1. Aha do na iharosuhkon hita pasal kaluarganta?

HASOMANTA si Paula * mangkatahon, ‘Sihol do uhurhu ase hanami sakaluarga boi masuk hu Paradeiso. Anggo boi namin si William suamiku, pakon anakku rup mangidangi Jahowa.’ Ai adong do kaluarga nasiam na lang sisombah Jahowa? Tontu ra do sarupa pangahapmu pakon si Paula, sihol do homa nasiam ase sidea pe dihut manombah Jahowa.

2. Bani artikel on, sungkun-sungkun aha do na laho iulas hita?

² Lang boi ipaksa hita kaluarganta ase manombah Jahowa. Tapi boi do hita totap mangojur sidea ase mamingkirhon isi ni Bibel janah ra mandalankon podahni. (2 Tim. 3:14, 15) Jadi mase ma hita porlu marbarita bani sidea? Mase porlu ipatuduh hita uhur na sapangahapan? Sonaha carani mangurupi sidea ase ra mananda Jahowa? Anjaha sonaha sanina botou i kuria boi mangurupi hita?

3. Domu bani 2 Petrus 3:9, mase hita porlu marbarita bani kaluarganta?

³ Tongkin nari laho iripaskon Jahowa ma dunia na jahat on. Anjaha pitah halak na talup manggoluh “sadokah ni dokahni do” na maluah. (Lah. 13:48) Halani ai marusaha do hita marbarita bani ganup halak. Gari bani halak na legan pe hita marbarita, tontu sihol do homa hita marbarita bani kaluarganta. Anjaha Jahowa, Bapanta sihol do Ia ase “ulang ma magou namin atap ise pe, tapi das ma  haganup tene hu hamubahon ni uhur”.​—Basa 2 Petrus 3:9.

4. Hasalahan aha do ra na ibahen hita sanggah marbarita bani kaluarganta?

⁴ Sanggah marbarita basar do hita bani halak na lang itanda. Tapi ra do lang sonai ibahen hita bani kaluarganta, ra songon na manggurui do hita bani sidea. Halani ai maningon basar do homa hita sanggah marbarita bani kaluarganta.

5. Aha na porlu idingat sanggah laho marbarita hubani kaluarganta?

⁵ Anggo idingat hita sonaha caranta na baru on marbarita hubani kaluarganta, ra do ibotoh hita hurang dear do hape caranta ai. Ra do homa mandaoh hita humbani sidea. Halani ai gabe lang boi iurupi hita sidea. Tapi laho marbarita hubani kaluarganta, dong podah na jenges na ibere apostel Paulus, “Sai tongtong ma jenges hata nasiam, songon na ginaraman, ase ibotoh nasiam, sonaha patut marbalos bani ganup halak.”​—Kol. 4:5, 6.

6-7. Bere ma contoh mase hita porlu patuduhkon uhur na sapangahapan bani pasanganta na lang Saksi.

⁶ Patuduhkon uhur na sapangahapan. Si Paula mangkatahon, “Mungkahni ahu marlajar Bibel, pasal Bibel ampa Naibata do na lalab husaritahon bani suamiku. Lang adong pasal na legan na husaritahon.” Tapi si William, suamini lang sai ibotoh isi ni Bibel. Halani ai lang sai iarusi ia na isaritahon istrini ai. Pandapot ni si William, istrini ai pitah mamingkirhon agamani dassa. Haru do uhurni atap na domma kahou do istrini halani ajaran sesat.

⁷ Si Paula mangakui anggo ia gatinan  rap pakon sanina botou. Umpamani martumpu, marbarita, janah dihut ramah tamah. Ihatahon si Paula, “Sanggah mulak si William hu rumah, lang i rumah hanami. Halani ai gabe lungunan ma ia.” Tontu siholan do si William ase boi rup pakon istri ampa anakni i rumah. Anjaha lang homa ibotoh ise hasoman ni istrini. Pangahapni domma holongan istrini hubani hasomanni marimbangkon hubani. Jadi ipangindo ia ma ase marsirang sidea. Pandapot ni nasiam sonaha ma namin bahenon ni si Paula ase ulang sonai situasini?

8. Domu bani 1 Petrus 3:1, 2, aha do na gati mangurupi kaluarganta ra manjalo barita na madear?

⁸ Patuduh ma parlahou na madear. Somalni, parlahouta do na gati ipardiateihon halak marimbangkon aha na ihatahon hita. (Basa 1 Petrus 3:1, 2.) Ai ma na ujungni ibotoh si Paula. Nini do, “Holong do uhur ni si William bannami. Janah sasintongni lang ra ia marsirang.” Jadi halani situasi ai gabe iarusi si Paula ma porlu do ia mandalankon podah ni Bibel ibagas parhajabuanni. Dob ai nini homa, “Marimbangkon lalab ahu mansahapkon Bibel, dearan ma hubahen siusihan na madear.” Jadi sanggah si Paula marbuali pakon suamini, lang be lalab ia mangulas pasal Bibel. Ujungni, ididah si William ma domma lambin bujur si Paula hu bani. Anakni pe lambin unduk do hu bani. (Pod. 31:18, 27, 28) Halani ididah ia lambin dear do kaluargani dob marlajar Bibel, gabe ra ma ia marlajar.​—1 Kor. 7:12-14, 16.

9. Mase lang marnaloja hita mangurupi kaluarganta?

⁹ Ulang ma marnaloja mangurupi sidea.  Tiru hita ma Jahowa. “Marulak-ulak” do Ia mangurupi na legan ase ra manangar barita na madear janah mandapot hagoluhan sadokah ni dokahni. (Jer. 44:4) Si Timoteus pe tongtong do iojur si Paulus ase totap mangurupi na legan. Mase porlu ibahen ia sonai? Halani ai do na boi paluahkon dirini sandiri pakon halak na ra manangihon baritani. (1 Tim. 4:16) Hita pe holong do uhurta hubani kaluarganta, tontu sihol do hita homa ase ra sidea manjalo hasintongan. Songon si Paula, halani totap ia mambahen na madear ujungni gabe ra kaluargani manjalo hasintongan. Sonari sidea na dua domma gabe parintis anjaha suamini mangidangi gabe sintua.

10. Mase maningon sabar hita?

¹⁰ Totap ma sabar. Ra do lang marosuh kaluarganta mangidah parubahanta halani mangihutkon prinsip ni Bibel. Umpamani hita lang be dihut bani ari raya ni sidea ampa politik. Gabe manggila ma sidea halani ai. (Mat. 10:35, 36) Hassi pe sonai, ulang ma iahap hita anggo sidea ai lang boi mubah, janah lang talup mandapot hagoluhan sadokah ni dokahni. Anggo lang ra hita marbarita hubani sidea, dos do artini ai hita domma manguhumi sidea. Dingat ma, Jesus do na ibere kuasa humbani Jahowa laho manguhumi halak. (Joh. 5:22) Tapi anggo totap hita sabar mangurupi sidea, ujungni gabe ra ma sidea manangar baritanta.​—Tonggor ma kotak “ Gunahon ma Situs Webta laho Mangajar.”

11-13. Aha na boi iparlajari hita humbani pangalaman ni si Elis?

¹¹ Totap ma bujur janah toguh. (Pod. 15:2) Pardiateihon hita ma pangalaman ni si Elis. Ia marlajar Bibel sanggah ia domma lang be tading pakon namatorasni. Bapani ateis janah dihut homa bani politik. Tapi ibotoh si Elis do anggo ia maningon podas patugahkon aha na dob iparlajarini hubani namatorasni. Nini ma, “Anggo ipadokah-dokah nasiam patugahkon aha na dob iparlajari ham bani namatorasmu, ra do gabe lambin tarsonggot holi sidea.” Itulis ia ma surat hubani namatorasni. Ibagas suratni, iulas ia ma topik-topik hun Bibel na boi mambahen bapani gabe tartarik, umpamani pasal holong. (1 Kor. 13:1-13) Dob ai, martarima kasih do ia bani namatorasni halani domma dear ia ipagodang. Anjaha ibere homa hadiah hubani sidea. Sanggah mulak ia hu rumahni, iurupi ia do inangni horja i rumah. Tapi sanggah ipatugah si Elis pasal aha na iparlajari ia hubani namatorasni, lang marosuh sidea manangar ai.

¹² Sanggah i rumah ni namatorasni pe, totap do si Elis mambasa Bibel. Ia mangkatahon, “Hubahen sonai ase iarusi inangku, ponting tumang do Bibel ai bakku.” Sungkun-sungkun do homa uhur ni bapani mase boruni gabe mubah. Anjaha sihol do homa ia mambuktihon salah do isi ni Bibel. Jadi nini si Elis ma, “Hubere ma Bibel bani bapa ampa hubahen homa satatan ibagas.” Sonaha hasilni? Lang adong jumpah bapani ai na salah ibagas Bibel. Tapi, gabe marosuh do ia mambasa Bibel.

¹³ Totap ma hita toguh hassi pe dong tantangan na borat. (1 Kor. 4:12b) Songon si Elis nongkan ai, igilai inangni do ia. Ia mansaritahon, “Dobkonsi ahu ididi, ihatahon inangku bakku, ‘Lang boruku be ho!’” Aha ma na ibahen si  Elis? Ihatahon ia use, “Lamlam do hupatorang bani inangku anggo ahu marosuh gabe Saksi Jahowa. Lang ra be ahu mubah. Anjaha huhatahon bani inang, totap do holong uhurhu hu bani. Gabe tangis ma hanami na dua. Dob ai hulompah ma sipanganon na mantin. Ujungni, iakui inang do anggo ahu gabe halak na lambin bujur dobkonsi marlajar Bibel.”

14. Mase lang ra hita mangihutkon haputusan na lang sosok pakon harosuh ni Jahowa?

¹⁴ Ra do lang mintor iarusi kaluarganta mase ponting tumang pangahapta mangidangi Jahowa. Umpamani songon si Elis nongkan, lang ra ia mamilih horja na iharosuhkon namatorasni halani sihol do ia gabe parintis. Gabe tangis ma use inangni ai. Si Elis mangkatahon, “Anggo domma sahali iihutkon hita haputusan ni kaluarganta na lang sosok pakon harosuh ni Jahowa, lambin bahat ma holi na ipangindo sidea. Tapi anggo totap do hita toguh janah lamlam patorangkon haputusanta, ujungni iarusi sidea ma ai.” Ai ma na iahapkon si Elis. Sonari namatorasni domma gabe parintis, anjaha bapani gabe sintua do homa.

15. Domu bani Mateus 5:14-16 pakon 1 Petrus 2:12, sonaha pambahenan ni sanina botou boi mangurupi kaluarganta manjalo hasintongan?

¹⁵ Jahowa boi manogu halak hubagas organisasi-Ni marhitei ‘horjanta na madear’. (Basa Mateus 5:14-16; 1 Petrus 2:12.) Anggo dong pasanganmu na lang Saksi, ai ongga do ia marsitandaan pakon sanina botou? Ai ma na ibahen si Paula, iontang ia ma sanina botou hu  rumahni ase si William boi marsitandaan pakon sidea. Ujungni, ibotoh suamini ma domma salah pandapotni pasal sanina botou. Nini si William ma, “Dong sada sanina na cuti hun horjani ase boi hanami rup manonton bola i rumahku. Halani ai nini uhurhu ma, ‘Sarupa do hape harosuhnami.’”

16. Mase hita porlu mangontang kaluarganta ase roh hu partumpuan?

¹⁶ Sada cara na dear hita boi mangurupi kaluarganta, ai ma mangontang sidea hu partumpuan. (1 Kor. 14:24, 25) Songon si William nongkan ai, ujungni dihut ma ia hu acara Pardingatan, janah ai do parlobei sahali ia martumpu. Ia boi dihut halani domma mulak horja janah tongkin do homa acara ai. Nini si William ma, “Sasintongni anggo isi ni ambilan ai, lang pala adong na hudingat. Tapi na hudingat, ialo-alo sidea do ahu janah gomos isalam tanganku. Bujur do sidea bakku.” Anjaha adong sapasang suami istri na gati mangurupi si Paula pakon anakni sanggah sidea martumpu atap pe marbarita. Jadi sanggah si William sihol mambotoh roh bahatni aha na iparlajari istrini, ipangindo ia ma marlajar Bibel bani pasangan nongkan ai.

17. Anggo kaluarganta lang ra manombah Jahowa, mase ulang maretek ni uhur hita, anjaha mase hita ulang marnaloja mangurupi sidea?

¹⁷ Sihol do uhurta ase ganup kaluarganta manombah Jahowa. Tapi hassi pe domma marusaha hita mangurupi sidea, ra do totap sidea lang ra mangidangi Jahowa. Ulang ma maretek ni uhur hita halani ai. Lang boi ipaksa hita sidea manombah Jahowa. Tapi anggo ididah sidea malas do uhurta mangidangi Jahowa, ra do halani ai gabe mubah sidea. Tonggohon ma janah totap sabar ampa lamlam sanggah patorangkon aha na ihaporsayai nasiam bani sidea. Ulang ma marnaloja mangurupi sidea. (Lah. 20:20) Porsaya ma nasiam, ipasu-pasu Jahowa do na ibahen nasiam ai. Anggo ra sidea manangihon ham, gabe maluah ma sidea.