GORAN ni bapangku si Fred Molohan, goran ni inangku si Edna. Domma 20 tahun sidea gabe Saksi Jahowa sanggah tubuh ahu bani tahun 1934. Malas tumang uhurhu halani iajari sidea ahu ase mangkaholongi Jahowa. Hanami tading i Parsons, sada kota na etek i tenggara Kansas. Bahatan do halak na iminaki na martumpu i kurianami. Ringgas do kaluarganami martumpu janah marbarita. Tiap ari Sabtu laho do hanami marbarita i dalan. Sonari ihatahon ma ai mambere hasaksian bani ianan na mabuei. Sipata loja tumang do huahap. Tapi iboli Bapa ma es krim dob salosei hanami marbarita.

Otik do anggota i kurianami. Tapi bolag tumang do ianannami marbarita, das hu huta-huta na etek. Anjaha bahat do peternakan ijai. Sanggah marbarita, gati do halak mambere sayur, dayok, atap pe tolurni. Hinan, igalar do ganup publikasinta. Jadi halani domma ipalobei Bapa duitni, iboan hanami ma ganupan ai hu rumah bahen sipanganonnami.

Somal do namatorasku manggunahon fonograf sanggah marbarita. Halani etek ope ahu, lang boi ahu mamakei ai. Tapi marosuh do ahu mangurupi sidea sanggah mamutar ambilan ni Sanina Rutherford hubani kunjungan ampa parlajar Bibelni.

Ipasang Bapa ma speaker i atas motornami. Ipakei hanami ma ai laho marbarita. Mantap tumang do tene huidah ai. Parlobei, iputar Bapa ma musik ase sihol parhuta ai mambotoh maraha do hanami. Dobkonsi ai, iputar ma rokaman ambilan. Anggo dong na marosuh, ibere hanami ma publikasi.

Iboan Bapa ma motorni ai hu taman kota Cherryvale, Kansas. Anggo ari Minggu bahat do halak na roh hu taman ai. Tapi roh ma  polisi mangkatahon anggo motor lang boi masuk hubagas taman. Jadi iboan Bapa ma motor ai hu dipar ni taman ase boi itangar halak rokaman ambilan ai. Marosuh tumang ahu pakon si Jerry, abangku dihut marbarita mamakei cara sisonai.

Sadokah martahun-tahun, ibagihon hanami ma publikasi hu ianan na manlarang horja parambilanonta. Songon na husaritahon nongkan ai, halani ai ma ase roh hanami borngin-borngin hu rumah ni halak, janah sip-sip pamasukkon risalah hun toruh ni labah. Dobkonsi ai mintor podas ma hanami tumpu i darat ni kota laho mangidah atap na adong do sanina botou na itangkap polisi.

Cara na legan hanami marbarita ai ma mamakei plakat. Marbaris ma hanami markaliling hu kota mamboan plakat ai. Hudingat ongga do sanina botou roh hu kotanami janah dihut marbarita songon ai. Bani plakat ai isurat ma “Parohkon Ladung ampa Siding do Ugama”. Mardalan ma sidea hun rumahnami das hu kota, daohni hira-hira sada satongah kilometer. Dob ai mulak use sidea hu rumahnami. Untung ma lang dong sidea na itangkap. Tapi bahat do halak na sihol mambotoh aha do na masa.

Gati do hanami hu Texas laho kebaktian. Halani Bapa marhorja i perusahaan kereta api, lang manggalar ongkos hanami sanggah laho kebaktian ampa manrohi kaluarga. Tulangku si Fred Wismar, pakon anturangku, si Eulalie, tading i Temple, Texas. Sanggah poso ope, Tulang ai domma marlajar Bibel, janah ididi bani tahun 1900-an. Ia ma na patugahkon hasintongan hubani sanina botouni, tarmasuk ma bani inang. Bahat do halak i Texas na mananda Tulang halani ongga ia gabe hamba zona (sonari ihatahon sintua kaliling). Bujur, basar, anjaha ringgas do homa Tulang. Janah marosuh do ahu mangusihisi.

Bani tahun 1941, hu St. Louis, Missouri ma hanami laho kebaktian. Isuruh ma ganup na maposo ase hundul i lobei ni panggung laho manangar ambilan ni Sanina Rutherford. Dong 15.000 na maposo na roh ijia. Judul ambilan ai “Anak ni Raja”. Dob salosei marambilan, ibagihon Sanina Rutherford ampa asistenni ma buku na baru marjudul Children hubani ganup na maposo.

Bani bulan April 1943, hu Coffeyville, Kansas ma hanami laho kebaktian. Tema ni kebaktian ai, “Idilo laho Marhorja”. Ijai ipatugah ma dong acara partumpuan na baru, ai ma Sikolah Pangidangion Kristen. Dob ai, ibere ma bennami buku. Dong 52 parlajaran bani buku ai, na laho igunahon bani sikolah ai. Malas homa uhur halani bani kebaktian ai ma ahu ididi. Bani tahun ai pe, dapot tugas na parlobei ma ahu bani sikolah ai.

Tamat SMA ma ahu tahun 1951. Domma hubahen cita-citangku. Sihol do ahu mangidangi i Betel songon si Jerry abangku, na ongga mangidangi ijai. Jadi huisi ma formulirni. Lang piga dokah iontang ma ahu mangidangi i Betel. Jadi ahu mulai marhorja ijai tanggal 10 Maret 1952. Malas tumang uhurhu mambahen haputusan ai. Ai ma dalanni ahu boi lambin bahat marhorja bani Jahowa.

Sasintongni sihol do ahu itugaskon i bagian parsetakan. Tapi gabe parhobas i dapur do ahu ibahen. Hassi pe sonai tong do malas uhurhu halani bahat na boi huparlajari ijai. Margantih do hanami marhorja. Jadi bahat ma panorangku. Halani ai gati ma ahu hu perpustakaan i Betel laho marlajar. Hasilni lambin toguh ma haporsayaonku janah lambin orot ma ahu bani Jahowa. On ma na mambahen ahu marosuh tongtong mangidangi i Betel. Domma kaluar si Jerry hun Betel tahun 1949 janah marhajabuan pakon si Patricia. Tapi sidea tading dohor hun Betel i Brooklyn. Sidea ma na patoguhkon ahu sanggah baru masuk hu Betel.

 Lang piga dokah dobkonsi ahu i Betel, dong ma pangaturan laho mamilih sanina-sanina hun Betel laho itugaskon marambilan hu kuria na legan. Daoh ni kuria-kuria ai hira-hira 320 kilometer hun Brooklyn. Ahu ma sada na tarpilih. Hinan, hira-hira sajam ma padaskon ambilan ai. Mungkahni gobir do ahu sanggah na marambilan ai. Somalni markareta api do ahu laho. Hudingat do bani ari Minggu tahun 1954, ahu ibagas pardalanan mulak hu New York sanggah musim borgoh. Sasintongni maningon das do ahu bani bod ni ari ai. Tapi halani doras udan janah dong homa salju, matei ma masin ni kareta api ai. Ujungni das ma ahu patarni jam lima pagi i New York. Dob ai, naik kareta api na legan ma ahu hu Brooklyn. Tarlambat do ahu masuk horja sadari ai. Hassi pe loja pangahapku halani lang modom saborngin ai, tapi malas tumang uhurhu halani rup martumpu pakon bahat sanina botou na hujumpahi ai.

Leganni ai, sahali saminggu dihut do homa ahu bani acara mangulas Bibel na ibahen i lantai dua gedung 124 Columbia Heights. Acara ai boi itangar i siaran radio WBBR. Gati do Sanina Alexander H. Macmillan dihut bani acara ai. Somalni idilo hanami do ia Sanina Mac. Domma martahun-tahun ia mangidangi i Betel, janah totap do ia setia hassi pe bahat tantanganni. Halani ai sosok do ia gabe siusihan bannami na maposo.

Bani tahun 1958, mubah ma tugasku i Betel. Itugaskon ma ahu mangurus haporluan ni sanina botou na dob tamat hun sikolah Gilead. Umpamani mangurus visa ni sidea ase boi tading i nagori na legan. Ahu do homa na mangurus pardalanan ni sidea. Sanggah mahal tiket ni pesawat, bahatan do sidea na markapal laut hu Asia pakon Afrika. Tapi martahun-tahun dobkonsi ai, murah ma harga ni tiket. Jadi marpesawat ma sidea hu ianan ni sidea itugaskon.

Bani tahun 1960, hupindahi ma pesawat na laho isewa ase boi ipakei sanina botou hu kebaktian-kebaktian internasional na laho ibahen i Eropa bani tahun 1961. Dihut homa ahu hu kebaktian na ibahen i Hamburg, Jerman. Dob salosei kebaktian, ahu pakon tolu hasoman hun Betel manewa motor laho hu Italia. Irohi hanami ma Kantor Cabang i Rom. Dob ai laho ma hanami manlopusi Prancis ampa Dolog Pyrenees, anjaha das i Spanyol. Ijai ilarang do horja pangidangionta. Ibere hanami ma publikasi hubani sanina botou i Barcelona. Ibungkus hanami ma ai songon kado. Malas tumang uhurnami boi pajumpah pakon sidea. Dobkonsi ai laho ma hanami hu Amsterdam anjaha mulak hu New York.

Tahun 1962, itugaskon ma ahu mangurus pardalanan ni 583 sanina botou na laho hu kebaktian internasional i bahat nagori. Kebaktian “Barita na Madear na Manongtong” ai ibahen bani tahun 1963. Jadi sidea dihut bani kebaktian i Eropa, Asia, pakon Pasifik Selatan janah laho  hu Honolulu, Hawaii pakon Pasadena, Kalifornia. Dob ai dihut do homa sidea bani tur khusus hu nagori-nagori na dong ibagas Bibel, umpamani Lebanon pakon Yordania. Bagiannami ma na mangurus tiket pesawat, hotel, ampa visa ni sidea.

Tahun 1963 pe tahun na ponting do ai bangku. Bani tanggal 29 Juni, marhajabuan ma ahu pakon si Lila Rogers hun Missouri. Ia domma mangidangi i Betel humbani tahun 1960. Saminggu dobkonsi hanami marhajabuan, laho ma hanami hu kebaktian-kebaktian i Junani, Masir, pakon Lebanon. Hunjai marpesawat ma hanami hu Jordan. Ijai lang bebas hita mangidangi janah sunsah do Saksi Jahowa mangurus visa. Lang ibotoh hanami aha do na sihol masa anggo das hanami ijai. Hape megah tumang pangahapnami halani daskonsi hanami i bandara, domma dong sanina botou na mangalo-alo hanami. Ibahen sidea do tulisan na banggal, “Horas Saksi-Saksi Jahowa.” Malas do homa uhurnami boi mangidah ianan ni si Abraham, si Isak, pakon si Jakob hinan. Laho do homa hanami hu ianan ija Jesus pakon apostelni marbarita hinan, ampa mangidah ianan ija ambilan na madear ipararat “ronsi ujung ni tanoh on”.​—Lah. 13:47.

Sadokah 55 tahun tongtong do istriku mangurupi ahu ibagas pangidangion. Ongga do piga-piga hali hanami laho hu Spanyol pakon Portugal. Ijia ilarang ope horja pangidangionta. Jadi iojur hanami ma sanina botou ijai janah iboan hanami ma publikasi bani sidea. Dong homa sanina botou na ipenjara i Cádiz, Spanyol. Malas tumang uhurhu halani boi patoguhkon uhur ni sidea marhitei ambilan na hupadas.

Humbani tahun 1963 gati do ahu mangurus kebaktian internasional songon i Afrika, Amerika Tengah pakon Selatan, Australia, Eropa, Hawaii, Puerto Riko, Selandia Baru, pakon Timur Jauh. Sanggah kebaktian i Warsawa, Polandia, bani tahun 1989, bahat do sanina botou hun Rusia na roh hujai. Janah on ma kebaktian na parlobei na irohi sidea. Jumpah ma hanami pakon sanina botou na ongga ipenjarahon sadokah martahun-tahun i Uni Soviet halani setia bani Jahowa. Lang tarhalupahon hanami kebaktian sisonai.

Tugasnami na legan ai ma manrohi kaluarga Betel pakon misionaris i sab tanoh on. Ongga do hanami roh hu Korea Selatan. Ijai jumpah ma hanami pakon 50 sanina na ipenjarahon i Suwon. Age pe ipenjara, totap do malas uhur ni sidea paimahon boi use bebas mangidangi Jahowa. Gabe tarojur do uhurnami jumpah pakon sidea!​—Rom 1:11, 12.

Sanggah ahu ididi bani tahun 1943, dong hira-hira 100.000 parbarita. Tapi sonari dong 8.000.000 lobih parbarita i 240 nagori. Partambahan  ai boi adong halani pasu-pasu ni Jahowa marhitei sanina botou na tamat hun sikolah Gilead. Pongkut do sidea marhorja ibagas pangidangion. Ahu pe malas do uhurhu halani boi mangurupi sidea laho hu ianan ni sidea itugaskon.

Malas tumang uhurhu halani humbani na maposo domma hupilih mangidangi Jahowa i Betel. Sadokah goluhku, bahat do huahapkon pasu-pasu-Ni. Leganni ai, ibagas 50 tahun na parpudi on, bahat do homa dapot ahu huan-huan sanggah mangidangi kuria-kuria na dong i Brooklyn.

Ronsi sonari tongtong do istriku mangurupi ahu mangidangi i Betel. Hassi pe sonari domma marumur 84 tahun ahu, malas do uhurhu halani boi mangurupi bagian na mangirim surat hu Kantor Cabang.

Megah do ahu halani ibagas Organisasi ni Jahowa. Boi do huidah parsaudni Maleaki 3:18, “Idahonnima ma parleganan ni parpintor humbani parjahat, na mambalosi Naibata humbani na so mambalosi Naibata.” Songon na dob ibotoh hita roh samborni do dunia Setan on. Anjaha ganup halak na mangirikkonsi pe lang marpangarapan. Legan do anggo juakjuak ni Jahowa. Hassi pe gok hasunsahan i dunia on, anggo totap hita mangkaholongi janah mangidangi-Si, martuah do goluhta. Janah dong homa pangarapan bani ari simagira. Sada hasangapon do boi dihut mambaritahon ambilan na madear hubani ganup halak. (Mat. 24:14) Marhitei Harajaon ni Naibata, saud ma paradeiso i tanoh on. Sai ipaima-ima hita do ari ai! Ijai, sehat do holi ganup halak, martuah, janah manggoluh sadokah ni dokahni.