Tapi sanggah marumur hira-hira 13 tahun, lang be orot parhasomananku pakon Jahowa. Gabe sihol do ahu songon hasoman sakalasku, boi uhur-uhur ni sidea. Huahap bahattu do aturan na ibahen namatorasku. Gabe borat ma huahap mandalankon prinsip ni Bibel ampa mangidangi Jahowa. Age pe porsaya ahu dong Naibata ai, tapi lang orot be ahu pakon-Si.

Ase ulang gabe parbarita na lang aktif, totap do ahu marbarita. Tapi lang ongga hubahen persiapan paima laho marbarita. Halani ai, lang hubotoh sonaha carani mamungkah parsahapan. Lang homa hubotoh sonaha marbuali pakon halak na hujumpahi. Ujungni, lang adong kunjunganku. Gabe lang marosuh ahu marbarita. Nini uhurhu ma, ‘Mase ma dong halak na tongtong marbarita, hape borat tumang do mangkorjahon ai?’

Sanggah marumur 17 tahun, lang marosuh be ahu iatur-atur. Jadi pindah ma ahu hu Australia. Sasintongni haru do namatorasku anggo pindah ahu. Tapi iahap sidea ma boi do holi ahu totap mangidangi Jahowa ijai.

 Hape daskonsi i Australia, sedo na lambin dear situasingku. Gati do ahu lang martumpu. Dong piga-piga na maposo i kuriangku na songon ahu parlahouni. Dihut do sidea martumpu, tapi hu diskotik do homa laho sidea. Hubani sidea do ahu rosuh marhasoman. Hinan, totap do ahu gabe Saksi Jahowa, tapi huihutkon do homa parlahou ni dunia on. Hassi pe sonai, lang dong na mambahen malas uhurhu.

Dua tahun dobkonsi ai, gabe hupingkiri ma use aha do na sipontingan ibagas goluhku dobkonsi jumpah ahu pakon sada hasomanta naboru. Ondi ai, lima halak do hanami sarumah, janah ganupan anak boru. Iontang hanami ma sintua kaliling pakon istrini marborngin i rumahnami sadokah saminggu. Si Tamara do goran ni istrini. Sanggah suamini sibuk mangurus urusan i kuria, marbuali ma si Tamara pakon hanami. Basar tumang ia. Hassi pe sibuk ibagas pangidangion, tapi ra do homa ia marguro-guro pakon hanami. Marosuh do ahu marhasoman pakonsi.

Halani hinsah ni uhur ni si Tamara ibagas pangidangion, janah holong homa ia hubani hasintongan, gabe tarojur ma ahu mangusihisi. Huidah ma martuah do ia halani mambere na sidearan hubani Jahowa. Hape anggo ahu lang martuah halani lang ringgas be ahu mangidangi-Si. Anggo hurimangi pambahenan ni si Tamara ai, gabe hudingat ma na ihatahon Bibel, marosuh do Jahowa anggo hita mangidangi-Si “ibagas malas ni uhur” ampa “marhasoman olob-olob”.​—Ps. 100:2.

Sihol do ahu ase boi marmalas ni uhur songon si Tamara. Tapi ase boi sonai, maningon bahat do parubahan na hubahen. Tapi humulai ma otik-otik. Umpamani, persiapan ma ahu paima marbarita. Anjaha gati do ahu merintis ekstra. Halani ai, gabe lambin barani do ahu sanggah marbarita. Anjaha halani gati ahu mambasahon ayat ni Bibel sanggah marbarita, gabe lambin marmalas ni uhur ma ahu ibagas pangidangion. Dob ai, merintis ekstra ma ahu tiap bulan.

I kuria, marhasoman ma ahu pakon sanina botou na ringgas mangidangi Jahowa, age hubani  na maposo, sonai homa na matua. Halani mangidah sitiruon ni sidea, gabe hupingkirhon ma use aha do na sipontingan ibagas goluhku. Anjaha gabe tarojur ma ahu mambasa Bibel bai ganup ari. Lambin marmalas ni uhur ma ahu ibagas pangidangion, anjaha gabe perintis biasa ma ahu. Dobkonsi ai ma huahapkon malas tumang uhurhu sanggah marsaor pakon sanina botou i kuria.

Dobkonsi satahun, pajumpah ma ahu pakon si Alex. Bujur tumang do ia, holong do homa uhurni bani Jahowa, anjaha ringgas do ia ibagas pangidangion. Ondi ai, mangidangi gabe siparugas do ia i kuria janah domma onom tahun ia merintis. Ongga do ia mangidangi hu Malawi halani ijai porlu tumang bahat parbarita. Ijai, marhasoman do ia pakon piga-piga misionaris. Janah iojur misionaris ai do ia ase tongtong palobeihon pangidangion ibagas goluhni.

Bani tahun 2003, marhajabuan ma ahu pakon si Alex. Anjaha totap do hanami ibagas dinas sepenuh waktu ronsi sonari. Bahat tumang na iparlajari hanami. Anjaha bahat tumang pasu-pasu humbani Jahowa na iahapkon hanami.

Bani tahun 2009, itugaskon ma hanami gabe misionaris hu Timor-Leste, sada negara na etek, na dong i kepulauan Indonesia. Malas tumang uhurnami. Tapi haru do homa pangahapnami. Lima bulan dobkonsi ai, das ma hanami i Dili, ibukota ni Timor-Leste.

Tapi legan tumang do situasi i Timor-Leste pakon i nagori asalnami. Umpamani, legan do hasomalanni, bahasani, sipanganonni, ampa cuacani. Sanggah mangidangi, gati do hanami pajumpah pakon halak na miskin janah lang dong sikolahni. Bahat do homa halak na depresi halani ongga do masa porang ijai sadokah martahun-tahun. *

Tapi malas tumang uhurhu sanggah mangidangi ijai. Umpamani, pajumpah ma ahu pakon  si Maria, * sada dakdanak na marumur 13 tahun. Domma matei inangni piga-piga tahun na salpu, anjaha jarang do ia pajumpah pakon bapani halani lang sarumah sidea. Halani ai, lang dong na mangajar-ajarisi. Bahat do dakdanak ijai na songon si Maria ai goluhni. Hudingat, ongga do ia tangis-tangis marsarita hubangku. Tapi halani lang pala huarusi bahasa ni sidea, jadi lang hubotoh aha na ihatahon ia. Martonggo ma ahu bani Jahowa ase hubotoh sonaha carani mangapohsi. Hubasahon ma ayat ni Bibel na boi mangapohsi. Dobkonsi piga-piga tahun, lambin bahat ma parubahan na ibahen si Maria halani marlajar Bibel. Gabe lambin borsih ma ia janah bujur parlahouni. Ujungni ididi ma ia. Janah dong homa halak na iurupi ia marlajar Bibel. Lang lungunan be ia halani domma bahat sanina botou na gabe hasomanni.

Ipasu-pasu Jahowa do horja parambilanon i Timor-Leste. Hassi pe bahatan parbarita ijai baru pe sapuluh tahun na parpudi on ididi, tapi bahat do sidea na mangidangi gabe perintis, siparugas i kuria, ampa sintua. Dong do homa na mangidangi i RTO laho manerjemahkon publikasinta hu bahasa daerah. Malas tumang uhurhu sanggah mangidah sidea mandoding i partumpuan, ampa mangidah sidea tarsirom. Lambin orot do huidah parhasomanan ni sidea pakon Jahowa.

Legan tumang do situasi i Timor-Leste pakon i Australia. Hassi pe sonai malas tumang uhur mangidangi i Timor-Leste. Ongga do hanami marangkot sanggah mardinas. Bahat tumang penumpangni i angkot ai. Dong na mamboan ikan asin, dong homa na mamboan sayur-sayur na laho ijual hu tiga. Leganni ai, dong homa parlajar Bibelnami etek rumahni janah kotor homa. Sanggah marlajar Bibel hanami, mongkap ma iahap hanami janah marlintuni dayokni hujai hujon. Age pe sonai, nini uhurhu ma, ‘Aih, marriah tumang tene!’

Anggo hurimangi use, martarima kasih tumang do ahu halani domma iajarhon namatorasku pasal Jahowa hubangku. Sanggah galek ahu, tongtong do iurupi sidea ahu. Huahapkon ma sintong do na ihatahon bani Podah 22:6. Malas tumang uhur ni Bapa pakon Inang mangidah ahu pakon si Alex totap ringgas ibagas pangidangion. Humbani tahun 2016, itugaskon ma si Alex gabe sintua kaliling i daerah na iawasi Kantor Cabang Australasia.

Ra do adong na lang porsaya anggo hinan sompat do ahu lang marosuh marbarita. Tapi sonari marosuh tumang ahu mangidangi! Atap na sonaha pe hagoluhanta, anggo humbani tuk ni gogohta hita mangidangi Jahowa, ai do na mambahen malas uhur. Malas tumang uhurhu boi mangidangi ibagas dinas sepenuh waktu rap pakon si Alex sadokah 18 tahun na parpudi on. Huahapkon ma sintong do na ihatahon si Daud hubani Jahowa, “Sai na marmegah-megah do sagala na marlingod Bamu, marolob-olob do sidea sadokah ni dokahni, . . . Sai marolob-olob do ibagas Ham na mangkaholongi goran-Mu.”​—Ps. 5:12.