1. Aha do na mintor ipatugah Jahowa dobkonsi mardousa si Adam pakon si Hawa?

IBOTOH si Adam do anggo ulog lang boi marsahap. Jadi sanggah itangar si Adam marsahap ulog ai bani si Hawa, ra do ibotohni adong na legan na marsahap marhitei ulog ai. Tapi lang ibotoh sidea ise do ia. (1 Mus. 3:1-6) Hassi pe sonai, itangihon sidea do ia janah manlawan dompak Jahowa, Bapa ni sidea. (1 Tim. 2:14) Dob ai, mintor ipatugah Jahowa ma ise do na marsahap ai. Janah marjanji do Ia laho manripaskon munsuh na jahat ai. Ipasingat Jahowa do homa humbani ari ai, ihasogamkon munsuh ai do holi ganup halak na mangkaholongi Jahowa.​—1 Mus. 3:15.

2, 3. Sanggah lape roh Mesias, mase otik dassa na ipatugah Jahowa pasal Setan?

² Jahowa lang ongga patugahkon ise do goran ni malekat na manlawan ai. * Tapi 2.500 tahun dobkonsi ai, ipatugah Jahowa ma ise do malekat na jahat ai. (Job 1:6)  Isobut do ia “Setan”, artini “Panlawan”. Bani Kitab-Kitab Ibrani Terjemahan Dunia Baru, pitah tolu buku dassa na dong isobut Setan, ai ma bani buku 1 Kronika, Job, pakon Sakaria. Sanggah lape roh Mesias, mase otik dassa na ipatugah pasal Setan?

³ Kitab-Kitab Ibrani isuratkon laho mangurupi halak ase mananda Mesias. Halani ai ma lang bahat ipatugah Jahowa pasal Setan bani buku-buku ai. (Luk. 24:44; Gal. 3:24) Tapi dobkonsi roh Mesias, igunahon Jahowa ma ia pakon susianni laho patugahkon bahat pasal Setan ampa malekat na mangirikkonsi. * Holi, igunahon Jahowa ma Jesus ampa halak na iminaki ai laho manripaskon Setan pakon ganup na mangirikkonsi.​—Rom 16:20; Pangk. 17:14; 20:10.

4. Mase ulang pala mabiar hita bani Sibolis?

⁴ Songon “singa na maraum” do Setan atap pe Sibolis ai nini apostel Petrus. Janah si Johannes mangkatahon Setan ai “ulog” ampa “naga”. (1 Ptr. 5:8; Pangk. 12:9) Hassi pe sonai ulang mabiar hita bani Sibolis halani lang haganupan boi ibahenni. (Basa Jakobus 4:7.) Dong do homa Jahowa, Jesus, ampa malekat na tongtong mangurupi hita ase monang manlawan Sibolis. Hassi pe sonai, porlu do iulas hita tolu sungkun-sungkun na ponting on: Sadiha banggal do kuasa ni Sibolis ai? Sonaha do ia pakahouhon buei halak? Janah aha do na lang tarbahen ia? Ulas hita ma balosni janah aha ma parlajaranni hubanta.

5, 6. Mase lang tarbahen pamarentahan ni manisia mambahen na sidearan?

⁵ Bahat do malekat na mangirikkon Sibolis laho manlawan dompak Naibata. Paima roh Bah na Sumbang, iarahkon Sibolis ai ma malekat-malekat na legan ase marsaor pakon naboru i tanoh on. Bani Bibel, ihatahon do songon sapartolu bilangan ni bintang do buei ni malekat na mangirikkon Sibolis. (1 Mus. 6:1-4; Jud. 6; Pangk. 12:3, 4) Jadi dobkonsi itadingkon malekat-malekat na jahat ai Naibata, gabe Sibolis ma na manrajai sidea. Dob ai, ibahen ia ma organisasini songon Harajaon ni Naibata. Ia ma na gabe raja, anjaha ibere ia ma kuasa bani malekat-malekat na jahat ai laho manrajai tanoh on.​—Ep. 6:12.

⁶ Organisasi ni Sibolis on do na manrajai pamarentahan i tanoh on. Mase ihatahon sonai? Halani ongga do ia patuduhkon bani Jesus “sagala harajaon na i dunia on”, dob ai nini ma, “Bamu pe hubere ganup kuasa on ampa hasangaponni ai, ai domma bangku iondoskon  ai, anjaha hubere do ai hubani halak harosuh ni uhurhu.” (Luk. 4:5, 6) Halani ai, hassi pe dong pamarentah na bujur, tapi lang bahat na boi ibahen sidea laho mangurupi rayatni.​—Ps. 146:3, 4; Pangk. 12:12.

7. Sobali marhitei pamarentah, sonaha ugama palsu ampa bisnis ni dunia on igunahon Sibolis laho pakahouhon buei halak? (Tonggor ma gambar bani alm. 15.)

⁷ Sibolis pakon malekatni manggunahon ugama palsu laho pakahouhon “haganup dunia on”. (Pangk. 12:9) Umpamani, iajarhon do na lang tongon pasal Jahowa. Anjaha marusaha do sidea ase lang ibotoh halak goran ni Naibata. (Jer. 23:26, 27) Jadi iagan bahat halak ma sidea mangidangi Naibata, hape sasintongni malekat na jahat ai do na isombah sidea. (1 Kor. 10:20; 2 Kor. 11:13-15) Leganni ai, igunahon Sibolis do bisnis ni dunia on ase buei halak marpingkir arta pakon duit do na boi parohkon hatuahon. (Pod. 18:11) Halani ai, bahat ma halak pitah mangindahi “Mammon” atap Habayakon, sedo mangidangi Naibata. (Mat. 6:24) Janah hassi pe sasada halak mangkaholongi Jahowa, tapi anggo arta do na siporlunan bani, boi do holong ai gabe magou.​—Mat. 13:22; 1 Joh. 2:15, 16.

8, 9. (a) Aha ma na iparlajari hita humbani si Adam, si Hawa pakon malekat-malekat na jahat ai? (b) Aha ma gunani banta halani mambotoh Sibolis do na manrajai dunia on?

⁸ Dong dua parlajaran na ponting na dapot hita humbani si Adam, si Hawa pakon malekat-malekat na jahat ai. Na parlobei, maningon sada do ipilih hita, mangapiti Jahowa do atap Sibolis. (Mat. 7:13) Na paduahon, otik dassa gunani anggo mangirikkon Sibolis. Umpamani, si Adam pakon si Hawa boi manontuhon aha do na sintong ampa na lepak bani dirini sandiri. Anjaha ganup malekat na jahat ai pe boi markuasa bani raja-raja i tanoh on. (1 Mus. 3:22) Tapi lang dokah ai martahan! Sasintongni tongtong do sambor ujungni anggo mangirikkon Sibolis.​—Job 21:7-17; Gal. 6:7, 8.

⁹ Aha ma gunani hubanta halani mambotoh Sibolis do na manrajai dunia on? Ibotoh hita ma lang boi hita dihut bani politik ni dunia on. Tongon isuruh Jahowa do hita ase hormat bani pamarentah. (1 Ptr. 2:17) Janah idalankon hita do aturan na ibahen sidea asal ma aturan ai lang marlawanan pakon aturan ni Naibata. (Rom 13:1-4) Hita pe lang ra dihut bani kampanye politik. (Joh. 17:15, 16; 18:36) Leganni ai, domma ibotoh hita marusaha do Sibolis ase ulang ibotoh halak goran ni Naibata, janah ipasambor-sambor do goran ai. Halani ai, lambin ringgas ma hita marbarita patugahkon hasintongan. Megah do hita igoran Saksi Jahowa. Anjaha holong bani Naibata do siporlunan  banta marimbangkon habayakon.​—Jes. 43:10; 1 Tim. 6:6-10.

10-12. (a) Sonaha Sibolis pakahouhon malekat-malekat? (b) Aha do parlajaranni humbani malekat-malekat ai?

¹⁰ Bahat do akal-akal ni Sibolis laho pakahouhon na legan. Sipata ibahen do umpan, tapi sipata ibahen ma parlajouan ase ra sidea mangkorjahon harosuhni.

¹¹ Ra do dokah ipardiateihon Sibolis aha na iharosuhkon malekat-malekat na legan. Dob ai, ibahen ia ma naboru i tanoh on songon umpan ase malekat-malekat ai mangkorjahon na lepak. Ujungni marsaor ma sidea pakon naboru-naboru ai. Tubuh ma niombah ni sidea raksasa na jahat tumang. (1 Mus. 6:1-4) Leganni ai, ra do marjanji Sibolis bani malekat na jahat ai anggo sidea boi manrajai dunia on. Ra do on ibahen Sibolis laho manlanglangi ase lang saud harosuh ni Jahowa pasal ‘ginompar ni naboru ai’. (1 Mus. 3:15) Tapi ibahen Jahowa ma Bah na Sumbang, ase ulang saud harosuh ni Sibolis pakon malekat-malekatni.

¹² Hunjon, dong na boi iparlajari hita. Sonari on domma bahat na kahou ibahen Sibolis marhitei rosuh-rosuh ni daging ampa gijang ni uhur. Songon malekat-malekat na jahat ai, hassi pe domma dokah sidea i surga rap pakon Jahowa, tapi ipaturut sidea do hisap-hisap ni daging gabe lambin gogoh ibagas uhurni. Sonai homa hita, hassi pe domma dokah mangidangi Jahowa, boi do homa rosuh-rosuh ni daging marurat ibagas uhurta. (1 Kor. 10:12) Jadi maningon gati ma ipareksa hita uhurta. Janah mintor podas ma hita mangambukkon pingkiran na salah!​—Gal. 5:26; basa Kolosse 3:5.

13. Aha ope umpan na igunahon Sibolis, anjaha sonaha ase ulang hona hita?

¹³ Dong homa umpan na legan ibahen  Sibolis. Marhitei ugama palsu ampa hiburan, ibahen ia do ase bahat halak marosuh bani hadatuon atap begu-begu. Hiburan ai boi do humbani film, game, atap na leganni. Sonaha ase ulang masuk hita hubagas tirangkap ni Sibolis ai? Lang dong ibere organisasi daptar hiburan na dear pakon na sambor. Jadi maningon latih hita ma panggora ni uhurta ase boi mangihutkon prinsip ni Bibel sanggah mamilih hiburan. (Heb. 5:14) Janah ulang ma “marsipahulah-hulah” holongta bani Jahowa. (Rom 12:9) Anggo halak sipahulah-hulah, pitah marsahap dassa ibotoh, tapi lang ihorjahon. Halani ai, sanggah mamilih hiburan, pingkirhon ma on, ‘Ai hudalankon do prinsip na huajarhon bani na legan sanggah mamilih hiburan? Sonaha do pangahap ni sidea mangidah hiburan na hupilih on?’ Anggo ihorjahon hita prinsip ni Bibel na iajarhon hita bani halak na legan, umpan ni Sibolis ai lang boi hona hubanta.​—1 Joh. 3:18.

14. Parlajouan aha do na ibahen Sibolis hubanta, janah sonaha ase hita boi totap toguh?

¹⁴ Ibahen Sibolis do parlajouan laho pabiar-biarhon hita ase itadingkon hita Jahowa. Umpamani, ra do igunahon ia pamarentah laho manlarang hita marbarita. Dob ai marhitei hasomanta sasikolah atap pe saparhorjaan, ibahen ia ma ase sidea manrisai hita halani mandalankon prinsip ni Bibel. (1 Ptr. 4:4) Parlajouan na legan ra do humbani kaluarganta na lang Saksi. Songon na bujur sidea hubanta, hape sura-surani sihol ase hita ulang be martumpu. (Mat. 10:36) Halani ai sonaha ase hita boi totap toguh? Dingat ma Sibolis do munsuhta. Jadi ulang pala tarsonggot hita halani parlajouan sisonai. (Pangk. 2:10; 12:17) Dingat ma homa na ihatahon Sibolis anggo hita lang be ra mangidangi Jahowa sanggah dong parlajouan. (Job 1:9-11; 2:4, 5) Halani ai tongtong ma hita mangindo pangurupion bani Jahowa ase boi totap toguh. Pos ma uhurta seng  ongga tadingkonon ni Jahowa hita.​—Heb. 13:5.

15. Ai boi do ipaksa Sibolis hita laho mangkorjahon harosuhni?

¹⁵ Lang boi ipaksa Sibolis halak mangkorjahon aha na lang iharosuhkon sidea. (Jak. 1:14) Sasintongni bahat halak lang mambotoh anggo sidea mangkorjahon harosuh ni Sibolis. Tapi dobkonsi marlajar Bibel, maningon ipilih sidea ma mangapiti Jahowa do atap Sibolis. (Lah. 3:17; 17:30) Anggo totap hita manangihon Naibata, seng tarbahen Sibolis laho pakahouhon hita.​—Job 2:3; 27:5.

16, 17. (a) Aha ope na lang boi tarbahen Sibolis pakon malekatni? (b) Mase ulang mabiar hita marsora sanggah martonggo bani Jahowa?

¹⁶ Dong ope na lang boi tarbahen Sibolis pakon malekat-malekatni. Umpamani, lang dong ipatugah Bibel anggo Sibolis boi mambotoh uhur ampa pingkiranta. Pitah Jahowa pakon Jesus do na boi. (1 Sam. 16:7; Mrk. 2:8) Anggo sonai, ai mabiar do hita marsora sanggah martonggo halani nini uhurta igunahon Sibolis ma ai laho manlajou hita? Lang sonai. Dingat ma: Ibotoh hita do anggo Sibolis boi mangidah hita. Tapi lang mabiar hita mangkorjahon na dear sanggah mangidangi Jahowa. Sonai homa ma, ulang mabiar itangar Sibolis hita sanggah martonggo. Bahat do contoh ibagas Bibel na patugahkon anggo juakjuak ni Naibata marsora do sidea sanggah martonggo. Janah lang ongga ihatahon mabiar sidea itangar Sibolis ai. (1 Raj. 8:22, 23; Joh. 11:41, 42; Lah. 4:23, 24) Jadi anggo ibahen hita na sidearan laho mangidangi Jahowa, pos ma uhurta sai ipaluah Jahowa do hita humbani Sibolis.​—Basa Psalmen 34:8.

¹⁷ Jadi porlu do ibotoh hita ise do munsuhta, tapi ulang pala mabiar hita hu bani. Hassi pe lang gokan dear hita, marhitei pangurupion ni Jahowa, boi do hita manaluhon Sibolis! (1 Joh. 2:14) Anggo ilawan hita ia, maporus ma ia hun banta. (Jak. 4:7; 1 Ptr. 5:9) Sonari on, rosuh tumang do Sibolis manlajou na maposo. Halani ai, sonaha ase sidea boi monang manlawan Sibolis? Bani artikel na mangihut, iulas hita ma ai.