1, 2. (a) Horja aha do na sipontingan bani Jesus, janah mase? (b) Aha ma na maningon ibahen hita ase boi mandalankon tugas na ibere Naibata?

SAHALAK tukang kayu do Jesus paima ia gabe guru atap parbarita. (Mrk. 6:3; Joh. 13:13) Sanggah gabe tukang kayu, iparlajari do sonaha manggunahon ugas-ugasni laho mambahen barang-barang na jenges. Sonai homa sanggah marbarita, pandei do Jesus manggunahon na tarsurat laho patorangkon Hata ni Naibata hubani halak. (Mat. 7:28; Luk. 24:32, 45) Ibotoh Jesus do anggo Naibata marsuruh ia hu tanoh on laho padaskon barita na madear pasal Harajaon ni Naibata. Halani ai, dob marumur 30 tahun, itadingkon ia ma horja tukang kayu ai anjaha gabe parbarita ma ia. On ma horja sipontingan bani. (Mat. 20:28; Luk. 3:23; 4:43) Sihol do homa ia ase susianni mangkorjahon na sarupa.​—Mat. 9:35-38.

² Tongon lang ganupan hita marhorja gabe tukang kayu, tapi ganupan do hita parbarita na mangajarhon barita na madear. Jahowa do na mambere tugas ai. Jadi on ma horja na sipontingan hubanta. Halani ai ma hita igoran ‘hasoman sahorja ni Naibata’. (1 Kor. 3:9; 2 Kor. 6:4) Porsaya do hita ‘rimpun ni hata ni  Naibata ai ma hasintongan’. (Ps. 119:159, 160) Jadi halani sintong do hata ni Naibata, marusaha ma hita “padalankon hata hasintongan in pintor-pintor” sanggah mangidangi. (Basa 2 Timoteus 2:15.) Ase boi sonai, maningon lambin pandei ma hita manggunahon Bibel laho mangajarhon pasal Jahowa, Jesus, ampa Harajaon-Ni. Leganni ai, dong homa ugas-ugas na ipasirsir organisasi na mangurupi hita sanggah mangidangi. Igoran do ugas-ugas ai Alat laho Mangajarhon Bibel. Maningon ibotoh hita ma sonaha manggunahon ganupan alat ai.

3. Aha ma na sipontingan ibagas pangidangionta, janah sonaha Lahoan 13:48 boi mangojur hita mangkorjahon ai?

³ Ra do sungkun-sungkun hita mase alat ai igoran Alat laho Mangajarhon Bibel, sedo Alat laho Mambaritahon Bibel. Halani “mambaritahon” artini patugahkon sada barita, tapi anggo “mangajarhon” artini patorangkon barita ai ase boi iarusi halak anjaha idalankon. Halani lambin dohor ajal ni dunia on, ponting tumang do hita mangajari halak mangarusi hasintongan ni Bibel, ase sidea boi gabe susian ni Jesus. Halani ai, ringgas ma hita mangindahi halak “na dob tinontuhon hinan hu hagoluhan sisadokah ni dokahni” janah mangurupi sidea mangidangi Jahowa.​—Basa Lahoan 13:44-48.

4. Sonaha hita mangindahi halak “na dob tinontuhon hinan hu hagoluhan sisadokah ni dokahni”?

⁴ Sonaha hita mangindahi halak “na dob tinontuhon hinan hu hagoluhan sisadokah ni dokahni”? Bani abad na parlobei, susian ni Jesus mangindahi halak sisonai marhitei marbarita. Ihatahon Jesus bani sidea, “Anggo masuk hanima hubagas sada huta atap dusun pe, pindahi hanima ma ijai na talup tondokannima.” (Mat. 10:11) Sonai ma homa na ibahen hita sonari on. Tontu halak na margijang ni uhur lang ra manjalo barita na madear. Halani ai pindahi hita ma halak na bujur, toruh maruhur, ampa halak na sihol mambotoh hasintongan. Aha na ibahen hita ai usih songon na ibahen Jesus hinan sanggah ia gabe tukang kayu. Paima mambahen barang-barang humbani hayu songon pintu, pasangan, atap na leganni, maningon ipindahi ia do lobei hayu na sosok hujai. Dob ai igunahon ia ma ugas-ugasni laho mambahen barang-barang ai. Sonari pe, maningon do lobei ipindahi hita halak na bujur, dob ai boi ma igunahon hita alat-alat laho mangurupi sidea ase gabe susian ni Jesus.​—Mat. 28:19, 20.

5. Aha ma na porlu ibotoh hita pasal Alat laho Mangajarhon Bibel? Bere ma contohni. (Tonggor gambar bani alm. 9.)

⁵ Tiap ugas-ugas dong bei do gunani. Umpamani ugas-ugas na igunahon Jesus sanggah martukang. * Dong na igunahon laho mamotong, mangukur, mamahat, ampa pasadahon potongan kayu ai. Sonai homa ganup alat laho mangajarhon Bibel dong bei do gunani. Ulas hita ma sonaha hita manggunahon ganup alat ai.

6, 7. (a) Sonaha do nasiam manggunahon kartu kontak? (b) Mase hita porlu manggunahon ontangan partumpuan?

⁶ Kartu Kontak. Hassi pe etek kartu ai, tapi jenges tumang do ai laho patandahon ise do Saksi Jahowa sasintongni pakon situs web jw.org. Bani situs ai boi do holi itorih halak pasal Saksi Jahowa. Anjaha sidea pe boi mangindo parlajaran Bibel. Sadokah on lobih humbani 400.000 halak na mangindo parlajaran Bibel, janah tiap ari dong marratus halak na mambahen sisonai. Jadi huja pe hita laho boan ma kartu kontak ai ase boi ibere bani halak na ijumpahi hita.

⁷ Ontangan. Bani ontangan partumpuan ipatugah do ise Saksi Jahowa. Anjaha marhitei ontangan ai, hita boi mangarahkon halak na “sombuh tonduy” atap halak na sihol mananda Jahowa laho marlajar Bibel. (Mat. 5:3) Bani ontangan ai dong isuratkon: “Nasiam iontang laho marlajar Bibel pakon Saksi-Saksi Jahowa.” Isuratkon use anggo parlajaran ai boi ibahen “bani partumpuan” “atap pakon sahalak na mangajarhon Bibel”. Ganup halak boi roh hu partumpuan, hassi pe sidea lape marlajar Bibel. Anggo sidea roh, bahat do parlajaran Bibel na boi dapot sidea hunjai.

8. Mase maningon iontang hita halak hu partumpuanta? Saritahon ma sada pangalaman.

⁸ Maningon marusaha ma hita mangontang halak ase roh hu partumpuanta. Mase? Halani anggo roh sidea hu partumpuanta, ididah sidea ma anggo Saksi Jahowa lang songon gareja na legan. I partumpuanta iajarhon do hasintongan ni Bibel janah iurupi do halak ase mananda Naibata. (Jes. 65:13) On ma na iahapkon si Ray pakon si Linda na baru on. Porsaya do sidea bani Naibata janah sihol mananda Ia. Halani ai iputuskon sidea ma laho hu ganup gareja na dong i kota ai paima mamutuskon hu gareja na ija do sidea mandaptar. Sanggah ijai, ipardiateihon sidea ma aha na iajarhon janah sonaha parpakeian ni anggotani. Halani bahatni gareja ijai, martahun tahun ma sidea mambahen sisonai. Hape sada pe lang dong na mangajarhon na sintong. Anjaha bahat do anggotani lang suman marpakeian. Dob mulak sidea hun gareja na parpudi na dong bani daftar ni sidea, laho ma si Linda marhorja janah si Ray pe mulak hu rumah. Ibagas pardalanan hu rumah, ididah ia ma dong Balei Harajaon. Ninuhurni, ‘Aha do na ibahen sidea ibagas ai.’ Jadi masuk ma ia hujai. Longang ma ia mangidah halani ganup halak ijai bujur janah basar. Parpakeianni pe suman. Hundul ma ia i lobei. Marosuh tumang ia bani aha na iparlajari ijai! Pangalaman ai mambahen hita mardingat aha na ihatahon si Paulus pasal halak na baru roh hu partumpuan. Nini sidea do, “Na tongon do Naibata i tongah-tongah nasiam.” (1 Kor. 14:23-25) Dobkonsi ai, tongtong ma si Ray martumpu tiap ari Minggu. Dob ai roh ma homa ia hu partumpuan tengah pekan. Dihut do homa si Linda martumpu. Hassi pe domma marumur 70-an,  tapi ra do sidea marlajar Bibel anjaha ididi.

9, 10. (a) Mase urah tumang manggunahon risalah? (b) Patorang ma sonaha hita manggunahon risalah Aha do Harajaon ni Naibata?

⁹ Risalah. Dong ualuh risalah bani Alat laho Mangajarhon Bibel. Urah tumang do manggunahon ai laho mamungkah parsahapan. Humbani tahun 2013 dob ipatandahon, dong hira-hira lima milyar risalah na dob isetak! Ganup risalah ai sarupa do bentukni. Jadi anggo domma ibotoh hita manggunahon sada risalah, boi ma hita manggunahon na leganni. Sonaha hita manggunahon risalah laho mamungkah parsahapan?

¹⁰ Umpamani hita marbarita manggunahon risalah Aha do Harajaon ni Naibata? Patuduh ma alaman na parlobei janah hatahon, “Ongga do tarpingkir ham aha do Harajaon ni Naibata ai?” Dob ai patugah ma tolu pilihan na dong i toruh. Marimbangkon mangkatahon sintong atap salah balosni ai, rahanan ma ham mambuha bagian “Aha na Ihatahon Bibel” janah basahon ma Daniel 2:44 ampa Jesaya 9:5. Paima laho ham, tadingkon ma sungkun-sungkun, “Aha do na laho iahapkon rayatni Harajaon Naibata?” Ai dong bani alaman parpudi bagian “Na Boi Ipikkirhon”. Boi ma holi ham mambalosi sungkun-sungkun ai sanggah manrohi use. Gunahon ma buku Barita Na Madear humbani Naibata! parlajaran 7.

11. Aha ma tujuan ni majallahta ibahen, janah aha na maningon ibotoh hita?

¹¹ Majallah. Menara Pengawal pakon Sadarlah! ai ma majallah na sibahatan isetak janah iterjemahkon i sab dunia on. Halani bahat do halak na mambasa majallah ai, ibahen ma bani sampulni topik na iharosuhkon buei halak hun marbagei nagori. Maningon igunahon hita ma majallah ai laho mangurupi halak mambotoh aha do na sipontingan ibagas hagoluhan on. Tapi paima ai, porlu do ibotoh hita majallah na ija do na sosok ibere bani sasada halak.

12. (a) Hubani ise majallah Sadarlah! ibahen? (b) Saritahon ma pangalamanmu sanggah manggunahon majallah ai.

¹² Majallah Sadarlah! ibahen bani halak na lang sai mambotoh isi ni Bibel. Majallah ai pe ibahen bani halak na lang mangarusi ajaran ni halak Kristen, na lang porsaya bani ugama, ampa bani halak na lang porsaya anggo Bibel ai boi mangurupi sidea. Ai ibahen ase sidea porsaya tongon-tongon do adong Naibata. (Rom 1:20; Heb. 11:6) Majallah ai pe mangurupi halak ase porsaya Bibel ai ‘tongon hata ni Naibata’. (1 Tes. 2:13) Bani tahun 2018, dong tolu topik utama ai ma: “Apa Kebahagiaan Sejati Itu?”, “12 Kunci Keluarga Bahagia”, pakon “Bantuan bagi Yang Berduka.”

13. (a) Hubani ise majallah Menara Pengawal edisi umum ibahen? (b) Saritahon ma pangalamanmu sanggah manggunahon majallah ai.

¹³ Majallah Menara Pengawal edisi umum ibahen laho patorangkon ajaran ni Bibel hubani halak na hormat janah  sihol mananda Naibata. Ra do domma ibotoh sidea otik pasal Bibel tapi lape tongon-tongon mangarusi ajaranni. (Rom 10:2; 1 Tim. 2:3, 4) Bani tahun 2018, dong tolu topik na mambalosi sungkun-sungkun: “Apakah Alkitab Masih Berguna?”, “Bagaimana Masa Depan Kita?”, pakon “Apakah Allah Peduli kepada Anda?”

14. (a) Aha ma tujuanni ibahen ompat video na dong bani Alat laho Mangajarhon Bibel? (b) Saritahon ma pangalamanmu sanggah mamutar video ai.

¹⁴ Video. Sapari, ugas-ugas na igunahon Jesus lang dong na mamakei mesin. Tapi sonari domma bahat alat-alat na mamakei mesin songon sinso, bor, ampa gerinda. Sonai ma homa bani alat na igunahon hita sanggah marbarita. Sonari on, sobali manggunahon publikasi na isetak, igunahon hita do homa video. Dong ompat video na boi igunahon, ai ma: Mase Porlu Marlajar Bibel?, Sonaha do Tongon Ranggian Parlajaran Bibel Nami?, Aha do na Masa i Balei Harajaon?, pakon Ise do Saksi-Saksi Jahowa? Video na pondok hira-hira hurang dua minit, boi iputar sanggah marbarita. Video na leganni boi iputar sanggah hita manrohi use atap pe bani halak na lang sibuk. Jenges tumang do video on laho mangojur halak ase ra marlajar Bibel atap roh hu partumpuanta.

15. Aha ma gunani anggo halak manonton videonta bani sahap ni sandiri? Bere ma contohni.

¹⁵ Dong pangalaman ni botou na jumpah pakon sada naboru marsahap Yap. Ia pindah hun Mikronesia. Jadi iputar botou ai ma video Mase Porlu Marlajar Bibel? bani sahap Yap. Dob manonton video ai, nini naboru ai ma, “Aih bahasaku tene. Humbani parsahapni hubotoh do ia halak Yap!” Dob ai ia mangkatahon anggo ia sihol manorihi ganup publikasi na legan bani sahap Yap i jw.org. (Bandingkon Lahoan 2:8, 11.) Contoh na legan humbani sada botou na tading i Amerika Serikat. Ia mangirim link video na sarupa bani paramanni na tading i nagori na legan. Dob manonton video ai, ikirim paramanni ai ma email hu bani. Nini, “Marosuh tumang do ahu manonton video ai, tarlobih sanggah ihatahon ganup dunia on ibagas kuasa ni hajahaton. Songon na ipatugah bani video ai, domma hupindo parlajaran Bibel.” Jenges tumang do pangalaman ai halani ia tading i nagori na manlarang horja pangidangionta!

16. Patorang ma aha do tujuan ni brosur on ibahen: (a) Tangihon ma Naibata Ase Manggoluh Sadokah ni Dokahni. (b) Barita Na Madear humbani Naibata! (c) Ise na Manghorjahon Harosuh ni Jahowa Sonari On?

¹⁶ Brosur. Hita manggunahon brosur Tangihon ma Naibata Ase Manggoluh Sadokah ni Dokahni * laho mangajarhon hasintongan bani halak na lang sai ibotoh mambasa. Brosur ai pe boi igunahon anggo lape adong publikasi na legan ibagas sahapni. Dong homa brosur Barita Na Madear humbani Naibata! na boi ipakei laho mangajarhon Bibel. Dong 14 topik i pudi ni brosur ai.  Sungkun ma simada rumah topik na ija do na iharosuhkon. Dob ai, gunahon ma topik ai laho mangulas isi ni Bibel pakon sidea. Leganni ai dong homa brosur Ise na Manghorjahon Harosuh ni Jahowa Sonari On? Brosur on ibahen laho mangurupi parlajar Bibel mangarusi pasal organisasinta. Domma igunahon ham brosur on bani sidea? Tonggor ma Jadwal Partumpuan Hagoluhan pakon Pangidangion Kristen bulan Maret 2017, laho mambotoh sonaha manggunahon brosur ai.

17. (a) Aha ma tujuan ni buku Aha do na Iajarhon Bibel Hubanta? pakon buku Cara agar Tetap Dikasihi Allah? (b) Hassi pe parlajar Bibelta domma ididi, aha ma na maningon ibahen hita, janah mase?

¹⁷ Buku. Boi do homa igunahon ham buku Aha do na Iajarhon Bibel Hubanta? hassi pe domma sompat marlajar mamakei brosur. Buku on mangajarhon lambin bahat pasal ajaran dasar humbani Bibel. Anggo ia mambahen hamajuon janah domma salosei buku ai iparlajari, toruskon ma marlajar mamakei buku Cara agar Tetap Dikasihi Allah. * Buku on mangurupi parlajar Bibel mandalankon prinsip ni Bibel ibagas hagoluhanni. Age pe domma ididi parlajar Bibel ai, maningon itoruskon do mangulas buku ai ronsi salosei. Ibahen sonai ase lambin toguh haporsayaonni bani Jahowa janah totap setia.​—Basa Kolosse 2:6, 7.

18. (a) Domu bani 1 Timoteus 4:16 aha ma na maningon ibahen hita, janah aha do gunani ai? (b) Aha do tujuanta manggunahon Alat laho Mangajarhon Bibel?

¹⁸ Jadi ganup Saksi Jahowa maningon mangajari halak pasal ‘hata hasintongan, in ma Ambilan Na Madear’, ase boi sidea mandapot hagoluhan na sadokah ni dokahni. (Kol. 1:5; basa 1 Timoteus 4:16.) Laho mangurupi hita mangkorjahon ai, dong do Alat laho Mangajarhon Bibel na ipasirsir. (Tonggor ma kotak “ Alat laho Mangajarhon Bibel”.) Dear ma gunahon hita ganup alat ai. Maningon ibotoh do sonaha janah sadihari manggunahon alat ai. Ulang bere publikasinta bani na lang marosuh manjalo. Tujuanta sedo pitah mambagihon publikasi. Tapi hita sihol mangurupi halak na toruh maruhur, na sihol mananda Naibata, pakon “na dob tinontuhon hinan hu hagoluhan sisadokah ni dokahni” ase gabe susian ni Jesus.​—Lah. 13:48; Mat. 28:19, 20.