (Pod. 28:26) Hita lang boi porsaya bani uhurta halani “sipaoto-oto do uhur ni jolma, lobih humbani haganup na legan; jahat tumang”. (Jer. 17.9) Bahat do contoh bani Bibel na patuduhkon sambor do ujungni anggo marpangunsandeian bani uhurni sandiri. (1 Raj. 11:9; Jer. 3:17; 13:10) Aha do na masa anggo hita mangihutkon pingkiranta sanggah mambahen haputusan?

¹³ Iparentahkon Jahowa do hita ase mangkaholongi Ia humbani gok ni  uhurta, anjaha mangkaholongi hasomanta songon dirinta sandiri. (Mat. 22:37-39) Tapi maningon jaga do hita, halani songon na ipatugah bani ayat i paragrap 12, parohkon mara do anggo hita marpangunsandeian bani pingkiranta sandiri. Umpamani, sanggah sasada halak marah, tontu lang boi ia mambahen haputusan na dear. (Pod. 14:17; 29:22) Anjaha, sanggah sasada halak maretek ni uhur, ia pe lang boi mambahen haputusan na maruhur. (4 Mus. 32:6-12; Pod. 24:10) Jadi, sanggah mambahen haputusan, Hata ni Naibata ma na ihutkononta, sedo pingkiranta sandiri.—Rom 7:25.

14. Hunja ibotoh hita anggo sipata porlu do haputusan iubah?

¹⁴ Porlu do hita mambahen haputusan na maruhur. Tapi sipata porlu do iubah halak na maruhur haputusan na dob ibahenni. Naibata Jahowa mambere siusihan na madear. Pardiateihon ma na ibahen Jahowa bani halak Ninive bani panorang ni si Jona, “Dob ididah Jahowa pambahenan ni sidea ai, ai ma na mulak ai sidea humbani dalan ni sidea na bajan ai, gabe isolsoli Naibata ma diri-Ni pasal hamagouan, na nilumbahon-Ni sibahenon-Ni bani sidea; jadi seng be saud ibahen.” (Jon. 3:10) Sanggah ididah Jahowa mubah halak Ninive janah lang be mangkorjahon na jahat, iubah Naibata Jahowa ma haputusan-Ni. On pataridahkon paridop ni uhur janah martoruh ni uhur do Jahowa ai. Lang songon manisia, tongtong do Jahowa mambahen haputusan na dear, hassi pe sanggah marringis Ia.

15. Mase porlu iubah hita haputusanta?

¹⁵ Sipata, halani mubah situasi, dear do anggo hita pe mangubah haputusanta. Dingat ma, Jahowa pe ongga do mangubah haputusan-Ni. (1 Raj. 21:20, 21, 27-29; 2 Raj. 20:1-5) Hita porlu mangubah haputusan sanggah dong hatorangan na baru. Pardiateihon ma Raja Daud. Ia mambahen haputusan pasal si Mepiboset, pahompu ni si Saul sanggah manangar hatorangan na lang sasintongni. Tapi, dob ibogei na sasintongni, mintor iubah ma haputusan ai. (2 Sam. 19:24-29) Sipata, dear do anggo hita mambahen sisonai.

16. (a) Podah aha do na boi mangurupi hita sanggah mambahen haputusan? (b) Mase porlu ipingkiri hita haputusan na dob salpu, janah sonaha hita mangkorjahon ai?

¹⁶ Bibel patugahkon ase hita ulang tarolos sanggah mambahen haputusan na ponting. (Pod. 21:5) Anget lobei pingkiri hatorangan na adong ase boi mambahen haputusan na maruhur. (1 Tes. 5: 21) Paima mambahen haputusan, maningon do kopala kaluarga mangindahi podah hun Bibel atap  hun publikasinta. Dear do homa anggo itangihon pandapot ni ganup anggota kaluarga. Dingat ma, ongga do isuruh Jahowa ase itangihon si Abraham parinangonni. (1 Mus. 21:9-12) Sonai homa sintua, porlu mangindahi hatorangan na ipasirsir organisasinta. Sanggah dong tugah-tugah na baru, na mambahen sidea porlu mangubah haputusanni, maningon sirsir do sintua mangihutkon ai, janah lang haru anggo holi lang ihargai hasomanni. Anggo maruhur anjaha martoruh ni uhur do sintua, ra do sidea mangubah pingkiranni ampa haputusan na dob ibahen sanggah ai ihaporluhon. Anjaha dear do anggo hita mangusihi sidea. On mambahen dong hasadaon ampa hadameion ibagas kuria.—Lah. 6:1-4.

17. Aha na boi mangurupi hita ase mambahen haputusan na dear?

¹⁷ Sipata dong haputusan na ponting tumang. Contohni, maningon marhajabuan do atap lang, ise do halakni, janah gabe parintis do atap lang. Jadi, sanggah mambahen haputusan pasal ai, maningon do lobei ipingkiri hita sonaha do situasinta, janah martonggo mangindo pangurupion ni Jahowa. Tongon porlu do panorang. Tapi ase dear haputusanta, maningon do hita porsaya bani Jahowa janah mangihutkon tugah-tugah-Ni. (Pod 1:5) Ibere Jahowa do hubanta podah hun Bibel. Jadi, porlu do hita mambasa anjaha martonggo mangindo panogu-noguon humbani Jahowa. Iurupi Jahowa do hita ase mambahen haputusan domu bai harosuh-Ni. Paima mambahen haputusan sungkun ma dirinta: Humbani haputusanku, ai taridah do anggo ahu mangkaholongi Jahowa? Ai parohkon hadameion ampa malas ni uhur do on bani kaluargangku? Ai boi do taridah anggo ahu halak na bujur janah sabar?

18. Mase marosuh Jahowa anggo hita sandiri na mambahen pilihan?

¹⁸ Lang ongga ipaksa Jahowa ase hita mangidangi ampa mangkaholongi-Si. Tapi, Ia sihol ase humbani uhurta sandiri ma hita mamilih ai. Ia mangkargai haputusanta na laho mangidangi-Si. (Jos. 24:15; Par. 5:3) Marosuh do Jahowa anggo hita mambahen haputusan domu bani podah-Ni. Anggo porsaya do hita bani tugah-tugah-Ni janah mandalankon ai, boi do hita mambahen haputusan na maruhur. Anjaha taridah ma anggo hita halak na toguh bai ganup dalanta.—Jak. 1:5-8; 4:8.