1, 2. Aha ma na ibahen Sibolis ase jolma marsitaronon?

BAHAT do penemuan ni jolma na marguna hubanta. Umpamani, lampu, kulkas, talepon, ampa motor. Tapi dong homa penemuan na mambahen hasedaon. Umpamani, bom atom, ranjau darat, sinjata, ampa sigaret. Tapi dong do homa na siparahan humbani ai, na mambahen jolma marsitaronon. Aha ma ai? Ladung! Sasada halak na mangkatahon na lang sintong laho pakahouhon halak ai ma na ihatahon ladung. Ise ma na parlobei sahali marladung? Sibolis! Ihatahon Jesus do ia “bapa ni ladung”. (Basa Johannes 8:44.) Nantigan do mulani ia marladung?

² Ia marladung marribu tahun na salpu i pohon Eden. Ijia, sonang ope hagoluhan ni si Adam pakon si Hawa i Paradeiso dobkonsi itompa Naibata sidea. Nini Naibata bani sidea anggo ipangan sidea buah “humbani hayu pambotohan ni na madear ampa na masambor in”, gabe matei ma sidea. Hassi pe ibotoh Sibolis ai, ihatahon do bani si Hawa marhitei ulog, “Seng tongon matei nasiam.” Ai ma ladung ni Sibolis na parlobei sahali. Dob ai  nini homa, “Ibotoh Naibata do, anggo ipangan nasiam hunjai, gabe buha ma mata nasiam, doskon Naibata ma nasiam mambotoh na madear pakon na masambor.”​—1 Mus. 2:15-17; 3:1-5.

3. Mase jahat tumang do pambahenan ni Sibolis ai, anjaha sonaha do ujungni?

³ Jahat tumang do ladung na ihatahon Sibolis ai, halani ibotoh ia do anggo ipangan si Hawa buah ai, gabe matei ma si Hawa. Janah sonai ma na tarjadi. Halani ilanggar si Adam pakon si Hawa titah ni Naibata, gabe matei ma sidea. (1 Mus. 3:6; 5:5) Lang pitah ai, halani si Adam mardousa, ‘das ma hamatean in bani haganup jolma’. Anjaha “hamatean in domma manggomgomi . . . , age pe seng dos pardousaon ni sidea hubani panlanggaron ni si Adam”. (Rom 5:12, 14) Halani ai ma dihut hita mardousa janah lang boi manggoluh sadokah ni dokahni. Sonari, umur ni jolma pitah “pitu puluh do, anggo margogoh das ualuh puluh tahun”, ampa buei ‘hangaluton anjaha marhasunsahan’. (Ps. 90:10) Ganupan ai tarjadi halani ladung na ihatahon Sibolis.

4. (a) Sungkun-sungkun aha do na laho iulas hita? (b) Domu bani Psalmen 15:1, 2, ise do na boi marhasoman pakon Naibata?

⁴ Ihatahon Jesus do pasal Sibolis, “Seng jongjong ia ibagas hasintongan.” Anjaha ronsi sonari on sonai do tong ia. Tongtong do ia marladung laho “pakahouhon haganup dunia on”. (Pangk. 12:9) Tontu lang ra hita ipakahou Sibolis. Bani artikel on ulas hita ma tolu sungkun-sungkun ai ma: Sonaha Sibolis pakahouhon jolma sonari on? Mase halak marladung? Ase ulang songon si Adam pakon si Hawa, sonaha hita boi tongtong mangkatahon na sintong ase boi marhasoman pakon Naibata?​—Basa Psalmen 15:1, 2.

5. Sonaha Sibolis pakahouhon dunia on?

⁵ Sasintongni hita boi do lang hona tirangkap ni Sibolis. Si Paulus mangkatahon, “Sedo na so ibotoh hita uhurni ai” atap akal-akalni. (2 Kor. 2:11) Domma ibotoh hita Sibolis do na manrajai dunia on, sonai homa ugama na palsu, pamarentahan na jahat, ampa pardagangan ni dunia on. (1 Joh. 5:19) Jadi igunahon Sibolis ampa begu-beguni ma ganupan ai laho pakahouhon buei jolma marhitei “ladung”. (1 Tim. 4:1, 2) Umpamani, dong do piga-piga parbisnis na mambahen iklan na dear laho mangoto-otoi halak atap ase dapot untung na banggal. Hapeni barang na ijual ai parohkon hasedaon.

6, 7. (a) Mase parah tumang ladung ni pambobai ugama? (b) Ajaran palsu aha do na ongga itangar nasiam na ihatahon pambobai ugama?

⁶ Lambin parah do ujungni anggo pambobai ugama marladung. Mase? Halani anggo porsaya sasada halak bani ajaranni sidea ai lanjar ihorjahon sidea ma na ihagigihon Naibata, gabe matei ma halak ai sadokah ni dokahni. (Hos. 4:9) Bani masa ni Jesus, ibotoh ia do bahat pambobai ugama na marladung. Halani ai ma pangkar do Jesus mangkatahon, “Bursik ma nasiam sibotoh surat pakon Parisei, nasiam sipakulah-kulah, na mandalani laut ampa tanoh, laho manarik pala sahalak bani ugama nasiam, anjaha dob  saud ia masuk, gabe [“hu gehena”, Terjemahan Dunia Baru] do ia ibahen nasiam,” atap matei sadokah ni dokahni. (Mat. 23:15) Ihatahon do homa sidea songon Sibolis, bapani ai, na isobut “sibunuh jolma”.​—Joh. 8:44.

⁷ Sonari on bahat do pambobai ni ugama. Dong na isobut pastor, pandita, atap na legan. Songon halak Parisei, sidea pe lang mangajarhon hasintongan ni Bibel, tapi “itukar sidea do hasintongan ni Naibata gabe ladung”. (Rom 1:18, 25) Umpamani ihatahon sidea do “sahali maluah boi ma totap maluah”, manggoluh ope tonduy ni halak na matei, anjaha ijalo Naibata do homoseksual atap lesbian.

8. Aha do ladung na ihatahon pambobai ni politik?

⁸ Bahat do homa pambobai ni politik na marladung laho pakahouhon bahat halak. Ihatahon do anggo sidea boi mambahen dunia on gabe ‘damei anjaha sonang’. Hape “sompong ma roh hamagouan ai bani sidea”. Jadi ulang ma hita porsaya bani pambobai na mangkatahon anggo sidea boi padearhon dunia on. Domma ibotoh hita “songon panangko borngin do parroh ni Ari ni Tuhan in”.​—1 Tes. 5:1-4.

9, 10. (a) Mase halak marladung janah sonaha do ujungni? (b) Aha do na porlu idingat hita pasal Jahowa?

⁹ Lang pitah halak na adong jabatanni na marladung. Bani sada artikel na marjudul “Mase Hita Marladung”, na isuratkon si Y. Bhattacharjee, ihatahon, “Ladung ai domma marurat bani jolma.” Halani ai ma bahat halak porsaya lang salah na marladung ai. Gati do halak marladung halani mabiar tarbotoh salah atap pambahenanni na jahat, na leganni ase boi mandapot untung na banggal. Ihatahon artikel ai homa, lang salah be iahap halak marladung bani “halak na legan, hasoman sahorja, hasomanni, ampa na hinaholonganni”.

¹⁰ Sonaha do ujungni anggo sasada halak marladung bani halak na legan? Gabe lang be sidea marsihaporsayaon atap marhasoman. Umpamani, tontu pusok do uhurni sada paramangon dob mambotoh sadokah on istrini domma marhasoman-hasoman pakon dalahi na legan. Dong homa paramangon na bujur anjaha parduli bani istrini ampa anakni i lobei ni buei halak. Tapi dob lang dong na mangidah, jahat do ia bani sidea. Dingat ma pitah jolma do na boi ioto-otoi, tapi anggo Jahowa lang boi. Bibel mangkatahon ‘haganup do tidak anjaha ungkab’ i lobei-Ni.​—Heb. 4:13.

11. Aha ma na iparlajari hita humbani pambahenan ni si Ananias pakon si Sapira? (Tonggor ma gambar bani alm. 3.)

¹¹ Sapari, dong sapasang suami-istri  na igunahon Sibolis laho marladung bani Naibata, ai ma si Ananias pakon si Sapira, istrini ai. Marusaha do sidea mangoto-otoi apostel. Sonaha carani? Ijual sidea ma tanohni janah ibere ma satongah humbani duit ai hubani apostel. Ase songon na bujur sidea ididah kuria, ihatahon ma ganup do duit ni panjualan ai ibere sidea. Tapi ibotoh Naibata do ai. Halani ai iuhum Naibata ma sidea.​—Lah. 5:1-10.

12. Sonaha pangahap ni Jahowa mangidah parladung, janah aha ma na laho masa anggo lang ra mubah sidea?

¹² Sonaha do pangahap ni Jahowa mangidah halak parladung? Magigi tumang do Ia mangidah sidea. Bibel mangkatahon, songon “baliang” do sidea i lobei-Ni. (Pangk. 22:15) Jadi anggo lalab sidea marladung janah lang ra mubah, songon Sibolis, ibahen ma sidea hu “laut apuy”. Artini iripaskon ma sidea sadokah ni dokahni.​—Pangk. 20:10; 21:8; Ps. 5:7.

13. Aha ma na ibotoh hita pasal Jahowa, janah aha ma na sihol bahenonta?

¹³ Domma ibotoh hita anggo Jahowa ai sedo songon “jolma na ra marladung” janah “seng boi Naibata marladung”. (4 Mus. 23:19; Heb. 6:18) ‘Ihasogamkon Jahowa do . . . dilah siparladung.’ (Pod. 6:16, 17) Anggo sihol hita pamalaskon uhur ni Jahowa, hatahon ma na sintong janah “ulang ma marsiladungan”.​—Kol. 3:9.

14. (a) Aha ma na mambahen legan Saksi Jahowa pakon ugama na legan? (b) Patorang ma aha do artini prinsip na dong bani Lukas 6:45.

¹⁴ Sonaha Saksi Jahowa patuduhkon anggo sidea lang sarupa pakon ugama na legan? Tongtong ma hita ‘mangkatahon  na sintong’. (Basa Sakaria 8:16, 17.) Apostel Paulus mangkatahon, ‘Ipatuduhkon hanami dirinami songon juakjuak ni Naibata marhitei mangkatahon na sintong.’ (2 Kor. 6:4, 7) Anjaha Jesus pe mangkatahon ‘na manggoki uhur do na iluarhon pamangan’. (Luk. 6:45) Jadi, sasada halak ihatahon jujur anggo ia mangkatahon na sintong. Lang ra ia marladung bani ise pe. Sonari ulas hita ma sonaha hita boi totap jujur ibagas hagoluhanta.

15. (a) Mase lang dear marsipakulah-kulah? (b) Sonaha ase na maposo lang mangihutkon parlahou hasomanni na sambor? (Tonggor ma surat partoruh.)

¹⁵ Somal do halak na maposo sihol ase ijalo hasomanni na saumur pakonsi. Halani ai, gabe marsipakulah-kulah ma sidea. Anggo ijin namatorasni, atap sanggah i partumpuan, bujur do parlahouni. Tapi sambor do parlahouni sanggah rap pakon hasomanni na lang sisombah Jahowa atap sanggah mangunahon media sosial. Ra do sambor parsahapni, marpakeian na lang suman, manangar musik na sambor, minum-minum, mamakei narkoba, sip-sip marhaleti, atap na leganni. Dos do ai sidea domma mangoto-otoi Jahowa, namatorasni, ampa sanina botou i kuria. (Ps. 26:4, 5) Hape ibotoh Jahowa do ganupan ai. (Mrk. 7:6) Jadi, rahanan ma ‘ulang simburu uhurta mangidah pardousa, tapi marhabiaran ma hita tongtong’ bani Jahowa.​—Pod. 23:17. *

16. Sonaha hanima mambalosi ganup sungkun-sungkun na dong bani formulir merintis atap Betel?

¹⁶ Anggo sihol hanima merintis atap masuk hu Betel, dong formulir na maningon iisi hanima. Ijai dong sungkun-sungkun pasal hasehaton, hiburan, ampa parlahounima. Maningon jujur ma hanima mambalosi ganup sungkun-sungkun ai. (Heb. 13:18) Tapi sonaha porini dong ihorjahon hanima na ihagigihon Jahowa, na mambahen targanggu panggora ni uhurmu? Patugah ma ai bani sintua ase boi sidea mangurupi hanima mangidangi Jahowa humbani borsih ni uhur.​—Rom 9:1; Gal. 6:1.

17. Aha ma na maningon ibahen hita porini polisi manungkun pasal sanina botou hubanta?

¹⁷ Porini i nagori on hita ilarang mangidangi Jahowa, aha ma na ibahen ham anggo itangkap polisi ham janah isungkun pasal sanina botou? Ai maningon ipatugah ham do ganupan na ibotoh ham pasal sidea? Dingat ma  na ibahen Jesus sanggah ia itangkap gubernur Rom. Idalankon ia do prinsip on, “Adong panorang sipsip, anjaha dong panorang marsahapi.” Jadi lang ganup sungkun-sungkun ai ibalosi ia! (Par. 3:1, 7; Mat. 27:11-14) Jadi, porini sonai situasinta, maningon maruhur ma hita. Ulang halani hita gabe itangkap homa sanina botou na legan.​—Pod. 10:19; 11:12.

18. Porini dong sintua na manungkun pasal sanina atap botou, aha ma na maningon ibahen hita?

¹⁸ Sonaha porini i kuria dong sanina atap botou na mangkorjahon na sambor janah isungkun sintua ham pasal ai? Porini na mardousa ai hasoman atap kaluargamu, aha ma na ihatahon ham? Bibel mangkatahon, “Saksi na sintong manluarhon na sintong.” (Pod. 12:17; 21:28) Jadi, maningon ipatugah ham ma ganup na ibotoh ham pasal ai, halani martanggung jawab do sintua manjaga kuria ase totap borsih. Anjaha ibotoh sidea homa sonaha mangurupi na mardousa ai ase mubah janah paorotkon parhasomananni pakon Jahowa.​—Jak. 5:14, 15.

19. Aha ma na laho iulas hita bani artikel na mangihut?

¹⁹ Martonggo do si Daud bani Jahowa, “Hasintongan na ibagas uhur do iharosuhkon Ham.” (Ps. 51:8) Si Daud mambotoh na ibagas uhur do na sipontingan. Halani ai, bai ganup panorang ‘hatahon hita ma hasintongan bani hasoman’. Dong ope cara na legan na patuduhkon anggo hita lang sarupa pakon ugama na legan, ai ma sanggah hita mangajarhon pasal hasintongan ni Bibel. Bani artikel na mangihut ulas hita ma sonaha carani.