1, 2. (a) Sonaha do pangahap ni Jesus bani titah ni Naibata? (b) Tapi sonaha do anggo halak Parisei ampa sibotoh surat mandalankon titah ni Naibata?

MAROSUH tumang do Jesus bani Titah ni si Musa. Mase? Halani holong do Jesus bani Jahowa na mambere Titah ai. Halani ai ma, hassi pe ondi ai lape roh Jesus hu tanoh on, domma isuratkon bani Psalmen 40:9 sonaha pangahapni bani Titah ni Naibata. Ihatahon ijai, “Mangkorjahon rosuh-Mu ai do na huharosuhkon, Ham Naibatangku, anjaha ibagas uhurhu do titah-Mu.” Jadi marhitei parsahap ampa pambahenanni, Jesus patuduhkon marguna anjaha saud do ganup tujuan ni Titah ni Naibata.​—Mat. 5:17-19.

² Tapi legan do anggo halak Parisei ampa sibotoh surat. Ibahen sidea do Titah ni Naibata gabe borat idalankon. Halani ai ma pusok uhur ni Jesus. Ihatahonni ma bani sidea, “Igalar nasiam do parsapuluhan ni hosaya, humangei ampa huning.” Artini tongon-tongon do idalankon sidea titah ai. Tapi adong do na lang ibahen sidea. Aha ma ai? Ihatahon Jesus ma use, “Tapi tading do ibahen nasiam titah siharganan, ai ma hapintoron,  idop ni uhur ampa habujuron.” (Mat. 23:23) Jadi lang ibotoh halak Parisei aha do tujuan ni Titah ai ibahen. Anjaha mapas do sidea bani halak na legan. Tapi Jesus mangarusi tujuan ni Titah ai ibahen, janah ibotohni do marhitei Titah ai ma boi taridah sonaha paruhuran ni Jahowa.

3. Aha do na laho iulas hita bani artikel on?

³ Halak Kristen, lang be maningon mandalankon Titah ni si Musa. (Rom 7:6) Tapi mase ipaturut Jahowa totap ai isuratkon bani Bibel? Halani Ia marosuh ase hita mandalankon “titah siharganan”, ai ma prinsip na adong bani Titah ai. Umpamani, prinsip aha do na boi iparlajari hita humbani huta parlinggoman? Bani artikel na salpu, domma iulas hita pasal aha do na maningon ibahen pamunuh anjaha aha do parlajaranni hubanta. Bani artikel on hita sihol marlajar use pasal Jahowa ampa sifat-sifat-Ni humbani huta parlinggoman. Anjaha hita sihol mambalosi dong tolu sungkun-sungkun ai ma: Sonaha do huta parlinggoman ai pataridahkon anggo Jahowa paridop ni uhur? Halani arga tumang do hagoluhan bani Jahowa, aha do parlajaranni hubanta? Anjaha, sonaha do huta parlinggoman ai pataridahkon anggo Jahowa ai Naibata na pintor atap pe adil? Sanggah hita mangulas artikel on, pingkirhon ma sonaha do hita boi maniru Jahowa.​—Basa Epesus 5:1.

4, 5. (a) Pangaturan aha do na ibahen ase halak na mamunuh urah masuk hu huta parlinggoman, anjaha mase? (b) Humbani pangaturan on, parlajaran aha do na boi idapot hita pasal Jahowa?

⁴ Jahowa mambere pangaturan dong onom huta parlinggoman, ase anggo dong halak na mamunuh urah masuk hu huta ai. Ia mamarentahkon halak Israel mamilih tolu huta hampit timur ampa tolu hampit barat ni bah Jordan. Tujuanni ase urah sasahalak na mamunuh masuk hu huta ai. (4 Mus. 35:11-14) Ampa dear do homa dalan laho hu huta ai iurus. (5 Mus. 19:3) Domu bani sejarah ni halak Jahudi, ibahen do homa tanda-tanda bani dalan ase urah masuk hu huta ai. Jadi, porini dong na lang sangaja mamunuh, lang be ia lintun hu nagori na legan, ase ulang tarojur ia manombah gana-gana.

⁵ Pingkirhon ma: Jahowa mamarentahkon anggo adong sasada halak na mamunuh maningon ipamatei do halak ai. Hassi pe sonai, porini dong sasada halak na lang sangaja  mamunuh, ibere Jahowa do pangaturan ase ia ilinggomi, mandapot holong ampa idop ni uhur-Ni. Sada pakar Alkitab mangkatahon, “Tangkas torang do ibahen [pangaturan ai] ganup janah urah iarusi.” Jahowa sedo Naibata na kejam na sihol mangindahi hasalahan laho manguhum juakjuak-Ni, tapi “bayak bani idop ni uhur” do.​—Ep. 2:4.

6. Sonaha do parlahouni halak Parisei?

⁶ Halak Parisei lang mangkaholongi na legan. Umpamani, domu bani sejarah ni halak Jahudi anggo sasada halak mambahen hasalahan na sarupa lobih tolu hali, seng ra be sidea pataridahkon idop ni uhur. Laho pataridahkon na lepak do parlahouni sidea ai, ibahen Jesus ma umpama. Dong sahalak Parisei na martonggo i lambung ni sijalo sohei atap pajak. Nini halak Parisei ai ma, “Ham Naibata, tarima kasih ma huhatahon Bamu, halani seng dos ahu pakon halak na legan, panrampok, pargeduk, parbangkis barang songon sijalo sohei an.” Ijon Jesus sihol pataridahkon anggo halak Parisei ai, “mapas do bani hasoman” ampa seng parholong.​—Luk. 18:9-14.

7, 8. (a) Sonaha do hita mangusihi Jahowa pasal toruh ni uhur? (b) Aha do na mangurupi hita ase urah manasap dousa ni na legan?

⁷ Usihi ma Jahowa na paridop ni uhur, ulang songon halak Parisei. (Basa Epesus 4:32.) Ulang ma bahen halak mabiar laho mangaku salah hubanta. (Luk. 17:3, 4) Halani ai sungkun ma dirinta: ‘Ai podas do ahu manasap dousa ni hasoman porini sidea gati mambahen borit uhurhu? Ai tongon-tongon do sihol ahu mardamei pakon sidea?’

⁸ Ase urah hita manasap dousa ni na legan maningon do hita martoruh ni uhur. Ulang ma songon halak Parisei na mapas bani na legan, janah seng ra manasap hasalahan. Tapi anggo halak Kristen, maningon do martoruh ni uhur janah mambahen ‘hasoman lobihan humbani dirinta sandiri!’ Hita pe ra ma manasap dousa ni na legan. (Pil. 2:3) Halani ai pingkirhon ma, ‘Ai hutiru do Jahowa anjaha martoruh ni uhur?’ Anggo hita martoruh ni uhur lambin urah ma hita manasap dousa ni hasoman. Sonai homa, na legan pe lambin urah ma mangaku salah hubanta. Halani ai, ulang ma podas-podas manggila, tapi patuduh ma idop ni uhur.​—Par. 7:8, 9.

9. Sonaha do Jahowa mangurupi halak Israel ase mangarusi pansing do hagoluhan ai?

⁹ Huta parlinggoman ibahen ase ulang gabe mardousa halak Israel halani mamunuh halak na lang marsalah. (5 Mus. 19:10) Harga do bani Jahowa hagoluhan, anjaha seng iharosuhkon-Ni halak na mamunuh. (Pod. 6:16, 17) Hassi pe pamunuhan ai lang isangaja, tapi lang ipaturut Jahowa  hasalahanni ai. Ia boi do mandapot idop ni uhur. Tapi, parlobei maningon do ia patugahkon na masa bani pangintuai ni Israel. Dob ai anggo sidea mamutuskon pamunuhan ai lang sangaja, boi ma ia tading i huta parlinggoman ronsi sintua malim matei. Anjaha ra do ia tading ijai sadokah goluhni. Pangaturan on mangajarhon bani halak Israel, na pansing do hagoluhan ai. Laho patuduhkon hormat bani Naibata na mambere hagoluhan, marusaha ma sidea ase ulang mambahen mara bani halak na legan.

10. Songon na ihatahon Jesus, sonaha do sibotoh surat ampa halak Parisei lang manghargai hagoluhan ni halak na legan?

¹⁰ Sibotoh surat ampa halak Parisei sedo songon Jahowa na parduli bani hagoluhan ni halak na legan. Jesus mangkatahon bani halak ai, “Irampok hanima do anakkunsi ni habotohon. Hanima sandiri seng masuk, anjaha halak na sihol masuk, ilanglangi hanima do!” (Luk. 11:52) Aha do artini ai? Sasintongni sibotoh surat ampa halak Parisei do na maningon mangajari na legan pasal Hata ni Naibata ase mandapot hagoluhan sadokah ni dokahni. Tapi sidea do na manlanglangi halak mangirikkon Jesus, in ma “Pambobai hu hagoluhan”. (Lah. 3:15) Artini, sidea mamboban halak na legan hu hamateian. Jadi gijang do uhur ni sidea janah pitah mamingkirhon dirini sandiri. Janah sidea pe lang parholong atap lang maridop ni uhur!

11. (a) Sonaha do si Paulus patuduhkon holong bani halak na legan? (b) Aha do na boi mangurupi hita ase ringgas marbarita songon si Paulus?

¹¹ Sonaha do hita boi mangusihi Jahowa ase ulang songon halak Parisei pakon sibotoh surat? Hita maningon mangkargai hagoluhan ni halak na legan. Si Paulus ringgas do mambaritahon pasal Harajaon bani buei halak. Halani ai do ia mangkatahon, “Borsih do ahu humbani sapata ni daroh nasiam.” (Basa Lahoan ni Apostel 20:26, 27.) Tapi, ai halani parentah ni Jahowa do ase ia marbarita? Atap ase ulang mardousa? Lang. Tapi halani holong do ia bani halak na legan. Sihol do ia ase na legan boi manggoluh sadokah ni dokahni. (1 Kor. 9:19-23) Sonai homa ma namin hita. Usihi hita ma Jahowa na mangkarosuhkon ase ganup halak mambahen hamubahon janah boi tongtong manggoluh. (2 Ptr. 3:9) Jadi hita pe maningon holong do bani na legan, janah ai do na mangojur hita ase ringgas marbarita. Halani ai malas ma uhurta.

12. Sonaha hita patuduhkon anggo hita mangkargai hagoluhan?

¹² Ase boi hita mangusihi Jahowa, maningon jaga ma hita ase ulang mambahen hasalahan na boi parohkon mara. Umpamani sanggah mamboan motor, marhorja, martukang atap pe sanggah laho hu partumpuan. Dingat ma harganan do hagoluhan ampa hasehaton marimbangkon duit. Naibata tongtong do mangkorjahon na sintong. Halani ai usihi hita ma Ia. Sintua pe maningon do mamingkirhon sonaha boi manjaga dirini ampa halak na legan humbani parmaraan. (Pod. 22:3) Halani ai ma anggo sintua pasingatkon hita, dear ma itangihon hita. (Gal. 6:1) Ganupan ai patuduhkon anggo hita mangusihi Jahowa, na lang marosuh anggo hita mambahen mara bani na legan.

13, 14. Sonaha do pangintuai i Israel boi mangusihi hapintoron ni Jahowa?

¹³ Naibata na pintor do Jahowa. Janah sihol do Ia ase pangintuai na i Israel manguhumi  atap mangadili ibagas hapintoron. Umpamani, maningon ipatumpu pangintuai ai ma ganup bukti. Paima mambahen haputusan bani na mamunuh ai, maningon ipindahi sidea ma aha do alasanni mamunuh. Ai halani sogam ni uhur do ase mamunuh ia? Anjaha ipardiateihon ma homa sonaha do parlahouni sadokah on. (Basa 4 Musa 35:20-24.) Anggo dong siotikanni dua halak na manaksihon pamunuhan ai, boi ma ia iuhum matei.​—4 Mus. 35:30.

¹⁴ Dobkonsi ibotoh sidea sonaha do sasintongni na masa ai, maningon do homa ipingkirhon sidea parlahou ampa sifat ni na mamunuh ai. Pangintuai ai porlu do homa maruhur ase mambotoh aha do sasintongni na masa. Na siporlunan maningon ipindo sidea ma tonduy na pansing ase boi mangusihi holong ni Jahowa ampa hapintoron-Ni.​—2 Mus. 34:6, 7. 

15. Aha do na mambahen legan Jesus pakon halak Parisei?

¹⁵ Anggo halak Parisei lang manguhumi ibagas hapintoron. Pitah hasalahan dassa na ididah sidea, sedo parlahou ampa sifat ni halak ai. Umpamani, sanggah piga-piga halak Parisei mangidah Jesus mangan i rumah ni si Mateus, isungkun sidea ma susianni, “Mase ma rap mangan Gurunima rap pakon sijalo sohei ampa pardousa?” Nini Jesus ma mambalosi, “Seng porlu doktor bani halak na jorgit, bani na boritan do. Laho ma nasiam, mangguruhon arti ni hata on, ‘Idop ni uhur do harosuh ni uhur-Hu, sedo galangan.’ Ai roh pe Ahu, sedo mandilo parpintor, halak pardousa do.” (Mat. 9:9-13) Ai marosuh do Jesus bani parlahou ni pardousa ai? Lang. Tapi sihol do ia ase sidea mambahen hamubahon. Janah ai do na iojur Jesus sanggah ia marbarita. (Mat. 4:17) Ibotoh Jesus do homa dong do piga-piga humbani “sijalo sohei ampa pardousa” ai, na sihol mambahen hamubahon. Sidea roh hu rumah ni si Mateus, sedo na laho mangan tumang. Tapi halani sihol mangirikkon Jesus do sidea. (Mrk. 2:15) Jadi legan tumang do halak Parisei pakon Jesus. Sidea lang porsaya anggo halak na legan boi mubah. Anjaha pangahap ni sidea, lang dong pangarapan bani pardousa. Lang itiru sidea idop ni uhur ampa hapintoron ni Jahowa!

16. Aha do na porlu ipareksa panitia pangadilan?

¹⁶ Sonai homa ma sintua sonari on, maningon do mangusihi Jahowa na ‘mangkaholongi uhum [“hapintoron”, Terjemahan Dunia Baru]’. (Ps. 37:28) Sintua maningon do ‘mamareksa’, ai tongon do atap lang sasada halak mambahen dousa. Anggo tongon do, iirikkon sidea ma podah ibagas Bibel laho mambahen haputusan. (5 Mus. 13:13-15) Sidea na dihut gabe anggota panitia pangadilan, maningon tongon-tongon ma mamareksa, ai tongon do atap lang ia mambahen hamubahon. Sipata lang sai urah mandalankon ai. Halani maningon humbani uhurni do halak mambahen hamubahon janah manosali hasalahanni. (Pangk. 3:3) Ase halak na mardousa ai mandapot idop ni uhur, maningon mambahen hamubahon do ia. *

17, 18. Sonaha do sintua boi mambotoh anggo sasada halak tongon-tongon mambahen hamubahon? (Tonggor ma gambar bani alm. 15.)

¹⁷ Ibotoh Jahowa pakon Jesus do sonaha paruhuran ampa pingkiran ni jolma, halani sidea boi mambotoh uhur. Tapi anggo sintua lang boi mambotoh uhur ni jolma.  Anggo sintua do ham, sonaha do ham boi mambotoh na tongon-tongon do halak ai mambahen hamubahon? Parlobei, pindo ma hapentaran atap pe hauhuron bani Jahowa. (1 Raj. 3:9) Na paduahon, gunahon ma Bibel pakon publikasi, ase ibotoh ham aha do na mambahen legan “pusok ni uhur dunia on” pakon “pusok ni uhur na humbani Naibata”, ai ma hamubahon na humbani uhur. (2 Kor. 7:10, 11) Atap parlajari ma humbani Bibel sonaha do halak na tongon-tongon mambahen hamubahon pakon na lang. Anjaha arusi ma sonaha do pangahap, pingkiran ampa parlahou ni sidea.

¹⁸ Na patoluhon, pingkirhon ma sonaha do parlahou ampa sifat ni na mambahen dousa ai. Mase sonai pambahenanni? Mase ia mambahen haputusan sisonai? Aha do tantanganni janah sonaha do situasini? Bibel patugahkon anggo Jesus na gabe kopala ni kuria, “seng mangihutkon pangidah ni matani ia manguhumi, anjaha seng mangihutkon pambogei ni pinggolni ia mamutuskon. Tapi marhitei hapintoron do uhumanni halak na masombuh, anjaha marhitei hasintongon do dabuhonni timbangan bani halak na madoyuk i nagori in”. (Jes. 11:3, 4) Jesus do na mamilih nasiam gabe sintua. Halani ai, porsaya ma sai urupanni do nasiam mambahen haputusan na pintor anjaha patuduhkon holong. (Mat. 18:18-20) Tontu malas do uhurta halani dong bahat sintua na parduli hubanta! Anjaha sidea pe mangurupi hita laho patuduhkon hapintoron ampa holong bani na legan.

19. Aha do na boi iparlajari hita humbani huta parlinggoman?

¹⁹ Titah ni si Musa marisi “habotohon ampa hasintongan”. Jadi humbani titah ai hita boi marlajar pasal Jahowa pakon prinsip-Ni. (Rom 2:20) Humbani pangaturan pasal huta parlinggoman na dong bani Titah ai, sintua boi marlajar ase ‘mandalankon uhum na sintong’. Janah hita pe boi patuduhkon holong atap “idop ni uhur” bani na legan. (Sak. 7:9) Hassi pe sonari, lang be idalankon hita Titah ai, tapi anggo Jahowa lang mubah. Hapintoron ampa idop ni uhur totap ope ponting bani Jahowa. Tontu megah do uhurta boi mangidangi Naibata sisonai. Halani ai usihi hita ma sifat-sifat-Ni anjaha marlinggom ma bani Jahowa!