1. Ise do na pajongjongkon kuria i Pilippi?

SANGGAH si Paulus, si Silas, si Lukas, pakon si Timoteus das i Pilippi, bahat tumang halak ijai na marosuh manangar barita na madear. Ipajongjong sidea ma kuria ijai anjaha ra do sidea na baru ididi ai mambahen partumpuan i rumah ni si Lidia.​—Lah. 16:40.

2. Tantangan aha do na iahapkon kuria Pilippi?

² Lang piga dokah mintor adong ma tantangan na roh hu kuria ai. Ipengaruhi Sibolis ma halak ijai na lang marosuh bani barita na madear ase mangarsik-arsik si Paulus pakon hasomanni. Ujungni itangkap sidea ma si Paulus pakon si Silas, ilonsingi, janah ipenjarahon. Dobkonsi si Paulus pakon si Silas ipaluah, laho ma sidea manjumpahi sanina botou i kuria Pilippi laho patoguhkon sidea. Dob ai, misir ma si Paulus, si Silas, pakon si Timoteus hun huta ai, tapi anggo si Lukas ra do totap ope ijai. Jadi sonaha ma sanina botou i kuria Pilippi? Halani iurupi Jahowa sidea marhitei tonduy na pansing, totap do sidea ringgas mangidangi Jahowa. (Pil. 2:12) Tontu malas do uhur ni si Paulus manangar ai!

3. Domu bani Pilippi 1:9-11, aha do na itonggohon si Paulus?

³ Dobkonsi sapuluh tahun lobih, itulis si Paulus ma surat bani kuria i Pilippi. Ibagas suratni ai taridah do holong tumang si Paulus bani sidea. Nini do, “Banggal ni sihol hubani nasiam haganup marhitei holong ni atei ni Kristus Jesus.” (Pil. 1:8) Ipatugah ia homa anggo ia tongtong do manonggohon sidea. Ipangindo ia do bani Jahowa ase mangurupi sidea lambin marsihaholongan,  mananda na siporlunan, gabe lang martikas, lang mambahen hasomanni tartolsu, janah lambin marbuah. Tontu marguna do homa suratni ai hubanta sonari on. Basa hita ma suratni ai anjaha ulas hita ma sonaha mandalankon podahni ai.​—Basa Pilippi 1:9-11. *

4. (a) Domu bani 1 Johannes 4:9, 10, sonaha do Jahowa patuduhkon holong-Ni hubanta? (b) Maningon sonaha do holongta hubani Jahowa?

⁴ Banggal tumang do holong ni Jahowa hubanta. Isuruh Ia do Anak-Ni roh hu tanoh on laho manobus dousanta. (Basa 1 Johannes 4:9, 10.) Halani ai gabe holong homa hita hubani Jahowa. (Rom 5:8) Tapi maningon sonaha ma holongta hu Bani? Pardiateihon ma aha na ongga ihatahon Jesus hubani halak Parisei. Nini do, “Maningon haholonganmu do Tuhan Naibatamu humbani gok ni uhurmu, humbani gok ni tonduymu ampa humbani gok ni pingkiranmu.” (Mat. 22:36, 37) Jadi maningon humbani gok ni uhur ma hita mangkaholongi Jahowa. Sihol do hita ase lambin toguh holongta hu Bani. Anjaha songon na ihatahon si Paulus maningon ‘lambin marbanggal ma holongta’. Sonaha hita boi mandalankon ai?

5. Aha na maningon ibahen hita ase lambin banggal holongta bani Jahowa?

⁵ Ase hita boi mangkaholongi Jahowa, maningon itanda hita do lobei Ia. Bibel mangkatahon, “Halak na so marholong ni uhur, seng itanda Naibata, ai Naibata ai ma haholongon.” (1 Joh. 4:8) Jadi ase boi lambin banggal holongta hubani Naibata, ihatahon si Paulus do maningon adong ma banta “habotohon ampa pangarusion na gok” pasal Jahowa. (Pil. 1:9) Hinan sanggah baru ope hita marlajar Bibel, mintor holong do uhurta hubani Jahowa hassi pe otik ope na ibotoh hita pasal-Si. Tapi lambin bahat na ibotoh hita pasal Jahowa, tontu lambin banggal ma holongta hu Bani. Hunjon taridah ma ponting do ase ibasa hita Bibel tiap ari janah irimangi hita isini.​—Pil. 2:16.

6. Domu bani 1 Johannes 4:11, 20, 21, ise do homa na maningon ihaholongi hita?

⁶ Halani ihaholongi Jahowa do hita, gabe tarojur ma hita laho mangkaholongi sanina botou. (Basa 1 Johannes 4:11, 20, 21.) Ra do iagan hita urah do mangkaholongi sidea, halani ganup do hita manombah Jahowa anjaha marusaha do hita maniru sifat-Ni. Marusaha do homa hita maniru Jesus na dob mambere goluhni hubanta. Tapi sipata sunsah do iahapkon hita laho mandalankon parentah ase marsihaholongan. Ulas hita ma sada contoh bani kuria Pilippi hinan.

7. Aha do na boi iparlajari hita humbani podah ni si Paulus hubani si Oiodia ampa si Sintike?

⁷ Ijia dong si Oiodia ampa si Sintike na ringgas mangidangi rup pakon si Paulus. Tapi dong parsalisihan dua botou ai. Halani ai ibagas suratni ihatahon si Paulus bani si Oiodia ampa si Sintike ase “marsada ni uhur” ma sidea. (Pil. 4:2, 3) Dob ai ipodahi si Paulus ma kuria Pilippi. Nini ma, “Bani sagala pambahen nasiam, ulang ma nasiam marungut-ungut barang maruhur sangsi.” (Pil. 2:14) Tontu marguna tumang do podah ai bani dua botou ai ase mardear  use, anjaha mangurupi kuria ase lambin marsihaholongan.

8. Aha do na gati mambahen hita sunsah mangkaholongi sanina botou, anjaha aha ma na porlu bahenonta?

⁸ Songon si Oiodia ampa si Sintike, anggo hahurangan ni hasoman do na lalab idingat hita, gabe sunsah ma hita mangkaholongi sidea. Sasintongni ganup hita dong bei do hahuranganni. Tapi anggo lalab do hita manorihi hahurangan, gabe sunsah ma hita marsihaholongan. Umpamani, ra do lang marosuh hita anggo adong hasomanta na lupa paborsihkon Balei Harajaon. Anjaha anggo idingat-dingat hita ganup hasalahanni, gabe sogam ma uhurta hu bani. Anggo sonai do pangahapmu dingat ma on: Sasintongni ibotoh Jahowa do ganup hahuranganta ampa hahurangan ni hasoman. Hassi pe sonai totap do holong uhur-Ni hubanta pakon hubani sidea. Halani ai, tiru hita ma holong ni Jahowa anjaha marusaha ma mangidah na dear humbani hasomanta. Anggo sonai ibahen hita, lambin marsada ma hita.​—Pil. 2:1, 2.

9. Aha do na imaksud si Paulus na “siporlunan” bani suratni ai?

⁹ Marhitei tonduy na pansing isuruh Jahowa ma si Paulus mamodahi halak Kristen i Pilippi, ase sidea boi “mananda na ija siporlunan” (Pil. 1:10) Marlaku do homa podah ai hubanta sonari on. Aha ma contohni na siporlunan ai? Ai ma papansingkon goran ni Jahowa, ase saud ganup harosuh-Ni, ampa adong hadameion pakon hasadaon ibagas kuria. (Mat. 6:9, 10; Joh. 13:35) Anggo ai do homa na sipontingan ibagas hagoluhanta, taridah ma anggo hita mangkaholongi Jahowa.

10. Aha do artini gabe lang martikas?

¹⁰ Ihatahon si Paulus do homa ase “ulang martikas” hita. Ijon sedo maksudni maningon gokan dear hita songon Jahowa. Tapi hita boi do gabe lang martikas i lobei ni Jahowa anggo marusaha hita mambahen holongta lambin banggal janah ibotoh hita aha na sipontingan. Sada cara hita patuduhkon holong, ai ma lang mambahen halak gabe tartolsu.

11. Mase hita ulang mambahen halak gabe tartolsu?

¹¹ Maningon jaga ma hita ase ulang mambahen halak gabe tartolsu. Sonaha halak gabe tartolsu halani hita? Ra do ai halani hiburan na ipilih hita, parpakeianta, atap horjanta. Adong do halak na targanggu panggora ni uhurni mangidah ai hassi pe sasintongni ai lang salah mangihutkon prinsip ni Bibel. Tapi porini tartolsu halak halani pilihanta ai, gabe lang dear ma ai. Jesus mangkatahon barang ise na mambahen halak gabe tartolsu, dearan ma igantungkon losung batu bani borgokni anjaha inongnongkon hubagas laut.​—Mat. 18:6.

12. Aha do na boi iparlajari hita humbani siusihan sapasang parintis?

¹² Dong sapasang parintis na mandalankon podah ni Jesus ai. Bani kuria ni sidea, dong pasangan na baru ididi. Pasangan ai ipagodang ibagas kaluarga na mambahen bahat aturan. Halani ai, iahap pasangan ai anggo halak Kristen lang boi manonton film. Jadi sanggah ididah sidea parintis ai manonton film, mintor tarsonggot ma sidea. Iarusi parintis ai anggo pasangan ai porlu manlatih panggora ni uhurni mangihutkon  prinsip ni Bibel. Jadi rahanan ma iahapkon parintis ai ulang pala manonton film ronsi lang targanggu be panggora ni uhur ni pasangan ai. (Heb. 5:14) Marhitei pambahenan ni sidea, taridah ma anggo parintis ai mangkaholongi na legan lang pitah marhitei parsahap, tapi humbani pambahenan.​—Rom 14:19-21; 1 Joh. 3:18.

13. Sonaha halak boi gabe mangkorjahon na lepak halani hita?

¹³ Ra do adong halak gabe tartolsu janah mangkorjahon na lepak halani hita. Bayangkon ma sarita on. Dong sada dalahi na partenggen hinan, tapi dobkonsi marlajar Bibel mubah ma ia. Iputuskon ia ma lang ra be ia minum. Ujungni mambahen hamajuon ma ia janah ididi. Tapi adong ma sanina na legan na mangarahkon ia ase minum alkohol. Nini ma hubani, “Minum ma, lang pala mahua ai. Domma gabe Saksi Jahowa ham sonari. Tontu iurupi tonduy na pansing do ham ase boi manrajai diri.” Jadi bayangkon ma porini ra dalahi ai minum halani mangihutkon hata ni sanina ai, ujungni gabe hatagihan ma use ia.

14. Sonaha partumpuan boi mangurupi hita mandalankon podah bani Pilippi 1:10?

¹⁴ Anggo roh hita hu partumpuan, iurupi ma hita mandalankon podah bani Pilippi 1:10. Na parlobei, ijai iajari do hita ase mambotoh aha na sipontingan bani Jahowa. Na paduahon, iajari do homa hita sonaha carani ase lang be martikas. Na patoluhon, iojur do hita  ase “mandalankon holong ampa horja na madear”. (Heb. 10:24, 25) Halani bahat ojuran na idapot hita humbani sanina botou, tontu lambin banggal ma holongta hubani Jahowa ampa sidea. Holong sisonai ma na mambahen hita lang ra mambahen halak gabe tartolsu.

15. Aha do artini “gok bani buah-buah hapintoron”?

¹⁵ Itonggohon si Paulus do halak Kristen i Pilippi ase sidea “gok bani buah-buah hapintoron”. (Pil. 1:11) Marbuah ijon artini mangkaholongi Jahowa ampa juakjuak-Ni. Anjaha tarmasuk do homa ai sanggah hita mansaritahon pasal Jesus ampa pangarapanta bani halak na legan. Bani Pilippi 2:15 ihatahon do ase hita “marsinondang songon bintang i dunia on”. Sosok do on pakon hata ni Jesus bani susianni, “Hanima do panondang ni dunia on!” (Mat. 5:14-16) Iparentahkon Jesus do homa hita ase mambahen halak gabe susianni janah marbarita “das hu ujung ni tanoh on.” (Mat. 28:18-20; Lah. 1:8) Jadi anggo ringgas hita marbarita taridah ma anggo hita “gok bani buah-buah hapintoron”.

16. Domu bani Pilippi 1:12-14, sonaha hita boi totap marsinondang hassi pe bahat tantangan? (Tonggor ma gambar sampul.)

¹⁶ Lang soal sonaha situasinta, ganupan hita boi do marsinondang songon bintang i dunia on. Sipata porini pe dong tantangan, boi do ibahen hita ai gabe dalan laho marbarita. Umpamani, gabe tahanan rumah do si Paulus i Rom sanggah ia manulis surat hu kuria Pilippi. Hassi pe sonai, totap do ia ringgas marbarita bani ganup halak na roh mangidahsi  ampa bani tantara na manjaga ia. Jadi totap do ia ringgas mangidangi sonaha pe situasini. On ma na mangurupi sanina botou ijai gabe toguh janah “roh boranini mangkatahon hata ni Naibata seng mabiar-biar”.​—Basa Pilippi 1:12-14; 4:22.

17. Saritahon ma sonaha sanina botou boi totap marbarita hassi pe bahat tantangan.

¹⁷ Sonari, bahat do homa sanina botou na mangusihi si Paulus. Adong do sidea na tading bani nagori na manlarang horja parambilanonta. Tapi totap do ipingkirhon sidea sonaha carani ase boi totap marbarita. (Mat. 10:16-20) Bani sada nagori na manlarang horjanta, iojur sintua kaliling ma parbarita ijai ase marbarita bani kaluargani, hasoman, tetangga, hasoman sasikolah atap pe hasoman sahorja. Hasilni dob dua tahun ibahen sidea sonai, gabe lambin bahat ma martambah parbarita ijai. Ra do i nagorinta lang ilarang horja parambilanonta, tapi bahat do na boi iparlajari hita humbani sidea ai. Songon sidea, marusaha ma hita mamingkirhon sonaha carani ase boi marbarita bani buei halak. Anggo sonai ibahen hita, pos ma uhurta iurupi Jahowa do hita ase boi totap marbarita hassi pe dong tantangan.​—Pil. 2:13.

18. Aha do na sihol bahenonta?

¹⁸ Jadi marusaha ma hita mandalankon podah ni si Paulus ai. Maningon itanda hita ma ija na siporlunan, marusaha ma ase ulang martikas janah lang mambahen halak tartolsu. Dob ai patuduh hita ma buah-buah hapintoron. Anggo sonai ibahen hita lambin banggal ma holongta janah parrohkon hasangapon do ai bani Jahowa.