1. Aha do na dob iparlajari ham pasal Naibata?

ANGGO namatorasmu Saksi Jahowa, tontu iajarhon sidea do bamu Jahowa do na manompa haganup. Iajarhon sidea do homa parholong anjaha bujur do Jahowa ai, janah laho bahenon-Ni ma tanoh on gabe paradeiso.​—1 Mus. 1:1; Lah. 17:24-27.

2. Aha do na ihatahon buei halak pasal Panompa?

² Tapi bahat do halak mangkatahon lang dong Sitompa ai. Nini sidea tarjadi sandiri do ganup na dong i dunia on. Ihatahon sidea, mungkahni otik do masamni makhluk hidup i tanoh on. Dob ai, mubah ma ai gabe lambin bahat masamni. Anjaha piga-piga halak na porsaya pasal ai, ai ma halak na gijang sikolahni. Ihatahon sidea homa salah do na iajarhon Bibel anggo ibandingkon pakon ilmu pengetahuan. Nini sidea use halak na oto ampa na lang marpendidikan do na porsaya dong Panompa ai.

3. Mase maningon ipatoguh hita haporsayaonta?

³ Ai gabe galek do haporsayaonta halani ai? Lang, anggo ibotoh hita mase hita porsaya Jahowa do Sitompa haganup. Halani aha do hita porsaya bani Naibata? Ai pitah halani ai do na iajarhon hubanta? Atap domma ipindahi hita buktini adong do Naibata ai? (1 Kor. 3:12-15) Age pe domma martahun-tahun hita ididi atap baru ope, maningon torus do ipatoguh hita haporsayaonta. Ai do na mangurupi hita ase lang ioto-otoi ‘hapentaron ni dunia’ on, na lang sosok pakon isi ni Bibel. (Kol. 2:8; Heb. 11:6) Bani artikel on, dong tolu na laho iulas hita. (1) Mase bahat halak mangkatahon lang dong Sitompa ai? (2) Sonaha carani hita patoguhkon haporsayaonta bani Naibata? Anjaha (3) aha do na boi ibahen hita ase totap toguh haporsayaonta?

4. Domu bani Heber 11:1, aha do sasintongni haporsayaon ai?

⁴ Dong na mangkatahon sungkup ma asal porsaya, lang porlu dong bukti. Tapi sedo ai na iajarhon Bibel. Bibel mangajarhon porsaya do hita bani aha na so ididah hita halani domma torang na so ididah ai hubanta. Artini domma ibotoh hita bukti-bukti na patuduhkon tongon do adong na so boi ididah ai. (Basa Heber 11:1.) Halani ai ma hita porsaya bani Jahowa, Jesus ampa Harajaon-Ni. (Heb. 11:3) Sahalak ilmuwan na dob gabe Saksi mangkatahon, “Dong do dasarni haporsayaon ni Saksi Jahowa. Anjaha aha na ihaporsayai sidea sosok do homa pakon ilmu pengetahuan.”

5. Mase ma bahat halak lang porsaya dong Sitompa haganup?

⁵ Ra do sungkun-sungkun hita, ‘Anggo dong do buktini Jahowa do na manompa haganup, mase ma bahat halak lang porsaya ai?’ Sidea lang porsaya halani lang ongga iajarhon pasal Naibata i sikolahni. Songon si Robert na dob gabe Saksi mangkatahon, “Lang ongga iajarhon i sikolahku dong Sitompa haganup. Tapi sanggah ahu marumur 22 tahun, pajumpah ma ahu pakon Saksi Jahowa. Ipatorang sidea ma hun Bibel anjaha ipatuduh sidea do homa bukti-bukti na patuduhkon dong do Sitompa ai.” *​—Tonggor ma kotak “ Na Porlu Irimangi Namatoras”.

6. Aha do alasan na legan mase lang porsaya halak dong Naibata ai?

⁶ Dong homa na lang porsaya bani Naibata halani ihatahon sidea lang boi ididah Naibata ai. Sasintongni dong do na lang boi ididah sidea, tapi porsaya do sidea pasal ai. Contohni,  porsaya do sidea dong do alogo. Songon na iajarhon Bibel, haporsayaon ai do na “mambahen torang pasal na so nididah”. (Heb. 11:1) Ase boi hita porsaya bani na so boi ididah hita, maningon ipindahi hita do bukti-buktini. Ai ma na lang ibahen buei halak i dunia on. Halani ai ma ihatahon sidea lang dong Naibata ai.

7. Ai haganup do ilmuwan mangkatahon lang adong Sitompa ai? Patorang.

⁷ Age pe sonai, dong piga-piga ilmuwan na gabe porsaya dong do Sitompa halani domma ipindahi sidea buktini. * Songon na iulas nongkan, bahat do hinan ilmuwan lang porsaya dong Sitompa halani lang ongga ai iajarhon i sikolahni. Sarupa do sidea songon pangalaman ni si Robert nongkan. Tapi dobkonsi lambin bahat na iparlajari sidea pasal Jahowa, gabe porsaya  janah holong do uhur ni sidea hu Bani. Jadi maningon ipatoguh hita do homa haporsayaonta bani Jahowa lang soal aha sikolahta.

8-9. (a) Aha do na laho iulas hita sonari on? (b) Aha do gunani marlajar pasal tompaon?

⁸ Sonaha carani ase lambin toguh haporsayaonmu bani Naibata? Ulas hita ma ompat carani.

⁹ Marlajar pasal tompaon. Anggo ipardiateihon hita binatang-binatang, suan-suanan, ampa bintang, gabe porsaya ma hita dong do Sitompa ai. (Ps. 19:2; Jes. 40:26) Anggo lambin bahat na iparlajari hita pasal tompaon, gabe porsaya ma hita Naibata do na manompa haganup. Bahat do publikasinta na mangulas pasal tompaon. Ra do iahap hita lang sai iarusi hita hatorangan ai. Tapi totap ma marusaha mamparlajari artikel sisonai. Boi do homa ibasa hita artikel i jw.org ampa itonton hita video-video i kebaktian regional na patorangkon pasal tompaon.

10. Bere ma contoh pasal tompaon na patuduhkon dong do Sitompa ai. (Rom 1:20)

¹⁰ Anggo iparlajari hita pasal tompaon, gabe lambin porsaya ma hita Jahowa do na manompa haganup. (Basa Rom 1:20.) Contohni mata ni ari. Humbani mata ni ari do dapot hita energi panas ampa na leganni na ihaporluhon makhluk hidup i tanoh on. Tapi sasintongni, dong sinar ultraviolet hun mata ni ari na berbahaya bani jolma i tanoh on. Age pe sonai, dong lapisan ozon na manlanglangi sinar ai masuk hu tanoh on. Anggo lambin dohor sinar ai hu tanoh on, lambin bahat ma lapisan ozon laho manlinggomi tanoh on. Anggo irimangi hita ai, gabe porsaya ma hita dong do Sitompa na parholong ampa pentar na merancang ganupan ai.

11. Hunja do boi dapot hita hatorangan pasal tompaon na legan? (Tonggor ma kotak “ Publikasi na Boi Patoguhkon Haporsayaonta bani Sitompa”.)

¹¹ Boi do homa hita marlajar pasal tompaon na legan humbani Indeks Publikasi Menara Pengawal atap pe humbani artikel na dong i jw.org. Leganni ai boi do itonton hita video humbani seri “Apakah Ini Dirancang?” Humbani video ai, ipatugah do holi hatorangan pasal binatang, suan-suanan, atap pasal tompaon na legan. Anjaha ipatugah do homa sonaha do ilmuwan maniru tompaon ai laho mambahen teknologi na canggih.

12. Aha do na boi iparlajari hita humbani Bibel?

¹² Marlajar Bibel. Ilmuwan na ipatugah nongkan ai mungkahni lang porsaya dong do Sitompa ai. Tapi ujungni gabe porsaya do ia bani Naibata. Ia mangkatahon, “Lang pitah halani marlajar pasal tompaon gabe toguh haporsayaonku. Tapi huparlajari do homa Bibel.” Ra do domma bahat na iparlajari ham humbani Bibel. Tapi ase boi totap toguh haporsayaonmu, maningon tongtong do ham marlajar Bibel. (Jos. 1:8; Ps. 119:97) Parlajari ma homa panjahaion atap pe nubuat na isurat bani Bibel. Pingkirhon ma sonaha ai domma saud. Anjaha rimangi homa mase haganup isi ni Bibel lang dong na marlawanan age pe lang pitah sada halak na manulis ai. Anggo ibahen ham sonai, gabe lambin porsaya ma ham parholong do Sitompa ai, pentar, janah hata-Ni do na isurat ibagas Bibel. *​—2 Tim. 3:14; 2 Ptr. 1:21.

13. Bere ma sada contoh podah ibagas Bibel na marguna tumang anggo idalankon hita?

¹³ Anggo iparlajari hita Bibel, bahat do podah na dear na boi dapot hita. Umpamani, Bibel mangkatahon halak na sihol bayak, parohkon ‘buei sitaronon do ai bani dirini’.  (1 Tim. 6:9, 10; Pod. 28:20; Mat. 6:24) Ai tongon do ai? Sada buku na patorangkon pasal parlahou ni jolma mangkatahon, “Bahat do halak na sihol mangindahi habayakon gabe lang marmalas ni uhur janah depresi. Gari halak na marsura-sura ase lambin bahat duitni, boi do gabe stres janah bahat naboritni.” Jadi marguna tumang do podah ni Bibel. Ai dong do podah na legan ibagas Bibel na dob mangurupi ham? Anggo irimangi hita ai, gabe pos ma uhurta Naibata na manompa hita do na mambotoh na sidearan hubanta. (Jak. 1:5) Anggo iihutkon hita Hata-Ni, gabe marmalas ni uhur ma goluhta.​—Jes. 48:17, 18.

14. Aha do na boi iparlajari hita pasal Jahowa humbani Bibel?

¹⁴ Tujuanta marlajar Bibel, ai ma ase lambin mananda Jahowa. (Joh. 17:3) Anggo ringgas ham marlajar Bibel, lambin bahat ma na ibotoh ham pasal sifat ni Jahowa. Anjaha gabe ibotoh ham ma sarupa do sifat ni Naibata na ipatugah ibagas Bibel pakon sifat-Ni na boi ididah ham humbani tompaon-Ni. Halani ai, gabe lambin porsaya ma ham dong do Sitompa ai. (2 Mus. 34:6, 7; Ps. 145:8, 9) Anggo lambin bahat na iparlajari ham pasal Jahowa, gabe lambin toguh ma haporsayaonmu. Dob ai, lambin bagas ma holongmu hu Bani anjaha lambin orot ma ham pakon-Si.

15. Aha do gunani anggo isaritahon ham haporsayaonmu bani na legan?

¹⁵ Saritahon ma homa bani na legan aha na ihaporsayai ham. Tapi sonaha anggo lang ibotoh ham mambalosi halak na mangkatahon lang adong Naibata? Anggo sonai, bahen ma riset. Pindahi ma i publikasinta na mangulas pasal ai. (1 Ptr. 3:15) Atap, boi do homa isungkun ham hasomanta na marpangalaman sonaha carani patorangkon ai. Dobkonsi ipatorang ham na ihatahon Bibel bani sidea, ra do adong na porsaya, tapi dong homa na lang. Age pe sonai, totap do marguna aha na iriset ham ai. Gabe lambin toguh ma haporsayaonmu. Anjaha gabe lang podas-podas ham porsaya anggo dong ilmuwan na mangkatahon lang dong Sitompa.

16. Sonaha ma ujungni anggo lang ipatoguh hita haporsayaonta?

¹⁶ Lang soal domma sadiha dokah hita gabe Saksi Jahowa, maningon tongtong do ipatoguh hita haporsayaonta. Anggo lang, gabe galek ma holi haporsayaonta. Dingat ma, haporsayaon do na mambahen torang aha na so boi ididah. Tapi gati do ihalupahon hita aha na so boi ididah ai. Halani ai ma ihatahon si Paulus anggo lang toguh haporsayaonta, gabe urah ma holi ‘dousa ai manrahuti hita’. (Heb. 12:1) Sonaha carani ase tongtong toguh haporsayaonta?—2 Tes. 1:3.

17. Aha do na boi ibahen hita ase lambin toguh haporsayaonta?

¹⁷ Na parlobei, tongtong ma pindo bani Naibata ase ibere tonduy-Ni mangurupi hita. Mase? Halani buah ni tonduy do haporsayaon ai. (Gal. 5:22, 23) Anggo lang iurupi Naibata hita marhitei tonduy-Ni, lang boi toguh haporsayaonta. Anggo torus ipindo hita tonduy-Ni, sai bereon-Ni do ai banta. (Luk. 11:13) Janah boi do homa itonggohon hita ase lambin ‘tambah haporsayaonta’.​—Luk. 17:5.

18. Domu bani Psalmen 1:2, 3, hadiah aha do na dob ibere hubanta?

¹⁸ Leganni ai, maningon tongtong do hita marlajar Bibel. (Basa Psalmen 1:2, 3.) Sanggah psalmen ai itulis, dong piga-piga halak Israel na mandapot salinan ni Titah ni Naibata. Umpamani dong do salinan ai bani raja ampa malim. Age pe sonai, sahali pitu tahun maningon ipatumpu do “sagala paramangon, puang-puang pakon dakdanak” ampa halak na  legan ase ibasahon bani sidea Titah ni Naibata. (5 Mus. 31:10-12) Bani panorang ni Jesus pe, pitah otik dassa na mandapot gulungan Surat na Pansing. Anjaha maningon hu Sinagoga do halak ase boi manangar Surat ai ibasahon. Tapi sonari domma bahat halak na dong Bibelni. Hadiah na luar biasa do ai banta. Sonaha carani hita mangkargai hadiah ai?

19. Aha do na porlu ibahen hita ase totap toguh haporsayaonta?

¹⁹ Halani domma adong Bibelta, maningon ibasa hita ma ai tiap ari. Ulang ipaima-ipaima hita mambasa ai ronsi dong panorangta. Tapi porlu do ibahen hita jadwal laho mambasa Bibel bai ganup ari. Anggo ringgas hita marlajar Bibel, gabe totap ma toguh haporsayaonta.

20. Aha do na sihol bahenonta?

²⁰ Jadi Bibel do na ihaporsayai hita. Lang sarupa hita songon “halak na maruhur ampa na pentar” i dunia on. (Mat. 11:25, 26) Humbani Bibel, ibotoh hita do mase lambin jahat parlahou ni jolma sonari on, anjaha aha do na laho bahenon ni Naibata bani sidea. Jadi, sai tongtong ma ipatoguh hita haporsayaonta. Urupi hita ma na legan ase porsaya bani Naibata. (1 Tim. 2:3, 4) Sai tongtong ma hita paimahon roh panorangni ganup halak mangkatahon songon na isurat bani Pangungkabon 4:11, “Ham Tuhan Naibatanami, na talup do Ham manjalo hasangapon . . . ai Ham do na manompa sagala na dong.”