HAPORSAYAON boi mampargogohi hita. Umpamani, sanggah Sibolis marusaha pasedahon parhasomananta dompak Jahowa, marhitei haporsayaon ‘tarintopi hita do haganup panah apuy ni parjahat in’. (Ep. 6:16) Marhitei haporsayaon, sonaha pe banggalni parsoalan boi do iatasi hita. Jesus mangkatahon, “Anggo adong haporsayaonnima na sabatu ni losabi, hatahononnima do bani dolog an: Mosor ma hunjon hujai, gabe saud do mosor ai.” (Mat. 17:20) Halani ponting tumang haporsayaon ai laho paorotkon parhasomananta dompak Jahowa, rimangi hita ma sungkun-sungkun on: Aha do haporsayaon in? Aha do pengaruhni na dong ibagas uhurta hubani haporsayaonta? Sonaha hita boi patoguhkon haporsayaonta? Anjaha hubani ise ma hita marhaporsayaon?​—Rom 4:3.

Na ihatahon marhaporsayaon sedo pitah porsaya bani aha na ihatahon Bibel, halani “setan-setan pe porsaya do [adong Naibata] anjaha hitir-hitir”. (Jak. 2:19) Anggo sonai, aha do haporsayaon ai?

Ibagas Bibel arti ni haporsayaon ai ibagi gabe dua bagian. Na parlobei, haporsayaon ai ma “tenger ni uhur bani siarapkononkon”. (Heb. 11:1a) Anggo dong haporsayaonmu, tontu porsaya do ham sintong do ganup hata ni Jahowa janah porsaya do ham pasti saud do ai. Umpamani, ihatahon Ia do bani halak Israel, “Songon na so boi [iparontihon hanima] padan-Ku na bani torang ari ampa padan-Ku na bani borngin, gabe seng roh arian ampa borngin bani panorang na dob tinontuhon bani, sonai ma seng tarparontihon padan-Hu na bani si Daud juakjuak-Kai.” (Jer. 33:20, 21) Ai ongga do haru nasiam lang marsinalsal be mata ni ari mambahen lang margantih be arian pakon borngin? Anggo pos do uhurmu totap do tanoh on manginggoti mata ni ari, tontu porsaya do ham anggo Jahowa Sitompa in boi pasaudkon ganup janji-Ni.​—Jes. 55:10, 11; Mat. 5:18.

Na paduahon, haporsayaon ai ma “mambahen torang pasal na so nididah”. (Heb. 11:1b) Aha do maksudni ai? Bayangkon ma dong dakdanak na manungkun, ‘Hunja do ibotoh hita dong logou ai?’ Hassi pe lang ongga ididah ham logou ai, tapi boi do ham mambuktihon dong do logou ai marhitei hosah, pangaruh ni logou, ampa na leganni. Anggo domma porsaya ia tongon do adong logou, gabe iarusi ia ma masuk akal do porsaya bani aha na lang boi ididah. Sonai ma homa haporsayaon ai boi adong halani domma ibuktihon.​—Rom 1:20.

Mardingat porlu do bukti ase adong haporsayaon, maningon ibotoh sasada halak ma lobei “hasintongan in” ase boi ia marhaporsayaon. (1 Tim. 2:4) Tapi lang sungkup pitah ai. Apostel Paulus manuratkon, “Marhitei uhur do halak porsaya.” (Rom 10:10) Sobali porsaya, maningon ihargai do homa hasintongan ai. Dob ai, gabe tarojur ma ia patuduhkon haporsayaon ai marhitei mandalankon aha na dob iparlajarisi. (Jak. 2:20) Anggo sasada halak lang mangkargai hasintongan humbani borsih ni uhurni, tontu lang ra ia manjalo  hasintongan ai. Atap sai adong do sidalianni ase ulang mandalankon ai. (2 Ptr. 3:3, 4; Jud. 18) Sapari pe, lang ganup halak na mangidah halongangan boi gabe marhaporsayaon. (4 Mus. 14:11; Joh. 12:37) Anggo sasada halak tongon-tongon mangkaholongi hasintongan, urupan ni tonduy na pansing do ia ase marhaporsayaon.​—Gal. 5:22; 2 Tes. 2:10, 11.

Si Daud ma sada contoh halak na toguh marhaporsayaon. (Heb. 11:32, 33) Tapi lang ganup saninani patuduhkon haporsayaon songonsi. Umpamani, taridah do lang dong haporsayaon ni si Eliab, abangni ai, sanggah manggila ia hubani si Daud na sihol manlawan si Goliat. (1 Sam. 17:26-28) Haporsayaon ai sedo iboan tubuh, janah sedo homa tean-teanon humbani namatoras. Jadi, marhaporsayaon pe si Daud, halani orot do parhasomananni pakon Jahowa.

Bani Psalmen 27, ipatugah si Daud do mase toguh haporsayaonni. (Ayat 1) Irimangi ia do pangalamanni na hinan ampa sonaha Jahowa mangurupisi manlawan munsuhni. (Ayat 2, 3) Ihargai ia do pangaturan ni Jahowa pasal panumbahan. (Ayat 4) Laho do ia hu tabernakel laho manombah Naibata rap pakon hasomanni sahaporsayaon. (Ayat 6) Ringgas do ia martonggo. (Ayat 7, 8) Sihol do homa ia ase iajarhon hu bani pasal dalan ni Naibata. (Ayat 11) Jadi ponting tumang do haporsayaon ai bani si Daud. Halani ai ihatahon ia ma, “Sonaha ma anggo lang marhaporsayaon ahu?”​—Ayat 13, Terjemahan Dunia Baru.

Nasiam pe boi toguh marhaporsayaon songon si Daud anggo mandalankon aha na ipatugah bani Psalmen 27 nongkan ai. Lambin iarusi ham hasintongan, lambin toguh ma haporsayaonmu. Anggo ringgas ham marlajar Bibel ampa publikasi na ipasirsir organisasi, lambin urah ma ham patuduhkon haporsayaon. (Ps. 1:2, 3) Bahen ma panorang laho manrimangi na iparlajari. Hasilni, lambin martarima kasih ma ham bani Jahowa. Gabe tarojur ma ham patuduhkon haporsayaon marhitei ringgas martumpu ampa marbarita. (Heb. 10:23-25) Taridah do homa haporsayaonmu anggo ‘tongtong ham martonggo, janah seng bulih lengah’. (Luk. 18:1-8) Anggo “totap martonggo”, gabe porsaya ma ham ‘isarihon Jahowa do ham’. (1 Tes. 5:17; 1 Ptr. 5:7) Jadi, haporsayaon mangojur hita mangkorjahon na sintong. Anggo ihorjahon hita na sintong, gabe toguh ma haporsayaonta.​—Jak. 2:22.

Bani borngin paima matei Jesus, ia mangkatahon, “Porsaya ma hanima bani Naibata, anjaha porsaya ma homa bangku!” (Joh. 14:1) Jadi, sobali porsaya bani Jahowa, porlu do homa hita porsaya  bani Jesus. Sonaha carani? Pardiateihon hita ma tolu cara laho patuduhkon haporsayaon bani Jesus.

Na parlobei, ahapkon ma anggo tobusan ai sibere-bere ni Naibata hu bamu sandiri. Si Paulus mangkatahon, “Ia manggoluh pe ahu . . . manggoluh ibagas haporsayaon bani Anak ni Naibata, na mangkaholongi ahu anjaha na mamberehon dirini mangkopkop ahu.” (Gal. 2:20) Anggo porsaya ham bani Jesus, tontu tongon-tongon do ham porsaya anggo tobusan ai boi mangurupi ham mandapot hasasapan ni dousa ampa pangarapan hagoluhan sadokah ni dokahni. Porsaya ma homa ham marhitei tobusan do Jahowa patuduhkon holong-Ni na sibanggalan. (Rom 8:32, 38, 39; Ep. 1:7) Hasilni lang be lalab manolsoli diri ham.​—2 Tes. 2:16, 17.

Na paduahon, padohor ma bani Jahowa marhitei tonggo. Hita boi martonggo halani dong tobusan ni Jesus. Halani ai ma boi ma hita marhinsah ni uhur martonggo bani Jahowa, ase dapotan “idop ni uhur hita bahen pangurupion bani panorang haporluanni”. (Heb. 4:15, 16; 10:19-22) Jadi marhitei tonggo ipargogohi do hita ase ulang mangkorjahon na salah sanggah dong parlajouan.​—Luk. 22:40.

Na patoluhon, tangihon atap balosi ma Jesus. Apostel Johannes manuratkon, “Na porsaya bani Anak in, dapotan hagoluhan na sadokah ni dokahni, tapi na so mambalosi Anak in, seng idahonni ai hagoluhan, tapi ringis ni Naibata do totap bani.” (Joh. 3:36) Pardiateihon ma, ijon ibandingkon do na porsaya ai pakon na so mambalosi. Jadi anggo ibalosi ham Jesus, dos do ai ham porsaya hu bani. Sonaha carani mambalosi Jesus? Marhitei mandalankon “titah ni Kristus” atap ganup na iajarhon ampa na iparentahkon ia. (Gal. 6:2) Ibalosi ham do homa Jesus anggo idalankon ham tugah-tugah na ibere marhitei “juakjuak na bujur anjaha na maruhur”. (Mat. 24:45) Anggo ibalosi ham Jesus, gabe boi ma ham martahan sanggah roh hasunsahan songon logou na doras.​—Mat. 7:24, 25.

Dong sada dalahi na mangkatahon bani Jesus, “Porsaya do ahu! Urupi ham ma ahu na so marhaporsayaon on.” (Mrk. 9:24) Sasintongni, dong do haporsayaon ni dalahi ai. Tapi halani toruh maruhur, ihatahon ia ma porlu do ia iurupi ase marhaporsayaon. Dos songon dalahi ai, sai adong do situasi na mambahen hita porlu iurupi ase tambah haporsayaonta. Jadi humbani sonari patoguh hita ma haporsayaonta. Songon na dob iulas hita, hita boi patoguhkon haporsayaon marhitei marlajar Bibel, manrimangi aha na dob iparlajari, ampa martarima kasih hubani Jahowa. Lambin tambah do haporsayaonta sanggah hita martumpu rap pakon hasoman sahaporsayaon, marbarita, janah totap martonggo. Hasilni, dapot hita ma pasu-pasu. Bibel mangojur hita, “Nasiam na hinaholongan, pauli-uli nasiam ma diri nasiam i atas ni haporsayaon nasiam na pansing in . . . Ramotkon nasiam ma diri nasiam ibagas holong ni uhur ni Naibata.”​—Jud. 20, 21