1, 2. Dob matei si Musa, tugas na borat aha do na ibere bani si Josua?

JAHOWA mangkatahon bani si Josua, “Domma matei si Musa, juakjuak-Kin, on pe bingkat ma ho, dipari ma Jordan on, ho pakon haganup bangsa on, hu tanoh siberehonon-Ku hubani sidea.” (Jos. 1:1, 2) Ra do bungbang si Josua halani domma mubah tugasni. Sadokah 40 tahun na parpudi on, pitah sipangurupi si Musa do ia.

² Anjaha sadokah on, domma somal halak Israel ibobahon si Musa. Jadi ra pangahap ni si Josua anggo halak Israel lang marosuh ia na mambobahon sidea. (5 Mus. 34:8, 10-12) Sahalak pakar Alkitab patorangkon na ihatahon bani Josua 1:1, 2. Ia mangkatahon humbani sapari ronsi sonari gati do adong parsoalan sanggah margantih pambobai.

3, 4. Sonaha Jahowa mangurupi si Josua halani porsaya Bani, janah sungkun-sungkun aha ma na laho iulas hita?

 ³ Sasintongni tongon do holsoh ni si Josua ai. Hassi pe sonai porsaya do ia bani Jahowa janah mintor idalankon do parentah-Ni. (Jos. 1:9-11) Halani ai iurupi Jahowa ma ia. Sasintongni, Jahowa do na mambobahon si Josua ampa bangsa Israel marhitei sada malekat. Ra do malekat ai Anak-Ni na sasada in.​—2 Mus. 23:20-23; Joh. 1:1.

⁴ Tontu bahat do parubahan halani domma margantih pambobai. Tapi iurupi Jahowa do halak Israel laho mangihutkon parubahan ai. Sonari Jesus do homa na ipilih Jahowa laho mambobahon organisasi-Ni, janah tongtong do adong parubahan. Jadi mase hita boi totap porsaya bani Jesus, Pambobainta? (Basa Mateus 23:10.) Laho mambalosi sungkun-sungkun ai, ulas hita ma sonaha Jahowa mambobahon juakjuak-Ni sapari sanggah dong parubahan.

5. Ise do na jumpah pakon si Josua i dohor ni Jeriko? (Tonggor ma gambar bani alm. 16.)

⁵ Lang piga dokah dobkonsi halak Israel mandipar bah Jordan, jumpah ma si Josua pakon sada dalahi na marpodang i dohorhon Jeriko. Isungkun si Josua ma dalahi ai, “Hasoman do ham barang imbang?” Tarsonggot ma si Josua sanggah ihatahon anggo ia “pambobai ni bala ni Jahowa”, ai ma malekat na laho mangapiti juakjuak ni Naibata. (Basa Josua 5:13-15.) Hassi pe bani Bibel dong ihatahon anggo Jahowa marsahap bani si Josua, tapi marhitei malekat do Ia marsahap. Sonai do homa na ibahen Jahowa bani panorang na legan.​—2 Mus. 3:2-4; Jos. 4:1, 15; 5:2, 9; Lah. 7:38; Gal. 3:19.

6-8. (a) Mase parentah ni malekat ai songon na lang masuk akal? (b) Hunja do ibotoh hita anggo parentah-Ni ai dear janah sosok? (Tonggor ma surat partoruh.)

⁶ Ipatugah malekat ai ma aha na maningon bahenon ni sidea paima manaluhon kota Jeriko. Na parlobei, iparentahkon malekat ai do ganupan tentara maningon isunat. Ra do lang masuk akal iahap sidea ai, halani anggo isunat sonaha ma sidea laho marporang?​—1 Mus. 34:24, 25; Jos. 5:2, 8.

⁷ Ra do nini uhur ni tentara ai, ‘Porini roh munsuh mandorab, sonaha ma bahenonnami laho manlinggomi kaluarganami?’ Hape lang sonai na masa! Itangar sidea ma anggo halak Jeriko domma mabiar bani sidea. Bibel mangkatahon, “Tutup tumang do Jeriko jumpah halak Israel; seng dong na luar anjaha seng dong barang ise na masuk.” (Jos. 6:1) Tontu barita on mambahen halak Israel lambin porsaya bani Jahowa!

⁸ Dob ai, ihatahon malekat ai ma ulang idorab sidea kota Jeriko. Tapi isuruh do sidea ase manginggoti kota ai sahali sadari ibagas onom ari, janah pitu hali bani ari papituhon. Tontu ra do pangahap ni tentara ai, ‘Paloja-lojahon anjaha pabois-boiskon panorang dassa on.’ Tapi ibotoh Jahowa do aha na sihol bahenon-Ni. Ujungni talu do halak  Jeriko hassi pe lang pala marporang halak Israel. Lambin porsaya ma sidea bani Jahowa halani ra mangihutkon tugah-tugah ai.​—Jos. 6:2-5; Heb. 11:30. *

9. Mase tugah-tugah humbani organisasi maningon iihutkon hita? Bere ma contohni.

⁹ Aha do na boi iparlajari hita humbani sarita ai? Sipata ra do organisasi mambere tugah-tugah na baru na lang iarusi hita tujuanni. Umpamani, ra do lang sai marosuh hita manggunahon tablet sanggah marlajar, martumpu, atap pe mangidangi. Tapi sonari domma ididah hita bahat do gunani anggo ra hita mangihutkon tugah-tugah ai. Gabe toguh ma haporsayaonta janah lambin marsada ma hita pakon sanina botou.

10. Ise do sasintongni na mangarahkon si Paulus hu Jerusalem laho mangulas pasal sunat?

¹⁰ I Antiokia, dong piga-piga sanina na maringori pasal sunat. Iahap sidea ponting tumang do sunat laho mandapot haluahon. (Lah. 15:1, 2) Hape 13 tahun na salpu si Kornelius na lang halak Jahudi domma gabe halak Kristen. Jadi isuruh pangintuai ma ase si Paulus manjumpahi pangurus pusat na dong i Jerusalem. Tapi ise ma na mangarahkonsi hujai? Ia mangkatahon, “Mangihutkon pangungkabon do na tangkog ai ahu.”  Tontu halani iarahkon Kristus do ase laho ia hu Jerusalem mangulas parsoalan ai bani apostel ampa pangintuai na dong ijai.​—Gal. 2:1-3.

11. (a) Aha ope na ihaporsayai piga-piga halak Kristen Jahudi pasal sunat? (b) Sonaha si Paulus patuduhkon toruh ni uhur? (Tonggor ma surat partoruh.)

¹¹ Iurupi Jesus ma pangintuai ai mangarusi anggo halak na lang Jahudi lang porlu isunat. (Lah. 15:19, 20) Tapi martahun-tahun dobkonsi ai, tong do isunat halak Kristen Jahudi anakni. Dob ai, itangar pangintuai na i Jerusalem homa anggo si Paulus lang hormat bani Titah ni si Musa. * (Lah. 21:20-26) Haru ma sidea holi gabe dong ma parposahan i kuria. Halani ai isuruh ma si Paulus mamboan ompat dalahi hu rumah panumbahan, ase sidea porsaya anggo si Paulus unduk bani Titah ni si Musa. Sasintongni boi do ihatahon si Paulus, ‘Maraha pala hubahen sonai? Halak Kristen Jahudi ai do na lang mangarusi pasal sunat.’ Tapi lang sonai nini. Iarusi ia na dear do maksud ni pangintuai ai. Halani ai, martoruh ni uhur do ia mangkorjahon pangindoan ni sidea ai. Ra do sungkun-sungkun hita, ‘Mase lalab ipaturut Jesus dong parsoalan ai, hape domma ibotoh hita dob matei Jesus lang be marlaku Titah ni si Musa.’​—Kol. 2:13, 14.

12. Mase ipaturut Jesus lalab adong parsoalan pasal sunat?

¹² Tontu porlu do panorang bani halak Kristen Jahudi laho manjalo tugah-tugah na baru pasal sunat. Sunsah ope iahap sidea manadingkon Titah ni si Musa ai. (Joh. 16:12) Sadokah on iahap sidea sunat do tanda ni juakjuak ni Naibata. (1 Mus. 17:9-12) Leganni ai dong na mabiar ihasogamkon halak Jahudi na legan anggo sidea lang isunat. (Gal. 6:12) Tapi ujungni iurupi Jesus ma sidea mangarusi pasal ai marhitei surat na ikirim apostel Paulus.​—Rom 2:28, 29; Gal. 3:23-25.

13. Aha do na mangurupi hita ase urah mandalankon tugah-tugah humbani organisasi?

¹³ Sonari pe, Jesus Kristus do na mambobahon organisasi ni Jahowa. Tapi sonaha porini dong tugah-tugah na baru na lang iarusi hita? Dingat ma sonaha Jesus mambobahon halak Israel sapari ampa halak Kristen bani abad na parlobei. Marguna do ganup tugah-tugah na ibere ia laho manlinggomi sidea. Halani mandalankon tugah-tugah ai, gabe toguh ma haporsayaon ni sidea janah totap marsada.​—Heb. 13:8.

14-16. Sonaha tugah-tugah humbani “juakjuak na bujur anjaha na maruhur” patuduhkon anggo Jesus mansarihon hita?

¹⁴ Sonari, “juakjuak na bujur anjaha  na maruhur” mambere tugah-tugah bani panorang na topat. (Mat. 24:45) Ai patuduhkon anggo Jesus tongtong mansarihon hita. Si Marc, dong ompat niombahni. Nini ma, “Marusaha do Sibolis mamosah kaluarga ase lang be marsada kuria. Tapi halani dong pangaturan mambahen parlajaran Bibel kaluarga tiap minggu, gabe huarusi ma marguna tumang do ai laho manjaga hasadaon ibagas kaluarga.”

¹⁵ Anggo iarusi hita sonaha Jesus mambobahon kuria sonari on, gabe lambin toguh ma haporsayaonta. Umpamani, dong sada sintua na margoran si Patrick mangkatahon, “Dobkonsi adong pangaturan mambahen kalompok dinas lapangan, mungkahni dong na lang marosuh halani otik parbarita ibagas tiap kalompok.” Tapi sasintongni pangaturan ai patuduhkon isarihon Jesus do ganup parbarita. Umpamani, sidea na parmaila janah na lang ringgas marbarita mangahapkon anggo sidea ihaporluhon. Halani ai lambin toguh ma haporsayaon ni sidea.

¹⁶ Ponting tumang do horja parambilanon i sab tanoh on. Halani ai iurupi Jesus ma hita ase lambin ringgas mandalankon tugas ai. (Basa Markus 13:10.) Sada sintua na margoran si André, tongtong do ia mangihutkon tugah-tugah humbani organisasi. Nini do, “Dong halak i Betel na itugaskon hu lapangan. Hunjon hubotoh ma ponting tumang do ase hita lambin ringgas marbarita.”

17, 18. Aha do gunani anggo idingat hita hasil na idapot halani mandalankon tugah-tugah?

¹⁷ Tugah-tugah na ibere Jesus hubanta marhitei organisasi, marguna  tumang do ai sonari ampa bani ari simagira. Rimangi ma aha do gunani halani ra ham mangihutkon tugah-tugah ai. Sanggah parlajaran Bibel kaluarga, ulas ma parubahan aha do na domma ibahen bani partumpuan ampa pangidangion. Aha do gunani bani kaluarga nasiam?

¹⁸ Anggo idingat hita bahat do hasil na dear halani mandalankon tugah-tugah humbani organisasi, gabe urah ma hita mangihutkon tugah-tugah naimbaru. Umpamani, sonari domma bahat publikasinta i situs web jw.org. Jadi lang porlu be bahat publikasi na laho isetak. Hasilni lambin otik ma pangaluaran hujai. Anjaha halani manggunahon situs ai, gabe bahat ma halak manangar ambilan na madear. Ai gati do ham manggunahon tablet atap HP ibagas pangidangion? Tontu marosuh do Jesus anggo ra hita mangihutkon tugah-tugah ai.

19. Mase maningon iihutkon hita tugah-tugah na ibere organisasi?

¹⁹ Anggo ra hita mangihutkon tugah-tugah na ibere organisasi, gabe tarojur ma sanina botou mambahen sonai. Hasilni lambin toguh ma haporsayaon ni sidea janah hita pe lambin marsada. On ma na iahapkon si André sanggah dong halak na i Betel itugaskon hu lapangan. Ia mangkatahon, “Hassi pe sidea lang be i Betel, tapi totap do malas uhur ni sidea mandalankon tugas aha pe na ibere. On mambahen ahu lambin porsaya janah unduk bani organisasi.”

20, 21. (a) Mase maningon unduk hita hubani Jesus? (b) Sungkun-sungkun aha ma na laho iulas hita?

²⁰ Tongkin nari italuhon Jesus ma ganup munsuhni. Dob ai, ‘idalankon ia ma pambahenan na mambahen longang’. (Pangk. 6:2; Ps. 45:5) Sonari domma ilatih Jesus hita ase boi mangkorjahon tugas-tugas i dunia na baru. Ijai itugaskon do hita mangajari halak na dob ipapuho janah mambahen tanoh on gabe paradeiso.

²¹ Jesus do Pambobai ampa Rajanta. Anggo tongtong hita unduk hu bani, iurupi ia ma hita ase mandapot hagoluhan i dunia na baru. (Basa Psalmen 46:2-4.) Tapi lang sai urah mangihutkon parubahan na ibahen organisasi, tarlobih anggo ai mambahen mubah situasinta. Jadi aha ma na mangurupi hita ase tongtong porsaya bani Jahowa janah totap mangahapkon hadameion? Ai ma na laho iulas hita bani artikel na mangihut.