1-2. Aha do na laho iulas hita bani artikel on?

RA DO ongga isuruh ham hasomanmu mamboan barang-barang na ihaporluhon ham, tapi lalab do ia lang roh. Ra do kecewa ham halani ai. Songon na ihatahon bani Podah 13:12, “Pangarapan na so dapot, paborit uhur.” Tapi dobkonsi ibotoh ham alasanni mase lalab lang roh ia, gabe sabar ma ham paimahonsi.

² Bani artikel on, iulas hita ma piga-piga prinsip ni Bibel na boi mangurupi hita ase boi totap sabar paimahon janji ni Jahowa. (Mi. 7:7) Iulas hita homa bani situasi na sonaha do hita porlu totap sabar. Anjaha iulas hita use pasu-pasu aha do na ibere Jahowa bani halak na sabar paimahon-Si.

3. Prinsip aha do na boi dapot hita humbani Podah 13:11?

³ Humbani Podah 13:11, ibotoh hita ma mase hita porlu sabar. Ijai ihatahon, “Habayakon na tarolos-olos pinagugun sai surut do, tapi na pinaiduk-iduk lambin tambah do.” Prinsip aha ma na boi dapot hita hunjai? Halak na maruhur, ai ma halak na totap sabar ibagas sagala pambahenanni. Anggo totap hita sabar, gabe dear do hasilni.

4. Prinsip aha do na boi dapot hita humbani Podah 4:18?

⁴ Bani Podah 4:18 ihatahon, “Dalan ni halak parpintor songon sinalsal sogod-sogod do, lambin torang marsinondang paima tongah ari.” Humbani ayat ai, iarusi hita do otik-otik  do iurupi Jahowa juakjuak-Ni laho mangarusi harosuh-Ni. Tapi dong homa prinsip na legan na idapot hita humbani ayat ai. Aha ma ai? Porlu do panorang bani sasada halak ase boi mambahen parubahan. Ase boi lambin dear parlahounta maningon ringgas do hita marlajar Bibel, janah mandalankon na dob iparlajari ai. Dobkonsi ai, lambin bahat ma na iparlajari hita pasal Naibata. Pardiateihon hita ma limbaga ni Jesus na patorangkon pasal ai.

5. Contoh aha do na ibahen Jesus laho patorangkon porlu do panorang bani sasada halak laho mambahen parubahan?

⁵ Ibahen Jesus do sada contoh laho patorangkon porlu do panorang ase bonih ni hasintongan ai tubuh ibagas dirini sasada halak. Ia mangkatahon, “Martumbor do ai, dob ai marbuhu tanoh, na so pamotohan ni parjuma ai. Ai humbani gogohni sandiri ipatubuh tanoh ai do lobei hayuni, dob ai buyurni, dob ai gandum na porngis ibagas buyurni ai.” (Mrk. 4:27, 28) Parlajaran aha ma na idapot hita humbani contoh ai? Songon bonih ai, dobkonsi isuan lang mintor marbuah. Sonai ma homa sasada halak na marlajar Bibel, porlu do panorang ase boi ia mambahen parubahan. Umpamani, ra do dong parlajar Bibelta, halani lambin banggal holongni bani Naibata, lambin bahat ma parubahan na ibahen ia. (Ep. 4:22-24) Tapi maningon dingat hita do homa Jahowa do na patubuhkon bonih hasintongan ai.​—1 Kor. 3:7.

6-7. Humbani cara ni Jahowa manompa tanoh on, parlajaran aha do na dapot hita hunjai?

⁶ Sabar do Jahowa ibagas sagala horja-Ni, halani porlu do bahat panorang laho pasaloseihon horja-Ni. Ibahen Ia sonai ase ipasangap goran-Ni anjaha dong gunani bani jolma. Pardiateihon hita ma contohni sonaha Jahowa manompa tanoh on.

⁷ Ipatugah do bani Bibel gambaranni sonaha Jahowa manompa tanoh on. Ihatahon ibahen Naibata do lobei ukuranni mamakei “tali panibar”. Dob ai “ipajonam tiang  partunggulni” tanoh on, anjaha ‘ipatibal batu parsuhini’. (Job 38:5, 6) Dob salosei Naibata manompa tanoh on ipareksa Ia do sonaha hasilni. (1 Mus. 1:10, 12) Boi do ibayangkon nasiam sonaha do pangahap ni malekat dobkonsi mangidah tompaon ni Jahowa? Ihatahon “marolob-olob” do sidea. (Job 38:7) Jadi parlajaran aha ma na idapot hita hunjai? Tongon, dong do marribu tahun Naibata manompa bintang-bintang ampa sagala isini tanoh on. Hassi pe sonai, sanggah itonggor Naibata ganup hasil tompaon-Ni ai, ihatahon Ia do “domma dear tumang”.​—1 Mus. 1:31.

8. Aha do na laho iulas hita?

⁸ Humbani contoh-contoh nongkan ai, ibotoh hita ma prinsip ni Bibel na mangajarhon ponting tumang do ase hita totap sabar. Sonari iulas hita ma, bani situasi na sonaha do hita porlu sabar paimahon Jahowa laho mangurupi hita.

9. Bani situasi aha do hita porlu sabar paimahon Jahowa?

⁹ Maningon sabar do sanggah lape ibalosi tonggonta. Ra do hita martonggo bani Naibata ase ibere hagogohan sanggah marsitaronon. Ra do homa ipindo hita Ia laho mangurupi hita ase ulang be mangkorjahon na lepak. Tapi ra do pangahapta lape ibalosi tonggonta ai. Jadi mase ma sipata lang mintor ibalosi Naibata tonggonta?

10. Anggo lang mintor ibalosi Naibata tonggonta, mase hita maningon totap sabar?

¹⁰ Sasintongni itangihon Naibata do sanggah hita martonggo. (Ps. 65:3) Anjaha sanggah hita martonggo, on patuduhkon porsaya do hita hu Bani. (Heb. 11:6) Tapi sihol do Naibata mangidah ai marusaha do hita mandalankon domu bani tonggonta ai atap lang. (1 Joh. 3:22) Umpamani, anggo hita martonggo ase ulang be mangkorjahon na lang iharosuhkon Naibata, maningon totap ma hita sabar bani dirinta sandiri. Anjaha porlu do homa hita marusaha mambahen parubahan. Jesus pe patorangkon sipata lang mintor ibalosi Naibata tonggonta. Halani ai ma iparentahkon ia, “Pindo hanima ma, sai na bereon-Ni do bannima, pindahi hanima ma, sai na jumpahan do hanima, hartuki hanima ma, sai na bukaon-Ni do bannima. Ai sai na manjalo do na mangindo, jumpahan na mangindahi, anjaha ungkabon bani na mangkartuki.” (Mat. 7:7, 8) Anggo idalankon hita ai janah ‘tongtong hita martonggo’, pos ma uhurta itangihon Naibata do tonggonta janah ibalosi do ai.​—Kol. 4:2.

11. Anggo iahap hita lape ibalosi tonggonta, sonaha ma Heber 4:16 boi mangurupi hita?

¹¹ Age pe lang mintor ibalosi Naibata tonggonta, tapi marjanji do Ia balosan-Ni do ai bani ‘panorang na ihaporluhon’ hita. (Basa Heber 4:16.) Halani ai, anggo lang mintor ibalosi tonggonta ulang ma mintor manggila hita. Umpamani, domma martahun-tahun hita martonggo ase roh Harajaon ni Naibata laho manasap ganup sitarononta. Anjaha isuruh Jesus do homa hita manonggohon ai. (Mat. 6:10) Tapi halani lape roh Harajaon ai ronsi sonari, ra do pangahapta dokahtu do ai saud. Ujungni ra do gabe galek haporsayaonta halani ai. (Hab. 2:3; Mat. 24:44) Dearan ma hita paimahon Jahowa janah tongtong martonggo hu Bani. Pos ma uhurta domma itontuhon Jahowa “arini ampa panorang” na topat laho manasap ganup sitarononta.​—Mat. 24:36; 2 Ptr. 3:15.

12. Sipata bani situasi aha do hita lang sabar?

 ¹² Maningon totap do hita sabar anggo dong na mambahen na lang dear atap na lang adil hubanta. Bahat do halak i dunia on na marsitaronon ibahen halak na legan halani lang sarupa suku, bangsa, atap pe hasomalanni sidea. Dong do homa na mambahen na lang dear bani halak na cacat. Leganni ai, bahat do homa Saksi Jahowa na ihasogamkon halak halani haporsayaon ni sidea. Halani ai, anggo dong na mambahen na lang adil hubanta dear ma idingat hita podah ni Jesus on, “Barang ise na tahan das hu ujung, ai do na maluah.” (Mat. 24:13) Tapi sonaha anggo hasoman na i kuria do na mambahen na lang dear ai? Ra do domma ibotoh sintua pasal ai. Tapi porsaya do ham isaloseihon sidea do holi masalah ai mangihutkon prinsip ni Jahowa? Aha do na porlu ibahen sintua anggo dong halak i kuria na mambahen dousa na banggal?

13. Anggo dong na mangkorjahon dousa na banggal i kuria, aha ma na porlu ibahen sintua?

¹³ Anggo dong na mangkorjahon dousa na banggal i kuria, maningon martonggo ma sintua mangindo “hauhuron” humbani Jahowa, ase iarusi sidea prinsip ni Naibata laho manangani masalah ai. (Jak. 3:17) Tujuan ni sidea, ai ma laho mangurupi halak na mardousa ai mambahen hamubahon. (Jak. 5:19, 20) Maningon ijaga sidea do homa kuria ase totap borsih janah mangapoh na marsitaronon halani pambahenanni pardousa ai. (2 Kor. 1:3, 4) Jadi sanggah sintua manangani parsoalan i kuria, maningon ibotoh sidea do lobei sonaha sasintongni parsoalan ai. Dob ai maningon ipareksa sidea do homa prinsip ni Bibel na sosok bani masalah ai. Janah maningon ipinsang sidea do homa pardousa ai “domu hubani na patut”. (Jer. 30:11) Lang boi ipadokah-dokah sintua laho mangurus masalah ai. Tapi ulang homa tarolos sidea mambahen keputusan. Anggo iihutkon sidea prinsip ni Jahowa sanggah manangani masalah i kuria, parohkon na dear do ai bani ganup sanina botou. Hassi pe sonai, ra do totap borit uhur ni halak na marsitaronon halani pardousa ai. Aha ma na boi mangurupi sidea?

14. Anggo dong hasoman na mambahen borit uhurta, contoh na ija do humbani Bibel na boi mangurupi hita?

¹⁴ Ongga do dong sanina botou na mambahen borit uhurmu? Anggo dong, dear  do hita marlajar humbani contoh na dong bani Bibel. Umpamani, si Josep. Age pe jahat pambahenanni abangni hubani, lang mardomdom ia bani sidea. Tapi totap do ia mangidangi Naibata anjaha pos do uhurni, isaloseihon Jahowa do holi ganup masalah ai. (1 Mus. 39:21) Halani ai ipasu-pasu Jahowa ma ia. Ai ma na torus idingat si Josep. Anjaha imaafkon ia do ganup hasalahan ni abangni ai. (1 Mus. 45:5) Songon si Josep, anggo dong na mambahen borit uhurta, totap ma hita dohor bani Naibata. Janah pos ma uhurta isaloseihon Ia do holi masalah ai bani panorangni.​—Ps. 7:18; 73:28.

15. Aha do na mangurupi sada botou totap sabar age pe dong na mambahen na lang dear bani?

¹⁵ Lang ganup hita ongga manaron sitaronon songon si Josep. Hassi pe sonai totap do sunsah pangahapta anggo dong na mambahen na lang dear banta, age pe na mambahen ai Saksi atap pe lang. Anggo sonai dear ma ihutkon hita prinsip ni Bibel. (Pil. 2:3, 4) Pardiateihon ma pangalaman ni sada botou. Dong sada hasoman sahorjani na mangkatahon na lang dear pasal ia bani halak na legan. Borit tumang uhurni halani ai. Tapi irimangi ia ma sitiruon na ibahen Jesus. Sanggah dong na manrisai Jesus lang mambalas ia. (1 Ptr. 2:21, 23) Ai ma na mangurupi botou ai ase lang mintor manggila bani hasomanni ai. Dokah-dokah ibotoh ia ma na boritan do hape hasomanni ai janah stres homa. Malas tumang do uhurni botou ai halani lang mintor manggila ia bani hasomanni ai. Gabe damei ma uhurni.

16. Anggo dong na mambahen borit uhurta, aha do na boi mangapoh hita? (1 Petrus 3:12)

¹⁶ Anggo dong na mambahen borit uhurmu, dingat ma “dohor do Jahowa bani halak paruhur na marosak”. (Ps. 34:19) Holong tumang do uhur-Ni bamu halani totap do ham sabar, janah iompaskon ham do parsoalanmu bani Jahowa. (Ps. 55:23) Dingat ma, Ia do Hakim na pintor janah ibotoh Ia do ganup parsoalanmu. (Basa 1 Petrus 3:12.) Anggo dong parsoalanmu na lang boi isaloseihon ham totap ma ham sabar, janah pos ma uhurmu ipasalosei Jahowa do holi ai domu bani panorangni.

17. Aha do janji ni Jahowa bani Jesaya 30:18?

¹⁷ Marhitei Harajaon ni Naibata ibere Ia do holi bahat pasu-pasu hubanta. Jesaya 30:18 mangkatahon, “Halani ai paima-imahon do Jahowa, sihol do marulak-ulakan uhur-Ni dompak nasiam; halani ai bingkat do Ia laho mangidopi nasiam. Ai Jahowa, ai ma Naibata ni uhum, martuah ma ganup halak na martenger ni uhur Bani.” Jadi anggo totap hita sabar paimahon Jahowa, sai bereon-Ni do pasu-pasu banta sonari on ampa i dunia na baru.

18. Pasu-pasu aha do na laho ibere hubanta?

¹⁸ Anggo hita domma i dunia na baru, lang dong be na mambahen hita marsitaronon. Anjaha salpu do holi ganup sitaronon na masa sonari on. Lang dong be na mambahen na lang dear atap na mambahen pusok uhurta. (Pangk. 21:4) Anjaha lang porlu be hita holsohan halani domma sirsir ibahen Naibata ganup haporluanta. (Ps. 72:16; Jes. 54:13) Pasu-pasu na banggal tumang do ai.

19. Sonari on, pelatihan aha do na ibere Jahowa hu banta?

¹⁹ Sonari on, ilatih Naibata do ganup hita ase boi gabe rakyat bani Harajaon-Ni. Tongtong do iurupi Ia hita ase boi manadingkon parlahounta na masambor anjaha patuduhkon sifat-sifat na dear. Halani ai anggo dong sitarononta, ulang ma hita mintor mandolei. Tapi totap ma hita mangidangi Jahowa. Lang dokah nari isalpuhon Jahowa do ganup sitarononta. Halani ai totap ma hita marmalas ni uhur janah sabar ma paimahon Naibata pasaudkon haganup janji-Ni.