1. Aha do na ididah Jahowa humbani juakjuak-Ni?

“MAROSUH do Jahowa mangidah [juakjuak-Ni].” (Ps. 149:4) Tontu malas tumang uhurta mambotoh ai. Ipardiateihon Jahowa do sifat-sifatta na madear. Ididah do aha na boi ibahen hita. Anjaha iurupi do hita ase boi gabe hasoman-Ni. Anggo totap hita setia hu Bani, gabe hasoman-Ni ma hita sadokah ni dokahni.​—Joh. 6:44.

2. Mase dong na lang porsaya anggo Jahowa mangkaholongi sidea?

² Ra do adong na mangkatahon, ‘Porsaya do ahu anggo Jahowa mangkaholongi juakjuak-Ni. Tapi huahap lang holong uhur-Ni hubangku.’ Mase ma adong na marpingkir sonai? Si Oksana * mangkatahon, “Malas tumang uhurhu sanggah ididi janah mulai ma ahu merintis. Tapi dobkonsi 15 tahun, sai lalab ma hudingat sitarononku sanggah dakdanak ahu. Gabe huahap ma lang marosuh be Jahowa hubangku janah lang holong uhur-Ni mangidah ahu.” Sonai ma homa na iahapkon si Joan na bahat sitarononni sanggah dakdanak. Ia mangkatahon, “Huondoskon do goluhku bani Jahowa janah marusaha do ahu mambahen malas uhur-Ni. Tapi dobkonsi ai, gabe huahap ma lang holong uhur-Ni hubangku.”

3. Aha ma na laho iulas hita bani artikel on?

³ Songon haduasi botounta ai, holong do homa uhurmu hubani Jahowa. Tapi ra do lang porsaya ham holong do uhur-Ni bamu. Mase maningon porsaya ham anggo Jahowa parduli bamu? Janah aha do na porlu bahenonmu anggo iahap ham lang maharga ham bani Jahowa? Eta ulas hita ma balosni ai.

4. Sonaha ma ujungni anggo lang porsaya hita ihaholongi Jahowa do hita?

⁴ Anggo porsaya hita holong do Jahowa hubanta, gabe tarojur ma hita mambahen na sidearan ibagas pangidangion hassi pe bahat sitarononta. Tapi anggo iahap hita lang maharga hita bani Jahowa, gabe ‘hurang ma gogohta’. (Pod. 24:10) Gabe maretek ni uhur ma hita janah ujungni ipakahou Sibolis ma uhurta.​—Ep. 6:16.

5. Aha ma na masa bani sanina botounta na lang porsaya holong do Jahowa bani sidea?

⁵ Dong piga-piga sanina botounta na lang porsaya parduli do Jahowa bani sidea. Ujungni gabe galek ma haporsayaon ni sidea. Sada sintua na margoran si James mangkatahon, “Hassi pe ahu mangidangi i Betel janah dihut do ahu mangurupi kuria na marbahasa na legan, tapi huahap lang marosuh Jahowa bani pangidangionku. Sipata huahap do anggo Jahowa lang ra manangihon tonggongku.” Si Eva na mangidangi i Betel mangkatahon, “Anggo lang porsaya hita holong do Jahowa hubanta, gabe lang ringgas hita mangidangi Jahowa. Dokah-dokah lang be ibahen hita na sidearan janah lang malas uhurta ibagas pangidangion.” Si Mikael, sahalak sintua ampa perintis mangkatahon, “Anggo iahap ham lang parduli Jahowa bamu, dokah-dokah gabe mandaoh ma ham hun Bani.”

6. Aha ma na maningon ibahen hita anggo hita marpingkir lang holong Naibata hubanta?

⁶ Humbani pangalaman nongkan ai taridah ma gabe galek do haporsayaonta anggo iahap hita lang holong Naibata hubanta. Jadi aha ma na maningon ibahen hita anggo roh pingkiran sisonai hubagas uhurta? Mintor padaoh ma pingkiran ai. Anjaha pindo ma ase ibere Jahowa ‘damei-Ni na manramotkon uhur ampa pingkiran’. (Ps. 139:23; Pil. 4:6, 7) Dingat ma bahat do sanina botounta na mangahapkon sisonai. Bani Bibel pe dong do isurat pasal juakjuak ni Naibata na sonai pangahapni. Umpamani apostel Paulus. Ulas hita ma aha do na boi iparlajari hita hun bani.

7. Sitaronon aha do na iahapkon si Paulus?

⁷ Ongga do iahap ham halani bahat tumang tanggung jawabmu gabe lang tarhorjahon ham ganupan? Anggo sonai,  sarupa ma situasimu pakon si Paulus. Haru do uhurni mamingkiri sanina botou lang pitah i sada kuria, tapi “haganup kuria” do. (2 Kor. 11:23-28) Ongga do pusok uhurmu halani dong naboritmu? Sonai do homa pangahap ni si Paulus. Dong naboritni janah usih songon “duri ibagas daging” do iahap ia ai. Sihol do uhurni ase tanggal duri ai hun bani. (2 Kor. 12:7-10) Ongga do ham maretek ni uhur halani dong hahuranganmu? Sipata sonai do homa pangahap ni si Paulus. Halani lang urah iahap ia mangkorjahon na sintong, ihatahon ia ma dirini “jolma na masombuh”.​—Rom 7:21-24.

8. Mase si Paulus boi totap martahan age pe bahat sitarononni?

⁸ Hassi pe bahat sitarononni, tapi totap do si Paulus ringgas mangidangi Jahowa. Aha do na mangurupisi boi totap martahan? Hassi pe ibotoh ia dong hahuranganni, tapi porsaya tumang do ia bani tobusan. Ibotoh ia do homa janji ni Jesus na mangkatahon ‘ganup na porsaya bani, manggoluh sadokah ni dokahni’. (Joh. 3:16; Rom 6:23) Porsaya do homa si Paulus ra do Jahowa manasap hasalahan ni halak na ra mambahen hamubahon.​—Ps. 86:5.

9. Aha ma na boi iparlajari hita humbani na ihatahon si Paulus i Galatia 2:20?

⁹ Porsaya do si Paulus holong tumang do uhur ni Naibata hu bani, halani ibere do Kristus gabe tobusan. (Basa Galatia 2:20.) Hunja ibotoh hita ai? Pardiateihon ma na ihatahon si Paulus, ‘Anak ni Naibata mangkaholongi ahu anjaha mamberehon dirini mangkopkop ahu.’ Lang ianggap si Paulus anggo Naibata lang mangkaholongisi halani jahatni pambahenanni hinan. Lang homa iahap ia pitah hubani sanina botou na legan dassa holong uhur ni Naibata, anggo bani lang. Tapi ihatahon si Paulus do hubani kuria Kristen i Rom, “Matei Kristus mangkopkop hita, sanggah pardousa ope hita.” (Rom 5:8) Tangkas ma banggal tumang do holong ni uhur ni Naibata hubanta!

10. Aha ma na boi iparlajari hita humbani Rom 8:38, 39?

¹⁰ Basa Rom 8:38, 39. Leganni ai, ihatahon si Paulus do seng dong na boi mambahen “sirang hita humbani holong ni uhur ni Naibata”. Ibotoh si Paulus do hasabaron ni Jahowa sanggah marurusan pakon halak Israel hinan. Ibotoh ia do homa maidop uhur ni Jahowa mangidahsi.  Jadi boi ihatahon sonon ma pangahap ni si Paulus, ‘Ai domma ibere Jahowa Anak-Ni laho mangkopkop ahu. Mase ma lang porsaya ahu holong uhur-Ni hubangku?’​—Rom 8:32.

11. Age pe domma bahat dousa ni si Paulus songon na ipatugah bani 1 Timoteus 1:12-15, mase pos uhurni anggo Naibata mangkaholongisi?

¹¹ Basa 1 Timoteus 1:12-15. Tontu gati do isolsoli si Paulus hasalahanni na hinan paima ia gabe halak Kristen. Ihatahon ia do dirini “pardousa sibanggalan”. Paima gabe susian ni Jesus, iparburu ia do halak Kristen hun sada huta hu huta na legan. Ipamasuk do sidea hubagas penjara janah setuju do ia anggo adong na ibunuh. (Lah. 26:10, 11) Bayangkon ma sonaha pangahap ni si Paulus, dobkonsi gabe halak Kristen pajumpah ma ia pakon anak ni sanina botou na tarbunuh hinan halani ia. Tontu manosal tumang ma ia. Tapi lang boi iubah ia aha na dob salpu. Hassi pe sonai, porsaya do ia domma matei Kristus laho mangkopkopsi. Halani ai ma ihatahon ia, “Halani idop ni uhur ni Naibata do ase sonon ahu nuan.” (1 Kor. 15:3, 10) Aha ma parlajaranni hubanta? Maningon porsaya do ham anggo Jesus domma matei laho mangkopkop ham janah halani ai do ase boi ham marhasoman pakon Naibata. (Lah. 3:19) Jadi, lang idingat-dingat Jahowa hasalahanmu na hinan, tapi aha na ihorjahon ham sonari ampa i ari simagira do na idingat Ia.​—Jes. 1:18.

12. Sanggah iahap hita lang maharga dirinta, sonaha 1 Johannes 3:19, 20 boi patoguhkon uhurta?

¹² Sanggah idingat ham domma matei Jesus manobus dousamu, ra do iahap ham lang talup ham manjalo ai. Aha do na mambahen sonai pangahapmu? Ra,  uhurta sandiri do na mangoto-otoi hita. Gabe iahap hita ma lang maharga dirinta. (Basa 1 Johannes 3:19, 20.) Tapi anggo sonai pangahapmu, dingat ma banggalan do Naibata marimbangkon uhurta. Age pe pangahapmu lang maharga dirimu, tapi lang sonai pangahap ni Naibata. Holong tumang do uhur-Ni mangidah ham. Janah ra do Ia manalpuhon hasalahanmu. Jadi ase boi tenger uhurmu hu Bani, parlajari ma Bibel, gati martonggo, janah marsaor ma pakon sanina botou. Mase ponting tumang ihorjahon hita na tolu ai?

13. Anggo iparlajari hita Bibel, sonaha ai boi patoguhkon uhurta? (Tonggor ma kotak “ Sonaha Bibel Boi Mangurupi Sidea?”)

¹³ Parlajari ma Bibel bai ganup ari ase lambin tangkas ibotoh ham paruhuran ni Jahowa. Holi gabe iahapkon ham ma parduli tumang do Ia bamu. Anggo irimangi ham isi ni Bibel, gabe iurupi ma ham “pauli-ulihon” uhur ampa pingkiranmu. (2 Tim. 3:16) Sahalak sintua na margoran si Kevin na gati mangahap lang maharga dirini mangkatahon, “Sanggah hubasa janah hurimangi Psalmen 103, gabe ipauli-uli ma pingkiranku. Janah hubotoh ma sonaha sasintongni pangahap ni Jahowa hubangku.” Si Eva na ipatugah nongkan ai mangkatahon, “Bai ganup borngin, hurimangi ma paruhuran ampa pambahenan ni Jahowa. Gabe damei ma pangahapku janah ipatoguh do haporsayaonku.”

14. Sonaha tonggo boi patoguhkon uhurta?

¹⁴ Tongtong ma martonggo. (1 Tes. 5:17) Anggo sihol hita marhasoman pakon sasada halak, maningon gati do hita marbuali pakonsi janah ipatugah hita ma sonaha pangahapta. Sonai ma homa sanggah hita marhasoman pakon Naibata. Maningon ra do hita patugahkon aha na ibagas uhurta, ampa sonaha pangahapta sanggah martonggo. Anggo ibahen hita sonai, taridah ma porsaya do hita anggo Jahowa mangkaholongi hita. (Ps. 94:17-19; 1 Joh. 5:14, 15) Si Joan na ipatugah nongkan ai mangkatahon, “Sanggah martonggo ahu, hupatugah do ganup na ibagas uhurhu hu Bani, sedo pitah aha na huhorjahon sadari ai. Dokah-dokah gabe lambin hutanda ma Jahowa. Huahapkon ma ia sahalak Bapa na mangkaholongi niombahni, sedo songon sahalak bos i perusahaan.”​—Tonggor ma kotak “ Domma Ibasa Ham Buku On?”

15. Aha ma sibere-bere ni Jahowa hubanta?

¹⁵ Marsaor ma pakon sanina botou. Sibere-bere humbani Jahowa do sidea ai.  (Jak. 1:17) Ibere Jahowa do hasoman-hasoman i kuria na sirsir patuduhkon ‘holong bani sagala panorang’. (Pod. 17:17) Bani suratni hubani kuria i Kolosse, isobut si Paulus do goran ni piga-piga hasoman na mangurupisi. “Gabe apoh-apoh” do sidea ai hu bani. (Kol. 4:10, 11) Gari Kristus pe porlu do pangahapni ia ipargogohi. Ongga do ia iurupi hasomanni ampa malekat. Janah martarima kasih do Jesus halani ai.​—Luk. 22:28, 43.

16. Sonaha sanina botou i kuria boi mangurupi hita lambin dohor bani Jahowa?

¹⁶ Ai ra do nasiam manjalo pangurupion humbani hasoman-hasoman na bujur i kuria? Bahat tumang do gunani ai. Sanggah isaritahon ham sonaha pangahapmu bani sidea, sedo ai patuduhkon domma galek haporsayaonmu. Pardiateihon ma na ihatahon si James na ipatugah nongkan ai. Nini do, “Sanggah lutu pingkiranku, sabar do sidea manangihon saritangku. Ipatugah sidea do holong uhur ni sidea bangku. Halani ai, gabe huahapkon ma holong anjaha parduli do Jahowa hubangku.” Jadi, marusaha ma hita marhasoman orot pakon sanina botou i kuria!

17-18. Ise do na maningon itangihon hita, janah mase?

¹⁷ Marusaha do Sibolis mambahen hita lang be mangkorjahon na sintong. Halani ai, sihol do ia ase hita marpingkir lang ihaholongi Jahowa hita janah lang talup hita ipaluah. Tapi songon na dob iulas hita, parladung do Sibolis ai.

¹⁸ Holong tumang do Jahowa bamu. Janah maharga do ham i lobei-Ni. Anggo itangihon ham Ia songon na dob ibahen Jesus, gabe ‘marianan ma ham ibagas holong ni uhur-Ni’. (Joh. 15:10) Jadi, ulang ma tangihon Sibolis. Ulang homa iahap ham lang maharga dirimu. Tapi tangihon ma Jahowa, halani sai na madear do na ipindahi Ia hun bamu. Pos ma uhurmu ‘marosuh do uhur-Ni mangidah juakjuak-Ni’, tarmasuk ma ham!