1. Sonaha hita boi lambin orot bani Jahowa?

 TONTU malas do uhurta anggo rup pakon na hinaholonganta. Umpamani, sidea na dob marhajabuan malas do uhurni boi padua-dua pakon pasanganni. Sonai homa na maposo malas do uhurni rup pakon hasoman-hasomanni. Anjaha sonai ma homa hita ganupan, malas do uhurta anggo rup pakon sanina botou. Tapi na sipontingan malas ma uhurta boi lambin orot pakon Jahowa. Sonaha carani? Maningon martonggo ma hita, mambasa Bibel, ampa manrimangi harosuh-Ni pakon sifat-sifat-Ni. Tontu malas tumang uhurta anggo ibere hita panorang laho mangkorjahon ai.—Ps. 139:17.

2. Aha do tantanganni laho dohor bani Jahowa?

² Tontu malas tumang do uhurta boi martonggo ampa mambasa Bibel. Hassi pe sonai, dong do tantanganni laho mangkorjahon ai. Halani sibuk, ra do gabe lang dong panorangta laho mangidangi Jahowa. Ra do hita sibuk i parhorjaan, dong tanggung jawab kaluarga, ampa mangkorjahon horja na legan. Ai ma na mambahen pangahapta lang dong be panorang laho martonggo, marlajar, ampa manrimangi isi ni Bibel.

3. Aha ope na boi paboiskon panorangta?

³ Leganni ai, na boi paboiskon panorangta, ai ma hiburan. Hassi pe lang salah hiburan na ipilih hita ai,  tapi anggo lang jaga boi do ai mambahen lang dong be panorangta laho mangidangi Jahowa. Tongon porlu do hita hiburan. Tapi sedo ai na sipontingan ibagas goluhta.—Pod. 25:27; 1 Tim. 4:8.

4. Aha do na laho iulas hita?

⁴ Bani artikel on iulas hita ma mase porlu hita manontuhon aha do na sipontingan ibagas goluhta. Janah iulas hita use sonaha hita boi mambere lambin bahat panorangta laho mangidangi Jahowa. Anjaha aha ma gunani anggo ibahen hita sonai.

5. Sonaha Epesus 5:15-17 boi mangurupi na maposo laho mambahen haputusan na madear ibagas goluhni?

⁵ Bahen ma haputusan na sidearan. Na maposo porlu do mambahen haputusan ase boi goluhni martuah. Ra do guru ampa kaluarga na lang Saksi mangojur hanima kuliah ase boi holi dapot horja na dear. Tapi anggo ibahen hanima sonai, gabe bois ma holi panorangnima hujai. Namatoras pakon sanina botou marosuh do mangojur na maposo ase manggunahon panorangni laho mangidangi Jahowa. Aha ma na boi mangurupi na maposo laho mambahen haputusan na sidearan? Dear do anggo ibasa janah rimangi hanima Epesus 5:15-17. (Basa.) Dobkonsi mambasa ayat ai, rimangi ma sungkun-sungkun on, ‘Aha do “harosuh ni Tuhan in”? Haputusan aha do na maningon hubahen ase malas uhur ni Naibata? Sonaha ase ahu dear manggunahon panorang?’ Dingat ma, “ari hasunsahan do nuan” janah tongkin nari iripaskon mando dunia on. Tontu dearan do anggo igunahon hita goluhta laho mambahen malas uhur ni Jahowa.

6. Aha do na ibahen si Maria, janah mase dear tumang na ibahenni ai?

⁶ Pingkirhon ma aha do na sipontingan ibagas goluhta. Tongon, ra do lang salah ganup na ihorjahon hita. Tapi dong do sada horja na sipontingan marimbangkon horja na legan. Songon contoh ni si Maria pakon si Marta. Sanggah roh Jesus hu rumah ni sidea, malas tumang uhur ni sidea. Mintor bahat ma imasak si Marta sipanganon. Tapi anggo si Maria hundul do ia manangihon Jesus mangajar. Sasintongni lang salah na ihorjahon si Marta ai. Tapi aha na ibahen si Maria ai, ai ma “sidearan”. (Luk. 10:38-42) Ra do dobkonsi ai, lang idingat si Maria be aha na ipangan sidea. Tapi pangajaran ni Jesus tongtong do idingat ia. Sonai ma homa hita, dear ma gunahon hita panorangta ase lambin dohor bani Jahowa. Sonaha carani?

7. Mase ponting ase hita martonggo, marlajar Bibel, ampa manrimangi isini?

⁷ Ase boi lambin dohor bani Jahowa, maningon martonggo do hita, marlajar Bibel, ampa manrimangi isini. Sanggah hita martonggo, sarupa do ai songon hita marsahap bani Jahowa. (Ps. 5:8) Anjaha anggo hita marlajar Bibel, dapot hita ma “habotohon pasal Naibata” na boi mambahen hita gabe pentar. (Pod. 2:1-5) Leganni ai, sanggah irimangi hita isi ni Bibel, gabe lambin bahat ma na ibotoh hita pasal sifat ni Jahowa ampa harosuh-Ni. Jadi sonaha  carani ase dong panorangta laho mangkorjahon ganupan ai?

8. Parlajaran aha do na idapot hita sanggah Jesus i padang belantara?

⁸ Pindahi ma ianan na tenang. Songon na ibahen Jesus, paima mulai ia mangidangi Jahowa, laho do ia hu padang belantara janah ijai ma ia sadokah 40 ari. (Luk. 4:1, 2) Sanggah ai, martonggo do ia janah manrimangi tugas na ibere Jahowa hu bani. Ai ma na mangurupi ia totap setia age pe bahat tantangan. Parlajaran aha do na dapot hita hunjai? Anggo bahat halak i rumahta, ra do susah manorihi ianan na tenang laho martonggo. Anggo sonai, boi ma ipindahi hita ianan na tenang i luar. Songon pangalaman ni si Julia hun Prancis, ia pakon suamini tading i sada rumah na etek. Halani ai, susah ma iahap ia manorihi ianan na tenang. Jadi nini ma, “Laho ma ahu hu taman tiap ari halani tenang do ijai. Gabe boi ma ahu dokah martonggo bani Jahowa.”

9. Age pe bahat tumang horja ni Jesus, aha do na ibahen ia ase totap orot pakon Jahowa?

⁹ Sasintongni bahat tumang do na maningon ihorjahon Jesus. Sanggah ia i tanoh on, buei do halak mangihutkonsi laho manangar pangajaranni. Bani sada ari, “haganup parhuta ai marhumpul do i lobei ni labah” laho mangidahsi. Age pe sonai, ipasirsir ia do panorangni ase boi totap orot pakon Jahowa. Girah sogod, laho ma ia mangindahi “ianan na lungun laho martonggo”.—Mrk. 1:32-35.

10-11. Domu bani Markus 14:37, 38, parentah aha do na ibere Jesus bani susianni, tapi aha do na masa?

¹⁰ Bani borngin paima hamateanni, ipindahi Jesus do ianan na lungun laho martonggo ampa manrimangi harosuh ni Naibata. Jadi laho ma ia hu taman Getsemane. (Mat. 26:36) Ijai ipatugah ia ma dong na ponting na maningon ibahen susianni.

¹¹ Sanggah das sidea i taman Getsemane, domma tongah borngin. Isuruh Jesus ma susianni ai ase totap “puho” janah laho ma ia martonggo. (Mat. 26:37-39) Tapi sanggah martonggo Jesus, tarpodom do susianni. Sanggah itonggor Jesus sidea, nini ma bani sidea, “Puho ma hanima anjaha martonggo.” (Basa Markus 14:37, 38.) Ibotoh Jesus loja do susianni ai janah pusok homa uhurni. Ibotoh ia homa “galek do daging”. Tapi domma dua hali Jesus martonggo, dua hali ai do homa itonggor Jesus sidea tarpodom janah lang martonggo.—Mat. 26:42-45.

12. Aha do na boi ibahen ham anggo lang sanggup ham martonggo halani loja janah pusok uhurmu?

 ¹² Pingkirhon ma sadihari panorang na sosok laho martonggo. Ra do halani loja janah pusok homa uhurmu, hira lang dong be gogohmu laho martonggo. Anggo sonai, aha ma na boi ibahen ham? Dong na mangkatahon dearan do sidea martonggo sanggah bod ari marimbangkon borngin. Anjaha na legan mangkatahon rahanan iahap sidea hundul atap berlutut, ase boi serius sidea sanggah martonggo. Tapi sonaha porini pusok tumang uhurmu? Totap ma patugah bani Jahowa ganup na ibagas uhurmu halani iarusi Jahowa do sonaha pangahapmu.—Ps. 139:4.

13. Aha do na mambahen urah tarbagi pingkiranta sanggah marlajar, martonggo, atap martumpu?

¹³ Sanggah marlajar Bibel, ulang ma tarbagi pingkiran ni nasiam. Sobali na martonggo, maningon marlajar Bibel do hita janah roh hu partumpuan ase boi lambin dohor bani Jahowa. Aha ma na boi ibahen ham ase ulang tarbagi pingkiranmu sanggah marlajar Bibel atap martumpu? Rimangi ma sungkun-sungkun on, ‘Aha do somalni na mambahen urah-urah tarbagi pingkiranku sanggah martumpu ampa marlajar?’ Ra, halani dong do na manalepon, mang-SMS, atap email masuk. Sonari on, buei do halak domma mar-HP. Piga-piga pakar mangkatahon anggo dong HP i dohorta, gabe urah ma tarbagi pingkiranta. Sada pakar psikologi pe mangkatahon, “Anggo dong HP i lambungta, gabe lang konsentrasi be hita mangkorjahon horjanta.” Halani ai ma sanggah roh hita hu kebaktian, gati do hita ipasingat laho mangatur henponta ase ulang mangganggu na legan. Jadi porlu do homa sonai ibahen hita sanggah hita marlajar Bibel.

14. Domu bani Pilippi 4:6, 7, sonaha Jahowa mangurupi hita ase boi konsentrasi?

¹⁴ Martonggo ma bani Jahowa ase hita boi konsentrasi sanggah martumpu ampa marlajar Bibel. Tapi, ra do halani holsohan atap haru uhurta, gabe sunsah ma hita konsentrasi. Anggo sonai, martonggo ma homa bani Jahowa ase ibere  Ia damei-Ni na boi manjaga uhur ampa ‘pingkiranta’.—Basa Pilippi 4:6, 7.

15. Aha do gunani anggo lambin itanda hita Naibata?

¹⁵ Anggo igunahon hita panorangta laho marlajar Bibel, martonggo, ampa martumpu, bahat do gunani na idapot hita. Parlobei, gabe boi ma hita mambahen keputusan na dear. Songon na ihatahon bani Bibel, halak na “marsaor pakon halak na pentar, parohkon hapentaran”. (Pod. 13:20) Halani humbani Naibata do rohni hapentaran, lambin pentar ma hita anggo lambin itanda hita Ia. Lambin iarusi hita ma aha do harosuh-Ni ampa na ihagigihon-Si.

16. Anggo holong uhurta bani Jahowa, mase ai boi mangurupi hita ase lambin dear mangajari?

¹⁶ Na paduahon, lambin pandei ma hita mangajarhon Bibel. Sanggah hita mangajari halak marlajar Bibel, tujuanta na sipontingan, ai ma mangurupi sidea ase mangkaholongi Naibata. Ase boi holong uhur ni sidea bani Naibata, hita do parlobei na maningon mangkaholongi Naibata. Halani ai, porlu do hita gati martonggo ampa marlajar Bibel. Songon Jesus, halani holong uhurni bani Naibata, gabe urah ma ia mangajarhon pasal Naibata hubani susianni. Ai ma na mangurupi sidea lambin mangkaholongi Naibata.—Joh. 17:25, 26.

17. Anggo hita martonggo ampa mambahen parlajaran pribadi, mase ai boi patoguhkon haporsayaonta?

¹⁷ Na patoluhon, lambin toguh ma haporsayaonta. Sanggah iahapkon hita ibalosi Naibata tonggonta, lambin toguh ma haporsayaonta hu Bani. (1 Joh. 5:15) Aha ope na porlu ibahen hita ase lambin toguh haporsayaonta? Maningon ibahen hita do parlajaran pribadi. Halani, ‘humbani na manangar do roh ni haporsayaon’. (Rom 10:17) Sobali ai, dong ope na porlu ibahen hita. Aha ma ai?

18. Mase hita porlu manrimangi aha na iparlajari hita? Bere ma contohni.

¹⁸ Maningon irimangi hita do homa na iparlajari hita. Pardiateihon hita ma contoh ni panurat ni Psalmen 77. Susah tumang do uhurni halani pangahapni lang marosuh be Naibata bani halak Israel. Ai do torus na ipingkiri ia tiap borngin. (Ayat 3-9) Jadi aha ma na ibahen ia? Nini ma bani Jahowa, “Sai sahap-sahapkononku do sagala lahoan-Mu, anjaha sai hupingkir-pingkiri do pambahenan-Mu.” (Ayat  13) Idingat ia do namin na dear na ibere Jahowa bani halak Israel. Tapi, tong do  haru ope uhurni. Nini ma use, “Mintor lupa ma nani Naibata marontou ni uhur, atap na dob tarkunsi ma nani holong ni atei-Ni halani ringis-Ni?” (Ayat 10) Irimangi ia ma use sonaha Jahowa patuduhkon idop ni uhur-Ni bani halak Israel. (Ayat  12) Halani ai, gabe lambin porsaya ma ia seng ongga itadingkon Jahowa sidea. (Ayat 16) Anggo irimangi hita ganup pambahenan ni Jahowa janah sonaha Ia mangurupi hita, gabe lambin toguh ma haporsayaonta.

19. Aha ope hasilni anggo ibere hita panorangta laho marlajar pasal Jahowa?

¹⁹ Na paompatkon, lambin bagas ma holongta bani Jahowa. Anggo holong uhurta bani Jahowa, gabe tarojur ma hita mangkorjahon ganup parentah-Ni anjaha sabar manaron ganup sitaronon. (Mat. 22:37-39; 1 Kor. 13:4, 7; 1 Joh. 5:3) Na sipontingan ibagas goluhta, ai ma parhasomananta pakon Jahowa.—Ps. 63:2-9.

20. Aha do na laho bahenonmu ase lambin orot pakon Jahowa?

²⁰ Jadi ase lambin orot hita pakon Jahowa, maningon marlajar Bibel do hita, martonggo, ampa manrimangi na dob iparlajari hita. Songon Jesus, pindahi hita ma ianan na tenang laho martonggo. Padaoh hita ma ganup na boi mambahen urah tarbagi pingkiranta. Janah pangindo ma bani Jahowa ase boi hita konsentrasi sanggah marlajar ampa martumpu. Anggo dear igunahon hita panorangta, ibere Jahowa ma hubanta hagoluhan sadokah ni dokahni i dunia na baru.—Mrk. 4:24.