Paima hamateanni, mase ma ihatahon Jesus songon na isurat bani Psalmen 22:2?

Paima matei Jesus, bani Mateus 27:46 ihatahon ia ma sonon, “Ale Naibatang-Ku, Naibatang-Ku, mase ma itadingkon Ham ahu?” Sanggah ihatahon Jesus sonai, saud ma na isurat si Daud bani Psalmen 22:2. (Mrk. 15:34) Tapi, ulang ma iahap hita sanggah ai domma galek haporsayaon ni Jesus, atap pe pangahapni lang be parduli Jahowa hu bani. Ibotoh Jesus maningon matei do ia, anjaha sirsir do homa ia matei. (Mat. 16:21; 20:28) Ibotoh do homa anggo bani panorang ai lang “iramotkon” Jahowa ia. (Job 1:10) Ipaturut Jahowa do Jesus marsitaronon laho mambuktihon totap do ia setia hassi pe maningon marsik hamateanni.​—Mrk. 14:35, 36.

Jadi mase ma ihatahon Jesus songon na isurat bani Psalmen ai? Age pe lang ibotoh hita mase ihatahon ia sonai, tapi ra do adong piga-piga alasanni. Ulas hita ma ai. *

Sanggah ihatahon Jesus ai, ra do ia sihol patuduhkon lang ilinggomi Jahowa ia. Maningon matei do ia ase “ihopkop haganup marhitei hamatean na tinaronni ai”. (Heb. 2:9) Jadi, sanggah Jesus laho manggalar tobusan ai, lang iurupi Jahowa ia.

Sanggah ihatahon Jesus na isurat bani Psalmen ai, ra do ia sihol mangurupi halak  na manangar laho mardingat isi ni Psalmen 22. Somal do halak Jahudi hinan mardingat bahat Psalmen. Anggo ipatugah sada ayat humbani sada Psalmen, mintor idingat sidea ma ganup ayat bani bindu ai. Sanggah sonai ibahen Jesus, gabe iurupi ma susianni laho mardingat anggo haganup na dong bani Psalmen ai maningon saud do hu bani, paima matei ia. (Ps. 22:8, 9, 16, 17, 19, 25) Anjaha bani ayat na parpudi bani Psalmen ai, ipuji do homa Jahowa halani ia do Raja bani sab tanoh on.​—Ps. 22:28-32.

Sanggah ihatahon Jesus ai, ra do ia sihol patuduhkon anggo ia lang marsalah. Paima matei Jesus, ituduh do ia domma mangapasi Naibata. (Mat. 26:65, 66) Mintor podas ma Sanhedrin mambahen rapot bani tongah borngin laho mangadili Jesus, hape pangadilan ai lang mangihutkon paraturan na marlaku ijia. (Mat. 26:59; Mrk. 14:56-59) Jadi sanggah ihatahon Jesus, “Ale Naibatang-Ku, Naibatang-Ku, mase ma itadingkon Ham ahu”, ra do Jesus sihol patuduhkon sasintongni lang dong salahni na mambahen ia maningon iuhum matei.

Ra do Jesus sihol patugahkon sanggah marsitaronon si Daud sedo artini lang iharosuhkon Jahowa ia. Sedo homa artini domma galek haporsayaon ni si Daud. Halani dobkonsi ihatahon si Daud hubani Jahowa “mase itadingkon Ham ahu”, ihatahon si Daud do use pos do uhurni ipaluah Jahowa do holi juakjuak-Ni anjaha sai tongtong do ipasu-pasu Jahowa ia. (Ps. 22:24, 25, 28) Sonai ma homa na masa bani Jesus, “Anak ni si Daud”. Sanggah igantung ia bani sada hayu sedo artini lang marosuh Jahowa hu bani.​—Mat. 21:9.

Ra do pusok uhur ni Jesus halani lang ilinggomi Jahowa ia. Jadi maningon ipatuduh Jesus ma anggo ia boi setia ronsi matei. Sasintongni sedo harosuh ni Jahowa ase marsitaronon Anak-Ni janah matei. Tapi halani mardousa si Adam pakon si Hawa, maningon matei do Jesus bahen tobusan laho manggantih aha na magou ibahen si Adam. Anjaha maningon ipatuduh Jesus do homa parladung do Sibolis ai. (Mrk. 8:31; 1 Ptr. 2:21-24) Tontu ase boi saud ganupan ai, maningon ipaturut Jahowa ma Jesus marsitaronon janah matei.

Ra do Jesus sihol mangurupi susianni ase mangarusi mase ipaturut Jahowa sonai parmateini. * Jesus mambotoh bahat do holi halak na sangsi hu bani halani songon parjahat parmateini. (1 Kor. 1:23) Tapi anggo iarusi susianni mase maningon sonai parmateini, gabe lang sangsi be sidea. (Gal. 3:13, 14) Gabe porsaya ma sidea Sipaluah do Jesus sedo parjahat.

Atap aha pe alasan ni Jesus mase ihatahon ia songon na tarsurat bani Psalmen 22 ai, ibotoh Jesus do sanggah matei ia igantung bani sada hayu, saud ma harosuh ni Jahowa. Halani ai, lang piga dokah dobkonsi ai, ihatahon ia use, “Domma salosei!” (Joh. 19:30; Luk. 22:37) Jadi, sanggah ipaturut Jahowa Jesus marsitaronon janah matei, saud ma ganup tugas na ibere Jahowa hu bani i tanoh on. Leganni ai, saud ma haganup na tarsurat pasalsi “ibagas Titah ni si Musa, buku ni nabi-nabi, ampa bani buku Psalmen”.​—Luk. 24:44.