ARTIKEL PARLAJARAN 1
“Seng Anjai Hurangan bani Sagala na Madear Halak na Mangindahi Jahowa”
AYAT TAHUNAN 2022: “Seng anjai hurangan bani sagala na madear halak na mangindahi Jahowa.”—PS. 34:11.
DODING 4 “Jahowa do Siparmahan Ahu”
NA LAHO IULAS *
Age pe bahat sitaronon ni si Daud, tapi ihatahon ia do ‘seng hurangan ia bani na madear’ (Tonggor ma paragrap 1-3) *
1. Hasunsahan aha do na iahapkon si Daud?
MELARIKAN diri do si Daud humbani si Saul na sihol mamunuhsi. Dob das ia i kota Nob, ipangindo ia ma lima ruti. (1 Sam. 21:1, 3) Dobkonsi ai, laho ma ia pakon hasomanni marponop i sada gua. (1 Sam. 22:1) Mase ma sonai na masa?
2. Hajahaton aha do na ibahen si Saul? (1 Samuel 23:16, 17)
2 Sogam tumang do si Saul bani si Daud halani bahat na marosuh mangidahsi janah gati homa ia monang sanggah marporang. Sobali ai, halani lang unduk si Saul bani Jahowa, ipilih Jahowa ma si Daud gabe raja manggantihkonsi. (Basa 1 Samuel 23:16, 17.) Tapi halani raja ope si Saul, bahat do tentarani ampa halak na mangihutkonsi. Halani ai ma gabe melarikan diri si Daud. Sasintongni, na ibahen si Saul ai, laho manlanglangi harosuh ni Naibata mambahen si Daud gabe raja. (Jes. 55:11) Tapi pambahenan ni si Saul ai mambahayahon dirini sandiri do ai halani lang dong halak na marhasil manlanglangi harosuh ni Naibata.
3. Sonaha do pangahap ni si Daud hassi pe susah ia?
3 Halak na martoruh ni uhur do si Daud. Halani ai ma ase ipilih Jahowa ia gabe raja ni halak Israel. (1 Sam. 16:1, 12, 13) Halani sogam uhur ni si Saul bani si Daud, gabe susah ma ia. Ongga do ia hahurangan sipanganon, janah maningon marponop do ia i gua. Tapi, lang ongga isalahkon ia Jahowa halani hasunsahanni ai. Bani panorang ai ma ibahen ia sada doding pujian. Anjaha humbani doding ai ma ibuat ayat tema ni artikel on. Ihatahon, “Seng anjai hurangan bani sagala na madear halak na mangindahi Jahowa.”—Ps. 34:11.
4. Sungkun-sungkun aha do na laho iulas hita, janah mase porlu irimangi hita ai?
4 Sonari on bahat do hita susah halani hahurangan sipanganon atap susah manggoki haporluan siganup ari. * Tarlobih ma sadokah pandemi. Tapi, lambin susah do goluhta halani domma lambin dohor “hamarsikon na banggal”. (Mat. 24:21) Halani ai, porlu ma irimangi hita ompat sungkun-sungkun on: Mase ihatahon si Daud “seng anjai hurangan bani sagala na madear”? Mase maningon ihamalaskon hita aha na dong banta? Sonaha hita boi totap porsaya anggo Jahowa boi manggoki ganup haporluanta? Janah sonaha hita boi totap toguh sanggah dong hasunsahan bani ari na laho roh?
“SENG ANJAI HURANGAN AHU”
5-6. Sonaha Psalmen 23:1-6 boi mangurupi hita mangarusi artini anggo juakjuak ni Naibata “seng anjai hurangan bani sagala na madear”?
5 Mase ihatahon si Daud anggo sisombah Jahowa “seng anjai hurangan bani sagala na madear”? On boi iarusi hita humbani Psalmen 23. (Basa Psalmen 23:1-6.) Bani hata pamungkah bani ayat ai ihatahon si Daud do, “Jahowa do siparmahan ahu, seng anjai hurangan ahu.” Bani psalmen ai, ipatugah si Daud do pasu-pasu na iahapkon ia halani mambahen Jahowa gabe Parmahanni. Itogu-togu Jahowa do ia “bani dalan hapintoron”, janah totap do ihasomani Jahowa ia lang soal aha pe na masa. Ibotoh si Daud do homa age pe ia i “sampalan na mombur”, tapi totap do dong sitaronon ibagas goluhni. Ibotoh ia do homa boi do ia mabiar halani mardalan “bani lombang bagas ni hagolapan” janah dong do holi munsuhni. Tapi halani Jahowa Siparmahanni, ‘seng anjai mabiar’ ia.
6 Jadi domma iarusi hita mase ihatahon si Daud ‘seng anjai hurangan ia bani sagala na madear’. Halani lang soal sonaha pe situasini, boi do ia totap orot pakon Jahowa. Janah malas ni uhurni ai sedo halani arta. Tapi totap do ia martarima kasih bani Jahowa halani tongtong do ia ilinggomi ampa ipasu-pasu Jahowa.
7. Domu bani Lukas 21:20-24, tantangan aha do na iahapkon halak Kristen i Judea?
7 Humbani hata ni si Daud ai, gabe boi ma iarusi hita sedo arta na mambahen hita marmalas ni uhur. Boi do homa ai itonggor hita humbani pengalaman ni halak Kristen i Judea bani abad na parlobei. (Basa Lukas 21:20-24.) Ihatahon Jesus do anggo domma Jerusalem “iinggoti tentara”, maningon lari ma sidea hu dolog. Anggo kaluar sidea hun Jerusalem, boi ma sidea selamat. Tapi maningon itadingkon sidea do artani. Piga-piga tahun na salpu Menara Pengawal mangkatahon, “Itadingkon sidea do rumah, juma, ampa arta ni sidea. Janah porsaya do sidea sai bereon ni Jahowa do ganup haporluan ni sidea janah totap do ilinggomi Jahowa sidea halani unduk sidea bani parentah-Ni.”
8. Parlajaran aha do na boi dapot hita humbani halak Kristen i Judea bani abad na parlobei?
8 Parlajaran aha ma na boi idapot hita humbani halak Kristen i Judea bani abad na parlobei? Bani Menara Pengawal ai ihatahon use, “Ra do adong situasi na manguji hita sonaha pangahapta pasal arta. Ase boi hita selamat, aha do sipontingan banta, arta do atap totap setia bani Naibata? Tongon anggo domma roh hamarsikon banggal, bahat do hasunsahan na roh hubanta. Tapi tongtong ma tiru hita halak Kristen i Judea na totap unduk bani Jahowa.” *
9. Sonaha hata ni si Paulus bani halak Heber boi patoguhkon hita?
9 Ai boi do ibayangkon ham sonaha ma goluh ni halak Kristen ai dobkonsi kaluar sidea hun Jerusalem? Tontu maningon porsaya do sidea sai bereon ni Jahowa do ganup haporluan ni sidea. Tapi sedo pitah ai na mangurupi sidea. Lima tahun paima roh tentara Rom mengepung Jerusalem, domma ihatahon si Paulus hubani halak Heber sonon, “Ulang ma mata duiton parlahou nasiam, hasonangkon nasiam ma na adong, ai Ia sandiri do mangkatahon, ‘Sabonar na so tadingkonon-Ku do ho, sabonar na so paturuton-Ku do ho!’ Halani ai, tenger do uhurta mangkatahon, ‘Tuhan in do pangurupi bangku, seng mabiar ahu, aha ma boi bahenon ni jolma bangku?’” (Heb. 13:5, 6) Tontu lambin urah ma sidea mambahen penyesuaian i ianan na baru anggo iihutkon sidea podah ni si Paulus ai. Hita pe boi do homa porsaya sai ibere Jahowa do ganup haporluanta.
“HASONANGKON HITA MA IN”
10. Cara aha do na ipatugah si Paulus banta ase boi hita totap marmalas ni uhur?
10 Ibere si Paulus do podah bani si Timoteus janah marguna do homa podah ai banta sonari on. Nini do, “Halani ai, anggo adong banta sipanganon ampa parhiouon, hasonangkon hita ma in.” (1 Tim. 6:8) Sedo artini lang boi hita mangankon sipanganon na sodap, jenges rumahta, atap mamboli baju. Tapi na ihatahon si Paulus, ai ma ase ihamalaskon hita aha na dong banta. (Pil. 4:12) Ai ma carani ase boi totap malas uhur ni si Paulus. Sonai ma homa hita, na siharganan banta, ai ma parhasomananta pakon Naibata sedo arta.—Hab. 3:17, 18.
‘Seng ongga hurangan’ halak Israel sadokah 40 tahun i padang belantara. Ai boi do ihamalaskon hita aha na dong banta sonari on? (Tonggor ma paragrap 11) *
11. Parlajaran aha do na dapot hita humbani hata ni si Musa bani halak Israel?
11 Jahowa do na tangkas mambotoh aha na porlu banta, age pe na ibere Ia holi legan pakon harosuhta. Pardiateihon ma na ihatahon si Musa bani halak Israel dobkonsi sidea 40 tahun i padang belantara. Nini ma, “Ai domma ipasu-pasu Jahowa Naibatamu ham bani haganup horja ni tanganmu. Ia do manarihon ham sadokah mardalan i halimisan na bolag on, domma pala ompat puluh tahun dokahni, sai ihasomani Jahowa Naibatamu do ham, seng hurangan ham age bani aha.” (5 Mus. 2:7) Sadokah 40 tahun, ibere Jahowa do manna gabe sipanganon bani halak Israel. Baju na ipakei sidea sanggah kaluar hun Masir pe lang maseda. (5 Mus. 8:3, 4) Tapi ra do adong sidea na marpangahap otik tumang do sibere-bere ni Jahowa ai. Halani ai ma ase ipasingat si Musa halak Israel domma ibere Jahowa ganup haporluan ni sidea. Hita pe maningon martarima kasih ma bani ganup pasu-pasu na ibere Jahowa age pe pangahapta songon na otik do ai. Porsaya ma sai ilinggomi Jahowa do hita.
PORSAYA MA SAI ISARIHON JAHOWA DO NASIAM
12. Aha do buktini anggo si Daud porsaya bani Jahowa?
12 Ibotoh si Daud setia do Jahowa bani halak na mangkaholongi-Si. Sanggah ia manurat Psalmen 34, bahat do munsuh na sihol mamunuhsi. Tapi, porsaya do si Daud “marjaga do malekat ni Jahowa” laho manlinggomisi. (Ps. 34:8) Isarupahon si Daud do malekat ai songon prajurit na manlinggomi sada kota. Hassi pe si Daud ai sahalak tentara na barani janah domma ipilih Jahowa ia gabe raja, tapi lang marpangunsandeian bani dirini sandiri ia. Age pe pandei ia marumbalang ampa mamakei podang, tapi porsaya do ia “marjaga do malekat ni Jahowa” laho manlinggomisi. (1 Sam. 16:13; 24:13) Tontu sonari on lang ibahen Jahowa mukjizat laho manlinggomi hita. Tapi anggo totap hita porsaya janah setia bani Jahowa, dapot hita ma hagoluhan sadokah ni dokahni.
Sadokah hamarsikon banggal, Gog hun Magog ra do roh hu rumahta laho manangkap hita. Tapi ulang ma hita mabiar halani ibotoh Jesus ampa malekat-malekat do ai, janah sirsir do sidea mangurupi hita. (Tonggor ma paragrap 13)
13. Mase pangahap ni Gog hun tanoh Magog urah do hita iserang, tapi mase ulang pala mabiar hita? (Tonggor ma gambar sampul.)
13 Bani ari na laho roh dong situasi na manguji haporsayaonta. Roh ma Gog hun tanoh Magog, ai ma humpulan ni bangsa-bangsa laho menyerang hita. Songon biribiri na so dong penjagani do pangahap ni sidea hita. (Hes. 38:10-12) Halani lang dong hita na marsinjata janah lang homa marlajar porang. Tapi, porsaya ma hita ilinggomi Jahowa do hita marhitei malekat-Ni. Janah lang ibotoh bangsa-bangsa ai pasal ai. Tontu tarsonggot ma sidea sanggah roh malekat manripaskon sidea.—Pangk. 19:11, 14, 15.
CARANI ASE TOTAP TOGUH BANI ARI NA LAHO ROH
14. Aha do na maningon ibahen hita ase boi totap toguh bani ari na laho roh?
14 Aha ma na laho bahenonta ase boi hita toguh bani ari na laho roh? Ulang ma ianggap hita arta do na sipontingan halani bani sada panorang maningon itadingkon hita do ai. Hamalaskon hita ma aha na dong banta. Janah malas ma uhurta halani boi hita marhasoman pakon Jahowa. Anggo lambin itanda hita Jahowa, lambin porsaya ma hita sai ilinggomi Ia do hita sanggah roh Gog hun tanoh Magog.
15. Sanggah poso ope si Daud, aha do buktini anggo Jahowa tongtong manlinggomi ia?
15 Dong ope na boi mangurupi si Daud. Ia mangkatahon, “Dai anjaha tonggor nasiam ma dear ni layak ni Jahowa, martuah ma halak na martenger ni uhur Bani.” (Ps. 34:9) Humbani hata ni si Daud ai, gabe taridah ma aha do alasanni porsaya bani Jahowa. Iahapkon ia do tongtong do ia ilinggomi janah lang ongga itadingkon Jahowa. Umpamani, sanggah poso si Daud, marporang do ia manlawan Si Goliat, tentara ni halak Palistim na gogoh. Nini ma, “Ondoskonon ni Jahowa ma ho sadari on hubagas tanganku.” (1 Sam. 17:46) Leganni ai, sanggah ia mangidangi Raja Saul, dong do piga-piga hali si Saul sihol mamunuhsi. Tapi sai “ihasomani Jahowa” do si Daud. (1 Sam. 18:12) Humbani ganup pangalamanni ai, gabe ibotoh si Daud ma lang ongga itadingkon Jahowa ia sonaha pe situasini.
16. Sonaha hita boi ‘mandai’ dear layak ni Jahowa?
16 Anggo humbani sonari hita totap marpangunsandeian bani Jahowa, lambin porsaya ma hita sai tongtong do ilinggomi ia hita bani ari na laho roh. Haporsayaon sisonai porlu do sanggah hita mangindo cuti ase boi roh hu kebaktian, atap pe mangatur jadwal horjanta ase boi martumpu ampa marbarita. Tapi ra do halani ai gabe ipecat hita hun parhorjaan. Anggo sonai na masa, ai porsaya do ham lang itadingkon Jahowa ham janah tongtong do ibere Ia haporluanmu? (Heb. 13:5) Bahat do sanina botou na mangidangi ibagas dinas sepenuh waktu na mangahapkon anggo Jahowa tongtong do mambere haporluan ni sidea.
17. Aha do ayat tahunanta bani tahun 2022, janah mase ayat ai na ipilih?
17 Anggo porsaya hita tongtong do Jahowa dohor hubanta, lang dong na mambahen hita mabiar. Anjaha anggo totap ihorjahon hita harosuh ni Naibata, porsaya ma hita lang itadingkon Jahowa hita. Jadi, ase boi hita totap toguh sonari pakon bani ari na laho roh, ipilih Pangurus Pusat ma Psalmen 34:11 gabe ayat tahunan bani tahun 2022. Ihatahon, “Seng anjai hurangan bani sagala na madear halak na mangindahi Jahowa.”
DODING 38 Ipargogohi Naibata do Ham
^ Ayat tahunan 2022 ibuat humbani Psalmen 34:11: “Seng anjai hurangan bani sagala na madear halak na mangindahi Jahowa.” Hassi pe sonai, bahat do halak na mangidangi Jahowa na marhahurangan. Tapi mase ihatahon anggo sidea ai “seng anjai hurangan bani sagala na madear”? Anjaha mase ayat ai boi mangurupi hita sanggah dong hasusahan bani ari na laho roh?
^ Tonggor ma “Pertanyaan Pembaca” bani majallah Menara Pengawal 15 September 2014.
^ Tonggor ma Menara Pengawal 1 Mei 1999 alaman 19.