1, 2. (a) Hadameion na sonaha do na boi iahapkon hita sonari? (b) Mase bahat ope hasunsahan sonari on? (Idah gambar i atas.)

HAGANUPAN hita marosuh do adong hadameion. Sonari boi iahapkon hita “damei ni Naibata” na boi mangurupi hita ase martahan sanggah ibagas parsoalan. (Pil. 4:6, 7) Martarimakasih do hita bani Naibata halani ai. Halani hita domma mangondoskon diri bani Naibata, hita pe boi “mardamei pakon Naibata”. On artini, hita boi marhasoman pakon-Si.​—Rom 5:1.

² Tapi sonari on, bahat ope na mambahen lang damei uhur ampa pingkiranta halani buei hasunsahan i tanoh on. Umpamani, halani hita manggoluh bani panorang parpudi, bahat do parjahat. (2 Tim. 3:1-4) Sobali ai, maningon ilawan hita do Sibolis pakon ajaranni na ladung. (2 Kor. 10:4, 5) Lang pitah ai, lambin sunsah ma pangahapta halani kaluarganta manlanglangi hita manombah Jahowa. Ra do ihata-hatai  sidea haporsayaonta, janah ihatahon do hita mambahen parsirangan ibagas kaluarga. Dob ai, ra do iusir sidea hita hun rumah. Jadi anggo sonai na masa, aha do bahenonta? Anjaha, sonaha do hita ase boi mardamei pakon sidea ampa totap mangidangi Jahowa?

3, 4. (a) Mase halak na ra manjalo ajaran ni Jesus maningon pangkar? (b) Mase lang sai urah laho mangirikkon Jesus?

³ Ibotoh Jesus do lang ganup halak manjalo pangajarionni. Ibotoh ia do homa ihasogamkon halak do susianni. Jadi maningon pangkar do susianni. Halani ai ma ihatahon Jesus, “Ulang ma ninuhurnima, na roh Ahu, laho mamboan damei hu tanoh on. Seng na roh Ahu mamboan damei, tapi podang do. Na roh do Ahu tongon, paingorhon anak dompak bapani, boru dompak inangni, parumaen dompak simatuani, anjaha hasomanni sarumah do gabe munsuh bani Jolma in.”​—Mat. 10:34-36.

⁴ Jadi aha do artini sanggah ihatahon Jesus “Ulang ma ninuhurnima, na roh Ahu, laho mamboan damei”? Sedo na laho mambahen parposahan Jesus ibagas kaluarga. Sihol padaskon hasintongan do ia. (Joh. 18:37) Tapi sihol do Jesus ase ibotoh halak, lang sai urah bani susianni laho mangirikkonsi. Mase? Halani sidea ra do ihasogamkon hasoman atap kaluargani na lang ra manjalo hasintongan.

5. Aha do ra na masa bani halak na mangirikkon Jesus, anjaha aha do pasu-pasuni?

⁵ Hunjon tangkas ma, sai adong do kaluarga na lang marosuh hubanta halani mangirikkon Jesus. (Joh. 15:20) Ra do hita iejek atap pe lang be ijalo ibagas kaluarga. Hassi pe sonai, anggo hita totap setia bani Jesus, bahatan do pasu-pasu na ijalo hita marimbangkon aha na itadingkon.​—Basa Markus 10:29, 30.

6. Anggo dong kaluarga na sogam hubanta halani manombah Jahowa, aha ma na porlu idingat hita?

⁶ Totap do ihaholongi hita kaluarganta, hassi pe hita ihasogamkon sidea halani manombah Jahowa. Tapi dingat hita ma, maningon banggalan do holongta bani Jahowa pakon Jesus marimbangkon aha pe. (Mat. 10:37) Anjaha holongta ai bani kaluarga, ra do on gabe tirangkap ibahen Sibolis ase hita lang be manombah Jahowa.

7. Aha do na porlu idingat nasiam anggo paramangon atap parinangonmu lang sisombah Jahowa?

⁷ Ipatugah Bibel, sai “marhasunsahan” do halak na marhajabuan. (1 Kor. 7:28) Ra do lambin bahat hasunsahan anggo pasangan goluhta lang sisombah Jahowa. Hassi pe sonai, dingat nasiam ma parentah ni Jahowa bani halak na marjabu. Ia lang marosuh anggo sidea marsipadaoh-daohan atap pe marsirang halani lang sahaporsayaon. (1 Kor. 7:12-16) Anggo paramangonmu lang sisombah Jahowa, maningon hormat do ham hu bani, halani  ia do kopala kaluarga. Atap anggo parinangonmu lang sisombah Jahowa, maningon do homa isarihon janah ihaholongi ham ia.​—Ep. 5:22, 23, 28, 29.

8. Sungkun-sungkun aha do na boi irimangi nasiam anggo pasangan goluhmu lang marosuh nasiam magatitu marbarita?

⁸ Sonaha anggo pasangan goluhmu, seng marosuh anggo nasiam magatitu marbarita? Dong do sada paramangon ni botounta, lang marosuh anggo ia magatitu marbarita. Anggo sonai homa na masa bani nasiam, pingkirhon ma, ‘Ai na manlanglangi ahu do ia laho manombah Jahowa? Anggo lang sonai, ai boi do ahu unduk bani aha na ihatahonni?’ Anggo maruhur do nasiam, gabe lang sai bahat be parsoalan ibagas kaluarga ni nasiam.​—Tit. 3:2.

9. Sonaha do halak Kristen mangajari niombahni ase hormat bani namatorasni na lang sisombah Jahowa?

⁹ Anggo pasangan goluhmu lang sisombah Jahowa, gabe lang sai urah ma mangajari niombah. Umpamani, iparentahkon Bibel do niombah ase ‘pasangapkon bapani pakon inangni!’ (Ep. 6:1-3) Tapi sonaha anggo pasangan goluhmu ai lang mandalankon podah ni Bibel? Bahen ma siusihan bani sidea ase hormat bani namatorasni. Pingkirhon ma aha na dear humbani pasangan goluhmu, janah patugah ma anggo nasiam mangkargai pambahenanni bani kaluarga. Ulang ma patugah pasal hahurangan ni pasangan goluhmu bani niombah. Anjaha patorang ma homa, anggo manombah Jahowa pilihan do ai. Anggo iajari nasiam ase niombah hormat bani namatorasni na lang sisombah Jahowa, ra do on mangurupi pasangan goluhmu ase marosuh marlajar Bibel.

10. Sonaha do halak Kristen mangajari niombahni ase mangkaholongi Jahowa?

¹⁰ Sipata ra do pasangan goluhmu  manuruh niombah ase dihut bani ari raya. Atap pe ra do paramangonmu manlarang ham mangajarhon Bibel bani niombah, janah sidea lang ibere dihut hu partumpuan. Anggo sonai na masa, aha na boi ibahen nasiam? Totap ma marusaha mangindahi panorang ase boi mangajari niombah pasal Bibel. (Lah. 16:1; 2 Tim. 3:14, 15) Ra do on mangurupi niombah ase mangkaholongi Jahowa janah mambotoh titah-Ni. (Lah. 4:19, 20) Ujungni sidea do na manontuhon laho manombah Jahowa atap lang. *—5 Mus. 30:19, 20.

11. Aha do na ra boi mambahen dong paringoran ibagas kaluarga?

¹¹ Sanggah hita baru ope marlajar Bibel pakon saksi Jahowa, ra do ai lape ipatugah hita bani kaluarga. Tapi dobkonsi hita lambin marosuh bani hasintongan, sihol ma uhurta patugahkon on bani kaluarga. (Mrk. 8:38) Ra do halani ai, gabe dong paringoran ibagas kaluarga. Jadi sonaha do hita ase boi mardamei pakon sidea anjaha totap mangidangi Jahowa? Ulas hita ma carani.

12. Sonaha do hita patuduhkon anggo hita mangarusi pangahap ni kaluarganta?

¹² Mangarusi pangahap ni sidea. Tontu malas tumang do uhurta dobkonsi mananda hasintongan. Tapi ra do iahap kaluarganta, domma kahou hita janah lang be holong bani kaluarga halani lang be dihut bani ari raya. Atap ra do sidea mabiar, anggo hita matei jadi marsik ma hita holi. Halani ai, porlu ma dear itangihon hita sanggah sidea marsahap ase hita boi mangarusi mase sonai pangahap ni sidea. (Pod. 20:5) Dingat hita ma si Paulus. Marusaha do ia mangarusi pangahap ni “haganup” halak, ase boi padaskon hasintongan. Sonai homa ma hita, anggo marusaha hita mangarusi aha na ipingkirhon kaluarganta, lambin urah ma hita mangurupi sidea mananda hasintongan.​—1 Kor. 9:19-23.

13. Sonaha ma namin parsahapta bani kaluarga na lang sisombah Jahowa?

¹³ Lamlam marsahap. Bibel mangkatahon, ‘Sai tongtong ma jenges hatanta.’ (Kol. 4:6) Hassi pe lang urah mandalankon ai, tapi boi do hita totap lamlam marsahap marhitei pangurupion ni tonduy na pansing. Anjaha ulang ma ipabajan-bajan hita haporsayaon ni kaluarganta. Anggo sidea mambahen borit uhurmu halani parsahap ampa pambahenan ni sidea,  usihi hita ma apostel-apostel. Si Paulus mangkatahon, “Anggo hona parpahiri, mamasu-masu do hanami, anggo hona parburu, sabar do hanami, anggo ipahata-hata, basar do hanami.”​—1 Kor. 4:12, 13.

14. Aha do gunani anggo hita totap marparlahou na dear?

¹⁴ Totap marparlahou na dear. Mase on porlu? Hassi pe porlu do lamlam marsahap, tapi porlunan do anggo hita totap marparlahou na dear. (Basa 1 Petrus 3:1, 2, 16.) Patuduh ma humbani parlahoumu, anggo saksi Jahowa boi do martuah ibagas kaluarga, parduli bani niombahni, ampa mandalankon aturan ni Bibel ibagas goluhni. Porini kaluargamu seng ra manjalo hasintongan, tapi boi do hita marmalas ni uhur halani parlahounta na dear ai boi mambahen malas uhur ni Jahowa.

15. Aha do na boi ibahen hita ase lang marsual bani kaluarga pasal haporsayaon?

¹⁵ Pingkirhon ma lobei. Pingkirhon ma sonaha do carani ase ulang marsual pakon kaluarga pasal haporsayaon. (Pod. 12:16, 23) On ma na ibahen sada botou hun Australia. Sanggah laho manalepon simatuani dalahi na lang marosuh bani hasintongan, martonggo ma lobei ia pakon paramangonni, ase totap lamlam marsahap. Anjaha ipingkirhon ma aha na sihol isahapkon. Dob ai, itontuhon sidea ma sadia dokah do sidea marsahap. Halani anggo dokah-dokah, ra do on boi mambahen paringoran pasal haporsayaon.

16. Aha do bahenonta ase ulang lungun pangahapta anggo dong kaluarga na lang marosuh bani hasintongan?

¹⁶ Tontu sai adong do parsalisihan pakon kaluarganta na lang sisombah Jahowa. Ra do on mambahen lungun pangahap ni nasiam halani nasiam pe holong do bani kaluarga. Tapi dingat ma, maningon banggalan do holongta bani Jahowa marimbangkon bani kaluarga. Lang boi ipaksa hita ase kaluarganta manjalo hasintongan. Tapi anggo pongkut hita mangidangi Jahowa, on boi mangurupi sidea ase mangarusi ponting tumang do hubanta mangidangi Jahowa. Anjaha sidea pe boi mangidah aha do gunani mangidangi Jahowa. Halani holong, ibere Jahowa do panorang bani ganup jolma laho manombah-Si.​—Jes. 48:17, 18.

17, 18. Anggo dong kaluarga na manadingkon Jahowa, aha do na boi mangurupi hita ase totap toguh?

¹⁷ Tontu borit tumang ma pangahapta anggo dong kaluarganta na manadingkon organisasi ni Jahowa anjaha ipadarat hun kuria. Ra do songon na  itikam podang pangahapta. Anggo sonai, aha ma na boi bahenonta ase totap setia mangidangi Jahowa?

¹⁸ Totap ma ringgas mangidangi Jahowa. Hassi pe borit tumang do pangahapta, maningon totap ma toguh haporsayaonta. Halani ai, tongtong mambasa Bibel, martumpu, marbarita anjaha martonggo mangindo pangurupion ni Jahowa. (Jud. 20, 21) Tapi sonaha anggo totap ope sunsah pangahapta? Ulang ma mandolei! Totap ma ringgas mangidangi Jahowa. On boi mangurupi ase pingkiran ampa uhurta lambin tarapoh. On do homa na ibahen panurat ni buku Psalmen 73. Sanggah sunsah pangahapni, laho do ia hu rumah panumbahan. Janah on do na patoguhkon use haporsayaonni.​—Ps. 73:16, 17.

19. Sonaha do hita pataridahkon anggo hita unduk bani aturan ni Jahowa pasal paminsangon?

¹⁹ Unduk bani aturan ni Jahowa pasal paminsangon. Parohkon hadearan do ganup pinsang-pinsang ni Jahowa. Anggo dong halak na ihaholongi hita ipabali hun kuria, on boi mangurupi sidea ase mubah janah mulak use manombah Jahowa. (Basa Heber 12:11.) Tapi totap ma ihutkon hita aturan ni Jahowa na mamarentahon ase ‘ulang marsaor’ pakon sidea na ipabali hun kuria. (1 Kor. 5:11-13) Anjaha, ulang ma hita marsahap pakon sidea marhitei talepon, SMS, surat, e-mail, atap pe na leganni. Tongon, lang sai urah mandalankon ai.

20. Anggo dong halak na hinaholonganta ipabali hun kuria, sonaha ma namin pangahapta bani sidea?

²⁰ Totap ma paimahon! Halani holong ‘iarapkon hita do haganup’. Jadi totap ma hita mangarap anggo halak na ihaholongi hita boi mulak use manombah Jahowa. (1 Kor. 13:7) Anggo ididah hita ia domma mambahen hamubahon, tonggohon ma ia ase boi mandalankon podah ni Bibel anjaha manjalo ontangan ni Jahowa, “Mulak ma ho hu Bangku”.​—Jes. 44:22.

21. Aha do na boi mangurupi hita ase totap setia hassi pe dong kaluarga na manlanglangi hita mangihutkon Jesus?

²¹ Ihatahon Jesus do maningon banggalan ma holongta hu bani marimbangkon ise pe. Hassi pe dong kaluarga na manlanglangi hita, maningon pangkar do hita ase boi totap mangihutkon Jesus. Totap ma marpangunsandeian bani Jahowa, janah martonggo mangindo pangurupion ase totap martahan. (Jes. 41:10, 13) Anggo totap hita setia bani Jahowa pakon Jesus, dapotan pasu-pasu do hita.