1, 2. Sonaha do situasi ni halak Jahudi na i Jerusalem dob salosei ididah si Sakaria panonggoran na papituhon?

TONTU gabe toguh ma haporsayaon ni si Sakaria dob mangidah panonggoran na papituhon ai. Janah malas do uhurni mambotoh na laho uhumon ni Jahowa do halak parjahat. Tapi bahat ope ididah si Sakaria halak na mangkorjahon na sambor janah rumah panumbahan ai, lalab lang salosei ipajongjong. Mase ihalupahon halak Jahudi horja na ibere Jahowa bani sidea? Ai na laho mangindahi na porlu bani dirini sandiri do ase sidea mulak hu Jerusalem?

² Ibotoh si Sakaria do anggo sidea na mulak hu Jerusalem, ai ma laho manombah Jahowa do. Mungkahni, marhinsah ni uhur do sidea laho pajongjongkon rumah ni Naibata i Jerusalem janah horja na ponting do iahap sidea ai. Hunja ibotoh hita? Umpamani ra do sidea manadingkon rumahni na i Babel ampa horjani, hassi pe huta  Jerusalem ai lape ongga ididah sidea. (Esr. 1:2, 3, 5) Dob ai, ra do homa sidea mardalan hira-hira 1.600 kilometer daohni, hassi pe ra do adong parjahat i pardalanan ni sidea ai.

3, 4. Hasunsahan aha do na masa bani halak Jahudi na mulak hun Babel?

³ Bayangkon ma sonaha daohni pardalanan ni sidea. Ra do i pardalanan, domma ipingkirhon sidea sonaha do huta Jerusalem ai. Ra do na matua domma mansaritahon bani na maposo sonaha do hinan jengesni Jerusalem ampa rumah panumbahan ai. (Esr. 3:12) Porini nasiam dihut bani pardalanan ai, sonaha do pangahap ni nasiam dobkonsi mangidah huta Jerusalem? Sanggah ididah nasiam huta ai domma marumbak anjaha tarulang, ai pusok do uhur ni nasiam? Ra do gabe ibandingkon nasiam Jerusalem pakon tembok ni huta Babel na toguh. Tapi halak Jahudi, totap do marmalas ni uhur. Mase? Halani tongtong do iondingi janah iurupi Jahowa sidea i pardalanan. Halani ai ma, dobkonsi das sidea i Jerusalem, mintor ipauli sidea ma anjapanjap anjaha mambahen galangan bani Jahowa bai ganup ari. (Esr. 3:1, 2) Hinsah do uhur ni sidea laho paulihon huta ai. Songon na lang dong be na boi manlanglangi sidea.

⁴ Lang pitah rumah panumbahan na ipajongjong sidea, tapi dihut do homa paulihon huta ampa rumah ni bei. Maningon do homa sidea marjuma ase dong sipanganonni. (Esr. 2:70) Jadi bahat do horja ni sidea anjaha bahat do homa na manlanglangi. Umpamani, mintor roh ma munsuh laho manlanglangi horja ni sidea sadokah 15 tahun. Halani ai, gabe mandolei ma halak Jahudi. (Esr. 4:1-4) Dob ai, bani tahun 522 SM iparentahkon raja hun Persia ma ase ganup horja i Jerusalem iparonti. Ra do iahap halak Jahudi lang saud be huta ai ipauli.​—Esr. 4:21-24.

5. Sonaha do Jahowa mangurupi halak Jahudi?

⁵ Halani ai ma ibotoh Jahowa do, anggo sidea porlu ibere hagogohon ampa habaranion. Jadi ibere Jahowa ma panonggoran na parpudi bani si Sakaria. Marhitei panonggoran on, ipatugah Jahowa do anggo Ia tongtong mangurupi halak Jahudi, anggo itoruskon sidea horja ai. Halani ai ihatahon Jahowa ma, “Maningon jadi do on, anggo sintong itangihon nasiam sora ni Jahowa, Naibata nasiam.”​—Sak. 6:15.

6. (a) Aha do na ididah si Sakaria bani panonggoran na paualuhkon? (Idah gambar bani alm. 21.) (b) Mase marlegan-legan warna ni huda ai?

⁶ Humbani panonggoran si Sakaria na paualuhkon, on boi patoguhkon uhur ni si Sakaria pakon halak Jahudi. (Basa Sakaria 6:1-3.) Bayangkon ma aha na ididah si Sakaria. Bani “holangkolang ni dua dolog” na humbani tombaga, kaluar ma ompat gareta huda. Marlegan-legan do warna ni huda ai. Ase urah mananda pangajakni. Dob ai isungkun si Sakaria ma, “Ai aha do arti ni ai?” (Sak. 6:4) Tontu hita pe, sihol do mambotoh artini panonggoran ai.

7, 8. (a) Aha do na igambarhon dua dolog bani panonggoran ni si Sakaria? (b) Mase ma dolog ai humbani tombaga?

 ⁷ Bani Bibel, dolog gati do manggambarhon harajaon, atap pe pamarentahan. Jadi dua dolog bani panonggoran ni si Sakaria, sarupa do ai pakon dua dolog bani panonggoran ni si Daniel. Dolog na sada manggambarhon pamarentahan ni Jahowa na martahan sadokah ni dokahni. Anjaha dolog na sada nari manggambarhon Harajaon ni Mesias janah Jesus ma Rajani. (Dan. 2:35, 45) Humbani tahun 1914, sanggah Jesus itabalhon gabe Raja, haduasi harajaon ai domma jongjong laho pasaudkon harosuh ni Naibata i tanoh on.

⁸ Tapi mase ma dolog ai humbani tombaga? Somalni mahal janah marhilong do tombaga ai. Sapari pe, ongga do isuruh Jahowa halak Israel mamakei tombaga laho paulihon lampo-lampo (tabernakel) ampa rumah panumbahan i Jerusalem. (2 Mus. 27:1-3; 1 Raj. 7:13-16) Jadi dolog tombaga ai mangartihon pitah harajaon ni Jahowa pakon Harajaon ni Mesias do na sidearan. Harajaon ai boi parohkon hadameion ampa pasu-pasu bani manisia.

9. Ise do na igambarhon na mangajak gareta huda ai, anjaha aha do tugas ni sidea?

⁹ Ise do na igambarhon gareta huda ampa na mangajak ai? Na mangajak gareta ai, ai ma malekat-malekat, atap pe ra do marlegan-legan kalompok ni malekat ai. (Basa Sakaria 6:5-8.) “Dob mangadap sidea hu lobei ni Tuhan sigomgom ganup tanoh on” laho ma sidea mandalankon tugas na ponting. Sidea isuruh hu ianan na itontuhon laho manlinggomi juakjuak ni Naibata, tarlobih ma ai hu “tanoh na hampit utara,” ai ma Babel. Humbani panonggoran on, Jahowa patugahkon bani juakjuak-Ni anggo sidea lang be iparjabolon i Babel. Bayangkon ma sonaha do malas ni uhur ni sidea na pajongjongkon rumah ni Naibata ai, halani panonggoran ni si Sakaria. Gabe pos ma uhur ni sidea lang dong be munsuh na boi pasohkon horja ai.

10. Aha do gunani panjahaion ni si Sakaria pasal gareta ampa na mangajak, hubani hita sonari on?

¹⁰ Sonari on pe, igunahon Jahowa do malekat-malekat-Ni laho manlinggomi anjaha patoguhkon juakjuak-Ni. (Mal. 3:6; Heb. 1:7, 14) Bani tahun 1919, ipaluah Naibata Jahowa ma juakjuak-Ni humbani ugama na ladung na igambarhon Babel na banggal. Tapi marusaha do munsuh ni Naibata sonaha ase masap panombahan na sintong. Tapi totap do sidea lang boi marhasil. (Pangk. 18:4) Halani ilinggomi malekat do organisasi ni Jahowa. Jadi pos ma uhurta totap do boi martahan panombahan na sintong. (Ps. 34:8) Anjaha tongtong do hita boi marmalas ni uhur laho mangidangi Jahowa. Halani panjahaion ni  si Sakaria, mambahen pos uhurta anggo hita ilinggomi dua dolog ai.

11. Mase lang pala mabiar hita anggo roh kuasa politik ni dunia on laho manripaskon juakjuak ni Naibata?

¹¹ Lang piga dokah nari, roh ma kuasa politik ni dunia on laho manripaskon juakjuak ni Naibata. (Hes. 38:2, 10-12; Dan. 11:40, 44, 45; Pangk. 19:19) Bani buku Hesekiel, kuasa politik dunia on igambarhon songon hombun na manrungkub tanoh on. Sidea mangajak huda, janah manggila laho manripaskon juakjuak ni Naibata. (Hes. 38:15, 16) *. Ai porlu do hita mabiar bani sidea? Lang! Halani dong do tantara ni Jahowa laho manlinggomi hita. Bani hasunsahan banggal, ilinggomi malekat ni Jahowa do juakjuak-Ni anjaha iripaskon ma ganup halak na manlawan pamarentahan ni Jahowa. (2 Tes. 1:7, 8) Tontu sai tarpaima do hita bani panorang ai! Tapi ise do holi na mambobai tantara ni Jahowa ai?

12, 13. (a) Aha do na isuruh Jahowa ibahen si Sakaria? (b) Hunja do ibotoh hita anggo tumbor ai in ma Jesus Kristus?

¹² Pitah si Sakaria do na boi mangidah ualuh panonggoran ai. Tapi dong do na ibahen si Sakaria laho patoguhkon sidea na pajongjongkon rumah ni Naibata ai. (Basa Sakaria 6:9-12.) Adong tolu halak na roh hun Babel, ai ma si Heldai, si Tobia, ampa si Jedaya.  Sidea mamboban omas pakon pirak. Dob ai, isuruh Jahowa ma si Sakaria patumpuhon ai laho “mambahen sortali”. (Sak. 6:11) Halani si Serubabel ai ma ginompar si Daud, ai hu bani do inahkon sortali ai? Lang. Tapi hubani Sintua Malim do, ai ma si Josua. Tontu longang do sidea mangidah ai.

¹³ Halani inahkon sortali ai bani Sintua ni Malim Josua, ai na laho gabe raja do ia? Lang. Halani ia seng ginompar ni si Daud, seng talup ia gabe raja. Tapi na masa ai mangartihon sada gambaran na laho masa bani raja ampa malim na igoran Tumbor. Bibel patorangkon Tumbor ai, in ma Jesus Kristus.​—Jes. 11:1; Mat. 2:23. *

14. Aha do na laho ibahen Jesus?

¹⁴ Sintua ni malim ampa raja do Jesus ai. Anjaha ia do na mambobahon malekat ni Jahowa, laho manlinggomi juakjuak ni Naibata humbani dunia na jahat on. (Jer. 23:5, 6) Lang piga dokah nari iripaskon Jesus ma bangsa-bangsa i tanoh on. (Pangk. 17:12-14; 19:11, 14, 15) Tapi sanggah lape masa ai, dong do horja na banggal na laho ibahen Jesus.

15, 16. (a) Ise do na mangurupi juakjuak ni Naibata sonari laho mandalankon panombahan na sintong? (b) Aha do na masa i tanoh on dobkonsi saribu tahun pamarentahan Kristus?

¹⁵ Sobali gabe sintua ni malim ampa raja dong ope tugas ni Jesus, ai ma “paulihon rumah ni Jahowa”. (Basa Sakaria 6:13.) Bani tahun 1919 ai ma na ihorjahon Jesus, marhitei paluahkon juakjuak ni Naibata humbani ugama na ladung ai ma Babel na banggal. Anjaha ipajongjong ma use kuria-kuria, ampa mamilih “juakjuak na bujur anjaha na maruhur”. Sanina na iminaki on, mambobahon horja na ponting i tanoh on, domu bani panombahan na sintong na igambarhon songon rumah panumbahan. (Mat. 24:45) Tongtong do iajari Jesus juakjuak ni Naibata anjaha iurupi sidea ase boi mandalankon panombahan na sintong.​—Mal. 3:1-3.

¹⁶ Jesus ampa 144.000 halak hasomanni na gabe raja ampa malim mamarentah sadokah saribu tahun. Bani panorang ai ma, sidea mangurupi ganup halak na martenger ni uhur bani Naibata ase boi maluah humbani dousa.  Dobkonsi salosei horjani sidea ai, pitah sisombah Jahowa mando na adong i tanoh on!

17. Aha do janji ni Jahowa bani halak Jahudi, janah sonaha do pangahap ni sidea mambotoh ai?

¹⁷ Sonaha do pangahap ni halak Jahudi bani barita na ipadas si Sakaria? Marjanji do Jahowa laho mangurupi sidea ase boi pasaloseihon rumah ni Naibata ai. Tontu on boi mambahen malas tumang uhur ni sidea. Tapi ra do adong ope na bungbang halani otik dassa sidea laho mangkorjahon horja na banggal ai. Halani ojuran ni si Sakaria, boi ma sidea martenger ni uhur use. Sobali si Heldai, si Tobia, ampa si Jedaya, ihatahon Jahowa do bahat ope na “mangurupi laho paulihon rumah ni Jahowa”. (Basa Sakaria 6:15.) Porsaya ma halak Jahudi anggo Jahowa mangurupi sidea. Halani ai, jadi pangkar ma sidea laho pajongjongkon rumah ni Naibata hassi pe dong larangan humbani raja Persia. Usih songon dolok na banggal do larangan ai bani sidea. Tapi halani pangurupion ni Jahowa salosei ma rumah ai bani tahun 515 SM. (Esr. 6:22; Sak. 4:6, 7) Tapi, hata ni Jahowa ai dong do arti ni na lobih ponting hubanta sonari on.

18. Sonaha do Sakaria 6:15 saud sonari on?

¹⁸ Sonai homa ma sonari on, dong marjuta halak na ra mambere “habayakon”, panorang, ampa gogohni laho mangidangi Jahowa. On patuduhkon sidea dihut mangurupi pajongjongkon rumah panumbahan na igambarhon bani panonggoran ni si Sakaria. (Pod. 3:9) Ihargai Jahowa do aha na ibere juakjuak-Ni. Songon si Heldai, si Tobia, ampa si Jedaya, ibere sidea do omas pakon pirak bani si Sakaria laho mambahen sada sortali. Anjaha sortali ai ibahen ma gabe sada “pardingatan” halani sidea mangurupi pajongjongkon rumah ni Naibata. (Sak. 6:14) Sonari on pe, lang ihalupahon Jahowa holong ampa pambahenan ni juakjuak-Ni laho mangidangi-Si.​—Heb. 6:10.

19. Aha do guna ni panonggoran ni si Sakaria hubanta?

¹⁹ Bani ari parpudi, bahat do horja na laho ihorjahon juakjuak ni Naibata. Tapi iurupi Jahowa do hita anjaha itogu-togu Jesus ase pasaloseihon horja ai. Tontu martarimakasih do hita halani boi masuk hu organisasi ni Jahowa na damei anjaha totap martahan. Halani ai, unduk ma hita bani parentah ni Jahowa. Hassi pe bahat na manlanglangi hita, tapi ilinggomi Raja ampa Sintua ni Malim pakon malekat-malekat do hita. Jadi marusaha ma hita ase totap mangidangi Jahowa. Anjaha pos ma uhurta sai linggoman-Ni do hita sonari ronsi sadokah ni dokahni!