1, 2. (a) Sonaha do pangahapta sanggah sompong dong parubahan? (Tonggor ma gambar bani alm. 22.) (b) Sonaha Psalmen 131 boi mangurupi hita ase totap mangahapkon hadameion?

DOBKONSI 25 tahun si Lloyd pakon si Alexandra mangidangi i Betel, itugashon ma sidea hu lapangan. Mungkahni pusok do uhur ni sidea. Nini si Lloyd, “Marosuh tumang do ahu marhorja i Betel. Huarusi do namin mase ibahen parubahan ai, tapi sadokah marbulan-bulan lang tarjalo ahu ai. Huahap lang be ihaporluhon ahu.” Jadi mubah-ubah do pangahap ni si Lloyd. Sipata boi do ijalo ia parubahan ai, tapi sipata maretek ni uhur do ia.

² Sai tongtong do adong parubahan ibagas hagoluhan on. Anjaha halani sompong, ra do ai mambahen hita holsohan ampa maretek ni uhur. (Pod. 12:25)  Tapi sonaha hita boi totap mangahapkon hadameion anggo tarjadi sisonai? (Basa Psalmen 131:1-3.) Ulas hita ma contoh humbani juakjuak ni Naibata sapari ampa sonari na mangahapkon hadameion sanggah dong parubahan.

3. Aha do na masa bani si Josep?

³ Pardiateihon ma contoh humbani si Josep. Simburu do ganup abangni mangidahsi halani ia anak hinaholongan ni bapani. Halani ai, sanggah marumur 17 tahun, ijual abangni ma ia hubani halak Masir. (1 Mus. 37:2-4, 23-28) Sadokah 13 tahun, bahat ma sitarononni ijai, iparjabolon janah ipenjarahon. Daoh homa hun kaluargani. Sasintongni boi do ai mambahen ia gabe mandolei atap marah. Tapi lang sonai ia. Aha ma na mangurupi ia ase lang sonai?

4. (a) Aha do na mangurupi si Josep ase lang mandolei? (b) Sonaha Jahowa mambalosi tonggo ni si Josep?

⁴ Sanggah i penjara, idingat si Josep do sonaha Jahowa mangurupi ia sadokah on. (1 Mus. 39:21; Ps. 105:17-19) Sanggah poso ope ia, ongga do ibere Naibata nipi hu bani. Ra do homa idingatni ai, na mambahen ia porsaya anggo Jahowa tongtong do mangkasomanisi. (1 Mus. 37:5-11) Gati do homa ia martonggo patugahkon na ibagas uhurni. (Ps. 145:18) Anjaha ibalosi Jahowa do tonggoni ai. Ibahen Naibata do ase porsaya ia “ihasomani Naibata do ia” lang soal aha pe na masa.​—Lah. 7:9, 10. *

5. Sonaha ‘hadameion humbani Naibata’ mangurupi hita ase totap ringgas mangidangi?

⁵ Hassi pe mubah situasinta, tapi ‘hadameion humbani Naibata’ boi do manjaga uhur ampa pingkiranta ase lang maretek ni uhur. (Basa Pilippi 4:6, 7.) Sanggah dong holsoh ni uhur, hadameion ai boi patoguhkon uhurta ase totap ringgas mangidangi Jahowa janah lang mandolei. Sonari ulas hita ma siusihan humbani sanina botou na ongga mangahapkon sisonai.

6, 7. Sonaha tonggo boi mangurupi hita mandapot hadameion? Bere ma contoh.

⁶ Sanggah si Ryan pakon si Juliette mandapot surat hun organisasi na patugahkon anggo sidea lang be perintis istimewa sementara, gabe maretek ni uhur ma sidea. Nini si Ryan, “Mintor martonggo ma hanami. On ma panorangni ase hanami marpangunsandeian bani Jahowa. Halani bahat halak na baru i kuria on, jadi itonggohon hanami ma ase boi hanami mambere siusihan bani sidea.”

⁷ Sonaha Jahowa mambalosi tonggo ni sidea ai? Nini si Ryan, “Dob martonggo, lang be holsohan atap maretek ni uhur hanami. Damei ni Naibata boi manjaga uhur ampa  pingkirannami. Ibotoh hanami bahat ope na boi ihorjahon hanami bani Jahowa. On ma na mangurupi hanami ase totap mangarap bani Jahowa.”

8-10. (a) Sonaha tonduy na pansing mangurupi hita sanggah holsohan? (b) Aha ma gunani anggo hita totap ringgas mangidangi Jahowa?

⁸ Tonduy na pansing pe boi mangurupi hita ase mandapot hadameion. Umpamani sanggah mambasa Bibel, jumpah hita ma ayat na mangurupi hita mambotoh aha do na sipontingan. (Basa Johannes 14:26, 27.) Sonai ma na masa bani si Philip pakon si Mary, istrini. Sidea ongga mangidangi sadokah 25 tahun i Betel. Bahat tumang sitaronon ni sidea. Ibagas ompat bulan, matei ma inang, simatua naboru, ampa sanina ni si Philip. Dob ai, maningon iurus homa simatua dalahini halani domma pikun.

⁹ Nini si Philip, “Lang mandolei ahu halani ai, tapi songon adong na hurang. Sanggah mambasa majallah Ambilan na Madear, na mangulas Kolosse 1:11, huarusi ma hape lang sungkup pitah sabar, tapi porlu do patuduhkon ai ‘marhasoman malas ni uhur’. Jadi hita boi marmalas ni uhur halani pangurupion ni tonduy na pansing, sedo halani situasinta.”

¹⁰ Tapi totap do si Philip pakon si Mary ringgas marbarita. Halani ai ipasu-pasu Jahowa ma sidea. Dong ma parlajar Bibel ni sidea na mambahen hamajuon, janah ra marlajar piga-piga hali ibagas na saminggu. Nini si Mary, “Malas tumang uhurhu. Huahap songon na ihatahon Jahowa do bannami ase ulang lalab holsohan.”

11, 12. (a) Mase si Josep ipasu-pasu Jahowa? (b) Sonaha Jahowa mamasu-masu si Josep?

¹¹ Sipata anggo sompong mubah situasinta, ra do gabe holsohan hita. Gabe lalab ma ipingkiri hita ai. Tapi lang sonai si Josep. Hassi pe ibagas hasunsahan, marusaha do ia mambahen na sidearan. Pongkut do ia marhorja sanggah i rumah ni si Potipar ampa sanggah i penjara.​—1 Mus. 39:21-23.

¹² Bani sada ari, ipenjarahon ma dua halak siparugas ni Parao. Itugaskon ma si Josep mangawasi sidea. Bujur do si Josep bani sidea. Halani ai, ra  ma sidea mansaritahon pasal nipi na mambahen holsohan sidea. (1 Mus. 40:5-8) Lang ibotoh si Josep, marhitei parsahapan ai ma dalanni ia boi bebas. Dobkonsi dua tahun, ibebaskon ma ia anjaha iangkat gabe wakil ni Parao i Masir.​— 1 Mus. 41:1, 14-16, 39-41.

13. Aha ma na maningon bahenonta ase hita ipasu-pasu Jahowa?

¹³ Sipata ra do adong situasi na lang boi iubah hita. Tapi songon si Josep, totap ma hita sabar janah mangkorjahon na sidearan ase ipasu-pasu Jahowa. (Ps. 37:5) Hassi pe sunsah anjaha holsohan, ipargogohi Naibata do hita ase “lang putus pangarapan”. (2 Kor. 4:8) Isarihon Jahowa do hita anggo totap ringgas mangidangi-Si.

14-16. Sonaha si Pilippus patuduhkon anggo ia totap ringgas marbarita hassi pe mubah-ubah situasini?

¹⁴ Hita pe boi do homa mangusihi susian ni Jesus na margoran si Pilippus. Totap do ia ringgas marbarita hassi pe mubah situasini. Mungkahni itugaskon ma ia hu Jerusalem. (Lah. 6:1-6) Tapi mubah ma situasi ijai. Dobkonsi si Stepanus ibunuh, iparburu ma ganup halak Kristen. Halani ai lintun ma sidea hun Jerusalem. Hassi pe sonai, totap do si Pilippus ringgas mangidangi. Laho ma ia hu Samaria halani bahat ope halak ijai na lape manangar barita na madear.​—Mat. 10:5; Lah. 8:1, 5.

¹⁵ Huja pe tonduy na pansing mangarahkon si Pilippus ra do ia. Halani ai iarahkon ma ia hu Samaria. Ijia, iapasi halak Jahudi do halak Samaria. Tapi si Pilippus lang sonai. Ra do ia marbarita hubani sidea. Hasilni “ibogei na mabuei” ai ma barita na madear.​—Lah. 8:6-8.

¹⁶ Dob ai, iarahkon tonduy na pansing ma ia ase marbarita hu Asdod ampa Kesarea. Ijai bahat do halak na lang Jahudi. (Lah. 8:39, 40) Dob ai mubah ma use situasini. Marhajabuan ma ia janah dong homa niombahni. Hassi pe sonai totap do si Pilippus  ringgas marbarita. Halani ai ipasu-pasu Jahowa ma ia pakon kaluargani.​—Lah. 21:8, 9. 

17, 18. Anggo ringgas hita marbarita, sonaha ai boi mangurupi hita?

¹⁷ Bahat do halak na mangidangi sepenuh waktu, totap ringgas marbarita hassi pe mubah situasini. On ma na mambahen sidea marmalas ni uhur. Dong sada pangalaman hun Afrika Selatan ai ma si Osborne pakon si Polite, istrini, na lang be mangidangi i Betel. Mungkahni iahap sidea urah manorihi horja ampa rumah. Tapi nini si Osborne, “Hape lalab lang dapot hanami horja ai.” Istrini pe mangkatahon, “Domma tolu bulan, lalab do lang dapot hanami horja. Tabungannami pe domma bois. Sunsah tumang pangahapnami.”

¹⁸ Aha ma na mangurupi sidea? Nini si Osborne, “Halani ringgas marbarita pakon sanina botou, lang be sai ipingkiri hanami hasunsahannami ai.” Rahanan do iahap sidea laho marbarita marimbangkon lalab holsohan i rumah. Ai ma na mambahen sidea marmalas ni uhur. Nini si Osborne use, “Tongtong do hutorihi parhorjaan, janah ujungni dapot ma.”

19-21. (a) Aha do na porlu bahenonta ase totap mangahapkon hadameion? (b) Aha do gunani anggo hita lang mandolei sanggah dong parubahan?

¹⁹ Songon na dob iulas hita, anggo totap hita mambahen na sidearan janah porsaya bani Jahowa, gabe damei ma pangahapta lang soal aha pe na masa. (Basa Mika 7:7.) Parubahan ai boi mambahen parhasomananta pakon Jahowa lambin toguh. Sonai do pangahapni si Polite. Ihatahon ia ponting tumang do marpangunsandeian  hubani Jahowa, tarlobih sanggah ibagas hasunsahan. Nini do, “Lambin orot ma parhasomananku pakon Jahowa.”

²⁰ Songon si Mary nongkan ai, hassi pe ia maningon mangurus bapani tapi totap do ia marintis. Nini do, “Sanggah holsohan ahu, martonggo ma ahu ase ulang totap haru. Hunjon hubotoh ma maningon tongtong do huondoskon ganup holsoh ni uhurhu bani Jahowa.”

²¹ Si Lloyd pakon si Alexandra, istrini, mangkatahon sanggah dong parubahan iuji do haporsayaon ni sidea. Tapi halani toguh haporsayaonni, gabe marmalas ni uhur ma sidea. Anjaha boi ma sidea patuduhkon sifat na madear. Ai ma na mangurupi sidea ase martahan bani hasunsahan na laho roh.

22. Aha ma hasilni anggo marusaha hita mambahen na sidearan?

²² Tongtong do adong parubahan i dunia on. Ra do sompong mubah tugasta ibagas organisasi ni Jahowa. Ra do homa boritan hita. Atap ra do adong kaluarga na maningon iurus hita. Hassi pe sonai, porsaya ma bani Jahowa halani isarihon janah iurupi Ia do hita domu bani panorangni. (Heb. 4:16; 1 Ptr. 5:6, 7) Jadi, tongtong ma mambahen na sidearan ibagas situasi aha pe. Martonggo janah tongtong ma marpangunsandeian bani Jahowa. On ma na mangurupi hita totap mangahapkon hadameion lang soal parubahan aha pe na masa.