1-2. Limbaga aha ma na boi mangurupi hita mangarusi 1 Petrus 2:21?

BAYANGKON ma ham pakon piga-piga hasomanmu mardalan i sada harangan sanggah musim salju. Anjaha dong sada pemandu na marpangalaman na mangurupi nasiam ibagas pardalanan ai. Tapi sipata lang itonggor nasiam ia. Hassi pe sonai lang haru uhurmu halani dong do bokas ni naheini na boi iirikkon nasiam.

² Dunia na jahat on boi isarupahon songon harangan nongkan ai, anjaha halak Kristen dos songon halak na mardalan i harangan ai. Tapi martarima kasih do hita halani ibere Jahowa banta pemandu na sidearan, ai ma Jesus, Anak-Ni in. (1 Ptr. 2:21) Sahalak pakar ni Bibel mangkatahon isarupahon si Petrus do Jesus ai songon pemandu na boi iirikkon hita bokas ni naheini. Bani artikel on, iulas hita ma tolu sungkun-sungkun: Aha do artini mangirikkon bokas ni nahei ni Jesus? Mase maningon ihorjahon hita ai? Janah sonaha hita boi mangirikkon bokas ni nahei ni Jesus?

3. Aha do artini mangirikkon bokas ni nahei ni sasada halak?

³ Aha do artini mardalan mangirikkon bokas ni nahei ni sasada halak? Bani Bibel, hata “mardalan” ampa “langkah”, sipata boi do mangartihon na ihorjahon sasada halak ibagas goluhni. (1 Mus. 17:1; Ps. 44:19) Jadi sanggah ihatahon mardalan mangihutkon sasada halak, artini iihutkon hita aha na ihorjahonsi.

4. Aha do artini mangirikkon bokas ni nahei ni Jesus?

⁴ Aha do artini mangirikkon bokas ni nahei ni Jesus? Artini  maningon itiru hita do aha na ihorjahonsi. Tongon, bani ayat tema ai na ipatugah si Petrus pitah pasal sitiruon na ibahen Jesus sanggah ia marsitaronon. Tapi bahat do homa sitiruon na legan na ibahen Jesus hubanta. (1 Ptr. 2:18-25) Sasintongni, haganup na ihorjahon Jesus ampa na ihatahon ia, ai do na maningon itiru hita.

5. Ai boi do jolma na lang sempurna mangkorjahon pas songon na ibahen Jesus? Patorang.

⁵ Ai boi do jolma na lang sempurna maniru Jesus? Boi ma ge. Memang lang tarbahen hita mangkorjahon pas songon na ihorjahon Jesus. Tapi anggo marusaha hita humbani tuk ni gogohta laho maniru Jesus, on patuduhkon domma ibahen hita songon na ihatahon apostel Johannes, “Maningon iparlahouhon ma songon parlahou ni [Jesus].”​—1 Joh. 2:6.

6-7. Anggo itiru hita Jesus, mase ai boi mambahen hita lambin dohor bani Jahowa?

⁶ Gabe lambin dohor ma hita bani Jahowa anggo itiru hita Jesus. Mase sonai? Na parlobei, domma ibahen Jesus sitiruon sonaha carani mambahen malas uhur ni Jahowa. (Joh. 8:29) Jadi anggo ibahen hita songon na ibahen Jesus, gabe malas ma uhur ni Jahowa hubanta. Gabe pos ma uhurta ipadohor Jahowa do diri-Ni hubani halak na marusaha gabe hasoman-Ni.​—Jak. 4:8.

⁷ Na paduahon, itiru Jesus do Jahowa. Halani ai ma ihatahon Jesus, “Na mangidah ahu, na mangidah Bapa in do.” (Joh. 14:9) Maningon itiru hita do paruhuran ni Jesus ampa pambahenanni hubani halak na legan. Umpamani, maidop do uhurni bani sahalak na gadamon, iarusi ia do sonaha pangahap ni sada naboru na  parah tumang naboritni, janah maidop do uhurni hubani halak na marpusok ni uhur. (Mrk. 1:40, 41; 5:25-34; Joh. 11:33-35) Anggo itiru hita Jesus, dos do ai hita maniru Jahowa. Anjaha anggo lambin marusaha hita maniru Jahowa, lambin orot ma parhasomananta pakon-Si.

8. Anggo itiru hita Jesus, mase boi ihatahon anggo hita domma manaluhon dunia on?

⁸ Anggo iirikkon hita bokas ni nahei ni Jesus, gabe iurupi ma hita ase ulang mangihutkon dunia on. Bani borngin paima matei Jesus, ihatahon ia do, “Domma hutaluhon dunia on.” (Joh. 16:33) Artini, lang ra Jesus mangihutkon pingkiran ni halak i dunia on, tujuan ni sidea, ampa parlahouni. Tapi sai tongtong do idingat Jesus mase roh ia hu tanoh on, ai ma laho papansingkon goran ni Jahowa. Aha ma parlajaranni hubanta? Marusaha do halak i dunia on mambahen hita ase lang ringgas be mangidangi Jahowa. Tapi anggo itiru hita Jesus, gabe boi ma hita “manaluhon” dunia on.​—1 Joh. 5:5.

9. Aha ma na porlu bahenonta ase boi manggoluh sadokah ni dokahni?

⁹ Anggo iirikkon hita bokas ni nahei ni Jesus, gabe boi ma hita mandapot hagoluhan na sadokah ni dokahni. Dong sada dalahi na bayak manungkun bani Jesus aha do na porlu bahenonni ase mandapot hagoluhan sadokah ni dokahni. Nini Jesus ma, “Roh ma ho mangirikkon ahu!” (Mat. 19:16-21) Ihatahon Jesus do bani piga-piga halak Jahudi na lang porsaya ia do Mesias ai, “Iirikkon [biribiringku] do ahu. Hubere do bani sidea hagoluhan na sadokah ni dokahni.” (Joh. 10:24-29) Ihatahon Jesus do homa bani si Nikodemus, sahalak anggota Sanhedrin, bereonni do “hagoluhan na sadokah ni dokahni” hubani “na porsaya” bani Jesus. (Joh. 3:16) Maningon ipatuduh hita do haporsayaonta bani Jesus marhitei mandalankon ajaranni ampa maniru pambahenanni. Anggo ibahen hita sonai gabe boi ma hita manggoluh sadokah ni dokahni.​—Mat. 7:14.

10. Aha do artini ‘mananda’ Jesus? (Johannes 17:3)

¹⁰ Ase boi hita mangirikkon bokas ni nahei ni Jesus, maningon itanda hita do lobei ia. (Basa Johannes 17:3.) ‘Mananda’ Jesus artini maningon torus do iparlajari hita pasalsi. Maningon tangkas do ibotoh hita sonaha paruhuranni, pingkiran, ampa ajaranni. Age pe domma dokah hita ididi, maningon torus do itanda hita Jahowa pakon Jesus, Anak-Ni in.

11. Aha do na boi iparlajari hita humbani Injil?

¹¹ Iurupi Jahowa do hita ase boi lambin mananda Anak-Ni. Ibere do banta ompat  Injil na boi iparlajari hita bani Bibel. Ijai isaritahon pasal pangidangion ni Jesus sadokah ia i tanoh on. Ipatugah do pasal aha na ibahen Jesus, na ihatahon, ampa sonaha pangahapni. Buku ai boi mangurupi hita ‘mardingat’ siusihan na ibahen Jesus. (Heb. 12:3) Anggo iparlajari hita ganup Injil ai, gabe lambin dear ma itanda hita Jesus. Hasilni, gabe boi ma hita mangirikkon bokas ni naheini.

12. Aha ma na porlu ibahen hita ase bahat na boi iparlajari hita humbani Injil?

¹² Ase bahat na boi iparlajari hita humbani Injil, lang sungkup pitah ibasa tumang. Tapi maningon ibere hita do panorang laho manrimangi isini. (Bandingkon Josua 1:8.) Ulas hita ma dua cara na boi mangurupi hita manrimangi ompat Injil ampa mandalankon aha na iparlajari hita.

13. Sanggah mambasa Injil, sonaha ase boi ibayangkon ham saritani?

¹³ Parlobei, bayangkon ma saritani. Sanggah ham mambasa, bayangkon ma ham adong ibagas sarita ai, janah boi ididah ham aha na masa. Ase boi ibahen ham sonai, boi ma ibahen ham riset pasal sarita ai manggunahon publikasi na ipasirsir organisasinta. Pingkirhon ma aha na isaritahon bani ayat sebelumni, ampa aha na masa dobkonsi ai. Boi homa itonggor ham hatorangan pasal halak na ipatugah bani sarita ai, ampa iananni. Boi do ibandingkon ham sarita ai pakon Injil na legan. Halani ra do adong sarita na ipatugah bani sada Injil, hape lang ipatugah ai bani Injil na legan.

14-15. Sonaha hita boi mandalankon aha na iparlajari hita ibagas Injil?

¹⁴ Na paduahon, dalankon ma na iparlajari ham. (Joh. 13:17) Dob iparlajari ham Injil, sungkun ma dirimu: ‘Sonaha ahu boi mandalankon parlajaran na hudapot? Sonaha ahu boi manggunahon sarita on laho mangurupi halak na legan?’ Dob ai, pingkirhon ma ise sanina botou i kuria na boi iurupi ham. Anjaha  anggo sosok panorangni, bagihon ma na iparlajari ham ai hu bani.

¹⁵ Sonari ulas hita ma sada contoh sonaha hita boi manggunahon dua cara ai. Pardiateihon hita ma pasal naboru na mabalu na itonggor Jesus i rumah panumbahan.

16. Aha do na ibayangkon ham sanggah mambasa Markus 12:41?

¹⁶ Bayangkon ma saritani. (Basa Markus 12:41.) Sanggah ai, tanggal 11 Nisan tahun 33 M, piga-piga ari paima matei Jesus. Domma sadari bod Jesus mangajar i rumah panumbahan. Janah bahat do pambobai ugama na sihol martinggili pakonsi. Dong na manungkun bani Jesus ise do na mambere kuasa hu bani laho mangkorjahon horjani. (Mrk. 11:27-33; 12:13-34) Dong homa na mambahen sungkun-sungkun laho manlajou ia. Dob ai, pindah ma Jesus hu ianan na legan i rumah panumbahan. Itonggor ia ma dong bahat kotak sumbangan. Ra do ia hundul i Halaman Kaum Wanita, lanjar ikawahkon ma halak na mandabuhkon duitni hubagas kotak ai. Ididah ia ma bahat halak na bayak mandabuhkon buei-buei. Ra, tangkas do ibogei Jesus sora ni duit logam na idabuhkon hubagas kotak ai.

17. Domu bani Markus 12:42, aha ma na ibahen naboru na mabalu ai?

¹⁷ Basa Markus 12:42. Dob ai, itonggor Jesus ma roh sada “naboru na mabalu na masombuh”. (Luk. 21:2) Sunsah tumang goluhni. Ra, lang sungkup duitni laho mamboli haporluan siganup ari. Age pe sonai, sihol do uhurni mambere sumbangan. Jadi, sipsip ma ia mandabuhkon dua duit logam na etek hubagas kotak ai. Halani etekni, ra do lang tartangar sorani sanggah idabuhkon. Ibotoh Jesus do sadiha bahat na idabuhkon naboru ai, ai ma dua rimis. Otik tumang do harga ni duit ai. Laho mamboli burung pipit pe lang sungkup.

18. Domu bani Markus 12:43, 44, aha do na ihatahon Jesus pasal sumbangan ni na mabalu ai?

¹⁸ Basa Markus 12:43, 44. Malas tumang uhur ni Jesus mangidah naboru na mabalu ai. Jadi idilo ma susianni ase ipardiateihon sidea naboru ai. Anjaha nini ma, “Buenan do na nidabuhkon ni na mabalu na miskin an, . . . marimbang haganup na mandabuhkon ai.” Nini use, “Humbani lobih-lobihni do idabuhkon sidea bei, tapi anggo naboru an, ibagas hahuranganni idabuhkon do haganup na dong bani, haganup hagoluhanni.” Sanggah ibere naboru ai ganup duitni, taridah ma porsaya do ia sai tongtong do isarihon Jahowa haporluanni.​—Ps. 26:3.

19. Aha do na boi iparlajari hita humbani naboru na mabalu ai?

¹⁹ Dalankon ma aha na iparlajari ham. Sungkun ma dirimu, ‘Aha do na boi huparlajari humbani naboru ai?’ Pingkirhon ma use pasal naboru na mabalu ai. Sasintongni sihol do ia mambere bahat sumbangan bani Jahowa. Tapi age pe otik dassa na boi tarberesi, ai do na sidearan na boi ibahen ia bani Jahowa. Anjaha ibotoh Jesus do harga tumang do sumbanganni ai i lobei ni Bapani. Aha ma na boi iparlajari hita humbani sarita ai? Malas tumang uhur ni Jahowa hubanta anggo marusaha hita mangidangi-Si humbani tuk ni gogohta. (Mat. 22:37; Kol. 3:23) Megah do pangahap-Ni anggo ibahen hita na sidearan ase boi martumpu ampa marbarita.

20. Sonaha ham boi mandalankon parlajaran na idapot ham humbani naboru na mabalu ai? Bere ma contohni.

 ²⁰ Sonaha ham boi mandalankon parlajaran na idapot ham humbani naboru na mabalu ai? Pingkirhon ma ise do hasomanta na porlu ipatoguh. Umpamani, ai dong do ibotoh ham hasoman na matua na mangahap lang marguna ia halani lang bahat be na boi ibahen ia ibagas pangidangion? Atap, ai dong do ibotoh ham sanina na borit-boritan, na gabe maretek ni uhur halani lang boi be taratur roh hu partumpuan? Anggo adong, urupi ma sidea marhitei sahap na boi “pauli-ulihon”. (Ep. 4:29) Patugah ma bani sidea parlajaran na idapot ham humbani naboru na mabalu ai. Holi gabe tarapoh do sidea janah porsaya malas tumang uhur ni Jahowa halani domma marusaha mambere na sidearan. (Pod. 15:23; 1 Tes. 5:11) Anggo ipuji ham sidea, lang soal sadiha bahat na boi tarbahen sidea, taridah ma domma itiru ham Jesus.

21. Aha ma na sihol bahenonta?

²¹ Marhitei Injil, bahat tumang do na boi iparlajari hita pasal Jesus. Tontu martarima kasih tumang ma hita halani gabe ibotoh hita ma sonaha carani mangusihi Jesus. Halani ai, dear do anggo iparlajari nasiam ompat Injil ai. Atap sanggah mambahen parlajaran Bibel Kaluarga, boi do iparlajari nasiam ai. Dingat ma, ase bahat na boi iparlajari nasiam hun ompat Injil ai, sanggah mambasa bayangkon ma saritani. Pingkirhon ma sonaha nasiam boi mandalankon parlajaran ai. Sobali maniru pambahenan ni Jesus, porlu do homa hita marlajar humbani aha na ihatahon ia. Bani artikel na mangihut, ulas hita ma aha na boi iparlajari hita humbani na ihatahon Jesus paima matei ia.