1. Aha ma na laho masa bani halak Jahudi na i habuangan?

 IBAHEN Jahowa ma tarojur uhur ni si Kores, raja ni Persia laho paluahkon bangsa Israel na domma marpuluh tahun i habuangan Babel. Itingtinghon raja ma ase halak Jahudi mulak hu nagorini, “ase ipajongjong rumah ni Jahowa, Naibata ni Israel”. (Esr. 1:1, 3) Gabe longang ma uhur ni sidea manangar ai! On artini gabe boi ma sidea manombah Naibata i nagori ni sandiri.

2. Dob das halak Jahudi i Jerusalem, aha ma na parlobei ibahen sidea?

² Bani tahun 537 SM, das ma rombongan na parlobei humbani halak Jahudi i Jerusalem, hinan ibu kota ni harajaon Juda na i selatan. Mintor ipajongjong ma use rumah panumbahan anjaha bani tahun 536 SM domma salosei ipadear pondasini!

3. Aha do tantangan na roh hubani halak Jahudi?

³ Lang piga dokah dobkonsi ipajongjong halak Jahudi use rumah panumbahan, bahat ma halak na manlawan sidea. Ilanglangi bangsa-bangsa i sekitar ma sidea ase soh pajongjongkon rumah panumbahan. Ipambiar-biar ma halak Juda ase gabe galek. (Esr. 4:4) Borat do sanggah ai janah lambin parah do homa situasini halani bani tahun 522 SM gabe raja ma si Artasasta i Persia. * Nini uhur ni munsuhni, on ma panorang na sosok laho parontihon horja ni halak Jahudi ai. Jadi “irencanahon ma aturan laho mambahen masalah”. (Ps. 94:20) Ihatahon sidea ma bani Raja Artasasta anggo halak Jahudi sihol memberontak. (Esr. 4:11-16) Porsaya ma raja ai, janah iparentahkon ma ase iparonti horja pajongjongkon  rumah panumbahan ai. (Esr. 4:17-23) Halani ai gabe soh ma halak Jahudi marhorja.​—Esr. 4:24.

4. Aha do na ibahen Jahowa sanggah munsuh-munsuh manlarang horja pajongjongkon rumah panumbahan? (Jesaya 55:11)

⁴ Age pe piga-piga halak i pamarentahan Persia pakon bangsa-bangsa na so sisombah Jahowa manlarang horja pajongjongkon rumah panumbahan, tapi lang ipaturut Jahowa ai. Sihol do uhur-Ni ase isaloseihon horja ai. Anjaha tongtong do saud harosuh ni uhur-Ni. (Basa Jesaya 55:11.) Jadi ipilih Naibata ma si Sakaria gabe nabi anjaha ibere ma ualuh panonggoran na mambahen longang uhur. Sanggah isaritahon si Sakaria panonggoran ai bani halak Jahudi gabe ipatoguh ma uhur ni sidea. Panonggoran ai mangurupi sidea ase lang mabiar bani munsuh-munsuhni. Anjaha gabe tarojur ma sidea laho pasaloseihon horja na iharosuhkon Jahowa. Bani panonggoran na palimahon ididah si Sakaria ma parsuluhan ampa dua hayu jetun.

5. Aha ma na laho iulas hita bani artikel on?

⁵ Gabe ipatoguh do uhur ni halak Jahudi halani panonggoran na palimahon na ibere Jahowa marhitei si Sakaria. Sonari pe, sai adong do na mambahen hita maretek ni uhur. Anggo iparuhurhon hita panonggoran ai, gabe ipatoguh ma uhurta. Janah iurupi ma homa hita ase totap setia mangidangi Jahowa sanggah adong tantangan, parubahan situasi, pakon sanggah adong tugah-tugah na lang urah iarusi hita.

6. Sonaha panonggoran na isurat bani Sakaria 4:1-3 boi patoguhkon uhur ni halak Jahudi? (Tonggor ma gambar sampul.)

⁶ Basa Sakaria 4:1-3. Panonggoran pasal parsuluhan pakon dua hayu jetun ai mangurupi halak Jahudi gabe barani. Sonaha carani? Paruhurhon ma bani parsuluhan ai adong sumber minak na torus mardalan. Hunja rohni? Humbani dua hayu jetun ai ma roh minak hubagas baskom, janah mardalan ma minak ai hubagas lampu na pitu ai. Gabe gara ma torus apuyni. Isungkun si Sakaria ma, “Ai aha do artini on?” Ipatugah malekat ai ma barita humbani Jahowa, “‘Seng marhitei bala barang marhitei gogoh, tapi marhitei tonduy-Hu do ase saud,’ nini Jahowa Zebaot.” (Sak. 4:4, 6) Minak humbani hayu jetun ai manggambarhon tonduy na pansing na lang ongga bois. Jadi daoh do gogohan tonduy ni Naibata marimbangkon tentara ni halak Persia. Marhitei pangurupion ni Jahowa boi do salosei horja pajongjongkon rumah panumbahan ai. Gabe toguh ma uhur ni halak Jahudi dobkonsi manangar barita ai! Maningon porsaya do ganup sidea bani Jahowa, janah ipungkah ma horja ai age pe adong na manlarang.

7. Parubahan aha do na masa na mangurupi sidea na pajongjongkon rumah panumbahan?

⁷ Parubahan aha ma na masa na mangurupi sidea na pajongjongkon rumah panumbahan? Bani tahun 520 SM, mamarentah ma si Darius I i Persia. Bani tahun na paduahon pamarentahanni, ibotoh ia ma manlanggar hukum do pasohkon horja pajongjongkon rumah panumbahan ai. Jadi ibere ia ma parentah ase itoruskon use horja ai. (Esr. 6:1-3) Gabe tarsonggot ma ganup halak dob manangar haputusan ni raja. Tapi lang pitah ai. Iparentahkon do homa bangsa-bangsa i sekitar ni halak Jahudi ase ulang manlanglangi horja ai. Anjaha maningon ibere sidea do aha pe na iporluhon laho pasaloseihon horja ai. (Esr. 6:7-12) Hira-hira ompat tahun dobkonsi ai, salosei ma ipajongjong halak Jahudi rumah panumbahan ai bani tahun 515 SM.​—Esr. 6:15.

8. Sonaha ham boi totap barani sanggah adong tantangan?

 ⁸ Sonari pe, bahat do homa sisombah Jahowa na mangadapi tantangan. Umpamani, dong do hita na tading i nagori na mambatasi horja parambilanonta. Jadi ra do adong sanina botou na itangkap janah ‘iboan hu lobei ni pamarentah pakon raja’ laho mambere hasaksian bani sidea. (Mat. 10:17, 18) Sipata, halani margantih halak na mamarentah, gabe bebas ma sidea mangidangi Jahowa. Atap ra do adong hakim na bujur na mambahen haputusan ase boi sidea bebas mandalankon panombahan. Tapi Saksi Jahowa na legan, beda homa tantanganni. Tongon, sidea tading i nagori na lang manlarang horjanta. Tapi adong do tantangan humbani kaluargani. Umpamani, ipaksa do sidea ase lang be mangidangi Naibata. (Mat. 10:32-36) Age pe sonai, bahat do pangalaman na patuduhkon ujungni lang be ilarang kaluargani sidea halani lang boi ipaksa sidea soh mangidangi Jahowa. Anjaha dong homa kaluargani na manantang hinan, ujungni gabe Saksi Jahowa. Halani ai, ulang ma menyerah ham sanggah adong tantangan! Totap ma barani. Sai urupan ni Jahowa do ham marhitei tonduy-Ni ase ulang mabiar.

9. Mase adong piga-piga halak Jahudi na tangis sanggah mangidah pondasi ni rumah panumbahan na baru ai?

⁹ Adong do piga-piga halak Jahudi na dob matua gabe tangis sanggah mangidah domma ipajongjong pondasi ni rumah panumbahan na baru ai. (Esr. 3:12) Domma ididah sidea daoh do jengesan rumah panumbahan na ipajongjong si Salomo hinan marimbangkon rumah panumbahan on. (Hag. 2:2, 3) Halani ibanding-bandingkon sidea ai, gabe lungun tumang ma uhurni. Tapi, halani panonggoran si Sakaria gabe iurupi ma sidea ase lang be marpusok ni uhur. Sonaha carani?

10. Sonaha hata ni malekat na isurat bani Sakaria 4:8-10 boi mangapoh halak Jahudi?

¹⁰ Basa Sakaria 4:8-10. Aha do artini sanggah ihatahon malekat ai ‘marolob-olob halak Jahudi mangidah [“unting-unting”, ayat 10, NW] na ibagas tangan ni si Serubabel’? Unting-unting ai ma sada alat na ipakei laho mambotoh lurus do sada bangunan atap lang. Jadi, age pe jengesan rumah panumbahan na parlobei marimbangkon na baru ai, tapi jenges do ai i lobei ni Jahowa. Tangkas ma na sipontingan bani Jahowa ai ma cara ni sidea  manombah Ia i rumah panumbahan ai maningon domu hubani harosuh-Ni. Anggo ipingkiri halak Jahudi sonaha ase panombahanni iharosuhkon Jahowa, gabe marmalas ni uhur ma use sidea.

11. Tantangan aha ma na dong bani piga-piga hasomanta?

¹¹ Dong do piga-piga hasoman na mangahap lang urah sanggah mubah situasini. Umpamani, adong na domma dokah mangidangi ibagas dinas sepenuh waktu, hape ibere ma tugas na baru hu bani. Dong homa halani domma matua, gabe lang boi be ihorjahon sidea tugas na iharosuhkonsi. Lang salah anggo pusok uhurta sanggah mubah situasinta. Ra do mungkahni lang iarusi atap lang setuju hita bani haputusan ai. Ra do iahap hita dearan do tugasta ondi marimbangkon na sonari. Gabe maretek ni uhur ma hita, janah iahap hita ma lang be boi bahat ibahen hita hubani Jahowa. (Pod. 24:10) Sonaha ma panonggoran ni si Sakaria boi mangurupi hita ase totap mambere na sidearan bani Naibata?

12. Sonaha panonggoran ni si Sakaria mangurupi hita ase boi totap marmalas ni uhur age pe mubah situasinta?

¹² Lambin urah do hita manjalo parubahan situasi anggo ipingkiri hita aha do harosuh ni Naibata. Sonari on, domma bahat na ibahen Jahowa, anjaha malas do uhurta halani hasoman sahorja-Ni hita. (1 Kor. 3:9) Age pe mubah tugas na ibere hubanta, tapi lang ongga mubah holong ni Naibata. Halani ai, sanggah adong parubahan na ibahen organisasi na mambahen sunsah uhurmu, ulang ma lalab ipingkiri ham mase sonai. Marimbangkon lalab idingat-dingat ham “ari sapari”, pindo ma ase iurupi Jahowa ham laho mambotoh aha do gunani parubahan ai. (Par. 7:10) Marimbangkon lalab ipingkiri ham aha na lang boi be ihorjahon, pingkiri ma aha na tarbahen ham sonari. Humbani panonggoran ni si Sakaria, gabe ibotoh hita ma ponting tumang do manjaga pingkiran. Anggo ibahen hita sonai, gabe boi ma hita totap marmalas ni uhur janah setia hubani Jahowa age pe mubah situasinta.

13. Sanggah ihatahon ipungkah use horja pajongjongkon rumah panumbahan, mase adong na mangahap lang masuk akal parentah ai?

¹³ Sintua ni Malim Jesua pakon Gubernur Serubabel do na mambobahon  juakjuak ni Naibata. Ibotoh sidea do domma ilarang horja pajongjongkon rumah panumbahan. Tapi “ipungkah sidea ma use pajongjongkon rumah ni Naibata”. (Esr. 5:1, 2) Ra do lang masuk akal parentah ai iahap piga-piga halak Jahudi. Nini uhur ni sidea ma, holi gabe ibotoh munsuh ma ai, janah marusaha ma use sidea laho manlanglangi. Halani ai, porlu do ipapos uhur ni si Jesua pakon si Serubabel anggo Jahowa mangkasomani sidea. Sonaha panonggoran ni si Sakaria mangurupi sidea?

14. Domu bani Sakaria 4:12, 14, aha do na paposkon uhur ni Sintua ni Malim Jesua pakon Gubernur Serubabel?

¹⁴ Basa Sakaria 4:12, 14. Bani panonggoran ai ipatugah malekat ma anggo dua hayu jetun ai manggambarhon si Jesua pakon si Serubabel, “sidua halak na mininakan”. Usih songon na “jongjong i lobei ni Jahowa, sigomgom ganup tanoh on” do sidea. Sada hasangapon do ai bani sidea. On patuduhkon porsaya do Jahowa bani sidea. Halani ai, tugah-tugah aha pe na ibere sidea, maningon porsaya do halak Israel halani sidea do na igunahon Jahowa laho mambobahon halak Israel.

15. Sonaha hita patuduhkon anggo hita mangkargai tugah-tugah na ibere Jahowa marhitei Bibel?

¹⁵ Sonari, ibere Jahowa do tugah-tugah hubani juakjuak-Ni marhitei Bibel. Ibagas buku ai ipatugah do sonaha panombahan na iharosuhkon Ia. Sonaha hita patuduhkon anggo hita mangkargai tugah-tugah na ijalo hita humbani Bibel? Gunahon ma panorang laho mamparlajari ai ase boi iarusi ham isini. Sungkun ma dirimu: ‘Sanggah hubasa Bibel atap pe publikasinta, ai hugunahon do panorang laho manrimangi aha na hubasa? Anggo adong “na payah arusan”, ai marusaha do ahu manorihi aha do artini ai? Atap pitah asal hubasa dassa ai?’ (2 Ptr. 3:16) Anggo igunahon hita panorang laho manrimangi pangajaran ni Jahowa, gabe urah ma hita mangihutkon tugah-tugah na ibere Ia, anjaha gabe boi ma isaloseihon hita horja parambilanonta.​—1 Tim. 4:15, 16.

16. Sanggah lang iarusi hita tugah-tugah humbani “juakjuak na bujur anjaha na maruhur”, aha do na boi mangurupi hita ase urah mandalankon ai?

¹⁶ Sobali marhitei Bibel, ibere Jahowa do homa tugah-tugah marhitei “juakjuak na bujur anjaha na maruhur”. (Mat. 24:45) Sipata, ra do lang urah iarusi hita tugah-tugah na ibere sidea. Umpamani,  sanggah ibere tugah-tugah sonaha hita pasirsirhon diri paima roh sada bencana alam, ra do iagan hita lang mungkin tarjadi bencana sisonai i daerahta. Atap ra do iahap hita mahati-hatitu do juakjuak na bujur anjaha na maruhur ai sadokah pandemi on. Aha do na porlu bahenonta anggo iahap hita lang masuk akal tugah-tugah na ibere sidea? Dingat ma sonaha halak Israel mandapot guna halani ra sidea mandalankon tugah-tugah na ibere si Jesua pakon si Serubabel. Dingat hita ma homa sarita na ongga ibasa hita ibagas Bibel. Sipata, ibere do tugah-tugah na lang masuk akal iahap juakjuak ni Naibata, hape ai do na paluahkon sidea.​—Panguh. 7:7; 8:10.

17. Aha do pengaruhni panonggoran pasal parsuluhan pakon dua hayu jetun ai bani halak Jahudi?

¹⁷ Tongon, pondok do panonggoran ni si Sakaria na palimahon. Tapi boi do ai mambahen halak Jahudi gabe ringgas use marhorja ampa mangidangi Jahowa. Anjaha sanggah idalankon sidea aha na iparlajari humbani panonggoran ai, gabe iahapkon sidea ma pangurupion ni Jahowa ampa holong ni uhur-Ni. Marhitei tonduy-Ni, iurupi Jahowa do sidea ase boi totap marhorja ibagas malas ni uhur.​—Esr. 6:16.

18. Aha do pengaruhni panonggoran ni Sakaria ai bamu?

¹⁸ Marguna do homa panonggoran pasal parsuluhan pakon dua hayu jetun ai ibagas goluhmu. Songon na dob iulas hita, sanggah adong tantangan gabe ipatoguh do uhurmu. Sanggah adong parubahan situasi gabe boi ma ham totap marmalas ni uhur. Anjaha sanggah adong tugah-tugah na lang iarusi, gabe iurupi ma ham ase porsaya janah boi mandalankon tugah-tugah ai. Jadi aha ma na porlu bahenonmu? Na parlobei, paruhurhon ma aha na itonggor si Sakaria. Ai do na gabe bukti anggo Jahowa parduli hubani juakjuak-Ni. Dob ai, dalankon ma in marhitei porsaya bani Jahowa anjaha tongtong mangidangi-Si humbani gok ni uhurmu. (Mat. 22:37) Anggo ibahen ham sonai, iurupi Jahowa ma ham ase tongtong marmalas ni uhur mangidangi-Si.​—Kol. 1:10, 11.