ARTIKEL PARLAJARAN 2
Marlajar humbani Anggi ni Jesus
“Hunbani si Jakobus, juakjuak ni Naibata ampa Tuhan Jesus Kristus.”—JAK. 1:1.
DODING 88 Sai Ajari Ham ma Ahu bai Dalan-Mu
NA LAHO IULAS *
1. Ibagas kaluarga na sonaha do si Jakobus ipagodang?
TOGUH tumang do haporsayaon ni kaluarga ni si Jakobus. * Si Josep bapani ampa si Maria inangni, holong tumang do uhurni sidea bani Jahowa. Humbani gok ni uhur do sidea mangidangi Jahowa. Janah abangni do homa Mesias na ijanjihon, ai ma Jesus. Tontu sada hasangapon na banggal do bani si Jakobus boi ipagodang ibagas kaluarga na songon ai.
Halani si Jakobus ampa Jesus ipabanggal ibagas sada kaluarga, tontu dear do itanda ia abangni ai (Tonggor ma paragrap 2)
2. Aha ma namin na mambahen si Jakobus hormat bani Jesus?
2 Sasintongni buei do alasanni si Jakobus hormat bani Jesus. (Mat. 13:55) Umpamani, sanggah Jesus marumur 12 tahun, bahat tumang do na iarusi ia humbani na Tarsurat in. Anjaha iulas ia do homa ai pakon guru-guru i Jerusalem. (Luk. 2:46, 47) Leganni ai, ra do homa si Jakobus rup marhorja pakon Jesus gabe tukang kayu. Tontu bahat ma na ibotoh ia pasal Jesus. Songon na ihatahon si Nathan H. Knorr, “Lambin bahat do na ibotoh hita pasal sasada halak anggo rup marhorja hita pakonsi.” * Boi do homa ididah si Jakobus “lambin tambah do hapentaran ni Jesus sonai angkulani, anjaha iharosuhkon Naibata ampa jolma do ia”. (Luk. 2:52) Halani ai, ra do iahap hita si Jakobus ma namin halak na parlobei sahali na gabe susian ni Jesus. Tapi lang sonai na masa.
3. Sonaha do pangahap ni si Jakobus sanggah Jesus mangidangi i tanoh on?
3 Sanggah Jesus mangidangi i tanoh on, lape dihut si Jakobus gabe susian ni Jesus. (Joh. 7:3-5) Anjaha ra do homa dihut do ia na mangkatahon anggo Jesus domma “podouan”. (Mrk. 3:21) Leganni ai, ra do lang dihut si Jakobus mangkasomani si Maria sanggah Jesus igantung i tiang siksaan.—Joh. 19:25-27.
4. Aha do na laho iulas hita bani artikel on?
4 Dob ai gabe porsaya ma si Jakobus bani Jesus, janah gabe sintua na bujur do homa ia. Bani artikel on dong dua parlajaran na idapot hita humbani si Jakobus: (1) Mase hita maningon martoruh ni uhur? (2) Sonaha hita boi gabe guru na pandei songon si Jakobus?
TOTAP MA MARTORUH NI UHUR SONGON SI JAKOBUS
Dobkonsi ipapuho, ijumpahi Jesus ma si Jakobus. Halani martoruh ni uhur si Jakobus gabe ra ma ia gabe susianni (Tonggor ma paragrap 5-7)
5. Dobkonsi ipataridahkon Jesus dirini bani si Jakobus, aha ma na ihorjahon ia?
5 Nantigan do si Jakobus gabe susian ni Jesus? Dobkonsi Jesus ipapuho, “ipataridahkon do dirini bani si Jakobus, dob ai bani haganup apostel in”. (1 Kor. 15:7) Ra do dobkonsi ai ma si Jakobus gabe susian ni Jesus. Halani dobkonsi martumpu ganup susian ni Jesus i ruang pardatas i Jerusalem, laho manjalo tonduy na pansing, dihut do homa si Jakobus ijai. (Lah. 1:13, 14) Gabe pangurus pusat do homa ia bani abad na parlobei. (Lah. 15:6, 13-22; Gal. 2:9) Paima tahun 62 M, itulis si Jakobus do surat bani halak Kristen na iminaki. Janah suratni ai marguna do homa hubanta ronsi sonari lang soal hita marpangarapan hu surga atap pe i tanoh on. (Jak. 1:1) Sada sejarawan ni halak Jahudi na margoran si Josep mangkatahon, iparentahkon Sintua ni Malim Ananias anak ni si Hanas ma, ase iuhum matei si Jakobus. Hunjai taridah ma setia do si Jakobus ronsi matei janah marpangarapan hu surga do ia.
6. Aha do na mambahen si Jakobus legan pakon pamimpin ugama bani panorang ai?
6 Halak na toruh maruhur do si Jakobus. Anjaha legan do ia pakon pamimpin ugama ijia. Dobkonsi ibotoh si Jakobus anggo Jesus ai Anak ni Naibata, gabe porsaya ma ia. Tapi anggo halak Parisei lang sonai. Age pe domma ipapuho Jesus si Lasarus, tapi lang porsaya sidea anggo Jesus ai sinuruh ni Naibata. Marusaha do sidea mamunuh Jesus ampa si Lasarus. (Joh. 11:53; 12:9-11) Dobkonsi ipapuho Jesus, marusaha do sidea ase lang porsaya halak anggo Jesus ai domma puho. (Mat. 28:11-15) Halani gijang uhur ni pamimpin ugama, ai ma na mambahen sidea lang porsaya anggo Jesus ai Mesias.
7. Mase lang boi hita marginjang ni uhur?
7 Parlajaranni: Ulang ma hita marginjang ni uhur tapi ra ma hita mandalankon na iajarhon Jahowa. Anggo tersumbat pembulu darah i jantung jantung gabe targanggu. Sonai ma homa na halak marginjang ni uhur, ai do na mambahen ia lang ra manjalo ajaran ni Jahowa. Halani gijang uhur ni halak Parisei, gabe lang porsaya sidea anggo Jesus ai Anak ni Naibata. Hape domma ibere Jahowa bani Jesus kuasa laho mambahen halongangan. (Joh. 12:37-40) Halani ai, lang dapot sidea be pangarapan manggoluh sadokah ni dokahni. (Mat. 23:13, 33) Jadi ponting tumang do ase hita mangihutkon parentah ni Jahowa. Maningon ra do homa hita mambahen parubahan ibagas pingkiran ampa parlahounta ase sosok pakon harosuh ni Jahowa. (Jak. 3:17) Songon si Jakobus halani toruh ni uhurni gabe ra ma ia mangihutkon parentah ni Jahowa. Anjaha lang pitah ai gabe guru na pandei do homa ia.
MARUSAHA MA GABE GURU NA PANDEI SONGON SI JAKOBUS
8. Aha do na boi mangurupi hita ase boi gabe guru na pandei?
8 Ra do si Jakobus pe lang gijang sikolahni. Halani ai ma isarupahon pamimpin ugama do ia songon apostel Petrus ampa apostel Johannes. “Sedo halak sijamah surat sidea, tapi jolma na somal” do. (Lah. 4:13) Age pe sonai marusaha do si Jakobus gabe guru na pandei. On boi ibotoh hita sanggah ibasa hita buku Jakobus. Jadi sonai ma homa hita, hassi pe lang gijang sikolahta tapi boi do hita gabe guru na pandei. Halani dong tonduy na pansing ampa pelatihan humbani organisasi na boi mangurupi hita. Sonari ulas hita ma sonaha si Jakobus mangajari ase hita pe boi gabe guru na pandei.
9. Sonaha do cara ni si Jakobus mangajari?
9 Sederhana do cara ni si Jakobus sanggah mangajar. Halani ai gabe urah ma iarusi halak aha na porlu bahenon ni sidea. Umpamani, ipatorang ia do anggo halak Kristen boi do totap marmalas ni uhur age pe dong sitaronon. Nini do sonon, “Iparhatuah hita do halak na sabar. Ibogei nasiam do hasabaron ni si Job, anjaha ididah nasiam do sonaha dobni ibahen Tuhan in, ai parontou ni uhur banggal do Tuhan in anjaha paridop ni uhur.” (Jak. 5:11) Leganni ai, humbani na Tarsurat do pangajaran ni si Jakobus. Umpamani, isaritahon ia do pasal si Job, sonaha Jahowa mamasu-masu ia halani totap setia. Halani sonai ibahen si Jakobus gabe ipuji halak ma Jahowa sedo dirini sandiri.
10. Sanggah mangajari, aha do na boi itiru hita humbani si Jakobus?
10 Parlajaranni: Maningon sederhana ma caranta mangajar janah gunahon ma Bibel. Sanggah hita mangajari halak, maningon boi ma ididah sidea Jahowa do Naibata na pentar anjaha parduli tumang do Ia bani sidea. (Rom 11:33) Halani ai tongtong ma igunahon hita Bibel. Ulang ma hita na manontuhon aha na boi ibahen sidea ampa na lang. Tapi patuduh hita ma contoh-contoh humbani Bibel, ase iarusi sidea pingkiran ampa harosuh ni Jahowa. Anggo sonai ibahen hita gabe boi ma ibotoh sidea, tujuanni sidea mambahen parubahan sedo ase malas uhurta tapi mambahen malas uhur ni Naibata.
11. Aha do na porlu ipadear halak Kristen bani panorang ni si Jakobus, anjaha podah aha do na ibere ia bani sidea? (Jakobus 5:13-15)
11 Sabar janah barani do si Jakobus. Ibotoh si Jakobus do dong piga-piga na porlu ipadear humbani halak Kristen ijia. Halani ai, dear do ipodahi si Jakobus sidea. Umpamani, dong sidea na lang mintor podas mandalankon hata ni Naibata. (Jak. 1:22) Na leganni, rosuhan do marhasoman pakon halak na bayak. (Jak. 2:1-3) Anjaha dong homa na lang ipingkiri lobei paima marsahap. (Jak. 3:8-10) Age pe sonai porsaya do si Jakobus boi do holi sidea mambahen parubahan. Ai ma na mambahen ia ra mambere podah bani sidea. Anjaha iojur ia do homa na galek haporsayaonni ase mangindo pangurupion bani sintua.—Basa Jakobus 5:13-15.
12. Mase hita porlu totap sabar sanggah mangurupi parlajar Bibelta?
12 Parlajaranni: Maningon barani janah sabar do homa hita sanggah mangurupi halak na legan. Ra do bahat parlajar Bibel na lang urah mandalankon na iparlajarini ai. (Jak. 4:1-4) Tarlobih ma anggo dong hasomalan ni sidea na lang dear, gabe lang urah iahap sidea mambahen parubahan. Halani ai songon si Jakobus maningon barani do hita patugahkon bani sidea aha na porlu iubah sidea. Tapi maningon sabar do hita sanggah mangurupi sidea. Porsaya ma hita ibotoh Jahowa do ise na martoruh ni uhur janah ibere Ia do hagogohon bani sidea ase boi mambahen hamubahon.—Jak. 4:10.
13. Domu bani Jakobus 3:2, aha do na isadari si Jakobus?
13 Lang iahap si Jakobus dirini gijangan marimbangkon na legan. Age pe ia anggi ni Jesus janah sintua homa, tapi lang iahap ia dirini gijangan marimbangkon na legan. Ihatahon ia do ganup sanina botou i kuria “sanina na hinaholongan”. (Jak. 1:16, 19; 2:5) Lang ongga iahap ia dirini sempurna. Tapi ihatahon ia do homa, ia pe dong do homa salahni. Jadi nini ma sonon, “Ai ganup hita gati marsalah.”—Basa Jakobus 3:2.
14. Mase hita porlu jujur mangakui hasalahanta?
14 Parlajaranni: Ganup do hita ongga mambahen na lepak. Halani ai ulang ma iahap hita gijangan hita marimbangkon halak na legan. Anggo ibahen hita songon na sempurna hita ididah parlajar Bibelta, gabe iahap sidea ma lang sanggup sidea mangkorjahon aha na dob iparlajari. Dear do anggo iakui hita, ongga do homa hita mambahen na lepak. Tapi sai iurupi Jahowa do hita mambahen parubahan. Anggo ibahen hita sonai gabe pos ma uhur ni sidea, sidea pe boi do mambahen parubahan.
Igunahon si Jakobus do contoh na sederhana, tangkas, ampa urah iarusi (Tonggor ma paragrap 15-16) *
15. Contoh na sonaha do na igunahon si Jakobus? (Jakobus 3:2-6, 10-12)
15 Contoh atap limbaga na igunahon si Jakobus hona bani uhur ni halak. Marhitei pangurupion ni tonduy na pansing, gabe boi ma si Jakobus mambahen contoh na dear sanggah mangajari. Tapi lang pitah ai, iparlajari ia do homa cara mangajar sisonai humbani Jesus. Halani ai ma contoh na igunahon si Jakobus urah iarusi janah tangkas parlajaranni.—Basa Jakobus 3:2-6, 10-12.
16. Mase hita porlu manggunahon contoh na dear sanggah mangajar?
16 Parlajaranni: Gunahon ma contoh na urah iarusi. Anggo igunahon hita contoh na dear sanggah mangajar, gabe lambin urah ma sidea mambayangkon aha na iparlajari. Janah lambin idingat sidea do parlajaran ai. Jesus ma halak na pandei manggunahon contoh na dear sanggah mangajari anjaha ai do homa na itiru si Jakobus. Sonari ulas hita ma sada contoh na ongga igunahon si Jakobus janah mase ai gabe contoh na dear.
17. Mase contoh na igunahon si Jakobus bani Jakobus 1:22-25 contoh na dear?
17 Basa Jakobus 1:22-25. Igunahon si Jakobus do kaca gabe contoh laho patorangkon aha na ibasa hita maningon do idalankon. Anjaha contoh na ipakei ia ai domma ibotoh bahat halak. Ihatahon ia dong sada dalahi na markaca ididah ia do adong na porlu ipadear. Tapi lang ipadear ia ai. Jadi lang dong gunani ia na markaca ai. Sonai ma homa hita, dobkonsi ibasa hita Bibel tapi anggo lang ibahen hita parubahan, lang dong gunani ai.
18. Aha do tolu na porlu idingat hita sanggah mambahen contoh?
18 Ase boi hita mambahen contoh na dear, tiru hita ma si Jakobus. Dong tolu na porlu idingat hita: (1) Contoh na igunahon hita boi mangurupi laho patorangkon ajaran ai. (2) Gunahon ma contoh na itanda halak na manangar. (3) Maningon boi ma ididah sidea parlajaran humbani contoh ai. Tapi anggo sunsah hita mangindahi contoh na sosok, boi do ididah hita bani Indeks Publikasi Menara Pengawal, i bagian “ilustrasi”. Contoh na igunahon hita sarupa do ai songon mik. Anggo ipakei hita ai lambin tangkas ma soranta itangar. Sonai homa anggo igunahon hita contoh sanggah mangajar, lambin tangkas ma iarusi halak pangajaran ai. Tapi ulang ma mabahattu hita manggunahon contoh. Halani boi do holi ai mambahen halak gabe bingung. Dearan ma hita manggunahon contoh sanggah patorangkon intini parlajaran atap pe na sunsah iarusi sidea. Dingat ma, tujuanta marlatih ase lambin pandei mangajar ai ma ase lambin bahat na boi iurupi hita mananda Naibata sedo ase ipuji halak hita.
19. Sonaha hita boi patuduhkon holong bani sanina botou?
19 Tongon, anggo si Jakobus dong do abangni na sempurna. Tapi hita lang. Age pe sonai, bahat tumang do sanina botounta i sab dunia on, janah songon kaluarganta do sidea. Halani ai patuduh hita ma holongta bani sidea. Ra ma homa hita marlajar humbani sidea, janah ringgas ma hita mangidangi. Anggo itiru hita si Jakobus ampa carani mangajar, parohkon hasangapon do ai bani Jahowa. Anjaha boi ma iurupi hita buei halak laho mananda Naibata ampa mangidangi-Si.
DODING 114 Sabar ma Hita
^ Marsanina do si Jakobus pakon Jesus. Halani ai, ia do na tangkasan mananda Jesus marimbangkon halak na legan. Ia do homa na mambobahon kuria bani abad na parlobei. Bani artikel on, iulas hita ma parlajaran humbani si Jakobus ampa carani mangajar.
^ Si Jakobus na iulas hita bani artikel on, ai ma anggi ni Jesus age pe Jesus ai sedo abang kandungni. Anjaha si Jakobus on do homa na manurat buku Jakobus.
^ Si Nathan H. Knorr ai ma sahalak anggota pangurus pusat. Marujung goluh do ia tahun 1977 anjaha marpangarapan hu surga do ia.
^ HATORANGAN GAMBAR: Laho manggambarhon porlu tumang do manjaga dilah, igunahon si Jakobus ma contoh apuy na etek. Janah urah do iarusi halak contoh ai.