1-2. Sonaha ase iharosuhkon Jahowa panombahanta?

 SANGGAH itangar ham kata “panombahan”, aha ma na ibayangkon ham? Ra do mintor ibayangkon ham sada sanina na toruh maruhur martonggo paima modom ia. Atap ra do homa ibayangkon ham sada kaluarga na marmalas ni uhur sanggah mambahen parlajaran Bibel kaluarga.

² Tarmasuk panombahan do na ihorjahon sidea ai. Tapi ai ra do Jahowa manjalo panombahan ni sidea? Anggo ihorjahon sidea ai domu hubani harosuh-Ni, tontu ijalo Jahowa do ai. Anjaha porlu do homa ipatuduh sidea holong ni uhurni bani Jahowa janah pasangapkon-Si. Holong tumang do uhurta bani Jahowa. Pitah Ia do na talup isombah. Sihol do uhurta mambahen na sidearan sanggah mangkorjahon ai.

3. Aha ma na laho iulas hita bani artikel on?

³ Bani artikel on, iulas hita ma aha do na ibahen juakjuak ni Jahowa sapari laho manombah-Si. Anjaha iulas hita homa dong ualuh na porlu ibahen sonari laho manombah Naibata. Anggo ihorjahon hita ai, gabe ibotoh hita ma sonaha ase lambin dear panombahanta. Holi iulas hita homa mase manombah Jahowa boi mambahen martuah goluhta.

4. Sonaha juakjuak ni Jahowa sapari pasangapkon Jahowa janah patuduhkon holong ni uhur Bani?

⁴ Sapari, ipasangap si Habel, si Noak, si Abraham, pakon si Job do Jahowa. Anjaha ipatuduh sidea do holong ni uhurni hu Bani. Sonaha carani? Marhitei manangihon parentah-Ni, porsaya hu Bani, ampa mambere galangan.  Lang ipatugah Bibel sonaha panombahan na ibahen sidea. Tapi tangkas do ihatahon marusaha do sidea mambahen na sidearan laho pasangapkon Jahowa. Anjaha ijalo Jahowa do panombahan ni sidea ai. Tapi dobkonsi ai ibere Jahowa ma Titah ni si Musa bani ginompar ni si Abraham. Bani titah ai tangkas do ipatorang sonaha panombahan na iharosuhkon Jahowa.

5. Dobkonsi Jesus matei anjaha ipapuho, aha ma na mubah ibagas panombahan?

⁵ Dobkonsi Jesus matei anjaha ipapuho, lang be idalankon Titah ni si Musa. (Rom 10:4) Tapi ibere ma titah na baru hubani halak Kristen ijia, ai ma “titah ni Kristus”. (Gal. 6:2) Titah ai sedo marisi bahat aturan na maningon ihapal. Jadi sonaha ma sidea mandalankon “titah” ai? Marhitei maniru Jesus ampa mandalankon ajaranni. Sonari, marusaha do homa hita laho maniru Jesus ase malas uhur ni Jahowa, janah “dapotan hasonangan” ma hita halani mangkorjahon ai.—Mat. 11:29.

6. Sonaha hita boi mandapot guna sanggah mangulas artikel on?

⁶ Sonari ulas hita ma aha na porlu ibahen hita ibagas panombahan. Anjaha pingkirhon ma sungkun-sungkun on, ‘Hamajuon aha do na domma hubahen ibagas panombahan? Ai adong ope na porlu hupadear?’ Ra do malas uhurmu halani iahap ham domma ibahen ham na dear. Tapi pindo ma bani Jahowa ase iurupi ham laho mangkorjahon na sidearan ibagas panombahan.

7. Sonaha pangahap ni Jahowa bani tonggonta?

⁷ Hita manombah Jahowa sanggah martonggo hu Bani. Ipausih Bibel do tonggonta songon dahupa na dear ipasirsir paima igalangkon i tabernakel atap i rumah panumbahan. (Ps. 141:2) Sanggah itutung ai, luar ma uap na mambahen malas uhur ni Naibata. Sonai ma homa tonggonta. “Marosuh” do Jahowa manangar age pe sederhana kata-katani. (Pod. 15:8; 5 Mus. 33:10) Pos ma uhurta marosuh do Jahowa manangar sanggah ipatugah hita holong ni uhurta hu Bani, ampa sanggah martarima kasih hita. Sihol do homa uhur-Ni ase ipatugah hita holsoh ni uhurta ampa pangindoanta. Jadi, paima martonggo, dear ma anggo ipingkiri hita lobei aha na laho ihatahon. Anggo ibahen hita sonai, gabe boi ma ibere hita “dahupa” na sidearan hubani Jahowa, Bapanta in.

8. Sadihari do panorang na sosok laho mamuji Naibata?

⁸ Hita manombah Jahowa sanggah mamuji Ia. (Ps. 34:2) Ipuji hita do Jahowa sanggah ipatugah hita bani halak marosuh tumang do uhurta bani sagala horja ampa sifat-sifat-Ni. Bahat tumang do na boi isaritahon hita pasal Jahowa anggo ihargai hita pambahenan-Ni. Sanggah irimangi hita ganup pambahenanni ai, bahat do alasanta laho mamuji Ia. Sanggah marbarita, doskon mambere “galangan puji-pujian” bani Naibata do hita. (Heb. 13:15) Songon tonggo, ipingkirhon hita do lobei aha na laho hatahononta. Sonai ma homa paima marbarita, maningon ipingkirhon hita do lobei aha na laho hatahonon sanggah marbarita. Sihol do uhurta mambere “galangan puji-pujian” na sidearan. Halani ai humbani ringgas ni uhur do hita sanggah patugahkon hasintongan bani halak na legan.

9. (a) Songon bani halak Israel hinan, aha do gunani partumpuan? (b) Saritahon ma aha do gunani partumpuan bamu.

⁹ Hita manombah Jahowa sanggah hita roh hu partumpuan. Hinan iparentahkon  do bani halak Israel, “Maningon tolu hali ibagas satahun roh sagala dalahi na i tongah-tongah nasiam hu lobei ni Jahowa Naibatamu, bani ianan sipilihon-Ni.” (5 Mus. 16:16) Jadi maningon itadingkon sidea do rumahni. Tapi marjanji do Jahowa, “Sahalak pe lang na manguhur-uhuri tanohmu sadokah tangkog ho sihol mangidah bohi ni Jahowa, Naibatamu.” (2 Mus. 34:24) Halani marhaporsayaon, laho ma sidea marpesta bani Jahowa bai ganup tahun. Anjaha bahat do gunani na idapot sidea. Umpamani, lambin bahat ma iparlajari sidea Titah ni Jahowa. Iahapkon sidea ma holong tumang do uhur ni Jahowa bani sidea. Anjaha marmalas ni uhur do sidea boi marsaor rup pakon hasoman na manombah Jahowa. (5 Mus. 16:15) Sonai ma homa na iahapkon hita sonari on anggo marusaha hita roh hu partumpuan. Anjaha dingat ma, malas do uhur ni Jahowa anggo ibere ham komentar na singkat na dob ipersiapkon hinan.

10. Mase ponting tumang mandoding sanggah hita manombah Jahowa?

¹⁰ Hita manombah Jahowa sanggah rup mandoding pakon sanina botou. (Ps. 28:7) Bani halak Israel, ponting tumang do mandoding sanggah sidea manombah Jahowa. Itugaskon Raja Daud ma 288 halak Levi gabe sipandoding i rumah panumbahan. (1 Kron. 25:1, 6-8) Sonari pe, taridah do homa holong ni uhurta bani Jahowa sanggah hita mandoding laho mamuji Ia. Lang maningon jago hita mandoding ase boi mangkorjahon ai. Dingat ma: Sanggah marsahap, ‘ganup hita gati do marsalah’. Tapi sedo halani ai gabe lang ra hita marsahap i kuria ampa sanggah marbarita. (Jak. 3:2) Sonai ma homa sanggah mandoding, ulang ma halani iahap hita lang jenges soranta gabe lang ra hita mandoding laho mamuji Jahowa.

11. Domu bani Psalmen 48:14, mase maningon ibahen hita jadwal parlajaran Bibel kaluarga?

¹¹ Hita manombah Jahowa sanggah iparlajari hita Bibel janah iajarhon hita ai hubani niombahta. Sanggah ari Sabat lang marhorja halak Israel. Igunahon sidea do panorang ai laho patoguhkon parhasomanan ni sidea pakon Jahowa. (2 Mus. 31:16, 17) Iajarhon sidea do pasal Jahowa ampa sifat-sifat-Ni hubani niombahni. Sonari pe, maningon ibahen hita do jadwal laho mambasa ampa mamparlajari Bibel. On ma sada cara laho manombah Jahowa ampa patoguhkon parhasomananta pakon-Si. (Ps. 73:28) Leganni ai, anggo ibahen hita parlajaran Bibel kaluarga, gabe iurupi ma niombahta ase lambin dohor bani Jahowa, Bapanta na parholong in.​—Basa Psalmen 48:14.

12. Aha ma na boi iparlajari hita humbani cara ni Jahowa mangidah horja pajongjongkon tabernakel?

¹² Hita manombah Jahowa sanggah dihut pajongjongkon ampa mangurus Balei Harajaon. Bani Bibel ihatahon ‘horja na pansing’ do pajongjongkon tabernakel hinan. (2 Mus. 36:1, 4) Sonari pe, dihut bani pajongjongkon Balei Harajaon ampa bangunan ni organisasi tarmasuk do homa ai panombahan. Bahat do sanina botounta na mambere panorangni laho mangkorjahon ai. Ihargai hita do pambahenan ni sidea ai. Tontu ringgas do homa sidea marbarita janah dong do homa sidea na sihol gabe perintis. Halani ai, ulang ma ragu nasiam sintua laho manlantik sidea gabe perintis anggo boi do ipenuhi sidea persyaratanni. Jadi lang soal pandei atap lang hita ibagas horja pembangunan,  ganup do hita martanggung jawab laho manjaga bangunan ni organisasi totap borsih janah dear.

13. Sonaha ma pangahapta sanggah membere sumbangan laho mangurupi horja parambilanon?

¹³ Hita manombah Jahowa sanggah hita membere sumbangan laho mangurupi horja parambilanon i sab tanoh on. Hinan, lang boi halak Israel roh hu lobei ni Jahowa anggo lang iboan sidea age aha. (5 Mus. 16:16) Jadi iboan sidea ma galangan domu hubani tuk ni gogohni. On ma sada cara na patuduhkon anggo sidea mangkargai ganup pambahenan ni Jahowa bani sidea. Sonaha hita patuduhkon anggo hita mangkaholongi Jahowa janah mangkargai ganup pambahenan-Ni? Sada cara ai ma marhitei mambere sumbangan hu kuria ampa mangurupi horja parambilanon i sab tanoh on domu hubani tuk ni gogohta. Apostel Paulus mangkatahon, “Anggo sasahalak mambere humbani borsih ni uhurni malas do uhur ni Naibata, halani sihol do Naibata ase sasahalak mambere domu hubani na adong, sedo humbani na so adong.” (2 Kor. 8:4, 12) Malas tumang uhur ni Jahowa manjalo aha pe na boi ibere hita age pe otik ai.​—Mrk. 12:42-44; 2 Kor. 9:7.

14. Domu bani Podah 19:17, sonaha pangahap ni Jahowa anggo ra hita mangurupi sanina botou na mamorluhon?

¹⁴ Hita manombah Jahowa sanggah hita mangurupi sanina botou na mamorluhon. Marjanji do Jahowa pasu-pasuon-Ni do halak Israel na mangurupi halak na miskin. (5 Mus. 15:7, 10) Jadi, anggo ra hita mangurupi sanina botou na mamorluhon, iahap Jahowa do ai galangan na ibere hu Bani. (Basa Podah 19:17.) Umpamani, sanggah halak Kristen i Pilippi mambere haporluan ni si Paulus na ipenjarahon, ihatahon ia ma ai “galangan na hinamalaskon ampa hinarosuhkon ni Naibata”. (Pil. 4:18) Jadi pingkirhon ma hasoman i kuria janah sungkun ma dirimu, ‘Ai adong do sidea na porlu huurupi?’ Malas tumang do uhur ni Jahowa anggo igunahon hita panorang, gogoh, hapandeian, ampa duitta laho mangurupi sidea. Tarmasuk do homa ai panombahan hubani Naibata.​—Jak. 1:27.

15. Mase lang borat iahap hita pasirsirhon panorang ampa gogohta laho manombah Jahowa?

¹⁵ Maningon ipasirsir hita do panorang ampa gogohta laho manombah Jahowa. Tapi lang borat ai. (1 Joh. 5:3) Mase lang? Halani holong uhurta bani Jahowa do ase ihorjahon hita ai. Bayangkon ma sada dakdanak na sihol mambere hadiah bani bapani. Ra do marjam-jam bois panorangni mambahen gambar na laho ibere bani bapani. Tapi lang isolsoli ia ai halani holong uhurni bani bapani. Anjaha malas do uhurni boi mambere hadiah ai. Sonai ma homa hita. Halani holong uhurta bani Jahowa, tontu malas do uhurta mambere gogoh ampa panorangta laho manombah-Si.

16. Domu bani Heber 6:10, sonaha pangahap ni Jahowa anggo domma marusaha hita mambahen malas uhur-Ni?

¹⁶ Tontu lang iarapkon namatoras ase ganup niombahni boi mambere hadiah na sarupa. Ibotoh sidea dong bei do halobihan ni ganup niombah. Sonai ma homa Jahowa, iarusi Ia do homa situasinta. Ra do bahatan na boi ibahen ham marimbangkon na legan. Atap ra do homa lang tarbahen ham songon na ibahen na legan halani domma matua ham, hurang sehat,  atap halani dong tanggung jawab kaluarga. Tapi ulang ma maretek ni uhur halani ai. (Gal. 6:4) Lang ihalupahon Jahowa ganup pambahenanmu. Anggo domma marusaha ham mangkorjahon na sidearan humbani borsih ni uhurmu, tontu malas do uhur-Ni. (Basa Heber 6:10.) Ibotoh Ia do na dong ibagas uhurmu. Sihol do uhur-Ni ase martuah ham janah puas sanggah manombah Ia.

17. (a) Anggo iahap hita lang urah mangkorjahon aha na dob iulas hita, aha ma na porlu bahenonta? (b) Sonaha kegiatan na i kotak “ Ase Lambin Martuah Goluhta” boi mangurupi ham?

¹⁷ Aha do na boi bahenonta anggo lang urah iahap hita mangkorjahon aha na dob iulas hita nongkan, songon marlajar Bibel ampa marbarita? Anggo gati ihorjahon hita sada kegiatan, somalni lambin iharosuhkon hita ma ai, janah boi ma iahapkon hita gunani. Bayangkon ma sihol uhurta marlajar gitar. Anggo jarang do iparlajari hita ai, tontu lang boi hita margitar. Tapi sonaha ma anggo tiap ari hita marlajar? Mungkahni ra do tongkin ibahen hita, tapi dokah-dokah itambahi hita ma use panorangni. Anggo lambin pandei hita margitar, lambin marosuh ma hita mamparlajari ai. Sonai ma homa panombahanta hubani Jahowa.

18. Aha do na sipontingan na boi ibahen hita, janah aha ma hasilni?

¹⁸ Mambahen na sidearan ibagas panombahan hubani Jahowa do na sipontingan ibagas goluhta. Anggo ibahen hita sonai, gabe martuah ma goluhta janah puas, anjaha boi ma hita manombah Jahowa sadokah ni dokahni. (Pod. 10:22) Sonari iahapkon hita do hadameion halani ibotoh hita iurupi Jahowa do ganup halak na manombah-Si sanggah adong parsoalanni. (Jes. 41:9, 10) Tontu martuah do goluhta anggo isombah hita Jahowa, na talup ‘manjalo hasangapon pakon hamuliaon’ humbani sagala na tinompa-Ni.​—Pangk. 4:11.