1-2. Sonaha sintua boi maniru Apostel Paulus?

 HOLONG tumang do Apostel Paulus bani hasomanni sahaporsayaon. Marusaha do ia laho mangurupi sidea. (Lah. 20:31) Halani ai, holong ma uhur ni sidea bani. Contohni, sanggah ibotoh sintua na i Epesus lang boi be sidea pajumpah pakon si Paulus, tangis ma sidea. (Lah. 20:37) Sonai ma homa holong ni uhur ni sintua bani kuria janah marusaha do sintua mangurupi sidea. (Pil. 2:16, 17) Tapi sipata adong do tantanganni bani sintua. Sonaha sidea boi mangatasi ai?

² Itiru sidea do si Paulus jolma na lang sempurna. (1 Kor. 11:1) Sipata maningon marusaha do ia laho mangkorjahon na madear. (Rom 7:18-20) Marmasam do homa hasunsahan na ihadapi si Paulus. Age pe sonai, lang soh si Paulus mangidangi sanina botou, atap lang marmalas ni uhur mangkorjahon ai. Anggo itiru sintua si Paulus gabe boi ma sidea marmalas ni uhur mandalankon tugasni age pe adong parsoalan. Sonari ulas hita ma sonaha carani.

3. Aha do na laho iulas hita bani artikel on, anjaha aha do na boi iparlajari hita?

³ Bani artikel on iulas hita ma ompat tantangan bani sintua: (1) mambere panorang laho marbarita ampa mangkorjahon tanggung jawab na legan, (2) mambere panorang laho patoguhkon sanina botou, (3) lang maretek ni uhur halani hagalekonni, ampa (4) rap marhorja pakon halak na legan age pe adong kelemahanni. Iulas hita ma homa sonaha si Paulus mangatasi tantangan ai anjaha sonaha sintua boi manirusi.

4. Mase sipata gabe tantangan na marbarita ai bani sintua?

⁴ Mase mangkorjahon ai boi gabe tantangan. Sobali marbarita, buei do tanggung jawab ni sintua. Umpamani, gabe ketua i partumpuan tengah pekan ampa mambobahon Parlajaran Bibel Kuria. Sipata dapot tugas do homa sidea laho marambilan i kuria na legan. Leganni ai, ibere sidea do panorangni laho manlatih siparugas. Marosuh do homa sidea laho patoguhkon sanina botou. (1 Ptr. 5:2) Adong do homa sintua na dihut bani horja pemeliharaan Balei Harajaon ampa bangunan-bangunan na igunahon organisasi. Hassi pe sibuk sidea, tapi mambaritahon ambilan na madear do na sipontingan bani sidea, songon na ibahen sanina botou i kuria.​—Mat. 28:19, 20.

5. Sanggah marbarita, sitiruan aha do na ibahen si Paulus?

⁵ Na boi itiru sintua humbani si Paulus. Mase si Paulus marhasil marbarita? Bani Pilippi 1:10, ipatugah si Paulus halani ia “mananda na ija siporlunan”. Idihutkon ia do podahni ai. Marpuluh tahun do ia mangidangi, janah ibahen ia do ai na sipontingan bani goluhni. Marbarita do ia ‘i lobei ni halak na mabuei atap hun rumah hu rumah’. (Lah. 20:20) Lang pitah bani sada ari ia marbarita ibagas na saminggu. Tapi marbarita do ia bani ganup panorang. Umpamani, sanggah paimahon hasoman-hasomanni i Aten, marbarita do ia bani na sangap-sangap ijai, anjaha adong do na manjalo. (Lah. 17:16, 17, 34) Hassi pe ia i penjara, marbarita do ia hubani ganup halak na ijai.​—Pil. 1:13, 14; Lah. 28:16-24.

6. Aha do na iajarhon si Paulus bani na legan?

⁶ Si Paulus ma sitiruan na dear pasal mamakei panorang. Gati do ia mangontang hasoman na legan ase rap mangidangi pakonsi. Umpamani, sanggah pardalanan utusan injilni na parlobei, iarahkon ia do si Johannes Markus. Anjaha bani pardalanan utusan injilni na paduahon, iarahkon ia do homa si Timoteus. (Lah. 12:25; 16:1-4) Pasti marusaha do ia mangajari hasomanni ai ase dear mambobahon i kuria, sonaha mambahen kunjungan penggembalaan, anjaha sonaha carani ase dear mangajari.​—1 Kor. 4:17.

7. Sonaha sintua mandalankon podah na isurat si Paulus i Epesus 6:14, 15?

⁷ Parlajaranni. Sintua pe boi do maniru si Paulus ase sirsir marbarita bani ganup panorang, lang pitah sanggah marbarita hun rumah hu rumah. (Basa Epesus 6:14, 15.) Umpamani, boi do sidea marbarita sanggah marbalanja atap i ianan  parhorjaan. Boi do homa sidea marbarita sanggah mangurupi i proyek pembangunan organisasi, atap marbarita hubani na manjual bahan-bahan bangunan. Songon si Paulus, sintua pe boi do mambere panorang laho manlatih na legan sanggah marbarita, tarmasuk ma siparugas.

8. Sipata, aha do ra na porlu ibahen sintua?

⁸ Ulang ma namin halani masibuktu sintua mangkorjahon tugas i kuria atap tugas na ibere organisasi, jadi lang adong be panorang laho marbarita. Ase boi sidea mangkorjahon ganup tugas na sipontingan, sipata porlu do sidea manulak piga-piga tugas na ibere. Dobkonsi martonggo, gabe ibotoh sidea ma, ra anggo ijalo sidea tugas-tugas ai, gabe lang boi be ihorjahon sidea tugas na sipontingan. Misalni mambahen parlajaran Bibel kaluarga, marbarita, ampa manlatih niombahni laho marbarita. Adong do sintua na lang urah laho manulak piga-piga tugas. Tapi pos ma uhurmu iarusi Jahowa do pangahapmu, anggo ham sihol mambahen na sidearan laho mangkorjahon ganup tugasmu.

9. Tantangan aha do na roh bani sintua?

⁹ Mase mangkorjahon ai boi gabe tantangan. Sadokah panorang parpudi, buei do tantangan na roh hubani juakjuak ni Naibata. Halani ai, porlu do hita ganup ipatoguh, iurupi, anjaha iapoh. Adong do homa na porlu iurupi laho padaohkon diri humbani parlahou na lepak. (1 Tes. 5:14) Tontu, lang boi sintua padaohkon ganup tantangan ai humbani juakjuak ni Naibata. Age pe sonai, mangarap do Jahowa ase sintua boi patoguhkon ampa manlinggomi biri-biri-Ni. Sonaha ase sintua boi mangurupi sanina botou hassi pe bahat tanggung jawab ni sidea?

10. Domu bani 1 Tessalonika 2:7, sonaha si Paulus mangurupi hasoman sahaporsayaonni?

¹⁰ Na boi itiru sintua humbani si Paulus. Sai sirsir do si Paulus laho mamuji sanina botou janah patoguhkon sidea. Sonai homa do sintua porlu do sidea patuduhkon holong ni uhurni anjaha basar hubani sanina botou. (Basa 1 Tessalonika 2:7.) Ipapos si Paulus do hasoman sahaporsayaonni na holong do uhurni bani sidea, sonai homa Jahowa. (2 Kor. 2:4; Ep. 2:4, 5) Ibahen si Paulus do sanina botou i kuria songon hasomanni. Anjaha ibere ia do panorang bani sidea. Ipatuduh ia do na pos uhurni bani sidea marhitei torang-torang ipatuduh si Paulus pusok ni uhurni ampa hahuranganni. (2 Kor. 7:5; 1 Tim. 1:15) Hassi pe sonai, lang pitah masalahni ai na ipingkiri ia, tapi marosuh do ia laho mangurupi sanina botouni.

11. Mase si Paulus mamodahi sanina botouni?

¹¹ Sipata, ipodahi si Paulus do sanina  botouni. Sedo halani borit uhurni ase ibahen sonai, tapi halani holong ni uhurni do. Janah sihol do ia manjaga sidea humbani marmasam bahaya. Marusaha do si Paulus ase urah iarusi sidea podahni ai anjaha parduli do ia hubani sidea. Umpamani, ibagas suratni hubani halak Korint, ibere ia do sipasingat na karas. Dob ikirim suratni ai, isuruh ia ma si Titus hujai. Haru do uhurni lang ijalo sidea podahni ai. Hape ijalo anjaha idalankon sidea do podahni ai. Halani ai malas tumang ma uhurni manangar ai!​—2 Kor. 7:6, 7.

12. Sonaha ganup sintua boi patoguhkon hasoman sahaporsayaon?

¹² Parlajaranni. Ganup do sintua boi maniru si Paulus laho mamakei panorang marsaor pakon hasoman sahaporsayaon. Sada cara laho mangkorjahon ai, ai ma roh piga-piga minit paima ipungkah partumpuan ase boi patoguhkon sanina botou. Somalni, pitah piga-piga minit pe boi do hita patoguhkon sidea. (Rom 1:12; Ep. 5:16) Sahalak sintua pe boi do homa maniru si Paulus mamakei Bibel laho patoguhkon sanina botou anjaha paposkon uhurni ihaholongi Jahowa do sidea. Boi do homa sintua patuduhkon ihaholongi sidea do sanina botou. Marusaha ma mamuji sanina botou. Janah sanggah mamodahi, marusaha do sidea mambere podah marhitei ayat ni Bibel halani rosuh do sidea ase sanina botou manjalo podahni ai.​—Gal. 6:1.

13. Aha do pengaruhni hagalekon hubani sahalak sintua?

¹³ Mase mangkorjahon ai boi gabe tantangan. Lang adong sintua na sempurna. Songon na legan, sidea pe boi do mambahen hasalahan. (Rom 3:23) Sipata, lang urah bani sidea ase tetap seimbang mangidah hahuranganni. Adong do na gabe maretek ni uhur halani lalab mamingkirhon hahuranganni. Anjaha na legan marsidalian halani pangahapni lang porlu ia mambahen hamubahon.

14. Domu bani Pilippi 4:13, halani toruh maruhur si Paulus, sonaha ai boi mangurupi ia mangatasi hahuranganni?

¹⁴ Na boi itiru sintua humbani si Paulus. Halani martoruh ni uhur si Paulus, sadar do ia lang boi ia sandiri mangatasi hahuranganni. Porlu do ia iurupi Naibata. Halak na kejam hinan do si Paulus, kasar, janah iparburu ia do halak Kristen. Ujungni, ibotoh ia ma salah do pambahenanni ai anjaha mubah ma ia. (1 Tim. 1:12-16) Marhitei pangurupion ni Jahowa gabe sahalak sintua na bujur anjaha toruh maruhur ma ia. Isolsoli ia do  pambahenanni ai. Anjaha porsaya do ia domma isasap Jahowa hasalahanni. (Rom 7:21-25). Lang mangarap ia ase sempurna. Tapi marusaha do ia marparlahou na baru. Anjaha martoruh ni uhur do ia mangindo pangurupion ni Jahowa ase boi mandalankon pangidangionni.​—1 Kor. 9:27; basa Pilippi 4:13.

15. Sonaha sintua boi seimbang mangarusi hahuranganni?

¹⁵ Parlajaranni. Sahalak sintua ilantik sedo halani ia sempurna. Age pe sonai, marosuh do Jahowa ase iakui sidea hahuranganni janah marusaha patuduhkon parlahou na baru. (Ep. 4:23, 24) Sahalak sintua porlu do mamareksa dirini sandiri sanggah marlajar Bibel anjaha mambahen hamubahon. Anggo ibahen sidea sonai, ujungni iurupi Jahowa ma ia ase martuah janah marhasil.​—Jak. 1:25.

16. Mase lang dear anggo lalab idingat-dingat sintua hahurangan ni sanina botou?

¹⁶ Mase mangkorjahon ai boi gabe tantangan. Halani gati rap pakon sanina botou, ra do gabe itonggor sintua hahurangan ni sidea. Tapi anggo lalab ai na idingat-dingat ia, ra do gabe lang bujur ia halani sogam uhurni mangidah sanina atap botou ai. Jadi ipasingat si Paulus ma halak Kristen ase ulang sonai halani ai do harosuh ni Sibolis.​—2 Kor. 2:10, 11.

17. Aha do na idingat si Paulus humbani hasoman sahaporsayaonni?

¹⁷ Na boi itiru sintua humbani si Paulus. Si Paulus pe mambotoh dong do hahurangan ni hasoman sahaporsayaonni halani sipata borit do uhurni ibahen sidea. Tapi ibotoh si Paulus do hassi pe lepak pambahenan ni sidea, sedo artini halak na jahat sidea. Jadi halani holong uhurni hubani sanina botou gabe na madearni dassa na idingat ia humbani sidea. Halani ai, anggo marusaha sidea laho mangkorjahon na sintong age pe lang urah, tontu sedo na jahat tujuan ni sidea. Halani ai ma porlu do sidea iurupi.

18. Aha ma na boi iparlajari ham humbani si Paulus sanggah ia mangurupi si Oiodia pakon si Sintike? (Pilippi 4:1-3)

¹⁸ Pardiateihon ma sonaha si Paulus mangurupi dua botou i kuria Pilippi. (Basa Pilippi 4:1-3.) Ra, halani marsalisih si Oiodia pakon si Sintike gabe lang be marsisahapan sidea. Hassi pe sonai lang sogam uhur ni si Paulus mangidah sidea. Tapi idingat ia do pambahenan ni sidea na madear. Umpamani, domma dokah sidea mangidangi Jahowa, janah ibotoh si Paulus do holong tumang uhur ni Jahowa mangidah sidea. Halani ai, iojur ia ma ase mardamei haduasi sidea ai. Jadi, halani totap si Paulus mangindahi na madear humbani hasoman sahaporsayaonni, gabe marmalas ni uhur ma ia mangidangi rap pakon sidea.

19. (a) Aha do na porlu idingat sintua humbani sanina botou? (b) Aha ma na boi iparlajari ham humbani gambar pasal sintua na mamborsihkon Balei Harajaon?

 ¹⁹ Parlajaranni. Nasiam sintua, marusaha ma mangindahi na madear humbani sanina botou i kuria. Age pe adong hahurangan ni sidea, pasti adong do homa halobihanni. (Pil. 2:3) Tongon, sipata porlu do sidea ipodahi. Tapi songon si Paulus, ulang ma hasalahan ni sidea na lalab idingat nasiam. Dingat ma na madear na ibahen sidea . Umpamani, holong ni uhurni hubani Jahowa, na madear na ibahen sidea ibagas pangidangion, ampa halobihanni. Anggo sonai ibahen nasiam, gabe ibotoh sidea ma anggo ganup halak i kuria mangkaholongi sidea.

20. Sonaha ase sintua boi tongtong mandapot guna humbani sitiruan na ibahen si Paulus?

²⁰ Bahat do gunani anggo tongtong iparlajari sintua sitiruan na ibahen si Paulus. Boi do ipindahi ham hatorangan bani Indeks Publikasi Menara Pengawal, bani topik “Paulus” i subjudul “teladan bagi penatua”. Sanggah iparlajari nasiam artikel ai, sungkun ma dirimu, ‘Sonaha sitiruan na ibahen si Paulus boi mangurupi ahu mandalankon tanggung jawabku na gabe sintua i kuria?’

21. Aha do na porlu idingat sintua?

²¹ Nasiam sintua, dingat ma lang ongga ipindo Jahowa ase sempurna nasiam. Tapi ipindo Ia do ase totap nasiam setia. (1 Kor. 4:2) Malas do uhur ni Jahowa mangidah kesetiaan ni si Paulus ampa pangidangionni. Tontu malas do homa uhur-Ni mangidah pangidangion ni nasiam. Janah lang ‘ilupahon Naibata pambahenan ni nasiam ampa holong ni uhur na pinatuduhkon nasiam bani goran-Ni, marhitei mangidangi halak na mapansing in’.​—Heb. 6:10.