1-3. Sipata, aha do na mambahen hita tangis?

 GANUP do hita ongga tangis. Sipata halani malas ni uhurta, ra do gabe tangis hita. Tapi gatinan do hita tangis halani dong na mambahen pusok uhurta. Sonai ma pangahap ni si Lorita hun Amerika Serikat. Pusok tumang uhurni halani marujung goluh boruni. Nini do sonon, “Gati do hudingat borungku ai. Ai ma na mambahen pusok tumang uhurhu janah gabe tangis-tangis ma ahu.” *

² Sipata ra do hita tangis halani alasan na legan. Songon na ihatahon si Hiromi, sahalak perintis hun Jepang, “Pusok tumang uhurhu halani bahat tumang halak ijon lang ra manangihon baritanta. Sipata tangis do ahu mangindo bani Jahowa ase boi ahu pajumpah pakon halak na ra marlajar Bibel.”

³ Ai ongga do sonai homa pangahap ni nasiam? Pasti ongga do. (1 Ptr. 5:9) Ganup do hita sihol mangidangi Naibata “ibagas malas ni uhur”. Tapi sai dong do na mambahen hita tangis. Umpamani, dong halak na ihaholongi hita na marujung goluh, dong na mambahen hita maretek ni uhur, janah dong tantangan na mambahen hita gabe susah laho mangidangi Naibata. (Ps. 6:7; 100:2) Aha ma na boi ibahen hita anggo sonai situasinta?

4. Aha do na laho iulas hita bani artikel on?

⁴ Sonari marlajar ma hita humbani Jesus halani ongga do homa ‘Jesus tangis’. (Joh. 11:35; Luk. 19:41; 22:44; Heb. 5:7) Bani artikel on, iulas hita ma sanggah nattigan do Jesus tangis. Anjaha aha do na boi iparlajari hita pasal  Jahowa pakon Jesus humbani sarita ai. Iulas hita homa aha do na boi ibahen hita anggo dong na mambahen hita tangis.

5. Humbani Johannes 11:32-36, aha do na boi iparlajari hita pasal Jesus?

⁵ Bani tahun 32 M, marujung goluh ma si Lasarus, ai ma hasoman ni Jesus. (Joh. 11:3, 14) Dong dua botou ni si Lasarus, ai ma si Marta pakon si Maria. Anjaha dohor do Jesus pakon sidea. Tapi dobkonsi matei si Lasarus, baru ma roh Jesus hu Betania, huta ni si Marta pakon si Maria. Sanggah ibotoh si Marta domma roh Jesus, laho ma ia mangalo-alo Jesus janah tangis-tangis. Nini ma sonon, “Ambit ijon ham tuhan, seng matei botouhin!” (Joh. 11:21) Halani itonggor Jesus tangis si Maria, si Marta pakon na legan, ‘tangis ma homa ia’.—Basa Johannes 11:32-36.

6. Sanggah matei si Lasarus, mase tangis Jesus?

⁶ Mase ma tangis Jesus sanggah ai? Buku Pemahaman Alkitab patugahkon, “Halani marujung goluh si Lasarus hasomanni ai, janah ididah ia tangis si Marta pakon si Maria, gabe ‘tangis ma homa’ ia”. * Ra do ipingkiri Jesus pasti borit tumang ma iahap si Lasarus ronsi matei halani panahitni ai. Anjaha sanggah ididah ia pusok tumang uhur ni si Marta pakon si Maria, gabe tangis ma homa Jesus. Tontu sonai do homa pangahapmu anggo dong halak na hinaholonganmu marujung goluh. Sonari ulas hita ma tolu parlajaran humbani sarita ai.

7. Sanggah tangis Jesus halani marujung goluh hasomanni, aha ma na boi iparlajari hita pasal Jahowa?

⁷ Iarusi Jahowa do pangahapmu. “Usihan ni” Naibata do Jesus ai. (Heb. 1:3) Jadi, anggo pusok uhur ni Jesus mangidah ham marpusok ni uhur, sonai  do homa pangahap ni Jahowa mangidah ham. (Joh. 14:9) Janah sihol tumang Ia mangapoh ham.—Ps. 34:19; 147:3.

8. Mase boi hita porsaya ipapuho Jesus do holi halak na hinaholonganta na dob marujung goluh?

⁸ Sihol do Jesus papuhohon halak na hinaholonganmu na dob marujung goluh. Paima ipapuho Jesus si Lasarus, nini ma bani si Marta, “Na laho puho do botoumai.” Porsaya do si Marta pasal ai. (Joh. 11:23-27) Mase? Halani si Elias pakon si Elisa ongga do papuhohon na matei. (1 Raj. 17:17-24; 2 Raj. 4:32-37) Anjaha ra do homa domma itangar si Marta, Jesus pe domma ongga papuhohon na matei. (Luk. 7:11-15; 8:41, 42, 49-56) Jadi sanggah tangis Jesus, on patuduhkon tongon-tongon do ia sihol papuhohon halak na matei. Halani ai pos ma uhurmu ipapuho do holi kaluarga atap hasomanmu na dob marujung goluh.

9. Sonaha hita boi maniru Jesus sanggah mangurupi halak na marpusok ni uhur? Bere ma contohni.

⁹ Apoh hita ma sidea na marpusok ni uhur. Lang pitah tangis Jesus tapi itangihon ia do homa si Maria pakon si Marta. Janah iapoh do homa sidea. Maningon sonai ma homa ibahen hita bani halak na marpusok ni uhur. Songon pangalaman ni si Daniel, sahalak sintua i Australia. Nini do, “Sanggah marujung goluh istringku, bahat tumang sanina botou na mangapoh ahu. Dear do itangihon sidea saritangku. Lang maila ahu tangis i lobei ni sidea. Iurupi sidea do homa ahu. Icuci sidea do mobilku, iurupi ahu marbalanja, ampa itaruhkon sidea sipanganonku. Anjaha gati do sidea rap martonggo pakon ahu. Tongon-tongon do sidea ai hasoman na bujur ‘ibagas hasosakan’”.—Pod. 17:17.

10. Domu bani Lukas 19:36-40, aha do na masa sanggah ai?

¹⁰ Bani tanggal 9 Nisan tahun 33 M, laho ma Jesus hu kota Jerusalem. Sanggah dohor ia hu kota ai, iamparhon buei halak ma baju ni sidea i dalan laho mangalo-alo Jesus. Janah ihatahon sidea do Jesus ai raja ni sidea. Tontu malas tumang ma uhur ni halak na mangidah ai. (Basa Lukas 19:36-40.) Tapi lang isangka susianni na masa dobkonsi ai. “Sanggah na lambin dohor [Jesus], anjaha taridah ma huta ai, gabe itangisi ma ai.” Ihatahon Jesus ma laho iripaskon mando Jerusalem pakon pendudukni.—Luk. 19:41-44.

11. Mase itangisi Jesus penduduk ni Jerusalem?

¹¹ Tangis do Jesus halani ibotoh ia bahat do holi halak Jahudi na lang ra manjalo ia gabe Mesias. Halani ai ma kota Jerusalem iripaskon. Anjaha itawan do holi pendudukni. (Luk. 21:20-24) Janah saud do hata ni Jesus ai. Tongon, sonari on pe, otik dassa na ra manangihon baritanta. Tapi ulas hita ma tolu parlajaran na boi idapot hita hunjai.

12. Sanggah itangisi Jesus penduduk ni Jerusalem, aha do na iparlajari hita pasal Jahowa?

¹² Holong do uhur ni Jahowa bani ganup jolma. Sanggah tangis Jesus, ibotoh hita ma holong tumang do uhur ni Jahowa bani ganup jolma. “Ipangindo uhur-Ni ulang ma magou namin atap ise pe, tapi das ma haganup tene hu hamubahon ni uhur.” (2 Ptr. 3:9) Maningon holong do homa uhurta bani hasoman. Halani  ai, ringgas ma hita mambaritahon barita na madear.—Mat. 22:39. *

13-14. Sonaha Jesus patuduhkon na holong do uhurni bani na legan, anjaha sonaha hita boi maniru ia?

¹³ Ringgas tumang do Jesus mangidangi. Halani holong ni uhurni, ibaritahon ia do ambilan na madear hubani ganup na ijumpahi ia. (Luk. 19:47, 48) Maidop do homa uhurni mangidah sidea. Sipata, halani bahatni halak na ra manangihon, ‘seng sompat mangan’ Jesus pakon susianni. (Mrk. 3:20) Age pe borngin-borngin, ra do Jesus mangajari sada halak na ra manjalo baritani. (Joh. 3:1, 2) Halani ai, gabe buei tumang ma halak na domma manangihon barita ni Jesus age pe pitah otik dassa na ra gabe susianni. Sonai ma homa hita sonari. Ringgas ma hita mambaritahon ambilan na madear bani buei halak. (Lah. 10:42) Gunahon hita ma marmasam cara laho marbarita.

¹⁴ Ra ma hita mambahen penyesuaian. Sanggah hita marbarita, porlu do hita mambahen penyesuaian ase boi manjumpahi buei halak. Songon pangalaman ni sahalak perintis na margoran si Matilda. Ia mangkatahon, “Sanggah ahu pakon suamingku marbarita marhitei talepon, isesuaihon hanami do panorangni. Anggo sihol hanami mangkorjahon daerah bisnis, pagi-pagi ma hanami marbarita. Siangni, manjaga gerai ma hanami. Dobkonsi ai, marbarita ma hanami hun rumah hu rumah.” Jadi dearan do hita na menyesuaihon panorangta ase boi manjumpahi buei halak. Anggo ibahen hita sonai, gabe malas ma uhur ni Jahowa.

15. Domu bani Lukas 22:39-44, aha do na ipangindo Jesus bani Jahowa?

¹⁵ Bani borngin tanggal 14 Nisan 33 M, laho ma Jesus hu taman Getsemane. Ijai ipatugah ia ma bani Jahowa ganup na  ibagas uhurni. (Basa Lukas 22:39-44.) Anjaha ‘igalangkon ia do pangindoanni marhasoman doruh banggal ampa iluh’. (Heb. 5:7) Aha do na itonggohon Jesus bani borngin ai? Martonggo do ia mangindo pangurupion bani Jahowa, ase boi ia totap setia ronsi matei anjaha mangkorjahon harosuh-Ni. Itangihon Jahowa do tonggoni ai anjaha isuruh Ia do sada malekat laho patoguhkon Anak-Ni ai.

16. Sanggah martonggo Jesus i taman Getsemane, mase ronsi tangis ia?

¹⁶ Mase ma ronsi tangis Jesus sanggah martonggo i taman Getsemane ai? Halani ibotoh Jesus ituduh halak do holi ia songon penjahat na menghina goran ni Naibata. Ai ma na mambahen haru uhurni. Leganni ai, maningon totap do ia setia bani Naibata ase ipapansing goran ni Jahowa. Sonari on, ra do halani bahatni sitarononta, gabe susah hita totap setia bani Naibata. Sonaha contoh ni Jesus boi mangurupi hita? Ulas hita ma tolu parlajaranni.

17. Humbani tonggo ni Jesus, aha do na iparlajari hita pasal Jahowa?

¹⁷ Ra do Jahowa manangihon tonggonta. Martonggo do Jesus ase boi ia setia bani Naibata janah papansingkon goran-Ni. Halani ai, itangihon Jahowa do tonggoni ai. Hita pe anggo martonggo hita ase boi setia bani Naibata anjaha boi papansingkon goran-Ni, ibalosi Ia do homa tonggonta ai.—Ps. 145:18, 19.

18. Sonaha Jesus patuduhkon iarusi ia do pangahapta?

¹⁸ Iarusi Jesus do pangahapta. Sanggah susah hita, tontu malas do uhurta anggo dong hasoman na mangarusi pangahap ampa situasinta. Sonai ma Jesus, iarusi ia do dong hahuranganta janah sirsir do ia mangurupi hita domu bani “panorang haporluanni”. (Heb. 4:15, 16) Sanggah Jesus i taman Getsemane, ra do ia manjalo pangurupion humbani sada malekat. Sonai ma homa hita porlu do hita manjalo pangurupion humbani Jahowa. Pangurupion sisonai boi dapot hita humbani publikasi, video,  ambilan, ampa sanggah dong hasoman atap sintua na patoguhkon hita.

19. Sanggah adong sitaronon, sonaha hita boi totap margogoh? Bere ma contoh.

¹⁹ Ibere Jahowa do bamu ‘damei-Ni’. Sonaha Jahowa patoguhkon uhurta? Sanggah hita martonggo, ibere Ia do damei-Ni “na mangatasi haganup paruhuron”. (Pil. 4:6, 7) Ai ma na mangurupi hita totap tenang janah lang podas-podas mambahen haputusan. Ai do homa na iahapkon sada botou na margoran si Lusi. Ia mangkatahon, “Gati tumang ahu lungunan. Sipata huahap do lang holong uhur ni Jahowa hubangku. Tapi anggo domma sonai pangahapku, mintor martonggo do ahu bani Jahowa. Dobkonsi ai, gabe damei ma huahap.” Jadi anggo martonggo hita, gabe damei ma uhurta.

20. Parlajaran aha do na idapot hita humbani sarita ni Bibel sanggah Jesus tangis?

²⁰ Buei do parlajaran na idapot hita humbani sarita sanggah Jesus tangis. Porlu do iapoh hita hasoman na marpusok ni uhur. Anjaha, pos ma uhurta iurupi Jahowa pakon Jesus do hita sanggah dong na hinaholonganta na marujung goluh. Ringgas ma hita mambaritahon ambilan na madear halani sihol hita maniru idop ni uhur ni Jahowa pakon Jesus. Iarusi Jahowa pakon Jesus do homa hahuranganta. Anjaha tongtong do iurupi sidea hita ase totap setia ibagas sitaronon. Halani ai, dalankon hita ma ganup na iparlajari hita. Sai tongtong ma hita paimahon ‘apusan ni Naibata do sagala iluh humbani matanta’.—Pangk. 21:4.