1-2. (a) Sadihari do somalni idingat hita kenangan pasal halak na ihaholongi hita na dob marujung goluh? (b) Aha do na iparentahkon Jesus bani borngin paima hamateanni?

 LANG soal domma sadiha dokah marujung goluh halak na hinaholonganta, sai totap do idingat hita sidea. Tarlobih ma anggo jumpah tanggal parmateini ai. Gabe idingat hita ma kenangan pasal sidea.

² Tiap tahun, martumpu do hita pakon marjuta hasomanta laho mampardingati hamatean ni Jesus. (1 Ptr. 1:8) Roh hita hu acara ai halani idingat hita domma matei Jesus mangkopkop hita humbani dousa ampa hamatean. (Mat. 20:28) Janah Jesus do homa na mamarentahkon hita ase mambahen acara ai. Bani borngin paima matei ia, ibahen ia do sada acara janah iparentahkon ia do bani susianni sonon, “Bahen hanima ma sonin, gabe pardingatan bangku.”—Luk. 22:19.

3. Aha do na laho iulas hita bani artikel on?

³ Humbani ganup na roh hu acara Pardingatan, dong halak na marpangarapan hu surga na roh hu acara ai. Tapi bahatan do na roh halak na marpangarapan i tanoh on. Bani artikel on, iulas hita ma mase dua kalompok ai sihol roh hu acara Pardingatan. Anjaha aha do gunani anggo roh hita hu acara ai. Tapi parlobei iulas hita ma, mase halak na iminaki atap na marpangarapan hu surga roh hu acara Pardingatan.

4. Mase halak na iminaki mangankon ruti ampa minum anggur bani acara Pardingatan?

⁴ Tiap tahun, pitah halak na iminaki do na mangan ruti ampa minum anggur bani acara Pardingatan. Mase sonai? Pardiateihon hita use aha na ibahen Jesus bani borngin paima hamateanni. Dobkonsi salosei sidea marayahon Paskah, ibahen Jesus ma sada acara na baru. Janah acara ai itanda hita do sonari Borngin Pardingatan Hamatean ni Jesus. Bani acara ai, ibere Jesus ma ruti pakon anggur bani 11 apostelni. Isuruh ma sidea mangan ampa manginum ai. Dob ai ibahen Jesus ma dua padan pakon sidea, ai ma padan na baru pakon padan Harajaon. * (Luk. 22:19, 20, 28-30) Marhitei padan ai, gabe boi ma apostelni ai pakon halak na iminaki mamarentah gabe raja ampa malim i surga. (Pangk. 5:10; 14:1) Halani ai, pitah halak na iminaki dassa na mangankon ruti ampa minum anggur bani acara Pardingatan.

5. Sonaha do pangahap ni halak na iminaki pasal pangarapan na ibere bani sidea?

⁵ Alasan na legan mase halak na iminaki roh hu acara Pardingatan, halani ijai do sidea manrimangi pangarapan ni sidea. Ibere Jahowa do pangarapan bani 144.000 halak na iminaki laho mamarentah pakon Jesus i surga. Tongtong ma sidea manggoluh sadokah ni dokahni i surga janah boi mangidah Jahowa. (1 Kor. 15:51-53; 1 Joh. 3:2) Sada hasangapon na banggal tumang do ai bani sidea. Tapi maningon totap ma setia sidea ronsi matei ase boi mandapot pangarapan ai. (2 Tim. 4:7, 8) Sanggah irimangi sidea pangarapan ai, lambin malas ma uhur ni sidea. (Tit. 2:13) Tapi sonaha anggo ‘biribiri na legan’? (Joh. 10:16) Mase sihol roh sidea hu acara Pardingatan?

6. Mase biribiri na legan roh hu acara Pardingatan?

⁶ Biribiri na legan lang dihut mangankon ruti ampa minum anggur bani acara Pardingatan. Tapi malas do homa uhur ni sidea roh hu acara ai. Bani tahun 1938, ai ma parlobei sahali halak na marpangarapan i tanoh on iontang hu acara ai. Majallah Menara Pengawal 1 Maret 1938 mangkatahon, “Sidea na marpangarapan i tanoh on porlu do homa roh hu acara Pardingatan. . . . Janah malas do uhur ni sidea dihut bani acara ai.” Usih ma sidea songon halak na iontang hu acara perkawinan. Tontu malas do uhur ni sidea roh hu acara ai.

7. Mase sai tarpaima-ima biribiri na legan manangar ambilan na ipadas bani acara Pardingatan?

⁷ Biribiri na legan pe roh hu acara Pardingatan laho manrimangi pangarapan ni sidea. Bani acara ai, iulas do holi na laho ibahen Jesus pakon 144.000 halak bani pamarentahan ni Jesus sadokah 1.000 tahun. Jesus do holi na gabe raja janah ibahen sidea ma holi tanoh on gabe paradeiso. Iurupi sidea do homa ganup jolma ase boi sempurna. Tontu pangarapan na jenges tumang do ai. Irimangi biribiri na legan ma saud do holi na isurat bani Jesaya 35:5, 6; 65:21-23;  pakon Pangungkabon 21:3, 4. Ibayangkon sidea ma malas tumang uhur ni sidea i Paradeiso rap pakon halak na hinaholongan ni sidea. Halani irimangi sidea pangarapan ai, gabe tarojur ma sidea ase totap setia mangidangi Jahowa.—Mat. 24:13; Gal. 6:9.

8. Aha do alasan na legan mase biribiri na legan roh hu acara Pardingatan?

⁸ Alasan na legan mase biribiri na legan roh hu acara Pardingatan, ai ma halani holong janah sihol do sidea mangurupi halak na iminaki. Humbani panjahaion atap nubuat na isurat bani Bibel, ibotoh hita ma orot tumang do halak na iminaki pakon biribiri na legan. Ulas hita ma piga-piga contohni.

9. Domu bani Sakaria 8:23, sonaha ma pangahap ni biribiri na legan bani halak na iminaki?

⁹ Basa Sakaria 8:23. Humbani nubuat ai, ibotoh hita orot tumang do halak na iminaki pakon biribiri na legan. Hata “sada halak Jahudi” pakon “nasiam” maksudni halak na iminaki na manggoluh ope i tanoh on. (Rom 2:28, 29) Anjaha “sapuluh halak humbani bangsa na marbagei-bagei sahap”, on maksudni biribiri na legan. Ihatahon do homa “tangkapon” ni sidea do baju ni “sada halak Jahudi”, artini dihut do biribiri na legan rap pakon halak na iminaki manombah Jahowa. Jadi biribiri na legan roh hu acara Pardingatan halani holong janah orot sidea pakon halak na iminaki.

10. Sonaha do panjahaion na isurat bani Hesekiel 37:15-19, 24, 25 domma saud?

¹⁰ Basa Hesekiel 37:15-19, 24, 25. Bani panjahaion na isurat ijai, dong ipatugah pasal dua tungkot, ai ma tungkot ni Juda pakon tungkot ni Efraim. Tungkot ni Juda manggambarhon halak na marpangarapan hu surga. Anjaha tungkot ni Efraim manggambarhon halak na marpangarapan i tanoh on. * Ipadomu Jahowa do dua tungkot ai gabe “sada tungkot”. On artini marsada do holi halak na iminaki pakon biribiri na legan laho manombah Naibata. Anjaha sada do Raja ni sidea, ai ma Jesus Kristus. Domma saud hata ai bani panorangta sonari on. Sanggah roh sidea hu acara Pardingatan, sedo tarbagi sidea gabe dua kalompok. Tapi totap do sidea “sada hulanan” ampa “sada parmahan”.—Joh. 10:16.

11. Sonaha do “biribiri” na ipatugah bani Mateus 25:31-36, 40 mangurupi halak Kristen na iminaki?

¹¹ Basa Mateus 25:31-36, 40. “Biribiri” na ipatugah bani limbaga on manggambarhon halak na bujur na marpangarapan manggoluh i tanoh on. Sirsir do sidea mangurupi halak na iminaki laho mandalankon sada tugas na ponting, ai ma laho mambaritahon ambilan na madear i sab dunia on. Janah iurupi sidea homa na legan gabe susian ni Jesus.—Mat. 24:14; 28:19, 20.

12-13. Aha ope na ibahen biribiri na legan laho mangurupi halak na iminaki?

¹² Piga-piga minggu paima acara Pardingatan, ringgas tumang do biribiri na legan mangontang buei halak ase roh hu acara ai. Ai ma sada cara na ibahen sidea laho mangurupi halak na iminaki. (Tonggor ma kotak “ Ai Domma Sirsir Ham bani Acara Pardingatan Tahun On?) Leganni ai, age pe bahatan  kuria lang dong halak na iminaki mangankon ruti ampa manginum anggur, tapi totap do marusaha sidea mambahen acara Pardingatan i kuriani bei. Malas do uhur ni sidea mangurupi sanina ni Jesus. Ibotoh sidea do aha pe na ihorjahon sidea bani halak na iminaki, sarupa do ai songon na marhorja bani Jesus.—Mat. 25:37-40.

¹³ Lang soal huja pangarapanta, aha do alasanta roh hu acara Pardingatan?

14. Sonaha Jahowa pakon Jesus patuduhkon holongni na sibanggalan hubanta?

¹⁴ Sihol do hita patuduhkon tarima kasih halani holong na ipatuduh Jahowa pakon Jesus hubanta. Sasintongni domma buei na ibahen Jahowa laho patuduhkon holong-Ni banta. Tapi holong-Ni na sibanggalan taridah do sanggah Ia mambere Anak-Ni laho mangkopkop hita. (Joh. 3:16) Jesus pe halani holongni do ase ra ia mambere goluhni gabe tobusan. (Joh. 15:13) Tontu seng tarbalos hita aha na ibahen sidea. Tapi boi do hita patuduhkon tarima kasih bani sidea marhitei mandalankon parentah ni sidea. (Kol. 3:15) Anjaha sanggah roh hita hu acara Pardingatan, rimangi hita ma holong na ipatuduh sidea hubanta.

15. Mase harga tumang tobusan ni Jesus bani halak na iminaki pakon biribiri na legan?

¹⁵ Sihol tumang do hita patuduhkon tarima kasih halani dong tobusan. (Mat. 20:28) Halani dong tobusan, halak na iminaki gabe boi mandapot pangarapan na jenges. Boi ma sidea ihatahon pintor i lobei ni Naibata anjaha ibahen gabe anak-anak ni Naibata. (Rom 5:1; 8:15-17, 23) Sonai homa biribiri na legan. Halani porsaya sidea bani tobusan, gabe borsih ma panggora ni uhur ni sidea, boi homa sidea mangidangi Naibata, anjaha maluah “humbani hamarsikon banggal”. (Pangk. 7:13-15) Jadi, harga tumang do tobusan ai bani halak na iminaki pakon biribiri na legan. Ai ma na mangojur sidea ase roh hu acara Pardingatan.

16. Aha do alasan na legan ase roh hita hu acara Pardingatan?

¹⁶ Alasan na legan mase hita roh hu acara Pardingatan, ai ma halani sihol hita unduk bani parentah ni Jesus. Sanggah Jesus mambahen acara Pardingatan hamateanni, iparentahkon ia do sonon bani susianni, “Bahen nasiam ma sonin, gabe pardingatan bangku.” (1 Kor. 11:23, 24) Jadi lang soal huja pangarapanta, sihol do hita mandalankon parentah ni Jesus ai.

17. Mase hita boi lambin dohor bani Jahowa sanggah roh hu acara Pardingatan?

¹⁷ Lambin dohor ma hita bani Jahowa. (Jak. 4:8) Songon na dob iulas hita, sanggah roh hita hu acara Pardingatan, iulas hita do holi pasal holong ampa pangarapan na ibere Jahowa hubanta. (Jer. 29:11; 1 Joh. 4:8-10) Sanggah irimangi hita holong ni Jahowa ampa pangarapanta, gabe lambin bagas ma holongta hu Bani. Anjaha lambin orot ma parhasomananta pakon-Si.—Rom 8:38, 39.

18. Aha do gunani anggo irimangi hita sitiruon na ibahen Jesus?

¹⁸ Sihol do hita maniru Jesus. (1 Ptr.  2:21) Piga-piga minggu paima acara Pardingatan, dong jadwal pambasaan Bibel na mangulas pasal hagoluhan ni Jesus paima matei ia, ampa dobkonsi ia ipapuho. Janah bani acara Pardingatan ai, itangar hita ma ambilan na mangulas pasal holong ni Jesus. (Ep. 5:2; 1 Joh. 3:16) Anggo ibasa janah irimangi hita holong ni Jesus, lambin tarojur ma hita maniru “parlahouni”. —1 Joh. 2:6.

19. Aha do na porlu ibahen hita ase totap ibagas holong ni Naibata?

¹⁹ Sai tongtong do hita ibagas holong ni Naibata. (Jud. 20, 21) Ase boi hita totap ibagas holong ni Naibata, unduk ma hita bani parentah ni Naibata, papansingkon goran-Ni, anjaha mambahen malas uhur-Ni. (Pod. 27:11; Mat. 6:9; 1 Joh. 5:3) Janah anggo roh hita hu acara Pardingatan, lambin tarojur ma hita mangkorjahon harosuh ni Naibata. Anggo ibahen hita sonai, boi ma hita tongtong ibagas holong ni Naibata ronsi sadokah ni dokahni.

20. Aha do alasan na sipontingan ase roh hita hu acara Pardingatan?

²⁰ Age hita marpangarapan hu surga atap i tanoh on, bahat do alasanta ase roh hita hu acara Pardingatan. Sanggah ai ma idingat hita hamatean ni Jesus. Janah na sipontingan idingat hita homa holong ni Naibata na sibanggalan, na dob mambere Anak-Ni gabe tobusan laho mangkopkop hita. Acara Pardingatan bani tahun on ibahen bani ari Jumat, 15 April 2022. Tontu holong tumang do uhurta bani Jahowa pakon Jesus. Halani ai, bahen hita ma humbani tuk ni gogohta ase boi hita roh hu acara ai halani acara na ponting tumang do ai banta.