1. Sonaha hasomanta mambere lambin bahat panorangni laho mangidangi Jahowa?

 HALANI lambin dohor ujung ni dunia on, lambin bahat do horja ibagas pangidangion. (Mat. 24:14; Luk. 10:2; 1 Ptr. 5:2) Tontu sihol do hita mambere na sidearan bani Jahowa. Janah bahat do hasomanta na dob mambere bahat panorang laho mangidangi Naibata. Dong na sihol gabe perintis, mangidangi i Betel, mangurupi horja pembangunan, ampa na leganni. Anjaha bahat do homa hasomanta dalahi na marusaha gabe siparugas ampa sintua i kuria. (1 Tim. 3:1, 8) Tontu malas do uhur ni Jahowa mangidah sidea.​—Ps. 110:3; Jes. 6:8.

2. Sonaha do pangahap ni piga-piga hasomanta halani lape saud cita-cita ni sidea?

² Tapi, ra do gabe maretek ni uhur hita halani sada pe lang dong na saud cita-citanta ai, hape domma dokah ipaima hita ai. Leganni ai, ra do halani situasi atap halani domma matua hita, dong tanggung jawab na lang boi be ihorjahon hita. (Pod. 13:12) Sonai ma na iahapkon si Melissa. * Sihol tumang ia mangidangi i Betel atap dihut hu Sikolah bani Parbarita Harajaon. Nini do, “Halani domma matua ahu, lang boi ahu mandihuti ai. Sipata, gabe maretek ni uhur do ahu halani ai.”

3. Aha do na boi ibahen sasada halak ase boi mandapot tanggung jawab i kuria?

 ³ Anggo dong na maposo na sihol mandapot tanggung jawab i kuria, maningon marusaha do sidea patuduhkon sifat-sifat na dear. Ra do adong na poso na pentar, boi podas mambahen keputusan, anjaha ringgas. Tapi lang sungkup pitah ai. Maningon porlu do homa sidea totap sabar, dear mandalankon tugas, anjaha hormat bani sanina botou na legan. Anggo marusaha hanima mangkorjahon ai, ra do ibere holi bannima tanggung jawab i kuria. Songon pangalaman ni si Niko, sanggah ia marumur 20 tahun pusok uhurni halani lang ilantik ia gabe siparugas i kuria. Nini do, “Tontu dong do na porlu hupadear humbani diringku.” Tapi lang gabe mandolei ia halani ai. Totap do ia ringgas mangurupi hasoman i kuria anjaha marbarita. Ujungni dapotsi ma tanggung jawab i kuria. Anjaha sonari ia domma gabe anggota Panitia Cabang.

4. Aha do na laho iulas hita bani artikel on?

⁴ Ai ongga do ham maretek ni uhur halani lang dapotmu cita-cita atap pe tanggung jawab na iharosuhkon ham? Anggo sonai, tonggohon ma ai bani Jahowa. (Ps. 37:5-7) Boi do homa isungkun ham sanina botou na marpangalaman aha ope na porlu ibahen ham ase boi dapotmu cita-citamu atap pe tanggung jawab i kuria. Dalankon ma podah ni sidea. Anggo ibahen ham sonai, ra do holi dapotmu do cita-citamu ai. Tapi ra do lang saud cita-citanta ai halani sarupa situasinta songon si Melissa nongkan ai. Anggo sonai, aha do na boi ibahen ham ase totap marmalas ni uhur? Ulas hita ma ai bani artikel on. Dong tolu na laho iulas hita, ai ma: (1) Aha do na porlu ibahen hita ase lang lalab maretek ni uhur? (2) Sonaha carani ase hita totap marmalas ni uhur mangidangi Naibata? (3) Cita-cita aha ope na boi ibahen ham ase lambin marmalas ni uhur?

5. Aha do na boi ibahen hita ase totap marmalas ni uhur? (Parambilan 6:9)

⁵ Songon na ihatahon bani ayat tema, dearan do hita mamingkirhon “na nididah ni mata”. (Basa Parambilan 6:9.) Artini horjahon hita ma aha na boi tarbahen hita. Ulang marusaha hita mangkorjahon na lang boi tarbahen. Jadi bahen hita ma cita-cita atap pe tujuan na sosok pakon situasi ampa kesanggupanta. Ai do na mambahen totap malas uhurta.

6. Contoh aha do na laho iulas hita, janah parlajaran aha do na dapot hita hunjai?

⁶ Tapi ra do adong na marpingkir anggo sonai-sonai lalab horjani, gabe bosan ma ia. Sasintongni, boi do hita totap marmalas ni uhur mangkorjahon aha na boi tarbahen hita sonari. Mase sonai? Ulas hita ma balosni humbani contoh na isaritahon Jesus pasal talenta na isurat bani Mateus 25:14-30. Iulas hita do holi aha na boi ibahen hita ase totap malas uhurta mangkorjahon na boi tarbahen hita sonari on.

7. Contoh pasal aha do na isaritahon Jesus?

⁷ Isaritahon Jesus do adong sada dalahi na mambere tugas bani tolu jabolonni paima laho ia hu nagori na legan. Ibere ia ma talenta bani sidea domu bani kesanggupanni bei. * Na sada ibere lima talenta, na paduahon ibere dua talenta, anjaha na sada nari ibere sada talenta. Maningon igunahon sidea do talenta  ai laho martiga-tiga ase dong untungni. Jabolon na manjalo lima ampa dua talenta ai ringgas mangkorjahon tugasni. Tapi na sada nari lang ibahen ia sonai. Halani ai, iusir tuanni ma ia.

8. Aha do na mambahen malas uhur ni jabolon na manjalo lima talenta ai?

⁸ Tontu malas tumang ma uhur ni jabolon na manjalo lima talenta ai halani pos do uhur ni tuanni mambere bahat duit ai hu bani. Tapi sonaha ma jabolon na manjalo dua talenta? Sasintongni boi do gabe maretek ni uhur ia halani lang sarupa talenta na ijalo ia pakon hasomanni ai. Tapi, ai sonai do ibahen ia?

9. Aha do na lang adong isaritahon Jesus pasal jabolon na manjalo dua talenta ai? (Mateus 25:22, 23)

⁹ Basa Mateus 25:22, 23. Lang adong isaritahon Jesus gabe manggila jabolon na manjalo dua talenta ai. Janah lang dong homa ihatahon jabolon ai sonon, ‘Mase ma otik tumang ibere tuan ai hubangku hape ringgas do ahu marhorja? Anggo sonai, dearan ma hukubur talentani ai. Mardia pala marloja-loja ahu marhorja hu bani.’

10. Aha do na ibahen jabolon na manjalo dua talenta ai?

¹⁰ Totap do ringgas marhorja jabolon na manjalo dua talenta ai songon na ibahen jabolon na manjalo lima talenta. Hasilni, dapotsi ma untungni dua talenta nari. Ibere tuanni ma upahni. Malas uhur ni tuanni mangidahsi. Ipuji tuanni ma ia janah ibere ma lambin bahat tanggung jawab hu bani.

11. Sonaha carani ase hita totap marmalas ni uhur?

¹¹ Jadi ase boi totap marmalas ni uhur, ringgas ma hita mangkorjahon tugas aha pe  na ibere hubanta. Umpamani, ringgas ma hita marbarita ampa mangkorjahon tugas na leganni. (Lah. 18:5; Heb. 10:24, 25) Dear ma homa persiapkon parlajaran na laho iulas i partumpuan ase boi ibere nasiam komentar na boi patoguhkon hasoman na legan. Anggo ibere bani nasiam tugas i partumpuan tengah pekan, dear ma horjahon ai. Janah saloseihon ma ganup tugas ai domu bani panorang na dob itontuhon. Ulang ma ianggap hita dong tugas na hurang ponting, halani ganup do tugas ai ponting. Marusaha ma homa hita ase lambin pandei mangkorjahon tugas na ibere hubanta. (Pod. 22:29) Anggo totap ringgas hita marhorja bani Jahowa, lambin orot ma parhasomananta pakon-Si. Gabe malas ma uhurta. (Gal. 6:4) Anjaha lang gabe simburu hita bani halak na mandapot tugas na iharosuhkon hita.​—Rom 12:15; Gal. 5:26.

12. Aha do na mangurupi dua hasomanta totap marmalas ni uhur?

¹² Si Melissa na ipatugah nongkan ai, sihol do ia mangidangi i Betel atap dihut hu Sikolah bani Parbarita Harajaon. Tapi halani domma matua, lang boi be ibahen ia ai. Nini do, “Marusaha do ahu ase totap ringgas merintis. Janah hucoba do marmasam cara laho marbarita. Ai ma na mambahen ahu totap marmalas ni uhur.” Si Niko pe sompat do maretek ni uhur ia halani lang ilantik gabe siparugas i kuria. Nini do, “Marusaha ma ahu mangkorjahon aha na boi huhorjahon. Lambin ringgas ma ahu marbarita ampa mambere komentar na dear. Dob ai, huiisi do homa formulir laho mangidangi hu Betel. Satahun dobkonsi ai, iontang ma ahu mangidangi ijai.”

13. Aha ma hasilni anggo totap hita ringgas mangkorjahon tugasta sonari? (Parambilan 2:24)

¹³ Songon si Niko ai, anggo totap hita ringgas mangkorjahon tugasta, ra do lambin bahat tanggung jawab na ibere hubanta. Tapi sonaha porini totap lang dapot hita tanggung jawab ai? Dingat ma pangalaman ni si Melissa nongkan. Totap do ia ringgas mangkorjahon aha na boi tarbahensi. (Basa Parambilan 2:24.) Hita pe boi totap marmalas ni uhur halani ibotoh hita malas do uhur ni Jesus mangidah haringgasonta.

14. Aha do na porlu idingat hita?

¹⁴ Jadi, ai lang porlu be hita mambahen cita-cita ibagas organisasi ni Naibata? Sasintongni dong do cita-cita na legan na boi ibahen hita. Boi do hita mambahen tujuan sonaha carani ase lambin pandei marbarita, mangajari, ampa sirsir mangurupi na legan. Ase boi hita mangkorjahon ai, marusaha ma hita totap martoruh ni uhur ampa mamingkirhon aha na boi ibahen hita laho mangurupi na legan.​—Pod. 11:2; Lah. 20:35.

15. Cita-cita aha ope na boi ibahen ham?

¹⁵ Cita-cita aha ope na boi ibahen ham? Martonggo ma bani Jahowa ase ibotoh ham mambahen cita-cita na sosok pakon kesanggupanmu. (Pod. 16:3; Jak. 1:5) Boi do ham mambahen cita-cita na ipatugah bani  paragrap sada ai. Umpamani gabe perintis ektra, perintis biasa, mangidangi i Betel, atap mangurupi horja pembangunan. Boi do homa ham marlajar bahasa na legan ase boi mangurupi ianan na mamorluhon. Anggo dong cita-citamu sonai, boi ibasa ham buku Diorganisasi untuk Melakukan Kehendak Yehuwa pasal 10. Atap boi do isaritahon ham cita-citamu ai bani sintua i kuria. * Anggo totap ham  mambahen cita-cita, gabe lambin bahat ma hamajuon na ibahen ham janah gabe malas ma uhurmu.

16. Anggo lape boi saud cita-citamu, aha ma na boi ibahen ham?

¹⁶ Tapi ra do ronsi sonari lape saud cita-citamu ai. Age pe sonai, boi do homa ipingkirhon ham tujuan na legan na boi ihorjahon ham sonari on. Ulas hita ma contohni.

17. Domu bani 1 Timoteus 4:13, 15, aha do na boi ibahen sada dalahi ase lambin pandei mangajar?

¹⁷ Basa 1 Timoteus 4:13, 15. Ganup dalahi na dob ididi boi do marusaha ase lambin dear mangajar atap pe marambilan. Mase? Anggo dear ham mangajari, mambasa, ampa marambilan, bahat tumang do gunani ai bani halak na legan. Halani ai, dear do anggo iparlajari nasiam brosur Marlatih Ase Lambin Pandei Mambasa ampa Mangajar. Dob iparlajari ham sada saran humbani brosur ai, torus ma marlatih janah mangihutkon saran ai sanggah ham marambilan. Atap boi do homa ipindo ham saran bani sintua na gabe penasihat ekstra atap bani sintua na dear ‘marambilan ampa mangajar’. * (1 Tim. 5:17) Pingkirhon ma homa sonaha ase hatorangan na ipadas ham ai boi patoguhkon hasoman i kuria janah mangurupi sidea mandalankon isi ni Bibel. Anggo marusaha ham mangkorjahon ai, gabe malas tumang ma uhurmu sonai homa na manangar ambilanmu.

18. Aha do na boi mangurupi hita ase lambin pandei marbarita ampa mangajari?

¹⁸ Ganup do hita mandapot tugas laho marbarita ampa mangajari halak gabe susian ni Jesus. (Mat. 28:19, 20; Rom 10:14) Halani ai,  boi do homa marlatih nasiam ase lambin pandei marbarita ampa mangajar. Parlajari ma carani bani brosur Mambasa ampa Mangajar janah ihutkon ma saran na dong ijai. Dong do homa saran na legan na boi dapot ham humbani Jadwal Partumpuan​—Hagoluhan pakon Pangidangion Kristen, atap humbani video contoh parsahapan na iputar i partumpuan tengah pekan. Anggo iihutkon ham saran-saran ai, gabe ibotoh ham ma holi saran na ija do na sosok bani halak i daerahmu. Anggo torus ham marlatih, gabe malas ma uhurmu halani domma lambin pandei ham marbarita ampa mangajar.​—2 Tim. 4:5.

19. Aha do na boi ibahen hita ase lambin dear sifat-sifatta?

¹⁹ Na sipontingan, dong ope na boi ibahen nasiam, ai ma boi do marusaha nasiam patuduhkon sifat-sifat na dear. (Gal. 5:22, 23; Kol. 3:12; 2 Ptr. 1:5-8) Sonaha carani? Contohni, ra do sonari ipingkirhon ham do sonaha carani ase lambin toguh haporsayaonmu. Anggo sonai, boi do ibasa ham hun publikasinta artikel-artikel na mangulas sonaha hita boi patoguhkon haporsayaonta. Na leganni, boi do homa itonton ham humbani JW Broadcasting^® pangalaman ni hasomanta na totap toguh haporsayaonni age pe dong sitaronon. Dob ai, rimangi ma aha na boi ibahen ham laho maniru sidea.

20. Aha do na boi ibahen hita ase totap marmalas ni uhur?

²⁰ Tontu sihol do hita ganup mambere lambin bahat panorang laho mangidangi Jahowa. Tapi ra do lang tarbahen hita ai halani situasinta. Sanggah i dunia na baru do holi ganup hita boi mambere gok panorangta laho mangidangi Jahowa. Jadi, marusaha ma hita sonari ringgas mangkorjahon tugas aha pe na ibere hubanta. Ai do na mambahen hita marmalas ni uhur, anjaha parohkon hasangapon do homa ai bani Jahowa “Naibata na martuah in”.​—1 Tim. 1:11.