Gabe sonai ma sungkun-sungkun ni halak anggo lang dear ipardiateihon sanggah mambasa saritani. Hape adong dua halak na margoran si Mepiboset bani ayat ai. Anjaha, humbani sarita ai dong parlajaranni banta.

Dong pitu halak anak ni Raja Saul anjaha dong dua boruni. Si Jonatan do goran ni anakni na sikahanan. Dob ai dong use anakni na margoran si Mepiboset, na itubuhkon si Rispa gundikni ai. Tapi si Mepiboset do homa goran ni anak ni si Jonatan. Jadi, adong anak ni Raja Saul margoran si Mepiboset anjaha dong homa pahompuni margoran si Mepiboset.

Bani sada panorang, masogam ma uhur ni Raja Saul mangidah halak Gibeon na marianan i tongah-tongah ni halak Israel, janah marusaha ma ia mamunuh sidea ganupan. Janah bahat do ra sidea na domma ibunuh. Sasintongni, salah do pambahenanni ai halani bani panorang ni si Josua, ganup kopala ni halak Israel domma marpadan ase mardamei pakon halak Gibeon.—Jos. 9:3-27.

Marlaku ope parpadanan ai bani panorang ni si Saul. Age pe sonai, marusaha do si Saul laho mamunuh ganup halak Gibeon. Gabe mardousa ma si Saul pakon kaluargani halani ai. (2 Sam. 21:1) Ujungni gabe raja ma si Daud. Jadi ipatugah halak Gibeon ma pasal ai hu bani. Isungkun si Daud ma aha do na laho bahenonni laho manggalar dousa ni si Saul ai ase boi ipasu-pasu Jahowa use nagori Israel. Lang ipindo sidea duit, tapi ipindo ma ase ibunuh pitu halak ginompar ni halak na “mansurahon maniapkon” sidea. (2 Sam. 21:2-6) Jadi ibere si Daud ma pangindoan ni sidea ai.—4 Mus. 35:30, 31.

Sanggah ai, domma matei si Saul pakon si Jonatan ibagas parporangan. Tapi manggoluh ope si Mepiboset anak ni si Jonatan ai. Cacat do si Mepiboset halani ongga madabuh ia sanggah dakdanak. Janah lang dihut ia sanggah ompungni mamunuh halak Gibeon ai. Leganni ai, domma marjanji homa si Daud pakon si Jonatan hasomanni ai, laho manjaga ganup ginompar ni si Jonatan, tarmasuk ma si Mepiboset. (1 Sam. 18:1; 20:42) Bibel mangkatahon, ‘Ihaholongi Raja Daud do si Mepiboset, anak ni si Jonatan, pahompu ni si Saul, halani sumpahni bani Jahowa.’—2 Sam. 21:7.

Age pe sonai, itangihon si Daud do pangindoan ni halak Gibeon ai. Ibere ma dua anak ni si Saul pakon lima pahompuni. Sada anakni ai margoran si Mepiboset. (2 Sam. 21:8, 9) Halani pambahenan ni si Daud ai, gabe ipasu-pasu ma use nagori ai.

Sedo pitah sarita tumang on, tapi dong do homa parlajaranni. Bani titah ni Naibata tangkas do ihatahon, ‘Seng bulih marutang hosah anak halani bapani.’ (5 Mus. 24:16) Anggo lang marsalah dua anak ni Saul pakon lima pahompuni ai, tontu lang setuju Jahowa anggo sidea ibunuh. Ihatahon do use bani titah ai, ‘Ganup halak maningon matei halani dousani bei.’ Jadi, dihut do ra martanggung jawab pitu ginompar ni si Saul ai sanggah ibunuh halak Gibeon. Halani ai maningon igalar sidea ma dousani ai.

Aha ma parlajaranni? Sanggah ihorjahon sasahalak dousa, lang boi ia marpingkir atap mangkatahon lang salah pambahenanni ai halani pitah mangihutkon parentah do ia. Maningon martanggung jawab do ia bani pambahenanni ai. Bibel mangkatahon, “Pardiateihon ma panlangkah ni naheimu, ase tarjamin ganup dalanmu.”—Pod. 4:24-27; Ep. 5:15.