1. Aha do na maningon ibahen halak Kristen ase boi monang ibagas parlumbaan?

GANUP halak Kristen isarupahon do songon na dihut ibagas parlumbaan. Dong do hita na domma dokah dihut bani parlumbaan ai, tapi dong homa na baru ope. Podah ni si Paulus hubani halak Kristen i Pilippi boi mangurupi hita ase totap marlintun das hu ujung. Hinan sanggah si Paulus manulis surat ai, ganup halak Kristen i Pilippi domma martahun-tahun mangidangi Jahowa anjaha totap do sidea setia. Hassi pe sonai tong do ipodahi si Paulus sidea ase totap marlintun. Ia pe “dompak tujuan ai do [marlintun]”. Janah sihol do ia ase sidea mangusihisi.​—Pil. 3:14.

2. Mase podah ni si Paulus boi mangurupi kuria Pilippi?

² Bani panorang na topat do podah ai ibere si Paulus. Ijia, iparburu do halak Kristen i Pilippi, hape baru ope kuria ai ibahen. Sonaha mungkahni ai tarjadi? Dobkonsi mandapot panonggoran ase ‘mandipar hu Makedonia’, das ma si Paulus pakon si Silas i Pilippi bani tahun 50 M. (Lah. 16:9) Ijai marbarita ma sidea bani sada naboru na margoran si Lidia. Halani iparimbagaskon ia barita na madear ai, “ibuka Naibata ma uhurni”. (Lah. 16:14) Mintor ididi ma ia rap pakon ganup hasomanni sarumah. Tapi lang marosuh Sibolis mangidah ai. Isarad parhuta ai ma si Paulus pakon si Silas hu lobei ni pamarentah. Janah ituduh ma sidea domma manggeori i huta ai. Ujungni ilonsing ma sidea, ipenjarahon, janah isuruh ase manadingkon huta ai. (Lah. 16:16-40) Ai mabiar do sidea? Lang! Janah aha ma na ibahen sanina botou i kuria na baru ai? Halani mangihutkon siusihan na ibahen si Paulus ampa si Silas, sidea pe totap do martahan.

3. Pasal aha ma na ibotoh si Paulus, anjaha sungkun-sungkun aha ma na laho iulas hita?

³ Lang marnaloja si Paulus mangidangi Jahowa. (2 Kor.  4:16) Ibotoh ia do ase boi setia mangidangi Jahowa ronsi matei, maningon tongtong ma ipingkirhon ia tujuan ni parlumbaan ai. Aha ma parlajaranni hubanta? Sonaha siusihan humbani sanina botou boi mangurupi hita ase totap martahan age pe bahat tantangan? Sonaha pangarapan bani ari simagira boi mangurupi hita ase ulang marnaloja mangidangi Jahowa?

4. Sonaha si Paulus totap mangidangi Jahowa lang soal aha na masa hu bani?

⁴ Pingkirhon ma sonaha situasi ni si Paulus sanggah ia manulis surat hubani kuria Pilippi. Gabe tahanan rumah do ia i Rom. Lang boi ia kaluar laho marbarita. Hassi pe sonai, totap do ia sibuk marbarita hubani ise pe na roh mangidahsi. Manulis surat do homa ia hubani kuria na legan. Sonari pe, bahat do sanina botou na lang boi kaluar hun rumah laho marbarita. Hassi pe sonai, marusaha do sidea marbarita bani ise pe na roh hu rumahni. Anjaha itulis sidea do surat hubani halak na lang boi ijumpahi sidea.

5. Domu bani Pilippi 3:12-14, aha ma na ibahen si Paulus ase totap mangidangi Jahowa?

⁵ Lang ipaturut si Paulus aha pe mambahen ia gabe maronti mangidangi Jahowa. Ia mangkatahon marusaha do ia manlupahon aha na ‘i pudini’ laho ‘marayak na i lobeini’, na mambahen ia monang ibagas parlumbaan. (Basa Pilippi 3:12-14.) Aha do na ibahen si Paulus ase totap ringgas mangidangi Jahowa? Na parlobei, hinan ipasangap halak Jahudi do ia. Tapi dob gabe halak Kristen, pangahapni “tompoh-tompoh” do ganupan ai. (Pil. 3:3-8) Na paduahon, ra do sai isolsoli ia dirini halani ongga iparburu ia halak Kristen. Tapi lang ipaturut ia ai mambahen ia lang be mangidangi Jahowa. Janah na patoluhon, bahat do na dob ibahen ia ibagas pangidangion. Hassi pe sonai totap do ia ringgas mangidangi Jahowa. Totap do ia sibuk marbarita hassi pe ipenjarahon, ibogbogi, ipargijig bani batu, harom kapal, hurangan sipanganon ampa hiou. (2 Kor. 11:23-27) Hassi pe bahat na ibahen si Paulus ibagas pangidangion anjaha bahat do homa tantanganni, tapi totap do iparayak ia na i lobeini. Maningon sonai ma homa hita.

6. Aha do piga-piga na dong i pudinta na dob ihalupahon hita?

⁶ Songon si Paulus, sonaha hita boi ‘manlupahon na i pudinta’? Ra, dong do hita na lalab maretek ni uhur halani dousanta na hinan. Anggo sonai, sanggah marlajar ham, rimangi ma pasal tobusan ni Jesus janah tonggohon ma ai. On ma na mangurupi hita ase pos uhurta anggo dousanta domma isasap Jahowa. Dong homa parlajaran na legan humbani si Paulus. Ase boi mambere bahat panorang laho mangidangi Jahowa, dong do na manadingkon parhorjaan hassi pe banggal gajini. Tapi, ai lalab do idingat hita aha na dob itadingkon ai? (4 Mus. 11:4-6; Par. 7:10) Na leganni, ra do dong na mambere bahat ibagas pangidangion. Anjaha boi hita totap martahan hassi pe bahat sitarononta. Tontu lang salah anggo idingat hita sonaha Jahowa mangurupi atap mamasu-masu hita, halani boi do ai mambahen hita lambin dohor bani Jahowa. Tapi ulang ma halani ai gabe iahap hita domma sungkup na  ibahen hita ibagas pangidangion.​—1 Kor. 15:58.

7. Domu bani 1 Korint 9:24-27, aha do na porlu ibahen hita ase boi monang ibagas parlumbaan? Bahen ma limbaga.

⁷ Iarusi si Paulus do artini na ihatahon Jesus on, “Maruntol ma nasiam.” (Luk. 13:23, 24) Ibotoh si Paulus do ase boi monang, maningon maruntol do ia ibagas parlumbaan ai. Isarupahon si Paulus do ai songon na marlintun. (Basa 1 Korint 9:24-27.) Ase boi monang siparlintun, lang boi ia mamingkirhon na legan. Umpamani, sanggah marlintun, ra do ilewati sidea toko-toko na manjual barang-barang. Pandapotmu, ai ra do siparlintun ai soh laho mangidah barang na dong i toko ai? Tontu lang sonai anggo ia sihol monang. Sonai ma homa ibagas parlumbaan ni halak Kristen. Ase boi monang janah mandapot upah maningon tiru hita ma si Paulus. Padaoh hita ma aha pe na mambahen hita lang be ringgas mangidangi Jahowa!

8. Tolu tantangan aha ma na laho iulas hita?

⁸ Ulas hita ma tolu tantangan na mambahen hita gabe lambat sanggah marlintun: (1) ra do aha na iarapkon hita lalab lang saud, (2) ra halani matua lang be margogoh, ampa (3) sai lalab adong sitarononta. Ulas hita ma tolu contoh humbani sanina botou na boi mangurupi hita ase totap martahan.​—Pil. 3:17.

9. Gabe sonaha ma pangahapta anggo na ipaima-ima hita lape saud?

⁹ Pangarapan na lape saud. Ganup do hita paimahon saud janji ni Jahowa. Hinan, torus do nabi Habakuk paimahon Jahowa manalpuhon hajahaton i Juda. Anjaha nini Jahowa ma hubani, “Paima-ima ma ai.” (Hab. 2:3) Tapi, anggo iahap hita songon na dokah saud aha na iarapkon hita, ra do on mambahen hita gabe maretek ni uhur. (Pod. 13:12) Sonai ma na masa bani sanina botou na iminaki. Mangarap do sidea ase iangkat hu surga  bani tahun 1914. Tapi lang sonai na tarjadi. Aha ma na ibahen sidea na setia bani situasi sisonai?

10. Aha ma na ibahen dua hasomanta sanggah na iarapkon sidea lang saud?

¹⁰ Pardiateihon ma pangalaman ni dua hasomanta. Sanina Royal Spatz domma ididi bani tahun 1908 sanggah ia marumur 20 tahun. Porsaya tumang do ia anggo tongkin nari laho iangkat ma ia hu surga. Halani ai bani tahun 1911, iarahkon ia ma si Pearl, tunanganni ai marhajabuan. Nini do, “Ibotoh ham do kan aha na laho masa bani tahun 1914. Jadi, papodas hita ma marhajabuan.” Hape lang iangkat sidea hu surga bani tahun 1914. Ai gabe mandolei do sidea halani ai? Lang, halani mangidangi Jahowa do na sipontingan bani sidea, sedo na laho hu surga. Jadi totap ma sidea marlintun ibagas parlumbaan ai. Ronsi matei pe, totap do si Royal pakon si Pearl ringgas mangidangi Jahowa. Tontu, ipaima-ima nasiam do homa ipapansing Jahowa goran-Ni, anjaha roh Harajaon-Ni laho pasaudkon ganup janji-Ni. Pos ma uhur ni nasiam pasaudon ni Jahowa do ganupan ai bani panorang na dob itontuhon Ia. Paima ai, totap ma hita ringgas mangidangi Jahowa. Ulang ma maretek ni uhur halani lape saud na iarapkon hita.

11-12. Hassi pe lang songon na hinan gogohta, mase maningon setia hita mangidangi Jahowa? Bere ma contoh.

¹¹ Lang be margogoh songon na hinan. Sanggah marlumba, maningon sehat janah gogoh do siparlintun. Tapi legan do parlumbaan ni halak Kristen. Ase boi mangidangi Jahowa janah toguh haporsayaonni, lang maningon gogoh angkulani. Bahat do hasomanta na lang be margogoh tapi totap do marusaha mambere na sidearan bani Jahowa. (2 Kor. 4:16) Umpamani, Sanina Arthur Secord na dob marumur 88 tahun. Domma 55 tahun ia mangidangi i Betel. Dob matua, lang sai sehat be ia janah galek. Bani sada ari, perawat na mangurus haporluanni mangkatahon bani, “Botou Secord, domma bahat tene na ihorjahon ham bani Jahowa.” Ididah ia ma perawat ai, janah tarsirom mambalosi, “Eak. Tapi lang ai na ponting. Na sipontingan sonari, maningon setia ma hita mangidangi Jahowa.”

¹² Ra do nasiam domma marpuluh tahun mangidangi Jahowa. Tapi halani domma hurang gogoh ni nasiam, ra do lang be bahat na boi ihorjahon songon na hinan. Ulang ma maretek ni uhur  nasiam halani ai. Pos ma uhurmu idingat anjaha ihargai Jahowa do ganup na ihorjahon nasiam hinan. (Heb. 6:10) Dingat ma, holongta bani Jahowa lang itontuhon humbani aha na ihorjahon hita. Tapi taridah do holongta hu Bani anggo marusaha hita mangidangi-Si domu bani na tarbahen hita. (Kol. 3:23) Iarusi Jahowa do hahuranganta. Janah lang ongga ipindo Ia lobih humbani na tarbahen hita.​—Mrk. 12:43, 44.

13. (a) Aha do na masa bani si Anatoly pakon si Lidiya? (b) Sonaha pangalaman ni sidea boi mangojur hita hassi pe bahat sitaronon?

¹³ Lalab marsitaronon. Dong piga-piga hasomanta na totap setia hassi pe sidea iparburu sadokah martahun-tahun. Contohni, sanggah marumur 12 tahun si Anatoly Melnik *, itangkap ma bapani, ipenjarahon, anjaha ibuang hu Siberia. Daohni hira-hira 7.000 km hun Moldova, huta ni sidea. Dob satahun, ibuang ma homa si Anatoly, inangni, pakon opungni hu Siberia. Dob ai, martumpu ma sidea hu huta na legan. Tapi maningon mardalan do sidea hira-hira 30 km daohni. Borgoh tumang do cuacani halani domma musim salju. Sobali ai, ongga do homa Sanina Melnik ipenjarahon sadokah tolu tahun. Daoh ma ia humbani si Lidiya, istrini pakon boruni na marumur satahun ondi ai. Hassi pe bahat tantangan, totap do si Anatoly pakon kaluargani setia mangidangi Jahowa. Sonari ia domma marumur 82 tahun, janah mangidangi gabe Panitia Cabang i Asia Tengah. Songon si Anatoly pakon si Lidiya, marusaha ma hita setia mangidangi Jahowa hassi pe bahat tantanganta.​—Gal. 6:9.

14. Ase boi monang, aha ma na maningon ibahen si Paulus?

¹⁴ Pos do uhur ni si Paulus anggo ia boi monang ibagas parlumbaan ai janah mandapot upah. Halani ia halak na iminaki, ipaima ia do “upah hamonangan ni pandiloon na hun babou, na humbani Naibata”. Tapi maningon torus ma ipingkiri ia upahni ai ase boi monang. (Pil. 3:14) Ase iarusi halak Pilippi pasal ai, ipatugah si Paulus ma sada limbaga.

15. Sonaha si Paulus manggunahon limbaga pasal warga negara sanggah mangojur kuria Pilippi mamingkirhon pangarapan ni sidea?

 ¹⁵ Iojur si Paulus do ase halak Kristen i Pilippi mardingat anggo sidea warga nagori atas. (Pil. 3:20) Mase maningon idingat sidea ai? Ijia bahat do halak na sihol gabe warga negara Rom halani bahat gunani. * Tapi anggo ibandingkon pakon warga nagori atas, tontu bahatan do gunani na idapot halak Kristen na iminaki marimbangkon gabe warga negara Rom. Halani ai, iojur si Paulus ma sidea ase totap ‘marparlahou domu hubani ambilan na madear ni Kristus’. (Pil. 1:27) Sonari pe halak Kristen na iminaki mambere siusihan na madear halani totap mamingkirhon pangarapan ni sidea hu surga.

16 Domu bani Pilippi 4:6, 7, aha ma na maningon ibahen hita lang soal huja pangarapanta?

¹⁶ Lang soal hita marpangarapan hu surga atap i paradeiso, marusaha ma hita totap setia. Ulang sai idingat hita aha na dob itadingkon hinan. Padaoh ma aha pe na mambahen hita lang be ringgas mangidangi Jahowa. (Pil. 3:16) Ra, domma dokah hita paimahon ase saud janji ni Jahowa, atap domma hurang gogohta halani domma matua. Dong homa na iparburu sadokah martahun-tahun. Lang soal sonaha situasimu, “ulang ma haru uhur nasiam pasal atap aha pe”. Tapi “pabotohkon nasiam ma pangindoan nasiam bani Naibata”. Bereon-Ni do holi bani nasiam hadameion lobih humbani na boi ibayangkon nasiam.​—Basa Pilippi 4:6, 7.

17. Aha na laho iulas hita bani artikel na mangihut?

¹⁷ Songon siparlintun, anggo domma dohor hu garis finis, tontu lambin marusaha ma ia ase boi monang. Sonai homa hita. Halani lambin dohor ujung ni dunia on, tontu marusaha do hita humbani tuk ni gogohta laho mardingat pangarapan na dong i lobeita. Tapi, aha do na boi ibahen hita ase totap martahan? Bani artikel na mangihut, ulas hita ma sonaha hita boi “mananda na ija siporlunan”.​—Pil. 1:9, 10.