1. Halak na sonaha do ham sanggah lape marlajar Bibel?

 HALAK na sonaha do ham sanggah lape marlajar Bibel pakon Saksi Jahowa? Adong do ra hita na lang marosuh mardingat ai. Ra do hinan parlahou ampa pambahenanta mangihutkon na somal ibahen buei halak. Sanggah ai ra do “seng marpangarapan”, janah seng itanda hita Naibata. (Ep. 2:12) Tapi dobkonsi marlajar Bibel, gabe mubah ma ganupan ai!

2. Aha ma na ibotoh ham sanggah iparlajari ham Bibel?

² Dobkonsi marlajar Bibel, ibotoh ham ma adong do Naibata janah holong tumang do uhur-Ni bamu. Ibotoh ham ma use maningon ibahen ham do hamubahon ase malas uhur ni Jahowa janah boi ham gabe kaluarga-Ni. Halani ai maningon iubah ham do pambahenan, parlahou, ampa pingkiranmu. Anjaha maningon iihutkon ham do prinsip ni Bibel ibagas goluhmu.​—Ep. 5:3-5.

3. Domu bani Kolosse 3:9, 10, aha do na iharosuhkon Jahowa hubanta, janah aha ma na laho iulas hita bani artikel on?

³ Halani Jahowa do na manompa hita anjaha Ia do homa Bapanta, tontu marhak do Ia laho mambahen aturan hubani kaluarga-Ni. Anjaha sihol do uhur-Ni ase marusaha hita ‘mananggalhon parlahou na buruk in rap pakon pambahenanni’. * (Basa Kolosse 3:9, 10.) Bani artikel on holi iurupi ma sidea na sihol ididi laho mangarusi: (1) Aha do ‘parlahou na buruk in’? (2) Mase iojur Jahowa ase hita mananggalhon ai? (3) Sonaha hita mangkorjahon ai? Marguna do homa artikel on bani sidea na dob ididi ase lang ulakkon mangkorjahon na buruk in.

4. Sonaha ma pambahenan ni sasahalak na irajai ‘parlahou na buruk’?

⁴ Somalni, mangihutkon daging do pambahenan ampa parsahap ni sasahalak na irajai ‘parlahou na buruk’. Ra, pitah mamingkirhon dirini sandiri do ia, urah marah, lang ibotoh martarima kasih, janah gijang homa uhurni. Ra do marosuh ia mangidah atap pe manonton film na lang suman. Tontu adong do sifat-sifatni na madear. Anjaha ra do isolsoli ia pambahenan ampa parsahapni na lang madear ai. Tapi lang sihol uhurni mambahen parubahan.​—Gal. 5:19-21; 2 Tim. 3:2-5.

5. Ai boi do tongon-tongon itadingkon hita parlahou na buruk ai? (Lahoan 3:19)

⁵ Halani lang sempurna, lang boi tongon-tongon iambukkon hita pingkiran ampa harosuh na lepak humbagas uhur ampa pingkiranta. Sipata, ihorjahon atap ihatahon hita do aha na isolsoli hita i pudian ni ari. (Jer. 17:9; Jak. 3:2) Tapi sanggah marusaha hita mananggalhon parlahou na buruk ai, lang be irajai harosuh ni daging hita. Jadi halak na bujur ma hita.​—Jes. 55:7; basa Lahoan 3:19.

6. Mase iparentahkon Jahowa hita mananggalhon pingkiran na lepak ampa parlahou na sambor?

⁶ Sihol do Jahowa ase martuah goluhta. Halani holong tumang uhur-Ni hubanta, iparentahkon Ia ma ase iambukkon hita pingkiran na lepak ampa parlahou na sambor. (Jes. 48:17, 18) Anggo lang itulak hita harosuh ni daging, ibotoh Ia do ai boi mambahen sunsah dirinta, sonai homa halak na legan. Janah sunsah do homa uhur ni Jahowa mangidah ai.

7. Domu bani Rom 12:1, 2, pilihan aha do na maningon ibahen hita?

⁷ Dong do ra hasoman ampa kaluarga na mangejek hita sanggah hita marusaha mambahen hamubahon. (1 Ptr. 4:3, 4) Ra do ihatahon sidea marhak do ham mangkorjahon ganup harosuhmu, janah ulang paturut halak mangatur-atur goluhmu. Tapi, ise pe na manulak aturan ni Jahowa lang tongon-tongon martuah goluhni, halani ipaturut sidea do dirini ipengaruhi dunia na irajai Sibolis. (Basa Rom 12:1, 2.) Ganup hita maningon mambahen pilihan: Ai totap do ipakei hita parlahou na buruk in, na ipengaruhi dousa ampa dunia on? Atap ipaturut hita do Jahowa  mangurupi hita mambahen hamubahon ase boi gabe halak na marparlahou na madear?​—Jes. 64:8.

8. Aha do na boi mangurupi hita laho mananggalhon pingkiran na lepak ampa parlahou na sambor?

⁸ Ibotoh Jahowa do lang urah banta laho manadingkon pingkiran na lepak ampa parlahou na sambor. (Ps. 103:13, 14) Halani ai marhitei Bibel, tonduy na pansing, ampa organisasi-Ni, iurupi Jahowa do hita mambahen hamubahon na iporluhon. Tontu domma iahapkon ham pangurupion-Ni in. Sonari, ulas hita ma piga-piga cara na boi ibahen ham laho mananggalhon parlahou na buruk ase boi ham ididi.

9. Sonaha Bibel boi mangurupi ham?

⁹ Gunahon ma Bibel laho mamareksa diri. Usih songon kaca do Bibel. Boi do ai mangurupi ham laho mambotoh sonaha pingkiran, parsahap ampa parlahoumu. (Jak. 1:22-25) Guru studimu ampa sanina botou na marpangalaman pe boi do homa mangurupi ham. Umpamani, igunahon sidea do ayat-ayat ni Bibel ase ibotoh ham aha do hahurangan ampa halobihanmu. Iurupi sidea do homa ham sonaha carani mambahen riset ase lang be ihorjahon ham hasomalan na sambor. Na sipontingan, sirsir do Jahowa mangurupi ham janah ibotoh Ia do cara na sidearan laho mangurupi ham halani ibotoh Ia do na ibagas uhurmu. (Pod. 14:10; 15:11) Jadi, tongtong ma martonggo janah parlajari ma Bibel bani ganup ari.

10. Parlajaran aha ma na dapot ham humbani pangalaman ni si Elie?

¹⁰ Porsaya ma aturan ni Jahowa do na sidearan. Ganup na iparentahkon Jahowa bahen hadearon hubanta do ai. Anggo ra hita mangihutkon aturan-Ni gabe martuah ma goluhta. (Ps. 19:8-12) Tapi anggo lang ra hita mangihutkon aturan ni Jahowa, gabe ihorjahon hita ma horja ni daging. Ujungni gabe marsitaronon ma hita. Pardiateihon ma pangalaman ni sada dalahi na margoran si Elie na manulak aturan ni Naibata. Saksi Jahowa do namatorasni. Tapi sanggah remaja, marhasoman ma ia pakon halak na lang dear parlahouni. Gabe marnarkoba ma ia, mangkorjahon parriah-riahon, ampa manangko. Dokah-dokah gabe urah-urah ma si Elie manggila janah kasar homa. Ia mangkatahon, “Sasintongni hubotoh salah do ganupan na huhorjahon ai.” Age pe sonai lang lupa si Elie bani aha na ongga iparlajari ia. Ujungni, ulakkon ma ia marlajar Bibel. Marusaha ma ia mangambukkon hasomalanni na sambor janah ididi ma ia bani tahun 2000. Aha ma gunani bani si Elie halani ra ia mangihutkon aturan ni Jahowa? Si Elie mangkatahon, “Sonari gabe damei ma pangahapku janah borsih do panggora ni uhurhu.” * Humbani pangalaman on ibotoh hita ma gabe sunsah do hagoluhan ni halak na manulak aturan ni Jahowa. Tapi age pe sonai, sirsir do Jahowa mangurupi sidea anggo ra sidea mambahen hamubahon.

11. Aha do deba na ihagigihon Jahowa?

¹¹ Hagigihon ma na ihagigihon Jahowa. (Ps. 97:10, Terjemahan Dunia Baru, NW) Bibel mangkatahon ihagigihon Jahowa do halak ‘na gijang uhur, dilah siparladung, ampa tangan siduruskon daroh ni halak na so marsalah’. (Pod. 6:16, 17) Anjaha ‘ihagigihon Jahowa do homa siduruskon daroh pakon panipu’. (Ps. 5:7) Bani panorang  ni si Noak, bahat tumang do halak na mangkorjahon sisonai. Halani magigi tumang Jahowa mangidah ai, gabe iripaskon ma sidea ganupan. (1 Mus. 6:13) Pardiateihon ma contoh na legan. Marhitei Nabi Maleaki ipatugah Jahowa do anggo Ia magigi bani halak na mambahen sidalian ase boi mansirangkon istrini. Ai ma na mambahen lang ra Jahowa manjalo galangan ni sidea, janah uhumon-Ni do holi sidea halani pambahenanni ai.​—Mal. 2:13-16 NW; Heb. 13:4.

12. Aha do artini ‘mangkagigihon na jahat’?

¹² Sihol do Jahowa ase ‘ihagigihon hita na jahat’. (Rom 12:9) Hata “hagigihon”, boi do mangartihon masogam tumang, na mambahen gabe magigi. Umpamani, adong ma na mambere sapiring sipanganon na busuk bamu janah isuruh ham mangankon ai. Pitah mambayangkon ope, domma sihol mutah ham. Sonai ma homa pasal na masambor. Namin, pitah mamingkirhon pe domma magigi hita.

13. Mase maningon ijaga hita pingkiranta?

¹³ Jaga ma pingkiranmu. Somalni, aha na ipingkirhon hita, ai do na ihorjahon hita. Halani ai ma ihatahon Jesus ase iambukkon hita pingkiran na boi mambahen hita mangkorjahon na jahat. (Mat. 5:21, 22, 28, 29) Tontu sihol do hita pamalaskon uhur ni Jahowa. Halani ai, anggo tubuh pingkiran na sambor, mintor ambukkon ma ai!

14. Isarupahon songon aha do parsahap ai, janah sungkun-sungkun aha do na porlu irimangi hita?

¹⁴ Jaga ma parsahapmu. Jesus mangkatahon, “Na luar hun pamangan humbagas uhur do ai roh.” (Mat. 15:18) Tongon, humbani parsahapta taridah do halak na sonaha hita. Halani ai sungkun ma dirimu: ‘Ai totap do huhatahon na sintong, hassi pe halani ai gabe sunsah ahu? Anggo domma marhajabuan, ai hujaga do parlahouku ase ulang manggoda halak na legan? Ai marusaha do ahu manjaga parsahapku ase ulang mangkatahon na lang suman? Ai lamlam do ahu mambalosi halak na mambahen borit uhurhu?’ Dear do irimangi ham sungkun-sungkun ai ase boi ijaga ham parsahapmu. Parsahap ai boi isarupahon songon kancing baju. Ase urah ham mananggali bajumu, maningon ibuka ham do lobei kancingni. Sonai ma homa parsahapmu, ase urah ham  mananggalhon parlahou na buruk maningon marusaha ma ham ase ulang kasar marsahap, lang marladung, atap pe mangkatahon na lang suman.

15. Aha do artini mamakuhon parlahou na buruk “bani tiang”?

¹⁵ Podas ma mambahen parubahan na iporluhon. Igunahon Apostel Paulus do limbaga laho mangajarhon ponting tumang do hita mangubah parlahounta. Ia manuratkon maningon ipakuhon hita do parlahou na buruk “bani tiang”. (Rom 6:6, NW) Artini porlu do itiru hita Jesus Kristus. Maningon iambukkon hita do parlahou ampa pambahenan na ihagigihon Jahowa. Anggo ihorjahon hita ai, gabe borsih ma panggora ni uhurta janah dapot hita ma hagoluhan na sadokah ni dokahni. (Joh. 17:3; 1 Ptr. 3:21) Dingat ma, lang ra Jahowa mangubah aturan-Ni laho pasonangkon hita. Tapi maningon hita do na mangihutkon aturan-Ni.​—Jes. 1:16-18; 55:9.

16. Mase maningon tongtong ilawan hita hisap-hisap ni daging?

¹⁶ Tongtong ma lawan hisap-hisap ni daging. Age pe domma ididi ham, totap ma marusaha manlawan hisap-hisap ni daging. Pardiateihon ma pangalaman ni sada dalahi na margoran si Maurício. Sanggah poso ope, domma ihorjahon ia homoseksual. Ujungni, pajumpah ma ia pakon Saksi Jahowa janah marlajar Bibel ma ia. Dobkonsi mambahen hamubahon, ididi ma ia bani tahun 2002. Age pe sonari domma martahun-tahun mangidangi Jahowa, “Sipata tubuh do use hisap-hisap ni daging ai, janah maningon hulawan do ai,” nini si Maurício. Tapi lang ra maretek ni uhur ia halani ai. Ia mangkatahon, “Tarapoh do ahu halani mambotoh anggo lang huhorjahon ai, gabe malas ma uhur ni Jahowa.” *

17. Aha do na boi iparlajari ham humbani pangalaman ni si Nabiha?

¹⁷ Martonggo ma mangindo pangurupion ni Jahowa anjaha ulang ma mangunsagahkon gogohmu sandiri. (Gal. 5:22; Pil. 4:6) Tongtong ma hita marusaha mananggalhon parlahou na buruk in. Pardiateihon ma pangalaman ni sada naboru na margoran si Nabiha. Sanggah marumur onom tahun, itadingkon bapani ma ia. Ia mangkatahon, “Pusok tumang do uhurhu halani ai.” Lambin magodang, lambin  urah ma ia manggila janah lang sabar. Gabe pangedar narkoba homa ia. Halani ai, itangkap ma ia anjaha ipenjara sadokah martahun-tahun. Sanggah ipenjara, dong ma Saksi Jahowa na marbarita hujai janah marlajar Bibel ma si Nabiha pakon sidea. Halani na marlajar ai, marusaha ma si Nabiha mambahen parubahan. Ia mangkatahon, “Dong do piga-piga hasomalan na sambor na urah hutadingkon. Tapi na payah tumang huahap ai ma maronti mangissop.” Lobih ma satahun si Nabiha marusaha ase lang be mangissop. Aha do na mangurupi ia ase boi mangkorjahon ai? Nini ma, “Tongtong do ahu martonggo ase iurupi Jahowa. Pos do uhurhu, anggo ahu boi mambahen parubahan ase malas uhur ni Jahowa, tontu sonai ma homa na legan!” *

18. Domu bani 1 Korint 6:9-11, aha do na boi ihorjahon juakjuak ni Naibata?

¹⁸ Bani abad na parlobei, adong piga-piga dalahi pakon naboru na ipilih Jahowa laho mamarentah rap pakon Jesus. Hape sihorjahon na butak hinan do sidea. Umpamani, ihorjahon sidea do seks na so patut, homoseksual, ampa manangko. Tapi marhitei pangurupion ni Naibata boi do sidea mambahen hamubahon. (Basa 1 Korint 6:9-11.) Sonai homa sonari on, halani marlajar Bibel adong marjuta halak na iurupi mambahen hamubahon. * Boi do itadingkon sidea hasomalan na sambor age pe lang urah mangkorjahon ai. Ganup contoh ai patuduhkon boi do homa ham mambahen hamubahon janah manadingkon hasomalan na sambor ase boi ididi.

19. Aha ma na laho iulas hita bani artikel na mangihut?

¹⁹ Dong ope na porlu ihorjahon sidea na laho ididi. Sobali mananggalhon parlahou na buruk, porlu do homa sidea marparlahou na baru. Bani artikel na mangihut iulas hita ma sonaha carani, janah aha do na boi mangurupi hita mangkorjahon ai.