Na Maposo—Lawan ma Sibolis
“Pakei nasiam ma pakeian sinjata na humbani Naibata, ase boi tahan nasiam dompak akal-akal ni sibolis in.”—EP. 6:11.
1, 2. (a) Ai boi do na maposo monang manlawan Sibolis pakon malekatni? (Tonggor ma gambar bani alm. 21.) (b) Aha do na laho iulas hita?
ISARUPAHON apostel Paulus do halak Kristen songon tentara na laho mamorangi munsuh. Tapi sedo jolma munsuhta ai. Hita marporang manlawan Sibolis pakon malekat-malekatni. Jago tumang do sidea halani domma marribu tahun marporang. Halani ai ra do iahap hita tarlobih ma na maposo lang boi manaluhon sidea. Ai tongon do ai? Lang! Marhitei pangurupion ni Jahowa boi do na maposo monang. Songon tentara na jago, sidea ‘mamakei sinjata na humbani Naibata’ ase sirsir laho marporang.—Basa Epesus 6:10-12.
2 Ra do igunahon si Paulus usihan ai halani gati mangidah tentara Rom na mamakei baju porang ampa sinjatani. (Lah. 28:16) Bani artikel on iulas hita ma ganup sinjata ai. Janah ididah hita ma aha do na ihatahon na maposo pasal tantangan ampa gunani mamakei baju porang pakon sinjata na humbani Naibata.
Ipakei hanima do ganup sinjata humbani naibata?
“MARGONDIT HASINTONGAN”
3, 4. Mase hasintongan ni Bibel ipausih songon gondit ni tentara Rom?
3 Basa Epesus 6:14. Bani gondit ni tentara Rom, dong bosi-bosi laho manlinggomi binongei ase ulang hona tusuk, janah manjaga baju porangni totap gomos. Sipata bani gondit ai pe dong homa kait-kait laho manggantungkon podang atap pe pisou. Halani ai, lambin pangkar ma tentara ai marporang.
Hasintongan ni Bibel mangurupi hita ase ulang ipakahou ajaran na palsu
4 Songon gondit ai, hasintongan humbani Bibel mangurupi hita ase ulang ipakahou ajaran na palsu. (Joh. 8:31, 32; 1 Joh. 4:1) Anggo lambin ringgas hita marlajar Bibel, doskon na “marbaju bosi” ma hita ai. Janah lambin urah ma hita mandalankon aturan ni Naibata. (Ps. 111:7, 8; 1 Joh. 5:3) Anggo iarusi hita Bibel, lambin urah ma hita patorangkon hasintongan bani na legan.—1 Ptr. 3:15.
5. Mase ponting tumang mangkatahon na sintong?
5 Ponting tumang do hasintongan ni Bibel hubanta, janah marosuh do hita mandalankon ai. Anggo Sibolis marosuh do ia ase hita marladung. Anjaha ai ma sinjata na jago na igunahon ia. Tapi, rugi do halak na marladung pakon na iladungi. (Joh. 8:44) Jadi hassi pe sunsah, marusaha ma hita mangkatahon na sintong. (Ep. 4:25) Sonai ma na iahapkon si Abigail na marumur 18 tahun. Nini do, “Lang sai urah mangkatahon na sintong tarlobih sanggah dong na lepak hubahen.” Tapi mase ma ia marusaha ase jujur? Nini, “Anggo jujur ahu, borsih ma panggora ni uhurhu. Dob ai namatoras pakon hasomanku pe gabe porsaya bangku.” Si Victoria na marumur 23 tahun mangkatahon, “Ra do ihasogamkon halak hita anggo jujur ampa mandalankon aturan ni Naibata. Tapi tongtong do adong gunani na jujur ai. Sonang ma pangahapta halani dohor bani Jahowa, janah gabe hormat ma halak hubanta.” Jadi ponting tumang do ase hita tongtong “margonditkon hasintongan”.
Gondit hasintongan (Tonggor ma paragrap 3-5)
“MARBAJU BOSI HAPINTORON”
6, 7. Mase hapintoron isarupahon pakon baju bosi?
6 Baju porang ni tentara Rom somalni ibahen humbani bosi laho manlinggomi tontonni. Ikaitkon ma bosi-bosi ai mamakei kait logam pakon tali kulit. Bahat do homa bosi-bosi na ipasang hu abara ni tentara ai, janah ikaitkon ma ai mamakei tali kulit. Tongon baju bosi ai mambahen lang urah ia marhusor, janah maningon gati do ipareksa ase totap hot baju ai bani angkulani. Hassi pe sonai, baju ai boi
manlinggomi jantung ampa boltokni humbani podang atap pe anak panah!Porlu do hita iurupi laho manjaga uhurta
7 Usih songon baju bosi ai, hapintoron na itotapkon Jahowa pe boi manjaga ‘uhurta’. (Pod. 4:23) Sada tentara tontu mamilih baju porang humbani bosi marimbangkon baju humbani bahan na hurang dear. Hita pe mamilih mangihutkon aturan ni Jahowa marimbangkon pingkiranta sandiri, halani tongtong do pintor aturan-Ni ai. Anjaha halani hita lang gokan dear porlu do hita iurupi laho manjaga uhurta. (Pod. 3:5, 6) Jadi tongtong ma pakei hita “baju bosi” ai ase ulang manlembang uhurta.
8. Aha do gunani anggo hita mangihutkon aturan ni Naibata?
8 Ongga do iahapnima lang sai urah mandalankon aturan ni Naibata? Sonai ma na iahapkon si Daniel na marumur 21 tahun. Ia mangkatahon, “Irisai guru pakon hasomanku do ahu anggo mangihutkon aturan ni Naibata. Halani ai, sunsah ma huahap.” Tapi sonari sonaha pangahapni? Nini do, “Hassi pe sonai, hubotoh marguna tumang do mandalankon ai. Sambor do ujungni anggo lang idalankon. Songon hasoman-hasomanku ai, dong na narkobaon, dong homa na ipadarat hun sikolah.” Si Madison na marumur 15 tahun mangkatahon, “Borat do huahap mangihutkon aturan ni Naibata halani iejek hasomanku ahu.” Jadi aha ma na ibahen si Madison? Nini, “Sai hudingat ma anggo ahu Saksi Jahowa anjaha igunahon Sibolis do hasomanku laho pakahouhon ahu. Anggo totap hudalankon aturan ni Naibata, lambin malas do uhurhu.”
Baju bosi hapintoron (Tonggor ma paragrap 6-8)
‘MARSIPATU RINGGAS NI UHUR, MANGAMBILANKON PASAL HADAMEION’
9-11. (a) Mase mambahen persiapan paima marbarita sarupa songon tentara na mamakei sipatuni? (b) Aha do na mangurupi hita ase sirsir marbarita?
9 Basa Epesus 6:15. Ipakei tentara ni Rom do sipatuni laho marporang. Sipatu ai ibahen humbani kulit. Halani ai gabe hot ma sipatu ai, janah sodap ma iahap sidea mamakei ai.
10 Anggo ipakei tentara ai sipatuni, artini domma sirsir sidea laho marporang. Sonai homa ma, anggo ibahen hita persiapan sanggah lape marbarita, artini hita domma sirsir “laho mangambilankon Ambilan Na Madear, pardameian”. (Jes. 52:7; Rom 10:15) Hita pe porlu do pangkar sanggah marbarita. Si Bo na marumur 20 tahun mangkatahon, “Mabiar janah maila do ahu hinan marbarita bani hasoman sakalasku. Lang hubotoh mase sonai ahu. Tapi sonari domma sodap huahap marbarita bani sidea.”
11 Bahat do gunani na iahapkon na maposo anggo sidea mambahen persiapan paima marbarita. Persiapan
aha do na porlu ibahen? Si Julia na marumur 16 tahun mangkatahon, “Huboan do tong publikasi ibagas tasku. Hutangar do sanggah hasomanku marsarita. Gabe hubotoh ma sonaha mangurupi sidea. Anggo domma hubahen persiapan, gabe hubotoh ma aha do na sosok bani sidea.” Si Makenzie na marumur 23 tahun mangkatahon, “Dear do hutangar sanggah hasomanku marsarita. Janah hubasa do ganup artikel na mangulas pasal na maposo. Halani ai ma ase hubotoh topik na ija do hun Bibel atap pe hun jw.org, na sosok bani sidea.”Sipatu ringgas ni uhur (Tonggor ma paragrap 9-11)
“GANTAR HAPORSAYAON”
12, 13. Aha do “panah apuy” na humbani Sibolis ai?
12 Basa Epesus 6:16. Iboban tentara Rom do gantar na banggal laho manjaga dirini humbani tombak, podang, ampa anak panah.
13 Aha do “panah apuy” na humbani Sibolis ai? Artini sihol do ia ase hita marpingkir lang holong Jahowa banta,
anjaha lang dong na parduli banta. Tapi lang tongon ai. Si Ida na marumur 19 tahun mangkatahon, “Hinan huahap lang ihaholongi Jahowa ahu, janah lang ra Ia marhasoman bangku.” Dob ai aha ma na ibahen ia? “Hinan, sanggah martumpu hundul janah manangar-nangar dassa ahu. Huahap lang dong na rosuh manangar komentarku. Tapi sonari lang be sonai. Paima martumpu hubahen do lobei persiapan, janah marusaha do ahu mambere komentar dua ronsi tolu hali. Halani ai lambin banggal ma haporsayaonku. Tapi lang sai urah on. Hassi pe sonai, tongtong do iojur sanina-botou ahu. Partumpuan ai boi mambahen ahu lambin dohor bani Jahowa.”14. Humbani pangalaman ni si Ida, aha ma na boi iparlajari hita?
14 Anggo gantar domma itontuhon sadia ukuranni. Tapi lang sonai haporsayaon. Humbani pangalaman ni si Ida, ibotoh hita ma anggo haporsayaon ai boi do lambin tambah atap pe otik. (Mat. 14:31; 2 Tes. 1:3) Halani ai, marusaha ma hita mambahen ‘gantar haporsayaonta’ lambin banggal ase ilinggomi hita!
Gantar haporsayaon (Tonggor ma paragrap 12-14)
“TANGKULUK BOSI HALUAHON”
15, 16. Mase pangarapanta isarupahon songon tangkuluk bosi?
15 Basa Epesus 6:17. Ipakei tentara Rom do tangkuluk bosi laho manlinggomi ulu, borgok, ampa bohini. Sipata martali do tangkuluk ai ase boi ihanting.
16 Songon tangkuluk ai, ‘pangarapanta bani haluahon’ boi manjaga pingkiranta. (1 Tes. 5:8; Pod. 3:21) Anggo toguh haporsayaonta bani Jahowa, lang urah hita mandolei sanggah dong parlajouan. (Ps. 27:1, 14; Lah. 24:15) Tapi ase boi pangarapan ai manjaga pingkiranta, torus ma pingkirhon janji ni Naibata. Jadi maningon ipakei hita do “tangkuluk” ai, ulang ihanting!
17, 18. (a) Aha na ibahen Sibolis ase lang ipakei hita “tangkuluk bosi” ai? (b) Sonaha ase hita ulang ipakahou Sibolis?
17 Aha do na ibahen Sibolis ase ulang be ipakei hita “tangkuluk bosi” ai? Dingat ma aha na ibahenni bani Jesus. Ia mambotoh Jesus do holi na gabe raja bani manisia. Tapi marsitaronon do lobei Jesus janah matei. Dob ai, maningon paimahon do homa Jesus ase boi gabe Raja ronsi panorangni. Jadi ijanjihon Sibolis ma mintor boi do Jesus gabe raja bahenonni, asal ra ia marsombah hu bani. (Luk. 4:5-7) Ibotoh Sibolis do homa dong janji ni Jahowa hubanta, ai ma hagoluhan sadokah ni dokahni bani ari magira. Tapi sanggah paimahon ai, ra do bahat parlajouan na roh hubanta. Halani ai ibahen Sibolis ma hita ase mangindahi na porlu bani diri sandiri sonari, sedo mangindahi Harajaon ni Naibata.—Mat. 6:31-33.
18 Tapi, bahat do na maposo sonari on lang ra ipakahou Sibolis. Umpamani si Kiana na marumur 20 tahun mangkatahon, “Porsaya do ahu pitah Harajaon ni Naibata do na boi manalpuhon ganup sitaronon.” Aha ma gunani pangarapan ai hu bani? Jadi lang
be ia mangindahi hasangapon ni dunia on, halani ibotoh ia do na laho salpu ma ganupan ai. Halani ai ipilih ia ma mambere gok panorang laho mangidangi Jahowa.Tangkuluk bosi haluahon (Tonggor ma paragrap 15-18)
“PODANG NI TONDUY,” HATA NI NAIBATA
19, 20. Sonaha ase pandei hita patorangkon isi ni Bibel?
19 Tentara ni Rom manggunahon podang, ganjangni hira-hira 50 sentimeter. Halani tiap ari sidea marlatih gabe pandei ma sidea manggunahon podang ai.
20 Si Paulus mangkatahon anggo Hata ni Naibata usih do songon podang. Jadi maningon iparlajari hita ma ai ase ibotoh hita harosuh ni Naibata, janah boi patorangkon haporsayaonta. (2 Kor. 10:4, 5; 2 Tim. 2:15) Sonaha do carani marlajar Bibel? Si Sebastian na marumur 21 tahun mangkatahon, “Husuratkon ma sada ayat dobkonsi salosei mambasa sada bindu. Hubahen ma ganup ayat na huharosuhkon gabe sada daptar.” On ma na mangurupi ia mangarusi pingkiran ni Jahowa. Si Daniel na ipatugah nongkan ai mangkatahon, “Sanggah ahu mambasa Bibel, hupingkirhon ma ayat na ija do na boi mangurupi halak sanggah ahu marbarita. Anggo pongkut ahu mangurupi sidea janah pandei patorangkon isi ni Bibel, mintor marosuh do sidea manangar barita na huboan.”
Podang ni tonduy (Tonggor ma paragrap 19-20)
21. Mase ulang pala mabiar hita bani Sibolis pakon malekatni?
21 Aha na boi iparlajari hita humbani pangalaman na maposo nongkan ai? Ibotoh hita ma lang porlu hita mabiar bani Sibolis pakon malekatni. Gogohan do Jahowa marimbangkon sidea. Lang dokah nari ipenjarahon ma sidea. Lang boi be sidea pakahouhon ise pe sadokah 1.000 tahun Jesus mamarentah. Ujungni iripaskon ma munsuhta ai. (Pangk. 20:1-3, 7-10) Jadi domma ibotoh hita ise do munsuhta ampa akal-akalni. Anjaha boi do hita monang manlawan sidea marhitei pangurupion ni Jahowa!