AI SIHOL do uhurmu boi mangkorjahon tugas ibagas organisasi, hape lang tarbahen ham ai sonari? Ra do ham sihol mandapot tugas songon na ihorjahon sanina na legan. Atap sihol do ham boi totap mangidangi sepenuh waktu songon na hinan. Tapi ra do halani hasehaton, umur, parduiton, atap pe tanggung jawab kaluarga gabe lang boi ham mangidangi sepenuh waktu. Boi homa halani adong parubahan ibagas organisasi, gabe maronti ma ham humbani tugasmu. Halani ai, ra do pangahapmu ham lang be mambere na sidearan bani Jahowa. On boi mambahen ham gabe maretek ni uhur. Anggo sonai, aha do na boi mangurupi ham ase ulang lalab maretek ni uhur atap mandolei? Anjaha, aha na maningon ibahen ham ase totap marmalas ni uhur?

Hita boi maniru si Johannes Pandidi. Bahat do tugas na ibere Jahowa hu bani. Tapi sompong adong tantangan na roh hu bani. Tontu lang isangka si Johannes dokahan do ia i penjara marimbangkon mangidangi. Hassi pe sonai, totap do si Johannes mamingkirhon na madear ibagas pangidangionni janah marmalas ni uhur ronsi matei. Mase boi sonai ia? Aha na boi ibahen hita ase totap marmalas ni uhur hassi pe dong tantangan?

Bani bulan April tahun 29 M, itugaskon do si Johannes mamungkah dalan bani Mesias. Nini ma, “Paubah nasiam ma uhur nasiam, ai domma dohor Harajaon nagori atas in!” (Mat. 3:2; Luk. 1:12-17) Bahat na manjalo barita ai. Adong na roh humbani ianan na daoh laho manangar barita ai anjaha ra sidea mubah janah ididi. Pangkar do homa si Johannes pasingatkon pambobai ugama na mamontingkon diri anggo lang mubah sidea, uhumon ni Naibata ma sidea holi. (Mat. 3:5-12) Tugasni na sipontingan ai ma sanggah ididi ia Jesus bani bulan Oktober tahun 29 M. Dob ai, iojur ia ma halak ase mangihutkon Jesus, Mesias na ijanjihon ai.​—Joh 1:32-37.

Ihatahon Jesus pasal si Johannes, “Humbani jolma, na itubuhkon humbani naboru, seng dong na bangkit banggalan marimbang si Johannes Pandidi.” (Mat. 11:11) Hunjon taridah ma bahat  do pasu-pasu na ijalo si Johannes. Sonari on pe buei do homa sanina botou na mandapot bahat pasu-pasu. Umpamani, si Terry pakon si Sandra na mangidangi sepenuh waktu sadokah 50 tahun. Nini si Terry, “Bahat do pasu-pasu na iahapkon hanami. Ongga do hanami gabe perintis biasa, mangidangi i Betel, gabe perintis istimewa, sintua kaliling, pengawas distrik, anjaha sonari gabe perintis istimewa do use hanami.” Tontu malas do uhurta boi mandapot tugas ibagas organisasi ni Jahowa, tapi songon si Johannes, sipata lang urah ase hita totap marmalas ni uhur sanggah dong parubahan.

Na mambahen si Johannes boi totap marmalas ni uhur ai ma tongtong do ia mangkargai tugas aha pe na ibere hu bani. Contohni, dobkonsi Jesus ididi, lambin otik do na mangirikkon si Johannes tapi lambin bahat do na mangirikkon Jesus. Halani ai, ihatahon susianni ma bani si Johannes, “Tonggor ham ma, mandidihon do [Jesus] nuan, anjaha marrohan do ganup halak Bani.” (Joh. 3:26) Ibalosi si Johannes ma, “Simada tunangan, ai do siparunjuk. Ia huan-huan ni siparunjuk, na jongjong patangi-tangisi, marmalas ni uhur do halani sora ni siparunjuk ai. Malas ni uhur na sonai do na adong bangku.” (Joh. 3:29) Jadi si Johannes lang marpingkir soya-soya do horjani halani bahatan do na ihorjahon Jesus. Tapi totap do ia marmalas ni uhur halani tugasni gabe “huan-huan ni siparunjuk”.

Halani na madear do na ipingkirhon si Johannes, gabe totap ma ia marmalas ni uhur hassi pe lang urah mangkorjahon tugasni. Humbani tubuh, ia domma ibahen gabe halak Nasir. Halani ai, lang boi ia manginum anggur. (Luk. 1:15) Jesus mangkatahon anggo ‘si Johannes seng parmangan ampa seng parminum’. Tapi anggo Jesus pakon susianni lang mangihutkon larangan na ibahen bani halak Nasir. (Mat. 11:18, 19) Anjaha si Johannes lang boi mambahen tanda halongangan. Tapi susian ni Jesus tarmasuk ma halak na ongga mangirikkon si Johannes, ibere do kuasa bani sidea. (Mat. 10:1; Joh. 10:41) Hassi pe sonai lang pusok uhur ni si Johannes, tapi totap do ia ringgas marhorja bani Jahowa.

Anggo marusaha hita mangkargai tugas aha pe na ibere hubanta, hita boi totap marmalas ni uhur. Ihatahon si Terry do, “Marusaha do ahu pongkut mangkorjahon tugas-tugas na ibere hubakku”. Jadi anggo ia mardingat pangidangionni sadokah on, malas ni uhur do na iahapkonni lang adong na isolsoli ia.

Hita boi totap marmalas ni uhur anggo idingat hita aha do sasintongni na mambahen tugasta maharga. Sada hasangapon do banta boi gabe ‘hasoman sahorja ni Naibata’. (1 Kor. 3:9) Umpamani, anggo adong barang na iharosuhkon ham, tontu gati do iurus ham ase boi totap jenges barang ai. Usih sonai ma, ase boi hita totap marmalas ni uhur, tongtong ma dingat hasangapon na dong banta boi gabe hasoman sahorja ni Naibata. Halani ai ulang ibandingkon hita aha na dob ibahen hita pakon sanina na legan. Anjaha ulang iahap hita tugasta lang ponting marimbangkon tugas ni sanina na legan.​—Gal. 6:4.

Ra do domma ibotoh si Johannes lang dokah holi pangidangionni. Tapi ra do lang isangka-sangka ia sonaha ujungni pangidangionni. (Joh. 3:30) Bani tahun 30 M, hira-hira onom bulan dobkonsi si Johannes mandidi Jesus, ipenjarahon Raja Herodes ma ia. Tapi totap do ia marusaha ase boi torus mangidangi. (Mrk. 6:17-20) Aha do na mangurupi ia boi totap marmalas ni uhur bani situasi ai? Totap do ipingkirhon ia aha na iharosuhkon Jahowa.

Sanggah si Johannes i penjara, itangar ia ma aha na ibahen Jesus ibagas pangidangionni. (Mat. 11:2; Luk 7:18) Porsaya do si Johannes anggo Jesus ai do Mesias. Tapi sungkun-sungkun do ia sonaha holi Jesus pasaudkon ganup panjahaion pasal Mesias. Ibotoh si Johannes do gabe Raja do holi Mesias ai. Ra do sungkun-sungkun ia attigan do ai saud? Ai tongkin nari do? Ai ipaluah Jesus do ia holi hun penjara? Halani sihol mambotoh balosni, isuruh ia  ma dua susianni manungkun bani Jesus, “Ai ham do na sihol roh in, atap na legan ope paimaonnami?” (Luk. 7:19) Dobkonsi mulak susianni ai, isaritahon sidea ma anggo Jesus domma mambahen tanda halongangan. Pasti do iparuhurhon si Johannes balos ni Jesus, “Na gabe marpangidah do na mapitung, mardalani na repat, gabe borsih na gadamon, marpanangar na nengel, mulak manggoluh na matei, Ambilan Na Madear iambilankon do bani halak na masombuh.”​—Luk. 7:20-22.

Gabe toguh ma uhur ni si Johannes dob manangar balos ni Jesus. Lambin porsaya ma ia anggo Jesus laho pasaudkon ganup panjahaion pasal Mesias. Hassi pe ibotohni lang maningon ipaluah Jesus ia, tapi pos do uhurni lang soya-soya ganup horjani sadokah on. Jadi lang soal sonaha situasini, sai tongtong do adong na mambahen malas uhurni.

Songon si Johannes, anggo pongkut hita mangidangi Naibata gabe boi ma hita martahan ibagas malas ni uhur ampa hasabaron. (Kol. 1:9-11) Anggo ibasa hita Bibel janah irimangi, lambin idingat hita ma lang soya-soya na dob ibahen hita hubani Jahowa. (1 Kor. 15:58) Si Sandra mangkatahon, “Hubasa do Bibel sada bindu sadari, hasilni lambin dohor do ahu bani Jahowa. Gabe Jahowa do na hupingkiri, lang be pitah dirikku.” Anjaha anggo ipardiateihon hita laporan hun nagori na legan, on mambahen hita lang lalab mamingkirhon situasinta, tapi sonaha Jahowa pasaudkon harosuh-Ni sonari on. Nini si Sandra homa, “Acara JW Broadcasting^® tiap bulan mangurupi hanami lambin dohor bani organisasi ni Jahowa janah marmalas ni uhur lang soal aha tugasnami sonari on.”

Ringgas do si Johannes marbarita songon si Elias hinan. Anjaha songon si Elias, ia pe ongga do mangahapkon aha na iahapkon hita sonari on. (Luk. 1:17; Jak. 5:17) Jadi anggo itiru hita si Johannes janah pongkut mangidangi Jahowa, gabe boi ma hita totap marmalas ni uhur lang soal aha pe na masa hubanta.