1-2. Aha do artini tobusan, janah mase hita porlu itobus?

SANGGAH mardousa si Adam, lang boi be ia manggoluh sadokah ni dokahni. Sonai homa ginomparni. Lang tarsasap dousani ai halani sangaja do ia manlanggar titah ni Naibata. Tapi sonaha ma ginomparni? Hape lang dihut sidea mangkorjahon songon na ibahen si Adam. (Rom 5:12, 14) Ai adong do dalan laho paluahkon sidea humbani dousa ampa hamatean? Adong do! Bani ari si Adam mardousa, mintor ipatugah Jahowa ma laho paluahon-Ni do holi ginompar ni si Adam humbani dousa ampa hamatean. (1 Mus. 3:15) Dobkonsi jumpah panorangni, isuruh Jahowa ma Anak-Ni hun surga hu tanoh on, “mamberehon hosahni bahen tobus ni buei halak”.​—Mrk. 10:45; Joh. 6:51.

² Aha do artini tobusan ai? Bani Kitab-Kitab Yunani Kristen artini tobusan ai ma harga na igalar Jesus laho manggantihon aha na magou na ibahen si Adam. (1 Kor. 15:22) Mase ma porlu tobusan ai? Halani pintor do ganup dalan ni Jahowa. Taridah do ai humbani Titah-Ni. Bani Titah dong ihatahon hosah gantihni hosah. (2 Mus. 21:23, 24) Halani domma magou ibahen si Adam hagoluhan na sadokah ni dokahni, ibere Jesus ma hagoluhanni gantihni ai. (Rom 5:17) Halani ai ma Jesus gabe “Bapa Sadokah ni Dokahni” hubani ganup halak na porsaya bani tobusan.​—Jes. 9:5; Rom 3:23, 24.

3. Domu bani Johannes 14:31 ampa 15:13, mase ma Jesus ra mambere goluhni laho manobus hita?

³ Halani banggal tumang holong ni Jesus hubani Jahowa ampa manisia, ibere ia ma goluhni bahen tobusan. (Basa Johannes 14:31; 15:13.) Halani holong uhurni bani Jahowa, totap do ia setia ronsi matei janah ihorjahon do harosuh  ni Bapani. Hasilni, gabe saud ma holi harosuh ni Jahowa bani tanoh on ampa hubani manisia. Tapi mase ma marsik tumang hamatean na maningon itaron Jesus? Bani artikel on iulas hita ma balosni ai. Iulas hita use sonaha apostel Johannes patuduhkon anggo ia mangkargai tobusan. Dob ai, iulas hita ma sonaha hita boi patuduhkon anggo hita martarima kasih halani tobusan. Janah aha na porlu ibahen hita ase tongtong mangkargai tobusan na ibere Jahowa pakon Jesus.

4. Aha do na masa bani Jesus paima matei ia?

⁴ Bayangkon ma aha na masa bani Jesus paima matei ia. Sasintongni boi do ipindo ia bani Bapani ase roh marjuta malekat manlinggomisi. Tapi lang sonai ibahen ia. Ipaturut ia do halak Rom manangkap janah mambogbogisi. (Mat. 26:52-54; Joh. 18:3; 19:1) Igunahon halak Rom ai ma cambuk laho manlonsingi Jesus. Dob ai, isuruh ma Jesus mamorsan hayu na borat tumang hu ianan panguhumanni. Tapi sanggah i dalan, halani lang sanggup be Jesus, isuruh ma halak na legan mamorsan hayu ai. (Mat. 27:32) Dobkonsi das sidea i ianan ai, ipakuhon tentara Rom ma nahei pakon tangan ni Jesus bani hayu ai. Sanggah igantung Jesus bani hayu ai, lambin marigat ma ugahni. Gabe tangis ma hasoman ampa inangni sanggah manonggor ai. Tapi roh halak Jahudi, iejek-ejek do Jesus. (Luk. 23:32-38; Joh. 19:25) Sadokah marjam-jam ma Jesus manaronkon boritni. Sanggah ai marhosah pe borat tumang iahap Jesus. Paima rotap hosahni, martonggo do ia bani Jahowa. Ujungni ipaunduk ma uluni janah matei ma ia. (Mrk. 15:37; Luk. 23:46; Joh. 10:17, 18; 19:30) Tontu marsik tumang sitarononni janah ibahen do ia songon parjahat.

5. Hassi pe ibotoh Jesus na laho ibunuh holi ia, tapi aha do na mambahen sunsah uhurni?

⁵ Hassi pe ibotoh Jesus marsik tumang sitarononni holi, tapi sedo ai na mambahen sunsah uhurni. Sunsahan do uhurni sanggah mamingkiri tuduhan ni halak na laho mamunuhsi. Ituduh do ia domma mangapasi Naibata. Artini ituduh do ia lang hormat bani goran ni Naibata. (Mat. 26:64-66) Halani ai, ipindo Jesus do bani Jahowa anggo boi ulang ma sonai tuduhan ni halak hu bani. (Mat. 26:38, 39, 42) Jadi, mase ma ipaturut Jahowa Anak-Ni marsitaronon janah matei? Ulas hita ma tolu alasanni.

6. Mase maningon igantung Jesus bani sada hayu?

⁶ Parlobei, maningon igantung do Jesus bani sada hayu ase boi halak Jahudi ipaluah humbani papa. (Gal. 3:10, 13) Sasintongni maningon matei do halak Jahudi halani manean dousa humbani si Adam. Tapi leganni ai, maningon matei do homa sidea halani manlanggar Titah ni Naibata. Domma marjanji sidea laho mandalankon Titah ni Naibata, hape lang itopati sidea janji ai. (Rom 5:12) Bani Titah ihatahon barang ise na manlanggar titah ni Naibata, maningon matei do ia. Dob ai, maningon igantung do bangkeini bani sada hayu. * (5 Mus. 21:22, 23; 27:26) Jadi halani Jesus do na igantung bani hayu, gabe ia ma na manggantihon halak Jahudi matei bani hayu ai, age pe domma itulak sidea ia.

7. Aha ma alasan na paduahon mase ipaturut Naibata Anak-Ni marsitaronon?

⁷ Na paduahon, ipaturut Naibata do  Anak-Ni marsitaronon laho manlatih ia ase boi mandalankon tugasni gabe Sintua ni Malim. Domma iahapkon Jesus lang urah mandalankon titah ni Naibata sanggah borat tumang situasini. Halani sunsah tumang pangahapni, ongga do ia martonggo “marhasoman doruh banggal ampa iluh”. Halani ai, iarusi Jesus do aha haporluanta, janah “margogoh do ia mangurupi” sanggah “na tarlajou” hita. Tontu martarima kasih do hita bani Jahowa halani ipilih Ia do Sintua ni Malim na maridop ni uhur anjaha boi “mangahap bani hagalekonta”!​—Heb. 2:17, 18; 4:14-16; 5:7-10.

8. Aha ma alasan na patoluhon mase ipaturut Naibata Anak-Ni marsitaronon?

⁸ Na patoluhon, ipaturut Naibata do Jesus marsitaronon laho mambuktihon parladung do Sibolis ai. Ongga do ihatahon Sibolis lang dong jolma na ra mangidangi Jahowa anggo lang ibere upah. Ihatahon ia do homa lang dong jolma na ra mangkaholongi Naibata, anjaha usih songon si Adam do sidea ganupan. (Job 1:9-11; 2:4, 5) Tapi pos do uhur ni Jahowa setia do holi Jesus. Jadi ipaturut Ia ma masa bani Jesus sitaronon na marsik tumang. Tongon, setia do Jesus ronsi matei. Halani ai tarbukti ma parladung do Sibolis ai.

9. Sitiruon aha do na ibahen apostel Johannes hubanta?

⁹ Bahat do halak Kristen na totap toguh halani porsaya sidea bani tobusan. Hassi pe ilarang sidea marbarita janah dong homa tantanganni, tapi totap do sidea setia sadokah goluhni. Pardiateihon ma sitiruon na ibahen apostel Johannes. Sai tongtong do ia mambaritahon pasal Jesus ampa tobusan. Hira-hira 60 tahun ma dokahni ia mambaritahon ai. Tapi sanggah ia marumur hira-hira 100 tahun, itangkap pamarentah Rom ma ia janah ibuang hu pulau Patmos. Mase itangkap ia? Halani ‘mangambilankon hata ni Naibata pakon manaksihon Jesus’. (Pangk. 1:9) Tangkas ma toguh tumang do haporsayaon ni si Johannes!

10. Hunja ibotoh hita martarima kasih tumang do si Johannes halani dong tobusan?

¹⁰ Humbani surat na itulis si Johannes, taridah ma holong tumang do uhurni bani Jesus, janah martarima kasih do ia halani dong tobusan. Dong hira-hira 100 hali isuratkon ia pasal tobusan ampa gunani tobusan ai hubanta. Umpamani itulis ia do, “Anggo adong na mardousa, adong do sipangapiti banta bani Bapa in, in ma Jesus Kristus, Parpintor in.” (1 Joh. 2:1, 2) Itulis ia do homa ponting tumang do hita ‘manaksihon pasal Jesus’. (Pangk. 19:10) Tangkas ma ihargai si Johannes do tobusan ai. Sonaha ma hita boi mangusihisi?

11. Aha do na boi mangurupi hita ase ulang mangkorjahon na salah?

¹¹ Ulang ma ra mangkorjahon na salah. Anggo martarima kasih hita halani dong tobusan, ulang ma hita marpingkir sonon, ‘Lang pala mahua huhorjahon na salah. Holi martonggo ahu bani Jahowa mangindo ase isasap dousangku.’ Anggo tubuh ibagas uhurta sihol mangkorjahon na salah, mintor hatahon ma sonon, ‘Aih, domma bujur tumang Jahowa pakon Jesus hubangku. Lang ra ahu mangkorjahon na salah.’ Anjaha martonggo ma ham bani Jahowa sonon, ‘Ham Bapa, bere Ham ma hagogohon hubangku ase boi ahu manulak na jahat.’​—Mat. 6:13.

12. Sonaha hita boi mandalankon podah na isurat bani 1 Johannes 3:16-18?

 ¹² Haholongi ma ganup sanina botounta. Anggo ihaholongi hita sidea, taridah ma martarima kasih do hita halani domma ibere tobusan. Mase sonai? Dingat ma Jesus matei lang pitah hubani dirinta tumang. Tapi matei do homa ia laho mangkopkop sanina botounta. Holong do homa uhur ni Jesus hubani sidea. (Basa 1 Johannes 3:16-18.) Jadi anggo holong do homa uhurta bani sanina botou, taridah do ai humbani pambahenanta. (Ep. 4:29, 31–5:2) Umpamani, anggo adong sidea na boritan, na marsitaronon, atap pe na hona bencana, urupi hita ma sidea. Tapi anggo adong na mambahen borit uhurta, aha ma na boi bahenonta?

13. Mase hita porlu manalpuhon salah ni hasomanta?

¹³ Ra do pangahapmu lang urah manalpuhon salah ni hasoman na mambahen borit uhurmu. (3 Mus. 19:18) Anggo sonai, dalankon hita ma podah on, “Marsianju-anjuan [ma] anjaha marsisasapan dousa, anggo marpangkurangi uhur ni na sada dompak hasomanni; songon na dob isasap Kristus dousa nasiam, sonai ma homa nasiam marsisasapan.” (Kol. 3:13) Anggo ra hita manalpuhon hasalahan ni hasomanta, on patuduhkon martarima kasih tumang do hita bani Jahowa na dob mambere tobusan banta. Aha ma na porlu ibahen hita ase tongtong mangkargai tobusan?

14. Aha do na boi ibahen hita ase lambin mangkargai tobusan na dob ibere Jahowa hubanta?

¹⁴ Martarima kasih bani Jahowa. Hasomanta si Joanna na marumur 83 tahun na tading i India mangkatahon, “Sanggah martonggo ahu bai ganup ari, martarima kasih do ahu bani Jahowa halani domma mambere tobusan hubangku.” Sanggah martonggo, boi do homa ipatugah nasiam hasalahanmu bani sadari ai. Pindo ma bani Jahowa ase isasap salahmu ai. Tapi anggo dong dousa na banggal na ihorjahon nasiam, maningon ipatugah nasiam do ai bani sintua ase boi sidea mangurupi nasiam. Dear do holi itangihon sidea saritamu janah ibere do podah humbani Bibel. Martonggo do holi sidea rap pakon nasiam ase isasap Jahowa salahmu. Ujungni gabe boi ma dear use parhasomananmu pakon Jahowa.​—Jak. 5:14-16.

15. Mase porlu iparimbagaskon hita pasal tobusan?

¹⁵ Parimbagaskon ma pasal tobusan. Si  Rajamani, sahalak hasomanta naboru na marumur 73 tahun mangkatahon, “Gabe tangis do ahu sanggah hubasa sonaha marsikni sitaronon ni Jesus.” Ra do homa sonai pangahap ni nasiam. Tapi anggo iparimbagaskon nasiam aha na ibahen Jesus, lambin bagas ma holongmu bani Jesus pakon Bapani. Ase boi iparimbagaskon nasiam ai, parlajari nasiam ma lambin bagas topik pasal tobusan.

16. Aha do gunani anggo iajarhon hita pasal tobusan hubani halak na legan? (Tonggor ma gambar sampul.)

¹⁶ Ajarhon ma pasal tobusan hubani halak na legan. Sanggah iajarhon hita pasal tobusan hubani halak na legan, lambin martarima kasih ma hita bani Jahowa. Bahat do publikasi ampa video na boi igunahon hita laho mangajarhon mase maningon matei Jesus. Umpamani, boi do igunahon hita brosur Barita na Madear humbani Naibata! parlajaran 4. Judulni parlajaran ai “Ise do Jesus Kristus?” Atap boi do homa igunahon hita buku Aha do na Iajarhon Bibel Hubanta? bani pasal 5. Judulni parlajaran ai “Tobusan​—Silayak-layak ni Naibata”. Leganni ai, sanggah roh hita hu acara Pardingatan Hamatean ni Jesus, janah iontang hita homa halak na legan ase dihut hu acara ai, on patuduhkon anggo hita mangkargai tobusan ni Jesus. Tontu sada hasangapon do banta boi mangajarhon pasal Jesus hubani halak na legan.

17. Mase ihatahon anggo tobusan ai sibere-bere na sibanggalan humbani Naibata bani manisia?

¹⁷ Tangkas ma bahat do alasan mase maningon martarima kasih hita halani tobusan. Marhitei tobusan, gabe boi ma hita marhasoman pakon Naibata, age pe lang sempurna hita. Marhitei tobusan, iparseda ma holi ganup horja ni Sibolis. (1 Joh. 3:8) Marhitei tobusan do homa saud harosuh ni Naibata i tanoh on. Gabe Paradeiso ma holi sab tanoh on. Anjaha ganup halak mangidangi Jahowa ampa mangkaholongi-Si. Halani ai, bai ganup ari patuduh ma anggo hita mangkargai tobusan ni Jesus. Ai do sibere-bere ni Naibata na sibanggalan hubani manisia!